شي جينپيڭ شريلانكانىڭ زۇڭتۇڭى ديساناياكپەن كەڭەس وتكىزدى

1 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن شريلانكانىڭ زۇڭتۇڭى ديساناياكپەن كەڭەس وتكىزدى. سۋرەتتە: شي جينپيڭ ديساناياكپەن قول الىسۋدا.

سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

1 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن شريلانكانىڭ زۇڭتۇڭى ديساناياكپەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا ديساناياكتى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

شينحۋا اگەنتتىگى، 1 - ايدىڭ 15 - كۇنى، بەيجيڭ (ءتىلشى فىڭ شينران). 1 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن شريلانكانىڭ زۇڭتۇڭى ديساناياكپەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن شريلانكا ءداستۇرلى دوستار. ديپلوماتيالىق قارىم - قاتىناس ورناتقان 68 جىلدان بەرى ەكى ەل قارىم - قاتىناسى باستان - اياق اقاۋسىز، ورنىقتى دامىپ، تۇرلىشە ەلدەردىڭ تاتۋ – ءتاتتى ءوتىپ، ءوزارا ءتيىمدى سەلبەستىك جاساۋىنىڭ ۇلگىسىن ورناتتى. ەكى جاقتىڭ بىرگە قۇلشىنۋىندا، جۇڭگو مەن شريلانكانىڭ شىنايى ءوزارا كومەكتەسەتىن، ۇرپاقتان - ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسى ۇزدىكسىز ىشكەرىلەي دامىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدا جانە ءار سالاداعى اۋىس - كۇيىس، سەلبەستىكتە سۇبەلى ناتيجەلەرگە قول جەتكىزىپ، ەكى ەل حالىقتارىنا ناقتى قۇت - ىرىس اكەلدى. قازىر جۇڭگو - شريلانكا قارىم - قاتىناسى بۇرىنعىعا مۇراگەر بولىپ، كەيىنگىگە جول اشۋدىڭ تاريحي ورايىنا ءدوپ كەلىپ وتىر، ەكى جاق جۇڭگو - شريلانكا قارىم - قاتىناسىن ستراتەگيالىق تۇرعىدان يگەرىپ، جۇڭگو مەن شريلانكانىڭ تاعدىرلاس ورتاق تۇلعاسىن بىرگە قۇرۋى كەرەك.

شي جينپيڭ بىلاي دەپ باسا دارىپتەدى: جۇڭگو شريلانكانى باستان - اياق توڭىرەكتىك ديپلوماتيانىڭ ماڭىزدى بەتالىسىنا قويىپ، شريلانكانىڭ مەملەكەتتىڭ تاۋەلسىزدىگىن، يەلىك ۇقىعىن جانە تەرريتوريا تۇتاستىعىن قورعاۋىن بۇرىنعىداي قولدايدى، شريلانكا جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس قاراستىرۋىن قولدايدى، شريلانكا جاقپەن ساياسي سەنىمدىلىكتى تەرەڭدەتىپ، ەل باسقارۋ تاجىريبەلەرىن اۋىستىرىپ، ەكى ەلدىڭ ءارقايسى تاراۋلارىنىڭ پىكىرلەسۋىن، تىلدەسۋىن كۇشەيتۋدى قالايدى. جۇڭگونىڭ رەفورمانى ونان ارى جاپپاي تەرەڭدەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋى شريلانكانىڭ دامۋىنا تىڭ وراي اكەلەدى. جۇڭگو جاق شريلانكا جاقتىڭ نازاردى ەكونوميكالىق قۇرىلىسقا شوعىرلاندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ، وسى زامانعى اۋىل شارۋاشىلىعى، سيفرلى ەكونوميكا، تەڭىز - مۇحيت ەكونوميكاسى سياقتى سالالارداعى سەلبەستىكتى ىلگەرىلەتىپ، جاڭا كورىنەۋ تۇيىندەردى قالىپتاستىرۋىن بەلسەنە قولدايدى. ەكى جاقتىڭ گۋمانيتارلىق اۋىس - كۇيىسىن كۇشەيتىپ، ەكى ەل حالقىنىڭ ”جۇرەكتەرىن توعىستىرۋدى“ نىعايتۋ كەرەك. جۇڭگو جاق شريلانكا جاقپەن بىرلەسكەن مەملەكەتتەر ۇيىمى سياقتى كوپ جاقتى قۇرىلىمدار ىشىندەگى سايكەسۋدى، سەلبەسۋدى كۇشەيتىپ، كليمات وزگەرىسى سياقتى ادامزاتتىڭ دامۋىنا ساياتىن كەلەلى ماسەلەلەرگە بىرگە توتەپ بەرىپ، بۇكىل دۇنيە ءجۇزى وڭتۇستىگىنىڭ بىرلەسىپ ءوزىن الۋەتتەندىرۋىنە تاباندى بولىپ، ءوڭىردىڭ بەيبىتشىلىگى، ورنىقتىلىعى جانە دامۋى، گۇلدەنۋى ءۇشىن كۇش قوسۋدى قالايدى.

