بۇكىل ەلدەگى ءار ۇلت حالقىنا كوكتەم مەرەكەسى بايلانىسىمەن ىزگى تىلەك تىلەدى، ءار ۇلت حالقىنا باقىت، اماندىق تىلەدى، ۇلى وتاننىڭ گۇلدەنىپ - قۇدىرەتتەنۋىن تىلەدى

1 - ايدىڭ 22 - كۇنىنەن 24 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قاقاعان ايازدا لياۋنيڭگە بارىپ، نەگىزگى ساتىداعى كادرلار مەن بۇقاراعا امانداستى، ولاردان حال سۇرادى. سۋرەتتە: 1 - ايدىڭ 22 - كۇنى تۇستەن كەيىن شي جينپيڭ حۋلۋداۋ قالاسى سۇيجۇڭ اۋدانى ميڭشۇي مانزۋ ۇلتتىق اۋىلى جۋجياگوۋ قىستاعىندا قىزمەت تەكسەرگەندە، قىستاق تۇرعىندارىمەن ىقىلاسپەن اڭگىمەلەسىپ، كوپشىلىكتەن شىنايى حال سۇرادى جانە ولارعا كوكتەم مەرەكەسى بايلانىسىمەن ىزگى تىلەك تىلەدى.

سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن

1 - ايدىڭ 22 - كۇنىنەن 24 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قاقاعان ايازدا لياۋنيڭگە بارىپ، نەگىزگى ساتىداعى كادرلار مەن بۇقاراعا امانداستى، ولاردان حال سۇرادى. سۋرەتتە: 1 - ايدىڭ 23 - كۇنى تۇستەن بۇرىن شي جينپيڭ شىنياڭ دادۇڭ قوسىمشا ازىق - تۇلىك ساۋدا سارايىندا قىزمەت تەكسەرگەندە، دۇكەن قوجايىندارىمەن جانە قاريدارلارمەن ىقىلاسپەن اڭگىمەلەسىپ، كوپشىلىككە كوكتەم مەرەكەسى بايلانىسىمەن ىزگى تىلەك تىلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 1 - ايدىڭ 24 - كۇنى، شىنياڭ. جۇڭحۋا ۇلتىنىڭ ءداستۇرلى مەرەكەسى كوكتەم مەرەكەسى قارساڭىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قاقاعان ايازدا لياۋنيڭگە بارىپ، نەگىزگى ساتىداعى كادرلار مەن بۇقاراعا امانداستى، ولاردان حال سۇرادى، بۇكىل ەلدەگى ءار ۇلت حالقىنىڭ جانە شياڭگاڭدىق باۋىرلاستاردىڭ، اۋمىندىق باۋىرلاستاردىڭ، تايۋاندىق باۋىرلاستاردىڭ، شەتەلدەگى چياۋمين باۋىرلاستاردىڭ مەرەكەسىن قۇتتىقتادى! ەل ءىشى - سىرتىنداعى جۇڭحۋا پەرزەنتتەرىنىڭ دەندەرىنىڭ ساۋ، قىزمەتتەرىنىڭ تابىستى، وتباسىلارىنىڭ باقىتتى بولۋىن، جىلان جىلىنىڭ قۇتتى بولۋىن تىلەدى! ۇلى وتانىمىزدىڭ ەلى امان، جۇرتى تىنىش بولۋىن، مولشىلىققا كەنەلۋىن، گۇلدەنىپ - قۇدىرەتتەنۋىن تىلەدى!

1 - ايدىڭ 22 - كۇنىنەن 24 - كۇنىنە دەيىن شي جينپيڭ لياۋنيڭ ولكەلىك پارتكومنىڭ شۋجيى حاۋ پىڭنىڭ جانە ولكە باستىعى لي لىچىڭنىڭ سەرىك بولۋىندا حۋلۋداۋ، شىنياڭ، بىنشي سياقتى جەرلەرگە بارىپ، اۋىل - قىستاقتى، بازارلاردى، الەۋمەتتىك اۋماقتاردى، كاسىپورىنداردى ىشكەرىلەي ارالاپ قىزمەت تەكسەرىپ، نەگىزگى ساتىداعى كادرلار مەن بۇقاراعا پارتيا ورتالىق كوميتەتىنىڭ قامقورلىعى مەن تىلەگىن جەتكىزدى.

