شينجياڭدا مىندەتتى وقۋ – اعارتۋ كەزەڭىندەگى ساباقتار رەتتەلدى 

ءتىلشىنىڭ 2 – ايدىڭ 6 – كۇنى شينجياڭ ۇيعۇر اۆتونوميالى رايوندىق وقۋ – اعارتۋ مەڭگەرمەسىنەن ۇعىسۋىنشا، 2025 – جىلى كوكتەمگى وقۋ ماۋسىمىنان باستاپ، شينجياڭدا مىندەتتى وقۋ – اعارتۋ كەزەڭىندەگى مەكتەپتەردە ءبىرىنشى كلاستان توعىزىنشى كلاسقا دەيىن دەنە تاربيە جانە سالاماتتىق ساباعى كۇنىنە ءبىر ساعاتقا وزگەرتىلەدى، ساباق ارالىعىنداعى ادەتتەگى 10 مينۋتتىق دەمالىس 15 مينۋتقا ۇزارتىلادى. وقۋشىلاردىڭ ءار كۇنى مەكتەپتەگى دەنە تاربيەلىك قيمىلدارعا قاتىناساتىن جالپى ۋاقىتى 2 ساعاتتان كەم بولماۋى كەرەك.

جەر – جەردەگى مەكتەپتەر ساياساتتى اتقارۋ بارىسىندا ءارقايسى ساباقتاردىڭ ساباق ۋاقىتىن ورنالاستىرۋدى اناعۇرلىم ەگجەي - تەگجەيلى جاقسارتۋى، وقۋشىلاردىڭ مەكتەپتەگى ۋاقىتىن عىلىمي، ۇيلەسىمدى ورنالاستىرۋى، ءار كۇنى ءبىر رەت دەنە تاربيە ساباعىن ءوتۋدى تياناقتاندىرۋعا كەپىلدىك ەتۋى كەرەك، بارلىق وقۋشى تۇگەل قاتىناسپايتىن ەرەكشەلىككە يە ساباق، وقۋشىلاردىڭ اۋەسىنە باعىتتالعان ساباق جانە ساباقتان كەيىنگى قىزمەت وتەۋ قاتارلىلارمەن الماستىرۋعا بولمايدى، دەنە تاربيە ساباعىنىڭ ۋاقىتىن باسقا پاندەر مەن قيمىلداردى ورنالاستىرۋ بارىسىندا يەلەپ الۋعا نەمەسە باسقا پاندەرگە پايدالانۋعا بولمايدى.

سۋرەتتە: شاعانتوعاي اۋداندىق 1 – باستاۋىش مەكتەپتىڭ وقۋشىلارى قار ۇستىندە دوپ تەبۋدە (ماتەريالدىق سۋرەت). ياڭ حۋاگۋاڭ فوتوسى

سونىمەن بىرگە، جەر – جەردەگى مەكتەپتەر وزدەرىنىڭ ءىس جۇزىندىك جاعدايلارىمەن ۇشتاستىرا وتىرىپ، شينجياڭنىڭ ءىشى – سىرتىنداعى تۇيىندە سىناق ەتەتىن وڭىرلەر مەن مەكتەپتەردىڭ تيپتىك تاجىريبەلەرىن ۇلگى ەتە وتىرىپ، ءتۇرلى فورمالار ارقىلى وقۋشىلاردىڭ ساباق ارالىعىنداعى قيمىل ۋاقىتىنىڭ ۇزاقتىعىنا كەپىلدىك ەتۋى قاجەت، مۇنان سىرت، وقۋشىلاردىڭ قاجەتتى تۇسكى دەمالىس ۋاقىتىنا كەپىلدىك ەتۋى كەرەك، وقۋشىلاردان الدىن الا مەكتەپكە كەلۋدى، مەكتەپتەن جاي قايتۋدى تالاپ ەتۋىنە، سونداي – اق، ءتۇرى وزگەرگەن فورمادا وقۋشىلاردىڭ مەكتەپتەگى ۋاقىتىن ۇزارتۋىنا بولمايدى، ساباقحاناداعى وقىتۋ مەن ساباقتان كەيىنگى قىزمەت وتەۋ ۋاقىتىن قىسقارتۋعا قاتاڭ تيىم سالىنادى.

كەلۋ قاينارى: حالىق تورابى