لي چياڭ پاكيستاننىڭ زۇڭتۇڭى زارداريمەن، برۋنەيدىڭ سۇلتانى حاسانالمەن جەكە - جەكە كەزدەستى

شينحۋا اگەنتتىگى، 2 - ايدىڭ 6 - كۇنى، بەيجيڭ. 2 - ايدىڭ 6 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پاكيستاننىڭ زۇڭتۇڭى زارداريمەن كەزدەستى.

لي چياڭ مىنالاردى ءبىلدىردى: قازىر جۇڭگو مەن پاكيستاننىڭ سەلبەستىك سالاسى بارعان سايىن كەڭەيىپ، تابىسى بارعان سايىن كوبەيىپ كەلەدى، ەكى ەلدىڭ مىزعىماس دوستىعى ۋاقىت وتكەن سايىن جاڭارىپ، بارعان سايىن تەرەڭدەدى. كەشە ءتوراعا شي جينپيڭ زۇڭتۇڭ مىرزامەن كەڭەس وتكىزىپ، جۇڭگو – پاكيستان قارىم - قاتىناسىنىڭ دامۋىنا جاڭا ستراتەگيالىق جەتەكشىلىك جاسادى. جۇڭگو جاق پاكيستان جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن تياناقتاندىرىپ، جوعارى جىكتەگىلەردىڭ ءجيى بارىس - كەلىسىن ساقتاپ، ءداستۇرلى دوستىقتى ۇزدىكسىز ساۋلەلەندىرىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى تاباندىلىقپەن قولداپ، جۇڭگو مەن پاكيستاننىڭ بارلىق جاعدايدا بىردەي ستراتەگيالىق سەلبەستىك سەرىكتەستىك قارىم - قاتىناسىنىڭ ىشكەرىلەي العا دامۋىن ىلگەرىلەتىپ، جۇڭگو - پاكيستان تاعدىرلاس ورتاق تۇلعا قۇرىلىسىنىڭ ەكى ەل حالقىن اناعۇرلىم ويداعىداي يگىلىككە كەنەلتۋىنە مۇمكىندىك جاساۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق پاكيستان جاقپەن دامۋ ستراتەگياسىن ۇشتاستىرۋدى اناعۇرلىم كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، جۇڭگو - پاكيستان ەكونوميكالىق ءدالىزىنىڭ ”دارەجەسى جوعارىلاتىلعان نۇسقاسىن“ قۇلشىنا جاراتىپ، تاس جول، تەمىر جول، پورت سياقتى ءىرى نىساندار قۇرىلىسىن ءتارتىپتى ىلگەرىلەتىپ، اۋىل شارۋاشىلىعى، كەن كاسىبى، جاڭا ەنەرگيا، ينفورماتسيا تەحنيكاسى، جاساندى زەردە سياقتى سالالارداعى سەلبەستىكتى تەرەڭدەتىپ، ەكى ەلدىڭ بىرگە دامۋىن اناعۇرلىم ويداعىداي جەبەۋدى قالايدى. ەكى جاق جەرگىلىكتى ورىنداردىڭ سەلبەستىگى مەن جاستار، اقپارات قۇرالدارى، اقىل - پاراسات قويماسى سياقتى گۋمانيتارلىق اۋىس - كۇيىستى كەڭەيتىپ، ەمدەۋ، وقۋ - اعارتۋ، كەدەيلەردى سۇيەمەلدەۋ، اپاتتان قۇتقارۋ سياقتى قوعامدىق ىستەر، حالىق تۇرمىسى سالاسىنداعى سەلبەستىكتى ۇزدىكسىز ىلگەرىلەتىپ، ەكى ەل بۇقاراسىنىڭ جۇڭگو مەن پاكيستاننىڭ دوستىق سەلبەستىگىنە قاتىناسۋ سەزىمىن، تابىس سەزىمىن كۇشەيتۋى كەرەك. جۇڭگو جاق پاكيستان جاقپەن حاۋىپسىزدىك سەلبەستىگىن اناعۇرلىم تەرەڭدەتۋدى قالايدى، پاكيستان جاقتىڭ پاكيستانداعى جۇڭگولىق ادامداردىڭ، نىسانداردىڭ جانە قۇرىلىمداردىڭ حاۋىپسىزدىگىن شىنايى قامتاماسىز ەتۋىن ءۇمىت ەتەدى. قازىر دۇنيە جۇزىندەگى 100 جىلدىق وزگەرىس جاعدايى جەدەل قۇبىلۋدا، جۇڭگو جاق پاكيستان جاقپەن كوپ جاقتى سالادا ۇزدىكسىز ءوزارا قولداۋ كورسەتىپ، سايكەسۋدى كۇشەيتىپ، وزدەرىنىڭ يەلىك ۇقىعىن، حاۋىپسىزدىگىن، دامۋ مۇددەسىن ويداعىداي قورعاۋدى قالايدى.