1 - ايدىڭ 22 - كۇنى تۇستەن كەيىن شي جينپيڭ حۋلۋداۋ قالاسىنا بارىپ، اۆتوكولىكپەن ءبىر ساعاتقا تاياۋ ءجۇرىپ سۇيجۇڭ اۋدانىنىڭ ميڭشۇي مانزۋ ۇلتتىق اۋىلى جۋجياگوۋ قىستاعىنا باردى. بىلتىر 8 - ايدا بۇل ارا اۋىر تاسقىن اپاتىنا ۇشىراپ، قىس كىرۋدەن ىلگەرى قىستاقتاعى 41 وتباسى قايتا سالىنعان جاڭا تۇراقتارىنا كوشىپ كىرگەن بولاتىن. شي جينپيڭ قىستاقتىڭ كىرە بەرىسىندە اپاتقا ۇشىراعان اۋماقتى تەكسەرىپ كورىپ، سول كەزدەگى ۇيلەردى سۋ باسۋ جانە قىستاق تۇرعىندارىن كوشىرۋ جاعدايىن ەگجەي - تەگجەيلى سۇراپ ۇعىستى، ونان سوڭ قىستاقتىڭ پارتيا مۇشەلەرى مەن بۇقاراعا قىزمەت وتەۋ ورتالىعىنا كەلىپ بەينەكەسكىنمەن، كورمە تاقتامەن ۇشتاستىرىپ، اپاتتان كەيىنگى قالپىنا كەلتىرۋ، قايتا قۇرۋ اياق الىسىن ۇعىسىپ، جەرگىلىكتى ورىنداعى كادرلارعا بۇقارانىڭ ءوندىرىس - تۇرمىسىن، ءسوزسىز، جاقسى ورنالاستىرىپ، قىستان قىسىلماي وتۋىنە شىنايى كەپىلدىك ەتۋدى تاپسىردى.

ەگىنشىلىك كالەندارى بويىنشا كىشى جاڭا جىلعا تۋرا كەلگەندىكتەن، بارلىق وتباسى كوكتەم بوساعالىعىن، تەرەزە ويۋىن جاپسىرعان بولاتىن. شي جينپيڭ ىلگەرىندى - كەيىندى قىستاق تۇرعىنى جۋ شيسۇننىڭ، ۋاڭ باۋ - ۋەيدىڭ ۇيىنە بارىپ، ءۇي قۇرىلىمىن، ساپاسىن جانە مەرەكەلىك بۇيىمداردى دايىنداۋ احۋالىن تەكسەرىپ كورىپ، ۇكىمەتتىڭ قايتا سالىنعان ۇيلەرگە بەرگەن كومەك قاراجاتىنىڭ تياناقتانعان، تياناقتانباعاندىعىن، قىستاق تۇرعىندارىنىڭ نەگىزگى كىرىس كوزىنىڭ نە ەكەندىگىن ۇعىستى. ۋاڭ باۋ - ۋەي وتباسىنداعىلارمەن قورالانا وتىرعان كەزدە ۋاڭ باۋ - ۋەي باس شۋجيگە: جاڭا ءۇيىمىز ەڭسەلى دە جارىق، جىلى، مەرەكەلىك بۇيىمداردى تولىق دايىنداپ الدىق، بۇكىل قىستاقتاعىلار شىن جۇرەكتەرىنەن پارتياعا العىس ايتادى، باس شۋجيگە العىس ايتادى، − دەدى. شي جينپيڭ ونان: تاعى قانداي تالابىڭ مەن ءۇمىتىڭ بار؟ - دەپ سۇراعاندا، ول: اناعۇرلىم جاقسى تۇرمىس كەشىرۋدى ءۇمىت ەتەمىن، − دەدى. شي جينپيڭ قۋانىشپەن: سىزدەردىڭ ۇمىتتەرىڭىز ءبىزدىڭ دە ءۇمىتىمىز، پارتيا مەن ۇكىمەت − ماڭگى حالىق بۇقاراسىنىڭ پارمەندى سۇيەنىشى، − دەپ جاۋاپ قايتاردى.

قىستاقتان اتتاناردا قىستاق تۇرعىندارى تۇس - تۇستان باس شۋجيگە امانداستى، شاپالاق ءۇنى، الاقايلاعان ءۇن شاعىن تاۋلى قىستاقتى دۋمانعا بولەدى. شي جينپيڭ اۋىلداستارعا بىلاي دەدى: بىلتىر جىل باسىنان بەرى سىزدەردىڭ بۇل ارانى قامتىعان ەلىمىزدىڭ ءىشىنارا جەرلەرى جاراتىلىستىق اپاتقا ۇشىرادى. پارتيامىز حالىقتى بارىنەن جوعارى قويۋعا تاباندى بولىپ، كادرلار مەن بۇقارا ءبىر نيەتپەن ىنتىماقتاسىپ، اپاتقا قارسى اتتانۋدىڭ، اپاتتان قۇتقارۋدىڭ كەلەلى جەڭىسىنە قول جەتكىزدى. شات مەرەيلى كوكتەم مەرەكەسى تاياپ قالدى، مەن پارتيا ورتالىق كوميتەتى اتىنان اپاتقا ۇشىراعان بارلىق بۇقارادان جانە اپاتتان كەيىنگى قالپىنا كەلتىرۋ، قايتا قۇرۋ ءبىرىنشى شەبىندە ەرلىكپەن شايقاس جاساپ جاتقان بارلىق كادرلار مەن بۇقارادان شىنايى حال سۇرايمىن جانە كوكتەم مەرەكەسى بايلانىسىمەن ىزگى تىلەك تىلەيمىن!

شىنياڭ دادۇڭ قوسىمشا ازىق - تۇلىك ساۋدا سارايىنىڭ تاريحى ۇزاق، ەرەكشەلىككە يە كوكتەم مەرەكەسىندىك تاۋارلار كوزدىڭ جاۋىن الادى. 1 - ايدىڭ 23 - كۇنى تۇستەن بۇرىن شي جينپيڭ وسى اراعا كەلىپ، بىرنەشە دۇكەندى تەكسەرىپ كورىپ، دۇكەن قوجايىندارىمەن جانە قاريدارلارمەن ءالسىن - ءالى اڭگىمەلەسىپ، مەرەكە كەزىندەگى بازاردىڭ قامداۋ جاعدايىن ەگجەي - تەگجەيلى ۇعىستى. كوپشىلىك باس شۋجيدى كورىپ ايرىقشا تەبىرەنىپ، جان - جاقتان ”باس شۋجي، سالەمەتسىز بە!“ دەدى. شي جينپيڭ كوپشىلىككە: كوجە قاتىق، استىق، جەمىس - جيدەك − حالىق تۇرمىسىنداعى ءىرى ءىس، قازىر زات مولشىلىق، كوكتەم مەرەكەسىندەگى باس قوسۋدا كوپشىلىكتى تىپتەن جاقسى تاماقتاندىرۋ، اقاۋسىز تاماقتاندىرۋ كەرەك، − دەدى.

وسىدان سوڭ شي جينپيڭ شوعىرلى جاڭالانعان دادۇڭ رايونى چاڭ - ان ءمالىسى چاڭ - ان شاعىن اۋماعىنا بارىپ، ءتورت ۇرپاق بىرگە تۇرىپ كەلە جاتقان لاڭ سۋلاننىڭ وتباسىنا كىرىپ امانداستى. شاعىن اۋماق جاڭالانعاننان كەيىن قونىس ورتاسىنىڭ كورنەكتى جاقسارعانىن، ءار جاقتاعى قىزمەت وتەۋ قامتاماسىزدىعىنىڭ تىندىرىمدى ىستەلگەنىن بىلگەن شي جينپيڭ مۇنى تۇراقتاندىردى. ول بىلاي دەپ اتاپ كورسەتتى: قالانى جاڭالاۋدا جەرگىلىكتى جاعدايعا قاراي ىستەپ، الەۋمەتتىك اۋماق قۇرىلىسىمەن ۇشتاستىرۋ كەرەك، بارلىعىندا حالىققا قولايلى بولۋدى، حالىققا پايدالى بولۋدى، حالىقتى الاڭسىز ەتۋدى كوزدەۋ، اسىرەسە، قارتتار مەن بالالارعا ءتىپتى دە جاقسى كوڭىل ءبولۋ جانە ولاردى قورعاۋ كەرەك.

