عىلىم - تەحنيكادا جاڭالىق اشۋدىڭ دۇنيە جۇزىلىك ىقپالعا يە بيىك تۇعىرىن جەدەل قۇرىپ شىعۋ كەرەك

4 - ايدىڭ 29 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شاڭحايدا قىزمەت تەكسەردى. سۋرەتتە: شي جينپيڭ شۇيحۇي رايونىنداعى شاڭحاي ”مودەل كەڭىستىگى“ ۇلكەن مودەلدىك جاڭالىق اشۋ ەكولوگيالىق الەۋمەتتىك اۋماعى جاساندى زەردە ونىمدەرىن بايقاپ كورۋ دۇكەنىندە قىزمەت تەكسەرۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

4 - ايدىڭ 29 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شاڭحايدا قىزمەت تەكسەردى. سۋرەتتە: شي جينپيڭ شۇيحۇي رايونىنداعى شاڭحاي ”مودەل كەڭىستىگى“ ۇلكەن مودەلدىك جاڭالىق اشۋ ەكولوگيالىق الەۋمەتتىك اۋماعىندا ”كەلەر بۋىن زەردەلى دەنەلەرىنىڭ دەربەس بىرتىندەپ دامۋى“ نەگىزگى تاقىرىپتىق سالونىنا قاتىناسىپ جاتقان جاس جاسامپاز دارىندىلارمەن ىقىلاسپەن اڭگىمەلەسۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 4 - ايدىڭ 29 – كۇنى، شاڭحاي. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 4 - ايدىڭ 29 - كۇنى شاڭحايدا قىزمەت تەكسەرگەندە بىلاي دەپ باسا دارىپتەدى: شاڭحاي حالىقارالىق عىلىم - تەحنيكادا جاڭالىق اشۋ ورتالىعىن قۇرۋ سىندى تاريحي بورىشتى ارقالاپ وتىر، ورايدى مىقتى يگەرىپ، مەملەكەت ستراتەگياسىنا قىزمەت وتەۋدى جەتەكشى ەتىپ، عىلىم - تەحنيكادا جاڭالىق اشۋدىڭ قاينار كوزى يقۋاتى مەن جوعارى دەڭگەيدەگى كاسىپ سالاسىنىڭ جەتەكشىلىك يقۋاتىن ۇزدىكسىز كۇشەيتىپ، دۇنيە جۇزىلىك ىقپالعا يە عىلىم - تەحنيكادا جاڭالىق جاراتۋ بيىگىن جەدەل قۇرۋى كەرەك.

4 - ايدىڭ 29 - كۇنى تۇستەن بۇرىن شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، شاڭحاي قالالىق پارتكومنىڭ شۋجيى چىن جينيڭ مەن قالا باستىعى گۇڭ جىڭنىڭ سەرىك بولۋىندا شۇيحۇي رايونىنداعى شاڭحاي ”مودەل كەڭىستىگى“ ۇلكەن مودەلدىك جاڭالىق اشۋ ەكولوگيالىق الەۋمەتتىك اۋماعىنا بارىپ تەكسەرۋ - زەرتتەۋ جۇرگىزدى.

”مودەل كەڭىستىگى“ − شاڭحاي قالاسى قۇرعان جاساندى زەردە ۇلكەن مودەلى كاسىبىن جەتىلدىرۋ جانە جەدەلدەتۋ تۇعىرى، وعان 100 دەن استام كاسىپورىن ىرگە تەپكەن. شي جينپيڭ وسى اراعا كەلىپ، بەينە ەكران قىسقا فيلمى ارقىلى شاڭحاي قالاسىنىڭ جاساندى زەردە كاسىبىنىڭ دامۋ جاعدايىن ۇعىسىپ، ءتۇيىندى جەتىلدىرىلگەن كاسىپورىنداردىڭ ۇلكەن مودەل ونىمدەرى كورمەسىن كورىپ، قاتىستى تەحنيكالىق زەرتتەۋ - اشۋ جانە كاسىپورىنداردىڭ ءوندىرىس - تيجاراتى جونىندەگى تانىستىرۋدى تىڭدادى. شي جينپيڭ شاڭحايدىڭ جاساندى زەردەنى بەلسەنە دامىتۋدا قول جەتكىزگەن ناقتى ونىمدىلىگىن تۇراقتاندىردى. ول بىلاي دەپ اتاپ كورسەتتى: جاساندى زەردە تەحنيكاسى جەدەل جاڭالانىپ، قاۋىرت دامۋدا، شاڭحاي ۇلكەن مودەل كاسىپ سالاسى ەكولوگيالىق جۇيەسى ارقىلى جاساندى زەردە كاسىپ سالاسىن جەتىلدىرۋ سياقتى تابىستى تاجىريبەلەردى ويداعىداي قورىتىندىلاپ، ىزدەنىس سەرپىنىن ارتتىرىپ، جاساندى زەردەنىڭ دامۋى مەن جونگە سالۋدىڭ ءارقايسى جاعىندا الدىڭعى لەكتە جۇرۋگە كۇش سالىپ، ۇلگى كورسەتۋ اسەرىن تۋدىرۋى كەرەك.

”مودەل كەڭىستىگىنىڭ“ 3 - قاباتىندا ”كەلەر بۋىن زەردەلى دەنەلەرىنىڭ دەربەس بىرتىندەپ دامۋى“ نەگىزگى تاقىرىپتىق سالونى وتكىزىلىپ جاتتى. شي جينپيڭ قۋانىشپەن قاتىناسىپ، سول جەردەگى جاس جاسامپاز دارىندىلارمەن ىقىلاسپەن اڭگىمەلەستى. كوپشىلىك باس شۋجيگە وزدەرى تۇرعان ۇجىمنىڭ جاساندى زەردە تەحنيكاسىن زەرتتەۋدەن جانە كاسىپ سالاسىن قولدانۋدان العان اسەرلەرىنەن مالىمەت بەردى. شي جينپيڭ كوپشىلىككە بىلاي دەدى: جاساندى زەردە − جاڭا باستالعان ءىس ءارى جاستاردىڭ ءىسى. ءبىز قازىر مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدەمىز، جاس ۇرپاقتاردىڭ دارىنىن ايگىلەيتىن، ءوز ونەرىن كورسەتەتىن تاماشا كەزى. جۇڭحۋا ۇلتىنىڭ ۇلى ارمانىن جۇزەگە اسىرۋدا ءۇمىت جاستارعا قويىلىپ وتىر. كوپشىلىك وتانشىلدىق سەزىمىندە بولىپ، وتان ءۇمىتىن اقتاۋ مۇراتىن ورناتىپ، مەملەكەت ءۇشىن ىستەۋ قابىلەتىن كۇشەيتىپ، جەكە باسىنىڭ كۇرەسىن مەملەكەتتىڭ بولاشاعىمەن، تاعدىرىمەن تىعىز بايلانىستىرىپ، تاريحتىڭ ۇتىلامالى تاياقشاسىن جاقسى جالعاپ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ كەڭ ساحناسىندا جاستىق جالىنىن لاۋلاتۋى كەرەك.

وسىدان كەيىن شي جينپيڭ جاساندى زەردە ونىمدەرىن بايقاپ كورۋ دۇكەنىنە كىردى.

سورەدە زەردەلى كوزىلدىرىك، زەردەلى بالالار ويىنشىعى، زەردەلى مۋزىكا اسپابى سياقتى جاسامپازدىق ونىمدەرى كوزدىڭ جاۋىن الادى، شي جينپيڭ ونىمدەردىڭ يقۋاتى مەن بازار جاعدايىن ەگجەي - تەگجەيلى ۇعىستى، سونداي - اق كوڭىلدى بەينەدە زەردەلى كوزىلدىرىكتى تاعىپ بايقاپ كوردى. ول مىنانى ءبىلدىردى: ەلىمىزدىڭ ساندى مالىمەت بايلىعى مول، كاسىپ سالاسى جۇيەسى كەمەلدى، بازار كەڭىستىگى زور، جاساندى زەردەنىڭ دامۋ بولاشاعى كەڭ، ساياساتتىق قولداۋ مەن دارىندىلاردى تاربيەلەۋدى كۇشەيتىپ، اناعۇرلىم كوپ حاۋىپسىز، سەنىمدى ساپالى ونىمدەردى قۇلشىنا اشۋ كەرەك.

اتتاناردا جاڭالىق اشۋ ەكولوگيالىق الەۋمەتتىك اۋماعىنداعى عىلمي زەرتتەۋ قىزمەتكەرلەرى مەن كاسىپورىن قىزمەتكەرلەرى باس شۋجيگە كوتەرىڭكى ۇنمەن امانداسىپ، باس شۋجيدىڭ تاعى كەلۋىن قارسى الدى. شي جينپيڭ كوپشىلىككە ءالسىن - ءالى قول بۇلعاپ قۇرمەت ءبىلدىردى، كوپشىلىككە 1 - مامىر ەڭبەكشىلەر مەرەكەسى قۇتتى بولسىن ايتتى، كوپشىلىكتى ۇزدىكسىز تىڭ ناتيجە جاراتىپ، تىڭ ۇلەس قوسۋعا شابىتتاندىردى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.

كەلۋ قاينارى: حالىق تورابى