شي جينپيڭ حالىقارالىق وليمپيادا كوميتەتىنىڭ ءتوراعاسى باحپەن كەزدەستى

2 - ايدىڭ 7 - كۇنى تۇستەن كەيىن مەملەكەت ءتوراعاسى شي جينپيڭ حاربيندە 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق وليمپيادا كوميتەتىنىڭ ءتوراعاسى باحپەن كەزدەستى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

«حالىق گازەتى»، 2 – ايدىڭ 7 – كۇنى، حاربين. 2 – ايدىڭ 7 - كۇنى تۇستەن كەيىن مەملەكەت ءتوراعاسى شي جينپيڭ حاربيندە 9 - كەزەكتى ازيا قىسقى سپورت جارىسىنىڭ اشىلۋ سالتىنا قاتىناسۋعا كەلگەن حالىقارالىق وليمپيادا كوميتەتىنىڭ ءتوراعاسى باحپەن كەزدەستى.

شي جينپيڭ بىلاي دەپ اتاپ كورسەتتى: تاياۋ جىلداردان بەرى جۇڭگو بەيجيڭ قىسقى وليمپياداسىن، چىڭدۋ ستۋدەنتتەر سپورت جارىسىن، حاڭجوۋ ازيا سپورت جارىسىن ءساتتى وتكىزدى، بۇگىن كەشتە حاربين ازيا قىسقى سپورت جارىسىن قارسى الادى. وسى كەلەلى دەنە تاربيە جارىستارى جۇڭگونىڭ حالىقارالىق وليمپيادا كوميتەتىمەن تىعىز ىنتىماقتاستىعىن ايگىلەدى. وليمپيادا رۋحى − ادامزات وركەنيەتىنىڭ ماڭىزدى قۇرامداس بولەگى، ول جۇڭگونىڭ جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋ نىساناسىمەن جانە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جوباسىمەن بارىنشا قابىسادى. جۇڭگو وليمپيادا رۋحىن جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرىپ، دەنە تاربيە ىستەرىن بار كۇشپەن دامىتىپ، دەنە تاربيەدە قۋاتتى ەل قۇرۋ، سالاماتتى جۇڭگو قۇرۋ نىساناسىنا قاراي قادام تاستادى، بۇل حالىقارالىق دەنە تاربيە ىستەرىنە ۇزدىكسىز تىڭ ۇلەس قوسادى. ءبىز حالىقارالىق وليمپيادا كوميتەتىمەن بىرگە وليمپيادا سپورتىنىڭ قارىشتاپ دامۋىن ۇزدىكسىز ىلگەرىلەتۋدى قالايمىز.

باح مىنالاردى ءبىلدىردى: جۇڭگو جاقتىڭ ۇزاق ۋاقىتتان بەرى حالىقارالىق وليمپيادا كوميتەتىن زور كۇشپەن قولداپ كەلگەندىگىنە العىس ايتامىن. جۇڭگو بەيجيڭ قىسقى وليمپياداسى سياقتى تارتىمدى دا ەستەن كەتپەس ماڭىزدى جارىستاردى ءساتتى وتكىزىپ، حالىقارالىق وليمپيادا ىستەرىنە ماڭىزدى ۇلەس قوستى. جۇڭگو ىنتىماقتاسا سەلبەسۋ، تەڭ تۇرعىدا قۇرمەت ەتۋ سياقتى ۇستانىمداردى دارىپتەپ جانە امالياتتا ايگىلەپ، كوپ جاقتىلىققا تاباندى بولىپ، دەنە تاربيەنى ساياسيلاندىرۋعا قارسى تۇرىپ، وركەندەپ كەلە جاتقان ەلدەردىڭ حالىقارالىق دەنە تاربيە ىستەرىنە كەڭ كولەمدە ات سالىسۋىنا قولداۋ كورسەتىپ، وليمپيادا سپورتىنىڭ اقاۋسىز دامۋىن پارمەندى ىلگەرىلەتتى. جۇڭگونىڭ اناعۇرلىم زور دامۋ جەتىستىكتەرى ارقىلى دۇنيە ءجۇزىنىڭ بەيبىتشىلىك، دامۋ، العا باسۋ ىستەرىندە اناعۇرلىم زور رول اتقاراتىندىعىنا سەنەمىن. حاربين ازيا قىسقى سپورت جارىسىنىڭ ءسوزسىز تابىستى بولاتىندىعىنا سەنەمىن.

ساي چي، ۋاڭ ي، چىن ي - چين قاتارلىلار كەزدەسۋدە بىرگە بولدى.

كەلۋ قاينارى: حالىق تورابى