ديڭ شۋەشياڭ قازاقستان زۇڭليىنىڭ ءبىرىنشى ورىنباسارى سكليارمەن كەزدەستى ءارى جۇڭگو - قازاقستان سەلبەستىك كوميتەتىنىڭ 12 - رەتكى ءماجىلىسىن بىرگە باسقاردى

شينحۋا اگەنتتىگى، 3 - ايدىڭ 18 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 3 - ايدىڭ 18 - كۇنى بەيجيڭدە قازاقستان زۇڭليىنىڭ ءبىرىنشى ورىنباسارى سكليارمەن كەزدەستى ءارى جۇڭگو - قازاقستان سەلبەستىك كوميتەتىنىڭ 12 - رەتكى ءماجىلىسىن بىرگە باسقاردى.

ديڭ شۋەشياڭ مىنالاردى ءبىلدىردى: جۇڭگو مەن قازاقستان − ءوزارا قارايلاساتىن جاقسى كورشىلەر، دامۋعا بىرگە تالپىناتىن جاقسى دوستار، ءوزارا پايدا جەتكىزىپ، تەڭ يگىلىككە كەنەلەتىن جاقسى سەرىكتەر. ەكى ەل مەملەكەت باسشىلارىنىڭ تىكەلەي كوڭىل ءبولۋى مەن جەبەۋىندە، جۇڭگو - قازاقستان قارىم - قاتىناسى جەدەل دامۋ ارىنىن ساقتاپ، مەملەكەتتەر ارا قارىم - قاتىناستىڭ ۇلگىسىنە اينالدى. بىلتىر 7 - ايدا ءتوراعا شي جينپيڭ قازاقستاندا مەملەكەتتىك ساپاردا بولىپ، توقايەۆ زۇڭتۇڭمەن بىرگە ستراتەگيالىق ورنالاستىرۋ جاساپ جانە ءبىر تۇتاس جوسپارلاپ، جۇڭگو مەن قازاقستاننىڭ باياندى، جان - جاقتى ستراتەگيالىق سەرىكتەستىك قارىم - قاتىناسىنىڭ دامۋىنا ايقىن بەتالىس كورسەتىپ، جوبا جاسادى. ەكى جاق ەكى ەل مەملەكەت باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، ساياسي سەنىمدىلىكتى ونان ارى بەكەمدەپ، ءوزارا قولداۋدى نىعايتىپ، دامۋ ستراتەگياسىن ۇشتاستىرۋدى كۇشەيتىپ، ناقتى سەلبەستىكتى تەرەڭدەتىپ، ەكى ەلگە ەكى ەل حالقىنا ءتىپتى دە زور باقىت جاراتۋى كەرەك.

ديڭ شۋەشياڭ جۇڭگو - قازاقستان سەلبەستىك كوميتەتىنىڭ 11 - ماجىلىسىنەن بەرگى ءتۇرلى قىزمەت ونىمدىلىگىن تولىق تۇراقتاندىرىپ، كەلەسى قادامداعى قىزمەت جونىندە 4 ءتۇرلى ۇسىنىس قويدى. ءبىرىنشى، مەملەكەت باسشىلارىنىڭ ديپلوماتيالىق جەتەكشىلىگىن كۇشەيتىپ، ەكى ەل باسشىلارىنىڭ ستراتەگيالىق ورنالاستىرۋلارىنىڭ تياناقتانىپ، ءونىم بەرۋىنە كەپىلدىك ەتىپ، اناعۇرلىم باي مازمۇندى جانە ومىرشەڭدىك كۇشكە يە جۇڭگو - قازاقستان تاعدىرلاس ورتاق تۇلعاسىن قول ۇستاسا قۇرۋ. ەكىنشى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ سەلبەستىگىن تەرەڭدەتىپ، ەكونوميكا - ساۋدا، قارجى قوسۋ، ۇلاستىرۋ - تۇتاستىرۋ، ەنەرگيا، كەن ونىمدەرى سياقتى سالالارداعى سەلبەستىكتىڭ ساپاسىن جوعارىلاتىپ، ونىمدىلىگىن ارتتىرۋدى جەبەۋ. ءۇشىنشى، حاۋىپسىزدىك قالتقىسىن ۇزدىكسىز بەكەمدەپ، زاڭ اتقارۋ حاۋىپسىزدىگى سەلبەستىگىنىڭ تەرەڭدەۋىن، ناقتىلانۋىن ىلگەرىلەتىپ، ءتۇرلى حاۋىپ - قاتەر مەن سىن - سايىستان ءونىمدى ساقتانۋ. ءتورتىنشى، گۋمانيتارلىق اۋىس - كۇيىس دانەكەرىن كۇشەيتىپ، قوعامنىڭ ءار سالاسىنىڭ ءجيى بارىس - كەلىس جاعدايىن جالعاستىرىپ، جۇڭگو مەن قازاقستاننىڭ دوسجار حالىق رايى نەگىزىن بەكەمدەۋ.

سكليار مىنانى ءبىلدىردى: قازاقستان جاق جۇڭگومەن قارىم - قاتىناستى دامىتۋدى ديپلوماتيادا الدىمەن ەسكەرىلەتىن باعىت سانايدى، جۇڭگو جاقپەن ەكى جاقتى سەلبەستىك مەحانيزمىنىڭ رولىن تولىق ساۋلەلەندىرىپ، ”ءبىر بەلدەۋ، ءبىر جولدى“ بىرگە قۇرۋداعى ءتۇيىندى نىسانداردى ويداعىداي تياناقتاندىرىپ، قازاقستان - جۇڭگو سەلبەستىگىنىڭ ۇزدىكسىز تىڭ جەتىستىكتەرگە جەتۋىن ىلگەرىلەتۋدى قالايدى.

ءماجىلىس كەزىندە ەكى جاق ەكونوميكا - ساۋدا، قارجى قوسۋ، ۇلاستىرۋ - تۇتاستىرۋ، عىلىم - تەحنيكادا جاڭالىق اشۋ، ەنەرگيا، كەن ونىمدەرى، اۋىل شارۋاشىلىعى، قورشاعان ورتانى قورعاۋ سياقتى سالالارداعى سەلبەستىك پەن گۋمانيتارلىق اۋىس - كۇيىس جاعدايىن بىرگە اشالاپ، كەلەسى كەزەڭدە سەلبەستىكتى تەرەڭدەتۋ جونىندە پىكىر اۋىستىرىپ، كەڭ كولەمدى ورتاق تانىمعا كەلدى.

ماجىلىستەن كەيىن ديڭ شۋەشياڭ مەن سكليار «جۇڭگو - قازاقستان سەلبەستىك كوميتەتى 12 - ءماجىلىسىنىڭ ماڭىزدى ەستەلىگىنە» بىرگە قول قويدى ءارى سەلبەستىك قۇجاتىنا قول قويۋعا كۋا بولدى.

كەلۋ قاينارى: حالىق تورابى