جاڭا نۇسقاداعى «ەلەكترلى ۆەلوسيپەد حاۋىپسىزدىگىنىڭ تەحنيكالىق ولشەمى» جاريالاندى

حالىق گازەتىنىڭ ءتىلشىسى ۋاڭ چۇن 1 – ايدىڭ 13 – كۇنى بەيجيڭنەن حابارلايدى. ءتىلشىنىڭ بۇگىن ونەركاسىپ جانە ينفورماتسيالاندىرۋ مينيسترلىگىنەن ۇعىسۋىنشا، ونەركاسىپ جانە ينفورماتسيالاندىرۋ مينيسترلىگى، بازاردى باقىلاۋ – باسقارۋ باس مەڭگەرمەسى قاتارلى 5 تاراۋ ۇيىمداستىرىپ وزگەرىس ەنگىزگەن ءماجبۇرلى سيپاتتى مەملەكەتتىك ولشەم — «ەلەكترلى ۆەلوسيپەد حاۋىپسىزدىگىنىڭ تەحنيكالىق ولشەمى» 2024 – جىلى 12 – ايدىڭ 31 – كۇنى رەسمي جاريالاندى، 2025 – جىلى 9 – ايدىڭ 1 – كۇنىنەن باستاپ اتقارىلادى.

جاڭا ولشەمدە نازاردى ءورت اپاتىنىڭ كومەسكى قاتەرى مەن زيانىن تومەندەتۋگە، قاتىناس شىرعالاڭىنىڭ حاۋىپ ـ قاتەرىن ازايتۋعا شوعىرلاندىرىپ، بەيمەتال ماتەريالداردىڭ ورتتەن ساقتانۋ، وت الدىرماۋ قۋاتىنا قويىلاتىن تالاپتى كۇشەيتىپ، ەلەكترلى ۆەلوسيپەدكە پايدالانىلاتىن سۋلياۋدىڭ جالپى سالماعىن تۇتاس ەلەكترلى ۆەلوسيپەتتىڭ سالماعىنىڭ %5.5 ىنەن اسىرماۋ كەرەكتىگىن ايقىن تۇراقتاندىرعان. سونىمەن بىرگە، ەلەكتروموتوردىڭ باياۋ قارقىنمەن بۇرىلۋ، جۇكسىز كەزدەگى كەرى ەلەكتر قوزعاۋشى كۇشى، ەلەكتردىڭ يندۋكسياسىنىڭ مانىندەگى پارىق كوەففيتسەنتى قاتارلىلارعا قويىلاتىن تالاپتى ارتتىرىپ، ەلەكترلى ۆەلوسيپەتتىڭ ەڭ ۇلكەن تورموزداۋ ارالىعىن ازايتۋدى بەلگىلەگەن.

زاڭسىز وزگەرتىپ قۇراستىرۋدان ساقتانۋ جاعىندا، جاڭا ولشەمدە باتەريا گرۋپپاسىن، مەڭگەرگىشتى، جىلدامدىق تەجەگىشتى وزگەرتۋدەن ساقتانۋعا قويىلاتىن تالاپتى كەمەلدەندىردى. مۇنان سىرت، بەيدوۋ جۇيەسى ارقىلى ورنىن تۇراقتاندىرۋ، حابارلاسۋ جانە ديناميكالىق حاۋىپسىزدىكتى باقىلاۋ يقۋاتتارىن ارتتىرىپ، تۇتىنۋشىلاردىڭ ەلەكترلى ۆەلوسيپەدتىڭ حاۋىپسىزدىگىنە ساياتىن ماڭىزدى ينفورماتسيالاردى دەر كەزىندە تۇسىنۋىنە قولايلىلىق جاراتۋ ورتاعا قويىلعان.

تۇتىنۋشىلاردىڭ كۇندەلىكتى ءجۇرىس - تۇرىس قاجەتىن اناعۇرلىم ويداعىداي قاناعاتتاندىرۋ ءۇشىن، جاڭا ولشەمدە حاۋىپسىزدىككە ىقپالى زور بولماعان ءىشىنارا تالاپتار لايىقتى تومەندەتىلگەن. مىسالى، قورعاسىن قىشقىلدى اككۋمۋلياتوردى ىستەتكەن ەلەكترلى ۆەلوسيپەدتىڭ جالپى سالماعىنىڭ جوعارى شەگى 55 كيلوگرامنان 63 كيلوگرامعا جوعارىلاتىلىپ، بارلىق ەلەكترلى ۆەلوسيپەتتەرگە تەپكى ورناتۋ قاتارلى تالاپتار ەندىگارى تالاپ ەتىلمەيتىن بولعان.

ونەركاسىپ جانە ينفورماتسيالاندىرۋ مينيسترلىگىنىڭ قاتىستى جاۋاپتىسى بىلاي دەپ تانىستىردى: ەلەكترلى ۆەلوسيپەد سالاسىنداعى كاسىپورىنداردىڭ ونىمدەردى جوبالاۋ، ءوندىرۋ ءارى تەكسەرۋ جانە كۋالاندىرۋ قىزمەتىن ورىنداۋىنا بەلگىلى ۋاقىت قاجەت بولاتىنىن ويلاستىرا وتىرىپ، جاڭا ولشەمدە 8 ايلىق وندىرىستىك وتپەلى مەزگىل بەلگىلەنگەن. سونىمەن بىرگە، جاڭا ولشەم 2025 – جىلى 8 – ايدىڭ 31 – كۇنى اتقارىلادى، ودان بۇرىن كونە ولشەم بويىنشا وندىرىلگەن ەلەكترلى ۆەلوسيپەتتەردى ساتۋعا 3 اي وتپەلى مەزگىل بەلگىلەنىپ، كونە ولشەمگە ۇيلەسەتىن ەلەكترلى ۆەلوسيپەدتەردى ءبىرجاقتى ەتۋگە قولايلىلىق تۋدىرادى.

ءتىلشىنىڭ ۇعىسۋىنا قاراعاندا، كەلەسى قادامدا ونەركاسىپ جانە ينفورماتسيالاندىرۋ مينيسترلىگى قاتىستى تاراۋلارمەن بىرگە ەلەكترلى ۆەلوسيپەد كاسىپ سالاسىن باسقارۋدى كۇشەيتىپ، جاڭا ولشەمدى ۇگىتتەۋ تەبىنىن ارتتىرىپ، ءونىمنىڭ ماڭىزدى حاۋىپسىزدىك دەڭگەيىن اناعۇرلىم جوعارىلاتادى ەكەن.

كەلۋ قاينارى: حالىق تورابى