زارداري مىنالاردى ءبىلدىردى: پاكيستان مەن جۇڭگو − ءداستۇرلى دوس كورشى ەلدەر جانە اينىماس دوستار، حالىقارالىق اۋمالى - توكپەلى وزگەرىستەردە باستان - اياق ءبىرىن - ءبىرى قولداپ، ءوزارا كومەكتەسىپ، ەكى ەلدىڭ ءوزارا سەنىمى مەن سۇيىسپەنشىلىگى ۇرپاقتان - ۇرپاققا جالعاسىپ كەلەدى. پاكيستان جاق پاكيستان - جۇڭگو دوستىعىن توتەنشە قاستەرلەيدى، جۇڭگو جاقپەن قول ۇستاسا قۇلشىنىپ، ساۋدا، قارجى قوسۋ، نەگىزدىك قۇرىلعى قۇرىلىسى، فينانس، حالىق تۇرمىسى، گۋمانيتارلىق سياقتى سالالارداعى اۋىس - كۇيىس پەن سەلبەستىكتى اناعۇرلىم تەرەڭدەتىپ، بىرگە گۇلدەنۋدى جۇزەگە اسىرۋدى قالايدى. پاكيستان اناعۇرلىم كوپ جۇڭگو كاسىپورىندارىنىڭ پاكيستانعا بارىپ قارجى قوسىپ، كاسىپتى گۇلدەندىرۋىن قارسى الادى، پاكيستانداعى جۇڭگولىق ادامداردىڭ، نىسانداردىڭ جانە قۇرىلىمداردىڭ حاۋىپسىزدىگىن بار كۇشپەن قامتاماسىز ەتەدى.

ۋ جىڭلۇڭ كەزدەسۋدە بىرگە بولدى.

شينحۋا اگەنتتىگى، 2 - ايدىڭ 6 - كۇنى، بەيجيڭ. 2 - ايدىڭ 6 - كۇنى تۇستەن كەيىن مەملەكەتتىك كەڭەستىڭ زۇڭليى لي چياڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن برۋنەيدىڭ سۇلتانى حاسانالمەن كەزدەستى.

لي چياڭ مىنالاردى ءبىلدىردى: جۇڭگو مەن برۋنەي − اراسىن تەڭىز ءبولىپ جاتقان دوس كورشىلەر. تاياۋ جىلداردان بەرى ەكى ەل مەملەكەت باسشىلارىنىڭ ستراتەگيالىق جەتەكشىلىگىندە جۇڭگو – برۋنەي قارىم - قاتىناسى ۇزدىكسىز تەرەڭدەپ، ناقتى ىلگەرىلەپ، ءار سالاداعى سەلبەستىك ورنىقتى كەڭەيىپ، سۇبەلى تابىستارعا قول جەتكىزدى. بۇگىن تۇستەن بۇرىن ءتوراعا شي جينپيڭ مارتەبەلى سۇلتانمەن كەڭەس وتكىزىپ، جۇڭگو - برۋنەي تاعدىرلاس ورتاق تۇلعاسىن قۇرۋ جونىندە ماڭىزدى ورتاق تانىمعا كەلىپ، ەكى ەل قارىم - قاتىناسى تىڭ دا اناعۇرلىم جوعارى دەڭگەيگە كوتەرىلىپ، ەكى جاقتىڭ ءوزارا ءتيىمدى سەلبەستىگى اناعۇرلىم كەڭ ءورىستى قارسى الدى. جۇڭگو جاق برۋنەيدى باستان - اياق توڭىرەكتەگى تاتۋ كورشىلىك دوستىقتى تەرەڭدەتۋدىڭ ماڭىزدى بەتالىسى دەپ قارايدى، برۋنەي جاقپەن بىرگە ەكى ەل مەملەكەت باسشىلارىنىڭ ورتاق تانىمىن ويداعىداي تياناقتاندىرىپ، جوعارى جىكتەگىلەردىڭ بارىس - كەلىسىن ساقتاپ، ساياسي ءوزارا سەنىمدىلىكتى بەكەمدەپ، ناقتى سەلبەستىكتى تەرەڭدەتىپ، دامۋدى، گۇلدەنۋدى قول ۇستاسا بىرگە جەبەپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق برۋنەي جاقپەن ەكونوميكا - ساۋدا سەلبەستىگىنىڭ دەڭگەيىن ۇزدىكسىز جوعارىلاتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا ۇزدىكسىز قول قويۋدى وراي ەتىپ، ءتۇيىندى نىسان قۇرىلىستارىن جەدەلدەتىپ، ينفورماتسيا كاسىپ سالاسى، عىلىم - تەحنيكادا جاڭالىق اشۋ، جاسىل دامۋ، اۋىل شارۋاشىلىعى سياقتى سالالارداعى سەلبەستىكتى كۇشەيتىپ، ەكونوميكانىڭ جاڭا قوزعاۋشى قۋاتىن بىرگە جەتىلدىرۋدى قالايدى. جۇڭگو جاق برۋنەي جاقتىڭ اناعۇرلىم كوپ ساپالى اۋىل شارۋاشىلىق، سۋ ونىمدەرىن يمپورت ەتۋدى قالايدى، شارت - جاعدايى بار جۇڭگو كاسىپورىندارىن برۋنەيگە بارىپ قارجى قوسۋعا شابىتتاندىرادى، برۋنەي جاقتىڭ جۇڭگو كاسىپورىندارى ءۇشىن اناعۇرلىم كوپ قولداۋ كورسەتۋ قولايلىلىعىن ازىرلەۋىن ءۇمىت ەتەدى.