الەۋمەتتىك اۋماقتىڭ پارتيا مۇشەلەرى مەن بۇقاراعا قىزمەت وتەۋ ورتالىعىندا كەيبىر الەۋمەتتىك اۋماق تۇرعىندارى كوكتەم بوساعالىعىن جازىپ، بالالار جۇڭگو تۇيىنشەگىن جاساپ جاتىپتى. شي جينپيڭ ولاردىڭ اراسىنا بارىپ، ولاردىڭ تۋىندىلارىن ءالسىن - ءالى القاپ، ولاردى جۇڭحۋانىڭ تاڭداۋلى ءداستۇرلى مادەنيەتىن اناعۇرلىم جاقسى جالعاستىرۋعا، اسقاقتاتۋعا ىنتالاندىردى. شي جينپيڭ تاعى الەۋمەتتىك اۋماقتاعى زەينەتكە شىققانداردىڭ توپتىق ورىنداعان سىبىزعى كۇيىن قىزىعا تاماشالادى. ول كوپشىلىككە تەرەڭ سۇيىسپەنشىلىكپەن بىلاي دەدى: كوكتەم مەرەكەسىن جاقسى وتكىزۋ جاڭا ءبىر جىلدا تاماشا باستاما بولاتىندىعىن كورسەتەدى، بارلىق وتباسىنىڭ باقىتتى تۇرمىس كەشىرۋى، ۇلكەن - كىشىنىڭ قۋانىشقا بولەنۋى − ءومىردىڭ كوركەم كارتيناسى. ءبىز بىرگە قۇلشىنىپ، وسى كوركەم كارتينانى بارعان سايىن ايشىقتاي ءتۇسۋىمىز كەرەك.

شاعىن اۋماقتىڭ مادەنيەت الاڭىندا تۇرعىندار شاتتىققا تولى ياڭگى ءبيىن بيلەپ جاتتى. شي جينپيڭ كوپشىلىككە قول بۇلعاپ قۇرمەت ءبىلدىرىپ، كوپشىلىكتىڭ مەرەكەلەرىن قۇتتىقتادى.

1 - ايدىڭ 23 - كۇنى تۇستەن كەيىن شي جينپيڭ بىنشيگە بارىپ، انگاڭ توبىنا قاراستى بىنگاڭ تاقتايشا ماتەريالداردى سۋىقتاي پىشىندەۋ باس زاۆودىنىڭ 3 - سۋىقتاي پىشىندەۋ زاۆودىندا قىزمەت تەكسەردى. ول كاسىپورىننىڭ شوعىرلى مەڭگەرۋ ورتالىعىندا شوعىرلى مەڭگەرۋ زەردەلى جۇيەسىنىڭ اينالىم جۇمىسىن تەكسەرىپ كوردى، سەحتا سۋىقتاي پىشىندەۋ جۇمىس ءتارتىبىن، تەحنولوگيادا جاڭالىق اشۋدى، ءونىم يقۋاتىن ۇعىستى ءارى ەڭبەك ەرلەرىنە، جاس تەحنيكا تىرەكتىلەرىنە، ءبىرىنشى شەپتەگى جۇمىسشى - قىزمەتكەرلەر ۋاكىلدەرىنە ىقىلاسپەن امانداستى. شي جينپيڭ بىلاي دەپ اتاپ كورسەتتى: جاساۋ كاسىبىندە جوعارى دەڭگەيلىلەندىرۋ، زەردەلىلەندىرۋ، جاسىلداندىرۋ بەتالىسىنا تاباندى بولىپ، ونىمدەردىڭ عىلىم - تەحنيكالىق قامتىمىن جانە ۇستەمە قۇنىن ۇزدىكسىز جوعارىلاتىپ، انگاڭ سياقتى مەملەكەت مەنشىگىندەگى ءىرى كاسىپورىندار جۇڭگو ۇلگىسىندەگى وسىزامانداندىرۋعا كوبىرەك ۇلەس قوسۋى كەرەك.

1 - ايدىڭ 24 - كۇنى تۇستەن بۇرىن شي جينپيڭ لياۋنيڭ ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، لياۋنيڭنىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىرىپ، لياۋنيڭنىڭ جاڭا داۋىردەگى شىعىس سولتۇستىكتىڭ جاپپاي گۇلدەنۋىن ىلگەرىلەتۋدە تىڭ سەرپىلىسكە قول جەتكىزۋ جاعىندا باتىلدىقپەن الدا ءجۇرىپ، جۇڭگو ۇلگىسىندەگى وسىزامانداندىرۋدىڭ لياۋنيڭ تاراۋىن قۇلشىنا جازۋىن ءۇمىت ەتتى.

