شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋ لينمەن تەلەفوندا سويلەستى

شينحۋا اگەنتتىگى، 1 - ايدىڭ 15 – كۇنى، بەيجيڭ. 1 - ايدىڭ 15 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋلينمەن تەلەفوندا سويلەستى.

شي جينپيڭ مىنالاردى ءبىلدىردى: جىل ءولاراسى، جۇڭگو مەن ۆيەتنامنىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى قارساڭىندا باس شۋجي سۋلين جولداسپەن تەلەفوندا سويلەسكەنىمە توتەنشە قۋانىشتامىن. بىلتىر 8 - ايدا ءسىز جۇڭگودا مەملەكەتتىك ساپاردا بولدىڭىز، ءبىز ەكى پارتيانىڭ، ەكى ەلدىڭ قارىم - قاتىناسىن تەرەڭدەتۋ، سوتسياليزم ىستەرىنىڭ دامۋىن بىرگە جەبەۋ سياقتى جاقتاردا ىشكەرىلەي پىكىر اۋىستىرىپ، كەڭ كولەمدى ورتاق تانىمعا كەلدىك. جارىم جىلدان بەرى جۇڭگو مەن ۆيەتنام پارتيالارى، ەلدەرى، ءارقايسى تاراۋلار، ءارقايسى جەرلەر تياناقتاندىرۋدى بەلسەنە يگەرىپ، ءبىز اقىلداسىپ بەلگىلەگەن سەلبەستىك ىستەرىندە بەلسەندى ىلگەرىلەۋشىلىككە قول جەتكىزدى.

شي جينپيڭ بىلاي دەپ باسا دارىپتەدى: بيىل − جۇڭگونىڭ ”14 - بەسجىلدىق“ جوباسى اياقتالاتىن جىل، ۆيەتنام كوممۋنيستىك پارتياسى 14 - قۇرىلتايعا دايىندىق جاسايتىن شەشۋشى جىل، جۇڭگو - ۆيەتنام ەكى ەل جونىنەن دە بۇرىنعىعا مۇراگەر بولىپ، كەيىنگىگە جول اشۋ سىندى ماڭىزدى مانگە يە. ەكى جاق پارتيانى ۇزدىكسىز گۇلدەندىرىپ، پارتيانى نىعايتىپ، سوتسياليزم نازارياسى مەن امالياتتىق تاجىريبەلەردى اۋىستىرۋدى تەرەڭدەتىپ، سوتسياليزم ىستەرىنىڭ دۇنيە جۇزىندەگى 100 جىلدىق وزگەرىس بارىسىندا دامۋىن، زورايۋىن ىلگەرىلەتۋى كەرەك. جوعارى جىكتەگىلەردىڭ بارىس - كەلىسىنىڭ ساياسي جەتەكشىلىك رولىن تولىق ساۋلەلەندىرىپ، ءجيى بارىس - كەلىستى ۇزدىكسىز ساقتاۋ كەرەك. ءوزارا ءتيىمدى سەلبەستىكتە اناعۇرلىم كوپ تابىسقا قول جەتكىزۋدى ىلگەرىلەتىپ، ۇلاستىرۋ - تۇتاستىرۋدى جەدەل ىلگەرىلەتىپ، جاڭاشا وندىرگىش كۇش سەلبەستىگىنىڭ الدىڭعى شەپ تۇعىرىن قول ۇستاسا قۇرىپ، ورنىقتى، ىركىلىسسىز شەكارا اتتاعان كاسىپ تىزبەگى مەن قامداۋ تىزبەگىن قۇرۋ كەرەك. حالىق تىلەگىمەن توعىسقان، مەيىرگە تولى، حالىققا جاناسىمدى گۋمانيتارلىق اۋىس - كۇيىستى ورىستەتىپ، اقپارات، مادەنيەت، ساياحات، جەرگىلىكتى ورىندار، جاستار سياقتى ءار سالاداعى بارىس - كەلىستى، سەلبەستىكتى كۇشەيتىپ، اناعۇرلىم كوپ حالىق تىلەگى ينجەنەرياسىن قالىپتاستىرۋ كەرەك. حالىقارالىق جانە وڭىرلىك سەلبەستىكتى كۇشەيتىپ، حالىقارالىق ادىلدىكتى، تۋراشىلدىقتى قورعاپ، ادامزاتتىڭ تاعدىرلاس ورتاق تۇلعاسىن بىرگە قۇرۋ كەرەك.

