9 - كەزەكتى ازيا قىسقى سپورت جارىسى حاربيندە سالتاناتپەن باستالدى

2 – ايدىڭ 7 - كۇنى كەشتە 9 - كەزەكتى ازيا قىسقى سپورت جارىسى حيلۇڭجياڭ ولكەسىنىڭ حاربين قالاسىندا سالتاناتپەن اشىلدى. سۋرەتتە: مەملەكەت ءتوراعاسى شي جينپيڭ ءتوراعالار مىنبەسىندە كوپشىلىككە قول بۇلعاپ قۇرمەت بىلدىرۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

2 – ايدىڭ 7 - كۇنى كەشتە 9 - كەزەكتى ازيا قىسقى سپورت جارىسى حيلۇڭجياڭ ولكەسىنىڭ حاربين قالاسىندا سالتاناتپەن باستالدى. شي جينپيڭ قاتارلى پارتيا مەن مەملەكەت باسشىلارى اشىلۋ سالتىنا قاتىناستى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

2 – ايدىڭ 7 - كۇنى 9 - كەزەكتى ازيا قىسقى سپورت جارىسىنىڭ اشىلۋ سالتى حيلۇڭجياڭ ولكەسىنىڭ حاربين قالاسىندا وتكىزىلدى. سۋرەتتە: سۋرەتتە: ارتيستەر اشىلۋ سالتىندا ونەر كورسەتۋدە.

سۋرەتتى شينحۋا اگەنتتىگىنىڭ ءتىلشىسى ياڭ لەي تۇسىرگەن

«حالىق گازەتى»، 2 – ايدىڭ 7 – كۇنى، حاربين. قار - مۇز ارمانمەن بىرگە شۇعىلا شاشىپ، ازيا ءبىر نيەت، ءبىر تىلەكپەن شۇعىلالى داستان جازدى. 9 - كەزەكتى ازيا قىسقى سپورت جارىسى 2 – ايدىڭ 7 - كۇنى كەشتە حيلۇڭجياڭ ولكەسىنىڭ حاربين قالاسىندا سالتاناتپەن اشىلدى. مەملەكەت ءتوراعاسى شي جينپيڭ اشىلۋ سالتىنا قاتىناستى ءارى وسى كەزەكتى ازيا قىسقى سپورت جارىسىنىڭ باستالعاندىعىن جاريالادى.

ساي چي، ازيانىڭ جەر - جەرىنەن كەلگەن باسشىلار مەن سيلى قوناقتار قاتارلىلار اشىلۋ سالتىنا قاتىناستى.

ءتۇن پەردەسى استىندا حاربين حالىقارالىق كورمە، دەنە تاربيە ورتالىعىندا شىراقتار سامالاداي جارقىراپ، الۋان تۇسكە ەندى. اشىلۋ سالتى باستالۋدان بۇرىن حيلۇڭجياڭنىڭ جەر - جەرىنەن كەلگەن بۇقارا وڭىرلىك ەرەكشەلىككە يە ويىن قويدى، ناق مايدان ەرەكشە دۋمانعا بولەندى.

ساعات 19 دان 58 مينۋت وتكەندە، «بەيبىتشىلىك − تاعدىرلاس ورتاق تۇلعا» مۋزىكاسىنىڭ سۇيەمەلدەۋىندە شي جينپيڭ مەن حانىمى پىڭ لييۋان حالىقارالىق وليمپيادا كوميتەتىنىڭ ءتوراعاسى باح، ازيا وليمپيادا القالار كەڭەسى ءتوراعاسىنىڭ ءبىرىنشى ورىنباسارى حو جىنتيڭ قاتارلىلارمەن بىرگە ءتوراعالار مىنبەسىنە كىرىپ، كورەرمەندەرگە قول بۇلعاپ قۇرمەت ءبىلدىردى. بۇكىل زالدان ۇزاققا دەيىن شاتىرلاعان شاپالاق ءۇنى كوتەرىلدى.

