سىرتقى ىستەر مينيسترلىگى: ا ق ش – تى شيزاڭعا ساياتىن ماسەلەلەردەن پايدالانىپ جۇڭگونىڭ ىشكى ىسىنە كيلىگۋىن توقتاتۋعا قۋزايمىز

شينحۋا اگەنتتىگىنىڭ 4 – ايدىڭ 1 – كۇنى بەيجيڭنەن بەرگەن حابارى. ا ق ش – تىڭ مەملەكەت ىستەر حاتشىسى رۋبيو بىرنەشە كۇننىڭ الدىندا شيزاڭعا ساياتىن دەگەندى سىلتاۋ ەتىپ، ا ق ش مەملەكەتتىك كەڭەسىنىڭ تورابىندا مالىمدەمە جاريالاپ، جۇڭگو جاقتىڭ ءبىر ءبولىم ءمانساپتىلارىنا ۆيزا شەكتەمەسىن اتقاراتىندىعىن ايتتى، سىرتقى ىستەر مينيسترلىگىنىڭ مالىمدەمەشىسى گو جياكۇن 4 – ايدىڭ 1 - كۇنى كەزەكتى تىلشىلەر جينالىسىندا بىلاي دەدى: جۇڭگو ا ق ش – تى شيزاڭعا ساياتىن ماسەلەلەردەن پايدالانىپ جۇڭگونىڭ ىشكى ىسىنە كيلىگۋىن توقتاتۋعا قۋزايدى، قاجەتتى شارالاردى قولدانادى، ا ق ش - تىڭ قاتە ارەكەتىنە باتىل قارسى تۇرادى.

گو جياكۇن بىلاي دەدى: ا ق ش ـ تىڭ ارەكەتى شيزاڭ ىستەرى مەن جۇڭگونىڭ ىشكى ىسىنە دورەكىلىكپەن كيلىگىپ، حالىقارالىق زاڭ مەن حالىقارالىق قاتىناستىڭ نەگىزگى ولشەمىنە اۋىر قايشىلىق جاسادى، جۇڭگو بۇعان قاتتى نارازى بولىپ، باتىل قارسى تۇرادى.

”مەن مىنانى باسا دارىپتەيمىن: شيزاڭ ‐ اشىق شيزاڭ، شەتەلدىكتەردىڭ شيزاڭعا كىرۋىن شەكتەۋ جونىندە ەشقاشان بەلگىلەمە شىعارعان ەمەس. شيزاڭ ءار جىلى قىرۋار شەتەلدىك ساياحاتشىلار مەن ءار سالا قايراتكەرلەرىن قابىلدايدى، 2024 ـ جىلى تۇتاس جىلدا جيىنى 320 مىڭ ادام ـ رەت شەتەلدىك ساياحاتشى قابىلدادى.“ گو جياكۇن مىنانى ءبىلدىردى: شيزاڭنىڭ ەرەكشە جاعراپيالىق جانە كليمات شارت ـ جاعدايى سياقتى فاكتورلاردى ەسكەرە وتىرىپ، جۇڭگو ۇكىمەتى زاڭ ـ ەرەجە بويىنشا شەتەلدىكتەردىڭ شيزاڭعا كىرۋىنە بەلگىلى باسقارۋ جانە قورعاۋ شارالارىن قولداندى، بۇل بۇكىلدەي قاجەتتى. جۇڭگو شەتەلدىك قايراتكەرلەردىڭ جۇڭگونىڭ شيزاڭ رايونىنا ساپارلاي بارۋىن، ساياحاتتاۋىن، ساۋدامەن شۇعىلدانۋىن قارسى الادى، ءبىراق جۇڭگونىڭ زاڭدارى مەن قاتىستى بەلگىلەمەلەرىنە بويسۇنۋى كەرەك. جۇڭگو شيزاڭنىڭ ادامدىق ۇقىق، ءدىن، مادەنيەت ىستەرىنىڭ قازىرگى دامۋ جاعدايىن قيسىنسىز قارالاۋعا قارسى تۇرادى، شەتەل ءمانساپتىلارىنىڭ شيزاڭعا كىرىپ مىندەت وتەۋدى جەلەۋ ەتىپ، كەدەرگىلىك جاساۋ، ءبۇلدىرۋ ارەكەتتەرىمەن شۇعىلدانۋىنا قارسى تۇرادى.

”جۇڭگو ا ق ش - تى شيزاڭ ماسەلەسىندە بەرگەن ۋادەسىندە بەرىك تۇرۋعا، ”شيزاڭدى بولشەكتەۋشى“ كۇشتەردى ىرقىنا جىبەرۋدى توقتاتۋعا، شيزاڭعا ساياتىن ماسەلەلەردەن پايدالانىپ جۇڭگونىڭ ىشكى ىسىنە كيلىگۋدى توقتاتۋعا قۋزايدى. جۇڭگو قاجەتتى شارالار قولدانىپ، ا ق ش ـ تىڭ قاتە ارەكەتىنە باتىل قارسى تۇرادى.“دەدى گو جياكۇن.

كەلۋ قاينارى: حالىق تورابى