ەكى جاق مادەنيەت، ساياحات، وقۋ - اعارتۋ، جاستار، دەنە تاربيە، جەرگىلىكتى ورىن سياقتى جاقتاردا اۋىس - كۇيىستى، سەلبەستىكتى كۇشەيتىپ، حالىقتىڭ ءوزارا ءتۇسىنىسۋىن، جاقىنداسۋىن ۇزدىكسىز كۇشەيتۋى كەرەك. جۇڭگو جاق شىعىس وڭتۇستىك ازيا ەلدەرى وداعىنىڭ ىنتىماقتى جانە ستراتەگيالىق دەربەستىكتى كۇشەيتۋىن باتىل قولدايدى، برۋنەيدى قامتىعان شىعىس وڭتۇستىك ازيا ەلدەرى وداعىنا مۇشە ەلدەرمەن بىرگە جۇڭگو مەن شىعىس وڭتۇستىك ازيا ەلدەرى وداعىنىڭ اناعۇرلىم تىعىز تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

حاسانال مىنالاردى ءبىلدىردى: برۋنەيدىڭ جۇڭگومەن تەرەڭ ءداستۇرلى دوستىعى بار. برۋنەي جاق جۇڭگومەن قارىم - قاتىناسىن ايرىقشا قاستەرلەيدى، ءبىر جۇڭگو ساياساتىن تاباندىلىقپەن اتقارادى، جۇڭگونى ماڭىزدى سەلبەستىك سەرىگى سانايدى، جۇڭگو جاقپەن ەكونوميكا - ساۋدا، مۇناي - حيميا، اۋىل شارۋاشىلىعى، سيفرلى ەكونوميكا، كليمات وزگەرىسىنە توتەپ بەرۋ سياقتى سالالارداعى سەلبەستىكتەردى كەڭەيتىپ، برۋنەي - گۋاڭشي ەكونوميكالىق ءدالىزى قۇرىلىسىن ىلگەرىلەتىپ، گۋمانيتارلىق اۋىس - كۇيىستى كۇشەيتىپ، برۋنەي مەن جۇڭگونىڭ تاعدىرلاس ورتاق تۇلعاسىن بىرگە قۇرۋدى قالايدى. برۋنەي جاق شىعىس وڭتۇستىك ازيا ەلدەرى وداعى - جۇڭگو قارىم - قاتىناسى جۇلگەسىندەگى سەلبەستىكتى تەرەڭدەتىپ، وڭىرلەردى تۇتاستىرۋدى، حالىق تىلەگىن توعىستىرۋدى كۇشەيتىپ، شىعىس وڭتۇستىك ازيا ەلدەرى وداعى مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىنىڭ دامۋىن ىلگەرىلەتىپ، ءوڭىردىڭ بەيبىتشىلىگىن، ورنىقتىلىعىن جانە گۇلدەنۋىن جەبەۋدى قالايدى. برۋنەي جاق جۇڭگونىڭ حالىقارالىق، وڭىرلىك ىستەردە اتقارعان ماڭىزدى رولىن القايدى، جۇڭگونىڭ «تىنىق مۇحيتتان جالپى بەتتىك اتتاعان سەرىكتەستىك قارىم - قاتىناس كەلىسىمىنە» كىرۋىن قولدايدى.

ۋ جىڭلۇڭ كەزدەسۋدە بىرگە بولدى.

كەلۋ قاينارى: حالىق تورابى