«سۇيەم سەنى، جۇڭگو» اتتى تەرەڭ سۇيىسپەنشىلىك اۋەنىمەن 8 قۇرمەت قاراۋىلى نىق قادام تاستاپ، جۇڭحۋا حالىق رەسپۋبليكاسىنىڭ مەملەكەت تۋىن قورعاپ الاڭعا كىردى. بۇكىل زالداعىلار ورىندارىنان تۇرىپ جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى، بەس جۇلدىزدى نارت قىزىل تۋ باياۋ كوتەرىلدى.

ۇلكەن ەكراندا «شۋاقتى ساتتەر» اتتى قىسقا فيلم قويىلىپ، مەرەكەلىك كيىم كيگەن بالالار مۇز شىراقتى كوتەرىپ، حاربيننىڭ قالا بەلگىسىن جارقىراتتى. وسىدان كەيىن «مۇز شىراق ارمانعا باستايدى» اتىنداعى قارسى الۋ كونسەرتى باستالدى، مۇز شىراق گۇلى وتاعاسى جاقتىڭ قوناقتاردى ىستىق ىقىلاسپەن قارسى العان پەيىلىن بەينەلەدى.

ساعات 20 دان 08 مينۋت وتكەندە، سپورتشىلاردىڭ الاڭعا كىرۋ سالتى باستالدى. «قار – مۇزبەن قىمتانعان ازيا» اتتى ويناقى مۋزىكا ءۇنى ىشىندە 34 مەملەكەت پەن رايوننان كەلگەن دەنە تاربيە ۋاكىلدەر ۇيىرمەسى ىركەس - تىركەس الاڭعا كىرىپ، بۇكىل الاڭداعى كورەرمەندەردىڭ قىزۋ قارسى الۋىنا بولەندى. «وتاندى جىرلايمىز» ءانىنىڭ اسقاق اۋەنى كوتەرىلدى، وتاعاسى ەل جۇڭگو ۋاكىلدەر ۇيىرمەسى ەڭ سوڭىندا الاڭعا كىردى، شي جينپيڭ مەن حانىمى پىڭ لييۋان ورىندارىنان تۇرىپ، قول بۇلعاپ قۇرمەت ءبىلدىردى، بۇكىل زالداعىلار الاقايلاپ، شاپالاق ءۇنى تولاستامادى. جۇڭگو ۋاكىلدەر ۇيىرمەسىندە جالپى 257 ادام بار، مۇنىڭ ىشىندە جارىسقا قاتىناساتىن سپورتشى 170 ادام، وسى كەزەكتى ازيا قىسقى سپورت جارىسىنىڭ 6 ۇلكەن ءتۇرى، 64 شاعىن ءتۇرى بويىنشا جارىسقا قاتىناسادى.

حاربين ازيا قىسقى سپورت جارىسىن ۇيىمداستىرۋ كوميسسياسىنىڭ ءتوراعاسى، حيلۇڭجياڭ ولكەسىنىڭ باستىعى لياڭ حۇيليڭ ارناۋ سوزىندە ۇيىمداستىرۋ كوميسسياسى مەن 30 ميلليوننان استام حيلۇڭجياڭ حالقى اتىنان ازياداعى ءارقايسى ەل مەن رايوننان كەلگەن سپورت ساڭلاقتارىن قىزۋ قارسى الاتىندىعىن ءبىلدىرىپ، ولاردىڭ جارىس مايدانىندا ءوزىن ونەرلەرىن بارىنشا ساۋلەلەندىرىپ، كەلبەتىن ايگىلەپ، ارمانىن ورىنداپ، دوستىققا قول جەتكىزۋىن تىلەدى.

حاربين ازيا قىسقى سپورت جارىسىن ۇيىمداستىرۋ كوميسسياسىنىڭ ءتوراعاسى، جۇڭگو وليمپيادا كوميتەتىنىڭ ءتوراعاسى گاۋ جىدان ارناۋ سوزىندە مىنانى ءبىلدىردى: ءتوراعا شي جينپيڭنىڭ ىقىلاستى قامقورلىعى مەن پارمەندى باسشىلىعىندا، ازيا قىسقى سپورت جارىسىنىڭ شىمىلدىعى اشىلۋ الدىندا تۇر. ءبىز جۇڭگو ۇلگىسىندەگى وسىزامانداندىرۋدىڭ ساليحالى تابىستارىمەن ءبولىسىپ، ازيا دەنە تاربيەسىنىڭ تىڭ دا شۇعىلالى كوركەم كارتيناسىن ءبىر نيەتپەن سىزىپ، ازيا تاعدىرلاس ورتاق تۇلعاسىنىڭ كوركەم سيمفونياسىن بىرگە اسقاقتاتايىق.

