لي چياڭ گرەنادانىڭ زۇڭليى ميچەلمەن كەڭەس وتكىزدى

1 - ايدىڭ 13 - كۇنى مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن گرەنادانىڭ زۇڭليى ميچەلمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

شينحۋا اگەنتتىگى، 1 - ايدىڭ 13 – كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 1 - ايدىڭ 13 - كۇنى بەيجيڭدەگى حالىق سارايىندا جۇڭگوعا رەسمي ساپارمەن كەلگەن گرەنادانىڭ زۇڭليى ميچەلمەن كەڭەس وتكىزدى.

لي چياڭ مىنالاردى ءبىلدىردى: جۇڭگو مەن گرەنادا ديپلوماتيالىق قارىم - قاتىناستى قالپىنا كەلتىرگەن 20 جىلدان بەرى باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، جوعارى جىكتەگىلەردىڭ ءجيى بارىس - كەلىسىن ساقتاپ، ناقتى سەلبەستىكتى ۇزدىكسىز كەڭەيتىپ، ەكى ەل حالقىنا ناقتى باقىت جاراتتى. بۇگىن تۇستەن بۇرىن ءتوراعا شي جينپيڭ زۇڭلي مىرزامەن كەڭەس وتكىزىپ، كەلەسى ساتىداعى جۇڭگو - گرەنادا قارىم - قاتىناسىنىڭ ىشكەرىلەي دامۋىنا جاڭا جوبا جاسادىڭىزدار. جۇڭگو جاق گرەنادا جاقپەن بىرگە ەكى ەل قارىم - قاتىناسىنىڭ تاماشا جاعدايىن ويداعىداي قورعاپ، ساياسي سەنىمدىلىكتى بەكەمدەپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىر - ءبىرىن تاباندىلىقپەن قولداپ، ءار سالاداعى ءوزارا ءتيىمدى سەلبەستىكتى ۇزدىكسىز كەڭەيتىپ، ەكى جاقتى قارىم - قاتىناستىڭ تىڭ ساتىعا كوتەرىلۋىن ىلگەرىلەتۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق گرەنادا جاقپەن دامۋ ستراتەگياسىن ۇشتاستىرۋدى كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى جەتەكشى ەتىپ، اۋىل شارۋاشىلىعى، نەگىزدىك قۇرىلعى قۇرىلىسى، ەمدەۋ - دەنساۋلىق ساقتاۋ سياقتى ءداستۇرلى سالالارداعى سەلبەستىكتى تەرەڭدەتىپ، جاڭا ەنەرگيا، سيفرلى ەكونوميكا، كوك ءتۇستى ەكونوميكا سياقتى جاڭادان گۇلدەنگەن سالالاردا اناعۇرلىم كوپ سەلبەستىك كورىنەۋ تۇيىندەرىن قالىپتاستىرۋ جونىندە بەلسەنە ىزدەنىس جاساپ، ەكى ەلدىڭ ءوزارا پايدا جەتكىزۋ سەلبەستىگىنىڭ ساپاسىن كوتەرۋدى، دارەجەسىن جوعارىلاتۋدى ىلگەرىلەتۋدى قالايدى. جۇڭگو جاق شارت - جاعدايى بار جۇڭگو كاسىپورىندارىن گرەناداعا بارىپ قارجى قوسىپ، شارۋاشىلىقتى شالقىتۋعا شابىتتاندىرادى. ەكى جاق ساياحات، مادەنيەت، وقۋ - اعارتۋ، اقپارات قۇرالدارى سياقتى سالالارداعى اۋىس - كۇيىستى، سەلبەستىكتى ۇزدىكسىز كۇشەيتۋى كەرەك. جۇڭگو جاق گرەنادا سياقتى كارايب ەلدەرىنىڭ كليمات وزگەرىسىنە توتەپ بەرۋ قابىلەتىن جوعارىلاتۋىنا كومەكتەسىپ، «بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى جۇلگەلىك شارتى» مەن ونىڭ «پاريج كەلىسىمىنىڭ» جاپپاي، ءونىمدى اتقارىلۋىن ىلگەرىلەتۋدى قالايدى. جۇڭگو جاق گرەنادا جاقپەن قول ۇستاسا وتىرىپ جۇڭگو - لاتىن امەريكاسى تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتىپ، دۇنيە جۇزىلىك وڭتۇستىكتىڭ مۇددەسىن بىرگە قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

ميچەل مىنالاردى ءبىلدىردى: گرەنادا مەن جۇڭگونىڭ ديپلوماتيالىق قارىم - قاتىناستى قالپىنا كەلتىرگەندىگىنىڭ 20 جىلدىعى قارساڭىندا جۇڭگوعا ساپارلاي كەلگەنىمە وتە قۋانىشتامىن. جۇڭگو ۇكىمەتى حالىقتى وزەك ەتكەن دامۋ ۇستانىمىنا باستان - اياق تاباندى بولىپ، كەدەيلىكتەن جاپپاي ارىلتۋ ۇلى ءىسىن جۇزەگە اسىرىپ، دۇنيە ءجۇزىنىڭ دامۋىنا دۇنيەنى جالت قاراتقان ۇلەس قوسىپ، دۇنيە جۇزىنە، اسىرەسە، قالىڭ وركەندەپ كەلە جاتقان ەلدەرگە ۇلگى ورناتتى. گرەنادا جاق جۇڭگو جاقتىڭ ۇزاق ۋاقىتتان بەرى گرەنادا ەكونوميكاسىنىڭ، قوعامىنىڭ دامۋىنا كورسەتكەن قولداۋى مەن كومەگىنە العىس ايتادى، جۇڭگونىڭ ءوزارا قۇرمەت ەتۋ، تەڭ مامىلە جاساۋ پرينسيبى بويىنشا مەملەكەت پەن مەملەكەت قارىم - قاتىناسىن دامىتىپ، دۇنيە ءجۇزىنىڭ وڭتۇستىگىن دامىتۋعا جەتەكشىلىك ەتكەندىگىن القايدى. ءبىر جۇڭگو پرينسيبى دۇنيە ءجۇزى اعىمىنا ۇيلەسەدى، گرەنادا جاق بۇعان ۇزدىكسىز باتىل بويسۇنادى. گرەنادا جاق ءتوراعا شي جينپيڭ العا قويعان 3 ۇلكەن دۇنيە جۇزىلىك باستامانى باتىل قولدايدى، جۇڭگونىڭ ەل باسقارۋ تاجىريبەلەرىنەن ۇلگى الىپ، جۇڭگومەن ەكونوميكا - ساۋدا، گۋمانيتارلىق، كليمات وزگەرىسى سياقتى سالالارداعى ءوزارا ءتيىمدى سەلبەستىكتى كەڭەيتىپ، كوپ جاقتى سايكەسۋدى، سەلبەستىكتى كۇشەيتىپ، ەكى ەل قارىم - قاتىناسىنىڭ ۇزدىكسىز ىشكەرىلەي دامۋىن ىلگەرىلەتۋدى قالايدى.

كەڭەستەن كەيىن ەكى ەل زۇڭليلەرى ”ءبىر بەلدەۋ، ءبىر جولدى“ بىرگە قۇرۋ، ەكونوميكا، ساۋدا، جاسىل دامۋ، مادەنيەت، اقپارات، كليمات وزگەرىسى سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن بۇرىن لي چياڭ حالىق سارايىنىڭ سولتۇستىك زالىندا ميچەلدى قارسى الۋ سالتىن وتكىزدى.

ۋ جىڭلۇڭ جوعارىداعى قيمىلدارعا قاتىناستى.

كەلۋ قاينارى: حالىق تورابى