ساقتىق دارەجەسى جوعارىلاتىلدى! شينجياڭنىڭ وسى جەرلەرىندە كۇشتى سۋىق اعىس بولادى

جۇڭگو اۋا رايى تورابىنىڭ حابارىنا قاراعاندا، 3 - ايدىڭ 25 - كۇنى ساعات 16 دان 32 مينۋت وتكەندە شينجياڭ اۋا رايى ستانسياسى سۋىق اعىستان ساقتانۋدىڭ كوك ءتۇستى ساقتىق سيگنالىن سۋىق اعىستان ساقتانۋدىڭ سارى ءتۇستى ساقتىق سيگنالىنا كوتەرگەن. مەجەمەن 3 - ايدىڭ 25 - كۇنى تۇننەن 27 - كۇنى تۇنگە دەيىن التاي ايماعى، حوتان ايماعىنىڭ شىعىس بولەگى، بايىنعولىن وبلىسىنىڭ وڭتۇستىك بولەگى، تۇرپان قالاسى، قۇمىل قالاسى قاتارلى جەرلەردىڭ ءىشىنارا وڭىرلەرىندە ەڭ تومەنگى تەمپەراتۋرا 10 دا 14 سەلتسي گرادۋس تومەندەپ، قاتتى سۋىق اعىس جۇرەدى. ساقتانۋدى كۇشەيتىڭىز.

3 – ايدىڭ 26 – كۇنى تۇننەن 27 – كۇنى كۇندىزگە دەيىن وڭتۇستىك شينجياڭنىڭ باتىس بولەگى، قۇمىل قالاسىنىڭ سولتۇستىگىندەگى تاۋلى رايوندار قاتارلى جەرلەردىڭ ءىشىنارا وڭىرلەرىندە سەبەزگى جاڭبىر جاۋىپ، جاڭبىر سوڭى قارعا اينالادى نەمەسە قار جاۋادى، مۇنىڭ ىشىندە وڭتۇستىك شينجياڭنىڭ باتىس بولىگىندەگى ءىشىنارا وڭىرلەردە ورتاشا جانە قالىڭ جاڭبىر نەمەسە قار جاۋادى، قىزىلسۋ وبلىسىنىڭ ءىشىنارا وڭىرلەرىندە قالىڭ قار جاۋادى، كەي جەرلەرىندە ەرەكشە قالىڭ قار جاۋادى؛ شىعىس شينجياڭنىڭ جەل وتتەرىندە باتىس سولتۇستىكتەن 8 دە 9 بال بوران سوعادى، وڭتۇستىك شينجياڭداعى ويپاتتاردا قيىس شىعىستان 6 بال اينالاسىندا بوران سوعادى، مەزەتتىك جەل كۇشى 9 دا 10 بالعا جەتەدى، ءىشىنارا وڭىرلەردە قۇمدى بوران سوعادى. وڭتۇستىك شينجياڭداعى ويپاتتاردىڭ ءىشىنارا وڭىرلەرىندە ەڭ تومەنگى تەمپەراتۋرا 8 سەلتسي گرادۋس اينالاسىندا تومەندەيدى، كەي جەرلەردە 10 دا 14 سەلتسي گرادۋس تومەندەپ، سۋىق اعىس جۇرەدى.

3 - ايدىڭ 27 - كۇنى تۇننەن 28 - كۇنى كۇندىزگە دەيىن ىلە اڭعارىنىڭ وڭتۇستىگىندەگى تاۋلى وڭىرلەردە، وڭتۇستىك شينجياڭنىڭ باتىس تاۋلى وڭىرلەرىندە، اقسۋ ايماعىنىڭ باتىس بولىگىندەگى تاۋلى وڭىرلەردە سەبەزگى جاڭبىر جاۋىپ سوڭى قارعا اينالادى نەمەسە قار جاۋادى، مۇنىڭ ىشىندە قىزىلسۋ قىرعىز اۆتونوميالى وبلىسىنىڭ تاۋلى وڭىرلەرىنىڭ، قاشقار ايماعىنىڭ وڭتۇستىك تاۋلى وڭىرلەرىنىڭ ءىشىنارا جەرلەرىندە ورتاشا جانە قالىڭ جاڭبىر نەمەسە قار جاۋادى؛ تارباعاتاي ايماعىنىڭ سولتۇستىگى، التاي ايماعىنىڭ باتىس بولەگى، ءۇرىمجى قالاسىنىڭ وڭتۇستىك ىرگەسىنەن دابانچىڭعا دەيىنگى ارالىقتا، سانجى وبلىسىنىڭ شىعىس بولەگى قاتارلى جەرلەردىڭ ءىشىنارا وڭىرلەرىندە قيىس شىعىستان 5 بال اينالاسىندا جەل سوعادى، مۇنىڭ ىشىندە تارباعاتاي ايماعىنىڭ سارعۋسىن جانە مايتاس جەل رايونى، التاي ايماعىنىڭ نوقاي جەل ءوتى، ءۇرىمجى قالاسىنىڭ ۇلانباي جانە حۇڭيانچى قاتارلى جەل وتتەرىندە جەل كۇشى 8 دە 9 بال بولادى. وڭتۇستىك شينجياڭداعى ويپاتتاردىڭ شىعىس بولەگىندە قيىس شىعىستان 5 بال اينالاسىندا جەل سوعادى، مەزەتتىك جەل كۇشى 6 دا 7 بالعا جەتەدى، ءىشىنارا وڭىرلەردە قۇمدى بوران سوعادى.

كەلۋ قاينارى: حالىق تورابى