ازيا وليمپيادا القالار كەڭەسى ءتوراعاسىنىڭ ءبىرىنشى ورىنباسارى حو جىنتيڭ سوزىندە جۇڭگونىڭ ازيا قار - مۇز سپورتىن دامىتۋدا اتقارعان ماڭىزدى رولىن تۇراقتاندىرىپ، جۇڭگو ۇكىمەتىنىڭ، جۇڭگو وليمپيادا كوميتەتىنىڭ، حيلۇڭجياڭ ولكەلىك ۇكىمەتىنىڭ، حاربين قالالىق ۇكىمەتىنىڭ جانە ازيا قىسقى سپورت جارىسىن ۇيىمداستىرۋ كوميسسياسىنىڭ دەن قويا دايىندىق كورگەندىگىنە جانە ىنتىماقتاسا سەلبەسكەندىگىنە، سونداي - اق سپورتشىلاردىڭ، كورەرمەندەردىڭ جانە قىزمەتكەرلەردىڭ قولداۋىنا العىس ايتىپ، حاربين − ارمانداعىداي قار - مۇز قالاسى دەپ القادى.

ساعات 20 دان 51 مينۋت وتكەندە اشىلۋ سالتى جان تەبىرەنتەرلىك ساتتەردى قارسى الدى. مەملەكەت ءتوراعاسى شي جينپيڭ: حاربين 9 - كەزەكتى ازيا قىسقى سپورت جارىسى باستالدى! − دەپ جاريالادى. سول ساتتە بۇكىل الاڭ دۋمانعا بولەنىپ، شاپالاق ءۇنى ۇزاققا دەيىن تولاستامادى. جارقىراعان ءتۇستى جارقىلداق تۇنگى اسپاندى نۇرلاندىردى.

ەلىمىزدىڭ تاڭداۋلى سپورتشىلارىنىڭ 6 ۋاكىلى ازيا وليمپيادا القالار كەڭەسىنىڭ تۋىن كوتەرىپ الاڭعا كىردى. ازيا وليمپيادا القالار كەڭەسىنىڭ انىمەن بىرگە ازيا وليمپيادا القالار كەڭەسىنىڭ تۋى باياۋ كوتەرىلىپ، بەس جۇلدىزدى قىزىل تۋ اسقاق جەلبىرەدى.

سپورتشىلار نيڭ جۇڭيان مەن ساي شۋەتۇڭ، تورەشىلەر جاڭ چۇنحۇي مەن چىن ۋىنحۇڭ جارىسقا قاتىناسقان بارلىق سپورتشى مەن تورەشى اتىنان سەرت بەردى.

ىلە - شالا ۇلكەن ەكرانداعى قىسقا فيلم «جىگەردى جانىعان قىس» زالداعىلاردىڭ نازارىن اۋداردى: قار - مۇزدىڭ شاتتىعىنا بولەگەن حاربيندىكتەر ازيا قىسقى سپورت جارىسىن ەكى رەت وتكىزگەن قالانىڭ ىستىق ىقىلاسىن ايگىلەدى.

ادەبيەت - كوركەمونەر ويىندارى شىمىلدىعىن اشىپ، ويىن قويۋ الدىڭعى، ورتاڭعى، سوڭعى بولىپ ءۇش بولىمگە ءبولىندى. «جالىندى قار – مۇز» اتتى الدىڭعى ءبولىم اسقاق كەرناي ءۇنى ىشىندە باستالدى، مۇز جيناۋشى ازاماتتار مۇز ويعىش ۇستاپ، مۇز ۇستىندە بيگە باستى، ”باستاپقى مۇز“ وزەن جارا ورلەي كوتەرىلىپ، قىزىل تورعىنمەن قىمتالىپ، وسى كەزەكتى قىسقى سپورت جارىسىنىڭ «اسىپ ءتۇسۋ» اتتى بەلگىسىن نۇرلاندىردى، بالەت بيشىلەرى قارلى القاپتا بۇرالا بيگە باسىپ، ادام مەن تابيعات جاراسىمدى قاتار ءومىر سۇرگەن تاماشا كورىنىستى كەسكىندەدى. «ساعىمداي سىرعۋ» اتتى ورتاڭعى بولىمدە ازيا قىسقى سپورت جارىسى سپورتشىلارىنىڭ سامعاي ۇشقان ساليحالى ساتتەرى ەكراندا كورىنىس بەرىپ، مۇز بەتىندەگى ارمان جولىنداعى قۇلشىنىسپەن توعىسىپ، شاتتىققا شومعان قاۋىم بىرگە بيگە باستى، اق تىلەكتىڭ ايعاعىنداي الىپ تۇلعالى قار ادام الاڭ ورتاسىندا توبە كورسەتىپ، مۇز قالاسىنىڭ سالتاناتىنا بىرگە قادام تاستادى. «اسقار تاۋ، ايبىندى وزەن» اتتى سوڭعى بولىمدە بيشىلەر ازيا ەرەكشەلىگىندەگى كيىم-كەشەك كيىپ، قىزۋ ىنتامەن بيگە باسىپ، كوركەمدىكتىڭ كوپكە ورتاق بولۋى سىندى جاندى كارتينانى ايگىلەدى، وزىندىك ەرەكشەلىككە يە سامالدىق مۋزىكا كەشى ساحنادان كورەرمەندەر قاتارىنا دەيىن جالعاسىپ، ويناقتاعان مۋزىكا بەلگىسى تاعدىرلاس ازيا حالقىنىڭ ءبىر ءۇيلى جانداي بەرەكەسىن اڭعارتتى.

ساعات 21 دەن 24 مينۋت وتكەندە نەگىزگى الاۋدى تۇتاندىرۋ سالتى باستالدى. ۇلكەن ەكران حاربين قار - مۇز ءدۇبىرلى دۇنيەسى بولىمشە الاڭىمەن ۇشتاسىپ، ياڭ ياڭ، حان شياۋپىڭ، ۋاڭ جىن، جاڭ حۇڭ قاتارلى 4 الاۋگەر كۇش جالعاپ الاۋ جەتكىزىپ، بۇكىل الاڭدى قىزۋ شاپالاق ءۇنى كەرنەدى. مۇز شىراقتى كوتەرگەن بالالار الاۋ ۇستاۋشىمەن قول ۇستاسا العا ىلگەرىلەپ، نەگىزگى الاۋ مۇناراسىن بىرگە تۇتاندىردى، ”كۇمىستەي جارقىراعان قالامپىر اعاشى“ شۇعىلا شاشىپ، ازيا قىسقى سپورت جارىسىنىڭ قاسيەتتى الاۋى جالىندادى.

بۇكىل زالداعىلار «نۇرلانعان ازيا» اتتى ارقاۋ ءاندى بىرگە شىرقاپ، تۇتاس الاڭدى شاتتىق تەڭىزىنە اينالدىردى.

اشىلۋ سالتىنا حالىقارالىق سيلى قوناقتاردان برۋنەيدىڭ سۇلتانى حاساننار، قىرعىزستاننىڭ زۇڭتۇڭى جاپاروۆ جانە حانىمى جاپاروۆا، پاكيستاننىڭ زۇڭتۇڭى زارداري، تايلاندتىڭ زۇڭليى پەتانتان، كورەيانىڭ پارلامەنت باستىعى يۇي يۋانجى جانە حانىمى شىن جيڭحۇي قاتىناستى.

ۋاڭ ي، حى ليفىڭ، ۋاڭ شياۋحۇڭ، چىن ي - چين اشىلۋ سالتىنا قاتىناستى.

شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى سىن حاۋحۇي اشىلۋ سالتىنا قاتىناستى.

ازيا وليمپيادا القالار كەڭەسىنىڭ ءمانساپتىلارى قاتارلىلار اشىلۋ سالتىنا قاتىناستى.

كەلۋ قاينارى: حالىق تورابى