سىرتقى ىستەر مينيسترلىگى ا ق ش جاقتى ءتۇرلى جازالاۋ تىزىمدىكتەرىن الباتى پايدالانۋ ارقىلى جۇڭگونىڭ كاسىپورىندارىنا ءجونسىز قىسىم جاساۋدى توقتاتۋعا قۋزايدى 

شينحۋا اگەنتتىگىنىڭ ءتىلشىسى فىڭ شينران، ما جويان 3 – ايدىڭ 26 – كۇنى بەيجيڭنەن حابارلايدى. ا ق ش ساۋدا مينيسترلىگىنىڭ جۇڭگونىڭ ون نەشە ناقتى تۇلعاسىن ەكسپورت ەتۋدى باسقارۋ – تەجەۋ تىزىمدىگىنە ەنگىزگەنى جونىندە، سىرتقى ىستەر مينيسترلىگىنىڭ مالىمدەمەشىسى گو جياكۇن 3 – ايدىڭ 26 – كۇنى كەزەكتى تىلشىلەردى قابىلداۋ ماجىلىسىندە بىلاي دەدى: جۇڭگو جاق بۇعان باتىل قارسى تۇرىپ، قاتاڭ جازعىردى، ا ق ش جاقتى ءتۇرلى جازالاۋ تىزىمدىكتەرىن الباتى پايدالانۋ ارقىلى جۇڭگونىڭ كاسىپورىندارىنا ءجونسىز قىسىم جاساۋدى توقتاتۋعا قۋزايدى.

گو جياكۇن مىنانى اتاپ كورسەتتى: ا ق ش جاقتىڭ ”ناقتى تۇلعالار تىزىمدىگى“ قاتارلى ەكسپورتتى باسقارۋ – تەجەۋ قۇرالدارىن الباتى پايدالانىپ، ”ا ق ش – نىڭ مەملەكەت حاۋىپسىزدىگىنە زيان جەتكىزەدى، ا ق ش – نىڭ ديپلوماتيالىق ساياساتتارىنا قايشى كەلەدى“ دەگەندى جەلەۋ ەتىپ، زاڭسىز سىڭار جاقتىلى جازالاۋ شارالارىن الباتى قولدانۋى تيپتىك زورەكەرلىك ارەكەت سانالادى، حالىقارالىق زاڭ مەن حالىقارالىق قارىم – قاتىناس ەرەجەلەرىنە اۋىر دارەجەدە قايشى كەلەدى، كاسىپورىنداردىڭ زاڭدى ۇقىق – مۇددەسىنە اۋىر دارەجەدە زيان جەتكىزەدى، دۇنيە جۇزىلىك ءوندىرىس پەن قامداۋ تىزبەگىنىڭ حاۋىپسىزدىگى مەن ورنىقتىلىعىن بۇلدىرەدى.

ول: ”ءبىز ا ق ش جاقتى مەملەكەت حاۋىپسىزدىگى ۇعىمىنىڭ كولەمىن شەكتەن تىس كەڭەيتۋدى توقتاتۋعا، ەكونوميكا، ساۋدا، عىلىم – تەحنيكا جاقتارىنداعى ماسەلەلەردى ساياسيلاندىرۋدى، قۇرالعا اينالدىرۋدى، قارۋعا اينالدىرۋدى توقتاتۋعا، ءتۇرلى جازالاۋ تىزىمدىكتەرىن قولدانىپ، جۇڭگو كاسىپورىندارىنا ءجونسىز قىسىم جاساۋدى توقتاتۋعا قۋزايمىز. جۇڭگو جاق قاجەتتى شارالاردى قولدانىپ، جۇڭگو كاسىپورىندارىنىڭ زاڭدى ۇقىق – مۇددەسىن باتىل قورعايدى“ دەدى.

كەلۋ قاينارى: حالىق تورابى