شي جينپيڭ بىلاي دەپ اتاپ كورسەتتى: لياۋنيڭنىڭ ونەركاسىپ جۇيەسى ءبىرشاما كەمەلدى، ءداستۇرلى كاسىپ سالالارىنىڭ تيبىن جاڭالاپ، دارەجەسىن جوعارىلاتۋدى جانە ستراتەگيالىق جاڭادان گۇلدەنگەن كاسىپ سالالارىن جەتىلدىرۋدى، زورايتۋدى ءبىر تۇتاس جوسپارلاپ، وسىزاماندانعان كاسىپ سالاسى جۇيەسىن جەدەل قۇرۋ كەرەك. ءداستۇرلى كاسىپ سالالارىندا كاسىپ سالاسى نەگىزىن قايتا سومداۋدى جانە كەلەلى تەحنيكا - جابدىق جاعىندا قامال الۋدى كۇشەيتىپ، وزەكتى باسەكەلىك قۋاتتى ۇزدىكسىز جوعارىلاتۋ كەرەك. ستراتەگيالىق جاڭادان گۇلدەنگەن كاسىپ سالالارىن جەتىلدىرۋدىڭ، زورايتۋدىڭ ءتۇيىنى عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭ توعىسۋىن كۇشەيتىپ، جاڭاشا وندىرگىش كۇشتەردى جەرگىلىكتى جاعدايعا قاراي دامىتۋدا. دامۋ مىندەتى اۋىر بولعان سايىن ەكولوگيالىق ورتانى قورعاۋعا سولعۇرلىم باسا نازار اۋدارىپ، ەكونوميكالىق، قوعامدىق دامۋدىڭ جاپپاي جاسىل تيپكە بۇرىلىس جاساۋىن ىلگەرىلەتۋ كەرەك.

شي جينپيڭ بىلاي دەپ باسا دارىپتەدى: شىعىس سولتۇستىكتى جاپپاي گۇلدەندىرۋدە، سايىپ كەلگەندە، رەفورما جاساپ، ەسىك اشۋعا سۇيەنۋ كەرەك. رەفورمانى يگەرۋدە نازاردى ماسەلەگە اناعۇرلىم شوعىرلاندىرىپ، ءتۇيىندى كورنەكتىلەندىرىپ، قيىن تۇيىندەردى شەشىپ، زاڭمەن باسقارىلاتىن ۇكىمەت قۇرۋ، شارۋاشىلىق - ساۋدا ورتاسىن ساپالىلاندىرۋ، ”ەكىدەن تيتتەي دە اۋىتقىماۋعا“ تاباندى بولۋ جانە ونى تياناقتاندىرۋ، جۇڭگوشا وسى زامانعى كاسىپورىن ءتۇزىمىن كەمەلدەندىرۋ سياقتى جاقتاردا كوپ كۇش سالۋ كەرەك. قازىر مەملەكەتىمىزدىڭ اشىلعان ەسىگى بارعان سايىن ايقارا اشىلۋدا، ءار دارەجەلى كادرلار ەسىك اشۋ شارت - جاعدايىندا ماسەلەنى ويلاۋ، شەشىم جاساۋ، قىزمەتتى يگەرۋ قابىلەتىن جوعارىلاتۋى كەرەك.

شي جينپيڭ بىلاي دەپ اتاپ كورسەتتى: لياۋنيڭنىڭ اۋىل شارۋاشىلىق بايلىعى مول، دامۋ نەگىزى ءبىرشاما جاقسى، قالا مەن اۋىلدىڭ توعىسا دامۋىنا تاباندى بولىپ، اۋدان ورتالىقتارىن ماڭىزدى دانەكەر ەتكەن جاڭاشا قالا - قالاشىقتاندىرۋ قۇرىلىسىن ىلگەرىلەتىپ، اۋدان، اۋىل، قىستاقتاردىڭ الەۋمەتتىك بايلىق ورنالاسۋى مەن كاسىپ سالاسى تىزبەگى ورنالاسىمىن ساپالىلاندىرىپ، اۋىل - قىستاقتى جاپپاي گۇلدەندىرۋدى تىڭعىلىقتى ىلگەرىلەتۋ كەرەك. ”1000 قىستاق ۇلگى كورسەتۋ، 10 مىڭ قىستاقتى رەتتەۋ - وڭاۋ ينجەنەرياسى“ تاجىريبەسىن ۇيرەنىپ، قولدانىپ، ءىس جۇزىندىكپەن بايلانىستىرىپ، ەگجەي - تەگجەيلى، ناقتى يگەرىپ، ۇزدىكسىز قاجىماي كۇش سالۋعا تاباندى بولۋ كەرەك. جاۋاپكەرشىلىكتى ايقىنداپ، تۇبىنە، شەگىنە دەيىن جەتكىزىپ، ىسكە، ادامعا كوز جەتكىزە وتىرىپ نەگىزگى ساتىنى باسقارۋدى ويداعىداي يگەرۋ كەرەك.

شي جينپيڭ بىلاي دەپ باسا دارىپتەدى: مادەنيەتتە وزىنە سەنۋدى، ءوزىن الۋەتتەندىرۋدى ىلگەرىلەتىپ، سوتسياليستىك رۋحاني وركەنيەت قۇرىلىسىن كۇشەيتۋدە ءار دارەجەلى ورىنداردىڭ بارلىعى ماڭىزدى جاۋاپكەرشىلىك ارقالايدى. مادەنيەت ءتول جاسامپازدىق قۋاتىن قۇلشىنا جوعارىلاتىپ، اناعۇرلىم كوپ سارا تۋىندى شىعارىپ، مادەنيەت جاعىندا حالىققا تيىمدىلىك جاساۋ ينجەنەرياسىن ىشكەرىلەي اتقارىپ، مادەنيەت قىزمەتكەرلەرى ارقىلى جۇرت تىلەگىن اناعۇرلىم ويداعىداي توعىستىرىپ، حالىققا مەيىر جەتكىزىپ، سەنىمدى كۇشەيتىپ، قالىڭ كادرلار مەن بۇقارانىڭ رەفورما جاساۋ، جاڭالىق اشۋ، گۇلدەنىپ دامۋ ىنتاسى مەن جىگەرىن تولىق قاۋلاتۋ كەرەك.

شي جينپيڭ بىلاي دەپ اتاپ كورسەتتى: ءسوز جوق، پارتيانىڭ باسشىلىعىنا تيتتەي دە اۋىتقىماي تاباندى بولىپ، پارتيانى بۇلجىماي جاپپاي قاتاڭ باسقارۋ كەرەك. پارتيا ۇيىمدارىنىڭ ساياسي يقۋاتى مەن ۇيىمدىق يقۋاتىن كۇشەيتىپ، ستيلى پاك، سالتى دۇرىس ساياسي ەكولوگيا قالىپتاستىرىپ جانە ونى ساقتاپ، پارتيا مۇشەلەرى مەن كادرلاردى ادال، كىرشىكسىز بولۋعا، جاۋاپكەرشىلىك ارقالاۋعا تاربيەلەۋ، جەتەكتەۋ كەرەك، وسىلاردى ءارقانداي ۋاقىتتا، ءسوزسىز، مىقتى يگەرۋ كەرەك. ورتالىقتىڭ سەگىز ءتۇرلى بەلگىلەمەسىنىڭ رۋحىن جانە ونى اتقارۋدىڭ ەگجەي - تەگجەيلى ەرەجەسىن ىشكەرىلەي دايەكتىلەندىرىپ، ءار دارەجەلى كادرلاردىڭ شىن مانىندە شىندىققا جۇگىنىپ ناقتى ءىس ىستەۋىن، پاك، تارتىپشەڭ بولۋىن ىلگەرىلەتۋ كەرەك.

شي جينپيڭ سوڭىندا بىلاي دەپ باسا دارىپتەدى: كوكتەم مەرەكەسى تاياپ قالدى، ءار دارەجەلى پارتكومدار مەن ۇكىمەتتەر قيىنشىلىعى بار بۇقاراعا كوڭىل ءبولۋ، كوكتەم مەرەكەسى تاسىمالىن ورنالاستىرۋ، بازار قامداۋىن قامتاماسىز ەتۋ، مادەنيەت تۇرمىسىن بايىتۋ سياقتى قىزمەتتەردى تىڭعىلىقتى ويداعىداي ىستەپ، ءوندىرىس حاۋىپسىزدىگىن كۇشەيتىپ، حالىق بۇقاراسىنىڭ مەرەكەنى كوڭىلدى، تىنىش، بەرەكەلى وتكىزۋىنە شىنايى كەپىلدىك ەتۋى كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.

كەلۋ قاينارى: حالىق تورابى