شي جينپيڭ مەن پىڭ لييۋان حاربين 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسقان حالىقارالىق سيلى قوناقتارعا ارناپ قارسى الۋ قوناعاسىن وتكىزدى

2 - ايدىڭ 7 - كۇنى تۇستە مەملەكەت ءتوراعاسى شي جينپيڭ مەن حانىمى پىڭ لييۋان حيلۇڭجياڭ ولكەسى حاربين قالاسىنىڭ كۇن ارالى قوناق ۇيىندە قوناعاسى بەرىپ، حاربين 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق سيلى قوناقتاردى قارسى الدى. سۋرەتتە: شي جينپيڭ مەن پىڭ لييۋان سيلى قوناقتارمەن بىرگە ەستەلىك سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

2 - ايدىڭ 7 - كۇنى تۇستە مەملەكەت ءتوراعاسى شي جينپيڭ مەن حانىمى پىڭ لييۋان حيلۇڭجياڭ ولكەسى حاربين قالاسىنىڭ كۇن ارالى قوناق ۇيىندە قوناعاسى بەرىپ، حاربين 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق سيلى قوناقتاردى قارسى الدى. سۋرەتتە: شي جينپيڭ ارناۋ ءسوز سويلەۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 2 – ايدىڭ 7 – كۇنى، حاربين. 2 – ايدىڭ 7 - كۇنى تۇستە مەملەكەت ءتوراعاسى شي جينپيڭ مەن حانىمى پىڭ لييۋان حيلۇڭجياڭ ولكەسى حاربين قالاسىنىڭ كۇن ارالى قوناق ۇيىندە قوناعاسى بەرىپ، حاربين 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋعا كەلگەن حالىقارالىق سيلى قوناقتاردى قارسى الدى.

ولار: برۋنەيدىڭ سۇلتانى حاساننار، قىرعىزستاننىڭ زۇڭتۇڭى جاپاروۆ جانە حانىمى جاپاروۆا، پاكيستاننىڭ زۇڭتۇڭى زارداري، تايلاندتىڭ زۇڭليى پەتانتان، كورەيانىڭ پارلامەنت باستىعى يۇي يۋانجى جانە حانىمى شىن جيڭحۇي، سونداي - اق حالىقارالىق وليمپيادا كوميتەتىنىڭ ءتوراعاسى باح، ازيا وليمپيادا القالار كەڭەسى ءتوراعاسىنىڭ ءبىرىنشى ورىنباسارى حو جىنتيڭ قاتارلىلار.

مۇزدى القاپ كوكتەم مەرەكەسىندە كۇمىس كورپە جامىلىپ، قار مول ءونىم جىلىن اڭعارتىپ تۇر.

شي جينپيڭ مەن پىڭ لييۋان سيلى قوناقتارمەن كوكتەم مەرەكەسىنە بايلانىستى ءوزارا قۇتتى بولسىن ايتتى، ىقىلاسپەن قول الىستى ءارى ەستەلىك سۋرەتكە ءتۇستى.

جۇڭگو مەن شەتەلدىڭ ۇلتتىق كيىمدەرىن كيگەن 40 ءوسپىرىم حيلۇڭجياڭنىڭ حالىق ءانى «ۋسسۋري كەمە ءانىن» شىرقاپ، حالىقارالىق سيلى قوناقتاردى قىزۋ قارسى الدى.

قوناعاسى زالىندا قار - مۇز سالتاناتى مەن دۋماندى كوكتەم مەرەكەسىنىڭ مەرەيى توعىسىپ، شاتتىققا شومدى.

شي جينپيڭ ارناۋ ءسوز سويلەپ، جۇڭگو ۇكىمەتى مەن جۇڭگو حالقى اتىنان 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق سيلى قوناقتاردى قىزۋ قارسى الاتىندىعىن ءبىلدىردى.

شي جينپيڭ بىلاي دەپ اتاپ كورسەتتى: 9 - كەزەكتى ازيا قىسقى سپورت جارىسىنىڭ قاسيەتتى الاۋى بۇگىن كەشتە تۇتاندىرىلادى. بەيجيڭ قىسقى وليمپياداسىنان حاربين قىسقى سپورت جارىسىنا دەيىن، جۇڭگونىڭ ”قار - مۇز دابىراسى“ وتانىمىزدىڭ تۇستىگى مەن تەرىستىگىنە تارالدى ءارى دۇنيە ءجۇزىنىڭ قار - مۇز سپورتىنا ومىرشەڭدىك كۇش قوستى. وسى كەزەكتى جارىسقا قاتىناسقان مەملەكەتتەر مەن رايونداردىڭ سانى، سپورتشىلاردىڭ سانى ازيا قىسقى سپورت جارىسىنىڭ تاريحىنداعى ەڭ جوعارى دەڭگەيگە جەتتى، ازيا وليمپيادا القالار كەڭەسى مەن ءار ەل، ءار رايون ۋاكىلدەر ۇيىرمەسىنىڭ بىرگە قۇلشىنۋىندا، حاربيننىڭ دۇنيە جۇزىنە ”جۇڭگوشا ەرەكشەلىگى بار، ازيا كەلبەتىن ايگىلەيتىن، تارتىمدى ساتتەرى ۇزىلمەيتىن“ دەنە تاربيە سالتاناتىن وتكىزىپ، قار - مۇز سپورتىنىڭ جاڭا داستانىن جازاتىندىعىنا سەنەمىن.

شي جينپيڭ بىلاي دەپ باسا دارىپتەدى: وسى كەزەكتى قىسقى سپورت جارىسى ”قار – مۇزداعى ورتاق ارماندى، ازيانىڭ تىلەكتەستىگىن“ نەگىزگى تاقىرىپ ەتىپ، ازيا حالقىنىڭ بەيبىتشىلىك، دامۋ، دوستىق جونىندەگى ورتاق تىلەگى مەن تالپىنىسىن ارقالاپ وتىر. تىنىش، بەرەكەلى بولۋ سىندى ورتاق ارماندى بەرىك ساقتاپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىنە ازيانىڭ كۇش - قۋاتىن ارناۋ كەرەك. گۇلدەنۋدىڭ، دامۋدىڭ ورتاق تالپىنىسىنا تاباندى بولىپ، ەكونوميكانىڭ جالپىعا ءتيىمدى، سيىسىمدى جاھاندانۋىنا سارقىلماس قوزعاۋشى كۇش ۇستەۋ كەرەك. توعىسۋ، ەتەنە بولۋ ورتاق ارمانىن جۇزەگە اسىرىپ، ادامزات وركەنيەتىنىڭ دامۋىنا، العا باسۋىنا اناعۇرلىم زور ۇلەس قوسۋ كەرەك.

شي جينپيڭ بىلاي دەپ اتاپ كورسەتتى: حاربين − جۇڭگونىڭ وسى زامانعى قار - مۇز سپورتىنىڭ باستالعان جەرى. ”اق قار، كوك مۇز دا − باعالى بايلىق“، قار - مۇز مادەنيەتى مەن قار - مۇز ەكونوميكاسى حاربيننىڭ جوعارى ساپالى دامۋىنىڭ جاڭا قوزعاۋشى قۋاتىنا جانە سىرتقا ەسىك اشۋىنىڭ جاڭا دانەكەرىنە اينالۋدا.

كوپشىلىكتىڭ ىستىق ىقىلاسقا تولى، اشىق، سيىسىمدى قارا توپىراقتى ەمىن - ەركىن ساياحاتتاپ، جۇڭگو ۇلگىسىندەگى وسىزامانداندىرۋدىڭ ىزىنە ءۇڭىلىپ، تاماشا دا ۇمىتىلماس قار - مۇز ەستەمەلەرىن قالدىرۋلارىن قارسى الامىن. سپورت ساڭلاقتارىنىڭ ەسكىشە كالەندار بويىنشا جىلان جىلى بەينە جىلانداي ايباتتى بولىپ، ەرلىكپەن تاماشا ناتيجە جاراتۋىن تىلەيمىن (ارناۋ ءسوزدىڭ تولىق مازمۇنىن «حالىق گازەتىنىڭ» 3 – بەتىنەن وقي الاسىزدار).

ساي چي، ۋاڭ ي، حى ليفىڭ، ۋاڭ شياۋحۇڭ، چىن ي - چين قاتارلىلار قيمىلعا قاتىناستى.

قارسى الۋ قوناعاسى باستالاردان بۇرىن سيلى قوناقتار حيلۇڭجياڭنىڭ بەيزاتتىق مادەنيەت مۇرالارى كورمەسىن تاماشالادى.

كەلۋ قاينارى: حالىق تورابى