شي جينپيڭ بىلاي دەپ اتاپ كورسەتتى: ۆيەتنام كوممۋنيستىك پارتياسىنىڭ 13 - قۇرىلتايىنان بەرى ۆيەتنام كوممۋنيستىك پارتياسى بۇكىل ۆيەتنامداعى حالىقتى ىنتىماقتاستىرىپ جانە باستاپ، كوپ جاقتاعى قيىنشىلىقتار مەن سىن - سايىستى جەڭىپ، سوتسياليستىك قۇرىلىس پەن جاڭارتۋ ىستەرىندە تىڭ جەتىستىكتەرگە قول جەتكىزدى. سۋلين جولداس باس بولعان ۆيەتنام كوممۋنيستىك پارتياسى ورتالىق كوميتەتىنىڭ باسشىلىعىندا، ۆيەتنام پارتياسىنىڭ، مەملەكەتىنىڭ، حالقىنىڭ 14 - قۇرىلتايدى قارسى الۋدى، پارتيا 14 - قۇرىلتايىن ويداعىداي اشۋدى ارقاۋ ەتىپ، ۆيەتنامنىڭ ”ەكى 100 جىلدىق“ كۇرەس نىساناسىنا قاراي تاباندىلىقپەن ىلگەرىلەيتىندىگىنە سەنەمىن.

سۋ لين الدىمەن جۇڭگونىڭ شيزاڭىنداعى جەر سىلكىنىسىنەن كوپتەگەن ادامنىڭ قازا بولىپ، جارالانىپ، اۋىر مال - مۇلىك زيانى تۋىلۋىنا بايلانىستى شىنايى حال سۇراپ، مىنالاردى ءبىلدىردى: شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ باسشىلىعىندا، جۇڭگونىڭ جەر سىلكىنىسىنەن تۋىلعان زياننىڭ ورنىن، ءسوز جوق، تەز ارادا تولتىراتىندىعىنا سەنەمىن. ۆيەتنام جۇڭگو كوممۋنيستىك پارتياسىنىڭ حالىققا باسشىلىق ەتىپ قول جەتكىزگەن وراسان زور دامۋ جەتىستىكتەرىنە شىن جۇرەكتەن سۇيىنەدى، جۇڭگونىڭ ەكونوميكالىق كولەم جانە جاڭاشا وندىرگىش كۇشتەردى دامىتۋ سياقتى ارتىقشىلىقتارىن، ءسوز جوق، ساۋلەلەندىرىپ، اناعۇرلىم زور دامۋ جەتىستىكتەرىنە ۇزدىكسىز قول جەتكىزەتىندىگىنە سەنەدى. ۆيەتنام جاق باس شۋجي شي جينپيڭ العا قويعان 3 ءىرى دۇنيە جۇزىلىك باستامانى بەلسەنە قولدايدى ءارى وسى جۇلگەدە جۇڭگومەن سەلبەستىكتى كۇشەيتۋدى قالايدى. وتكەن ءبىر جىلدا ۆيەتنامنىڭ بۇكىل پارتياسى، بۇكىل ەل جۇدىرىقتاي جۇمىلىپ، كوپتەگەن قيىنشىلىقتار مەن سىن - سايىستى جەڭىپ، ەكونوميكالىق، قوعامدىق دامۋدا تىڭ دا ماڭىزدى تابىستارعا قول جەتكىزدى. ۆيەتنام ۆيەتنام كوممۋنيستىك پارتياسىنىڭ 14 - قۇرىلتايىنا دايىندالۋدى نىسانا ەتىپ، حالىقتى اۋقاتتاندىرىپ، مەملەكەتتى قۇدىرەتتەندىرۋدى، دەموكراتيالى، ءادىل، وركەنيەتتى بولۋدى ەرەكشەلىك ەتكەن جاڭا دامۋ داۋىرىنە قادام تاستايدى، وسى بارىستا جۇڭگونىڭ دامۋ تاجىريبەلەرىنەن، اسىرەسە، شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جاڭا نازارياسى مەن امالياتتىق جاڭالىق اشۋىنان تولىق ۇلگى الادى. ۆيەتنام ۆيەتنام - جۇڭگو قارىم - قاتىناسىن دامىتۋدى ۇزدىكسىز سىرتقى ساياساتتا ماڭداي الدى ورىنعا قويىپ، جۇڭگومەن ەكى پارتيانىڭ، ەكى ەلدىڭ ستراتەگيالىق قارىم - قاتىناسىن كۇشەيتىپ، ساياساتتاردى ۇشتاستىرۋدى كۇشەيتىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن قۇتتىقتاۋ قيمىلىن بىرگە ويداعىداي وتكىزىپ، الاۋىزدىقتاردى ۇيلەسىمدى باسقارىپ جانە شەشىپ، ستراتەگيالىق مانگە يە ۆيەتنام - جۇڭگو تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتەدى.

شي جينپيڭ مەن سۋلين جۇڭگو - ۆيەتنام گۋمانيتارلىق اۋىس - كۇيىس جىلىنىڭ رەسمي باستالعاندىعىن بىرگە جاريالادى، سونداي - اق ءوزارا كوكتەم مەرەكەسى بايلانىسىمەن ىزگى تىلەك تىلەپ، ەكى ەل حالقىنىڭ باقىتتى، امان - ەسەن بولۋىن تىلەدى.