تايكەشكەن وتكەلىنەن كىرىپ - شىققان ادام سانى سايكەس مەزگىلدەگىدەن %20 ارتتى

شينجياڭ گازەتىنىڭ 4 – ايدىڭ 3 – كۇنى التايدان بەرگەن حابارى. تايكەشكەن شەكارادان كىرىپ ـ شىعۋ شەكارا قورعانىس تەكسەرۋ پۋنكتىنىڭ ساناعىنا قاراعاندا، بيىل 1 ـ ايدان 3 ـ ايعا دەيىن تايكەشكەن وتكەلىنەن شەكارادان كىرىپ ـ شىققاندار 32 مىڭ ادام ـ رەتتەن اسىپ، سايكەس مەزگىلدەگىدەن %20 ارتقان، يمپورت ـ ەكسپورت زاتتارىنىڭ جالپى مولشەرى 710 مىڭ تونناعا جەتىپ، سايكەس مەزگىلدەگىدەن %2.9 ارتقان، شەكارا اتتاعان ساۋدانىڭ ومىرشەڭدىك كۇشى جوعارىلاعان.

3 ـ ايدىڭ 31 ـ كۇنى تۇستەن كەيىن ساعات 6 مولشەرىندە، ىشكى موڭعۇل دۇڭشيڭ ەنەرگيا شەكتى سەرىكتەستىگىنەن ۇيىمداسقان تەكسەرۋ ۇيىرمەسى موڭعۇليانىڭ قوبدا ولكەسىنە بارىپ تەكسەرۋ جۇرگىزىپ، تايكەشكەن وتكەلىندە كەدەننەن ءوتۋ رەسميەتىن 5 مينۋتتا ـ اق تولىق ورىندادى. جوعارى ءونىمدى كەدەننەن ءوتۋ بارىسى وسى سەرىكتەستىكتىڭ شەكارا وتكەلىنىڭ قولايلى، جوعارى ءونىمدى كەدەننەن ءوتۋ ورتاسىن القاۋىنا يە بولدى. وسى سەرىكتەستىكتىڭ باس جوراسى جوۋ جيان ـ ي بىلاي دەدى: ”ساياسات بارعان سايىن جاقسارىپ، شەكارالىق تەكسەرۋ قىزمەتى ءتارتىپتى بولىپ، بىزگە كوپتەگەن قولايلىلىقتار اكەلدى، كەدەننەن ءوتۋ ءارى تەز ءارى قولايلى بولدى.“

بيىل، تايكەشكەن وتكەلى ساۋداسىنىڭ دامۋى تىڭ تابىستارعا قول جەتكىزدى. 3 ـ ايدىڭ 10 ـ كۇنى سالماعى 800 توننا كەلەتىن اۆتوكولىككە پايدالانىلاتىن سالەركا تاسجول تاسىمالى ارقىلى تايكەشكەن وتكەلىنەن موڭعۇلياعا ەكسپورت ەتىلدى. قازىر تايكەشكەن وتكەلىنىڭ يمپورت ـ ەكسپورت زاتتارى ەنەرگيا، ماشينا جابدىقتارى، قۇرىلىس ماتەريالدارى، ازىق ـ تۇلىك، مۇناي قاتارلى كوپتەگەن سالالاردى قامتىپ، جۇڭگو مەن موڭعۇليانىڭ ساۋدا سەلبەستىگىن تەرەڭدەتۋگە شىت جاڭا ومىرشەڭدىك كۇش قوستى.

جۇڭگو مۇناي كۇنلۇن زات جەتكىزۋ شەكتى سەرىكتەستىگى شينجياڭ مۇناي الابى تاسىمال بولىمشە سەرىكتەستىگىنىڭ باسقارۋشىسى ۋاڭ شينجۇڭ بىلاي دەدى: ”3 - ايدىڭ 10 - كۇنىنەن بەرى، ءبىز 800 توننا اۆتوكولىككە پايدالانىلاتىن سالەركانى ءساتتى ەكسپورت ەتتىك، 3 اۆتوكولىك 10 مينۋتقا جەتپەيتىن ۋاقىتتا ءساتتى تۇردە شەكارادان شىقتى. 4 ـ ايدا ءبىز تاسىمال مولشەرىن 3500 تونناعا جەتكىزۋدى جوسپارلادىق، كەيىن تاعى دا ورنىقتى ىلگەرىلەتىپ، مۇناي ونىمدەرىن ەكسپورت ەتۋدى تايكەشكەن وتكەلىنىڭ جاڭا جارقىن تۇيىنىنە جانە ۇدايىلانعان ساۋدا نىسانىنا اينالدىرامىز.“

تايكەشكەن شەكارادان كىرىپ - شىعۋ شەكارا قورعانىس تەكسەرۋ پۋنكتى جولاۋشى مولشەرىنىڭ تەز ارتۋ جاعدايىنا باعىتتاي وتىرىپ، وزىق تەكسەرۋ جابدىقتارىن ەنگىزىپ، حاۋىپ - قاتەردى الدىن الا تۇجىرىمداۋ مەحانيزمىن اتقارىپ، تەكسەرۋ ونىمدىلىگىن بارىنشا جوعارىلاتتى. سونىمەن بىرگە، زەردەلى تەكسەرۋ جۇيەسىنە سۇيەنىپ، ءىرى ساندى مالىمەت پەن جاساندى زەردە تەحنيكاسىنان پايدالانىپ، جولاۋشىلاردى دالمە - ءدال پارىقتاۋدى جانە تەز ارادا تەكسەرىپ وتكىزۋدى جۇزەگە اسىردى.

كەلۋ قاينارى: حالىق تورابى