ديساناياك مىنالاردى ءبىلدىردى: جاڭا جىل باستالىسىمەن جۇڭگوعا ساپارلاي كەلگەنىمە وتە قۋانىشتامىن. شريلانكا جاق جۇڭگونىڭ ەكونوميكا، عىلىم - تەحنيكا، نەگىزدىك قۇرىلعى سياقتى سالالاردا قول جەتكىزگەن كەلەلى دامۋ جەتىستىكتەرىنە سۇيىنەدى. جۇڭگو ەجەلدەن شريلانكانىڭ سەنىمدى دوسى جانە سەرىگى. شريلانكا جاق جۇڭگومەن قارىم - قاتىناسىنا ايرىقشا ءمان بەرەدى، ءبىر جۇڭگو پرينسيبىنە باتىل بويسۇنادى، جۇڭگونىڭ شريلانكانىڭ تاۋەلسىزدىگىن، يەلىك ۇقىعىن جانە ورىندى ۇقىق - مۇددەسىن قورعاۋدا قاستەرلى قولداۋ كورسەتكەنىنە العىس ايتادى. شريلانكا جاق ”ءبىر بەلدەۋ، ءبىر جولدى“ بىرگە قۇرۋعا كۇش سالىپ، وڭىرلەردىڭ ۇلاستىرۋ - تۇتاستىرۋ دەڭگەيىن جوعارىلاتۋعا دەم بەرەدى، اناعۇرلىم كوپ جۇڭگو كاسىپورىندارىنىڭ شريلانكاعا بارىپ قارجى قوسىپ، شارۋاشىلىقتى گۇلدەندىرۋىن قارسى الادى، جۇڭگو جاقپەن نەگىزدىك قۇرىلعى، ەنەرگيا، اۋىل شارۋاشىلىعى، فينانس، كەدەيلىكتى ازايتۋ، سيفرلىق تۇرلەندىرۋ، ساياحات، تەڭىز - مۇحيت، قىزمەتكەرلەردى باۋلۋ سياقتى سالالارداعى سەلبەستىكتى كۇشەيتۋدى قالايدى. جۇڭگو − بۇكىل دۇنيە ءجۇزى وڭتۇستىگىنىڭ ماڭىزدى جەتەكشى ەلى، حالىقارالىق ىستەردە سىندارلى رول اتقارۋدا. شريلانكا جاق جۇڭگو جاقپەن كوپ جاقتى ورىنداردا ۇزدىكسىز سايكەسۋدى كۇشەيتىپ، ءوزارا قولداۋ كورسەتىپ، ورتاق مۇددەنى ويداعىداي قورعاۋدى قالايدى.

كەڭەستەن كەيىن ەكى ەل مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋدىڭ سەلبەستىك جوباسىنا جانە اۋىل شارۋاشىلىق ونىمدەرىن جۇڭگوعا جەتكىزۋ، قوعام، حالىق تۇرمىسى، اقپارات - راديو - تەلەۆيزيا سياقتى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا ديساناياكتى قارسى الۋ سالتىن وتكىزدى.

تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن شريلانكانىڭ مەملەكەت اندەرىن ورىندادى. ديساناياك شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ حالىق سارايىنىڭ التىن ءتۇستى زالىندا ديساناياكتى قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى