شي جينپيڭ برۋنەيدىڭ سۇلتانى حاسانالمەن كەڭەس وتكىزدى

2 - ايدىڭ 6 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن برۋنەيدىڭ سۇلتانى حاسانالمەن كەڭەس وتكىزدى. سۋرەتتە: شي جينپيڭ حاسانالمەن قول الىسۋدا.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

2 - ايدىڭ 6 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن برۋنەيدىڭ سۇلتانى حاسانالمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا حاسانالدى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 2 - ايدىڭ 6 - كۇنى، بەيجيڭ. 2 - ايدىڭ 6 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن برۋنەيدىڭ سۇلتانى حاسانالمەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن برۋنەيدىڭ ءداستۇرلى دوستىعى ارىدان باستاۋ الادى. ديپلوماتيالىق قارىم - قاتىناس ورناتقان 30 نەشە جىلدان بەرى ەكى جاق ساياسي ءوزارا سەنىمدىلىكتى ۇزدىكسىز تەرەڭدەتىپ، دامۋ ستراتەگيالارىن بەلسەنە ءتۇيىلىستىرىپ، ءار سالاداعى ناقتى سەلبەستىكتە سۇبەلى ناتيجەلەرگە قول جەتكىزىپ، حالىقارالىق جانە وڭىرلىك ىستەردە تاماشا سايكەسۋدى ساقتاپ، ۇلكەن - كىشى ەلدەردىڭ ءبىر - بىرىنە تەڭ مامىلە جاساۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتتى ءارى ءوڭىردىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە بەلسەندى ۇلەس قوستى. جۇڭگو مەن برۋنەي تاعدىرلاس ورتاق تۇلعانى بىرگە قۇرىپ، ءداۋىردىڭ دامۋ اۋقىمىنا سايكەسىپ، ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە ۇيلەسىپ، ەكى ەل قارىم - قاتىناسىنىڭ شىت جاڭا پاراعىن اشتى. ەكى جاق قولايلى ساتتەن پايدالانىپ العا ۇمتىلىپ، ءوزارا ءتيىمدى سەلبەستىك پەن ستراتەگيالىق سايكەستىكتى تەرەڭدەتىپ، ءوزارا قۇرمەت ەتىپ، بۇكپەسىز ءوزارا سەنىم ارتىپ، ماڭگى ءبىر - بىرىمەن بىتە قايناسقان جاقسى كورشى، ءبىر - بىرىنە سەنەتىن جاقسى دوس، بىرگە داميتىن جاقسى سەرىك بولۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق برۋنەي جاقپەن مەملەكەتتى دامىتۋ جولىندا قول ۇستاسا العا ىلگەرىلەپ، ەكى ەل حالقىنا اناعۇرلىم مول ىرىس - قۇت اكەلۋدى قالايدى. ەكى جاق ”ءبىر بەلدەۋ، ءبىر جولدى“ بىرگە قۇرۋ باستاماسىن برۋنەيدىڭ ”2035 – جىلعا دەيىنگى ۇلى ارمانى“ ستراتەگياسىمەن ۇشتاستىرۋدى كۇشەيتىپ، گۋاڭشي - برۋنەي ەكونوميكالىق ءدالىزى، حىڭ - ي مۇناي - حيمياسى سىندى ەكى باستاۋشى نىساندى ىلگەرىلەتىپ، جۇڭگو - شىعىس وڭتۇستىك ازيا ەلدەرى وداعىنىڭ شىعىس بولىكتەگى ارتۋ ءوڭىرى جانە ”قۇرلىق، تەڭىز جاڭا ارناسى“ سىندى قوس توراپتى قالىپتاستىرۋى كەرەك. جۇڭگو جاق اناعۇرلىم كوپ كاسىپورىندى برۋنەيگە بارىپ قارجى قوسىپ، كاسىپتى گۇلدەندىرۋگە شابىتتاندىرۋدى قالايدى، برۋنەيدىڭ سيفرلى ەكونوميكانى، جاساندى زەردەنى، جاڭا ەنەرگيا كاسىبىن دامىتۋىنا قولداۋ كورسەتەدى، برۋنەي جاقتىڭ ەكونوميكاسىنىڭ كوپ نەگىزدەنۋىنە دەم بەرەدى. جۇڭگو جاق ەكى ەلدىڭ بۋدانداستىرىلعان كۇرىشتى زەرتتەۋ سەلبەستىگىن ورىستەتۋىن قولدايدى، برۋنەي جاقتىڭ جۇڭگو حالىقارالىق يمپورت كورمەسى، جۇڭگو - شىعىس وڭتۇستىك ازيا وداعى كورمەسى سياقتى تۇعىرلاردان ويداعىداي پايدالانىپ، ساپالى اۋىل شارۋاشىلىعى، بالىق شارۋاشىلىعى ونىمدەرىنىڭ جۇڭگوعا ەكسپورت ەتىلۋىن كەڭەيتۋىن قارسى الادى. ەكى جاق گۋمانيتارلىق اۋىس - كۇيىستىڭ تاڭداۋلى ءداستۇرىن ساۋلەلەندىرىپ، وقۋ - اعارتۋ، مادەنيەت، ساياحات، جەرگىلىكتى ورىندار، دەنە تاربيە اۋىس - كۇيىسىن، سەلبەستىگىن تەرەڭدەتىپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن بىرگە ىلگەرىلەتىپ، حالىقارالىق ادىلدىكتى، تۋراشىلدىقتى قورعاپ، حالىقارالىق جانە وڭىرلىك بەيبىتشىلىكتى، ورنىقتىلىقتى جەبەۋدە بەلسەندى رول اتقارۋى كەرەك.

حاسانال ءتوراعا شي جينپيڭگە جانە جۇڭگو حالقىنا جىلان جىلعى كوكتەم مەرەكەسى بايلانىسىمەن باقىت تىلەدى. حاسانال مىنالاردى ءبىلدىردى: ءتوراعا شي جينپيڭنىڭ باسشىلىعىندا جۇڭگو ەكونوميكانىڭ ءۇرتىس، تەز ارتۋىن ساقتاپ، نەشە ءجۇز ميلليون ادامدى كەدەيلىكتەن ارىلتتى، بۇل − كەرەمەت تابىس. جۇڭگو دۇنيە جۇزىلىك 3 ۇلكەن باستامانى العا قويىپ، دۇنيە ءجۇزىنىڭ بەيبىتشىلىگى، ورنىقتىلىعى، دامۋى ءۇشىن شەشۋشى رول اتقارىپ، جاۋاپكەرشىلىك ارقالايتىن ءىرى ەلدىڭ جاۋاپكەرلىگىن ايگىلەدى. برۋنەي مەن جۇڭگو باستان - اياق ءبىر - بىرىنە قۇرمەت ەتىپ، ءبىر - بىرىنە سەنىم ارتىپ كەلەدى، ەكى ەل قارىم - قاتىناستى ۇزدىكسىز دامىتىپ، برۋنەي مەن جۇڭگونىڭ تاعدىرلاس ورتاق تۇلعاسىنا قول ۇستاسا قادام تاستادى. جۇڭگو جاقتىڭ برۋنەيدىڭ ەكونوميكانى كوپ نەگىزدەندىرۋ ستراتەگياسىن قولداعاندىعىنا العىس ايتامىن، ەكى ەلدىڭ سەلبەستىگى برۋنەي حالقىن يگىلىككە كەنەلتتى. برۋنەي جاق ءبىر جۇڭگو ساياساتىن باتىل اتقارادى، جۇڭگو جاقپەن ستراتەگيالىق سەلبەستىك سەرىكتەستىك قارىم - قاتىناستى بەكەمدەپ، ەكى ەل حالقىنا اناعۇرلىم مول ىرىس - قۇت اكەلۋدى قالايدى. برۋنەي جاق جۇڭگو جاقپەن ساياسي سەنىمدىلىكتى كۇشەيتىپ، ساۋدا، اۋىل شارۋاشىلىعى، بالىق شارۋاشىلىعى، ەنەرگيا سياقتى سالالارداعى سەلبەستىكتى تەرەڭدەتىپ، گۋمانيتارلىق اۋىس - كۇيىستى جەبەۋدى قالايدى. قازىر حالىقارالىق قوعام جاڭا دا كۇردەلى جاعدايعا جانە سىن - سايىسقا ءدوپ كەلىپ وتىر، برۋنەي جاق جۇڭگو جاقپەن سەلبەستىكتى كۇشەيتىپ، كوپ جاقتىلىققا جانە ەركىن ساۋداعا تاباندى بولىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

ەكى جاق «جۇڭحۋا حالىق رەسپۋبليكاسى مەن برۋنەي دارۋسسالام مەملەكەتىنىڭ ستراتەگيالىق سەلبەستىك سەرىكتەستىك قارىم - قاتىناسىن تەرەڭدەتۋ، جۇڭگو - برۋنەي تاعدىرلاس ورتاق تۇلعاسى قۇرىلىسىن ىلگەرىلەتۋ جونىندەگى بىرلەسكەن مالىمدەمەسىن» جاريالادى.

كەڭەستەن كەيىن ەكى ەل مەملەكەت باسشىلارى ءادىليا، ”ءبىر بەلدەۋ، ءبىر جولدى“ بىرگە قۇرۋ، ەكونوميكا - ساۋدا، اقپارات قۇرالدارى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا بىرگە كۋا بولدى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا حاسانالدى قارسى الۋ سالتىن وتكىزدى.

تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن برۋنەي ەكى ەلدىڭ مەملەكەت اندەرىن ورىندادى. حاسانال شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ حالىق سارايىنىڭ التىن ءتۇستى زالىندا حاسانالدى قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى