جارالانعانداردى بار كۇشپەن ەمدەپ، قازا بولعانداردىڭ سوڭعى جۇمىستارىن ويداعىداي ىستەپ، اۋىر حاۋىپسىزدىك شىرعالاڭدارىنىڭ تۋىلۋىنان باتىل ساقتانۋ كەرەك

شينحۋا اگەنتتىگى، 4 - ايدىڭ 29 – كۇنى، بەيجيڭ. 4 - ايدىڭ 29 - كۇنى ساعات 12 دەن 25 مينۋت وتكەندە لياۋنيڭ لياۋياڭ قالاسى بايتا رايونىنىڭ سانليجۋاڭ حۇيچيان عيماراتىنىڭ ماڭىنداعى ءبىر قوناقجايدا ءورت اپاتى تۋىلدى. ساعات 14 كە دەيىن شىرعالاڭدا 22 ادام قازا بولىپ، 3 ادام جارالاندى.

شىرعالاڭ تۋىلعاننان كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ايرىقشا ءمان بەردى ءارى ماڭىزدى نۇسقاۋ بەرىپ بىلاي دەپ اتاپ كورسەتتى: لياۋنيڭ لياۋياڭ قالاسى بايتا رايونىنداعى ءبىر قوناقجايدا ءورت اپاتى تۋىلىپ، اۋىر ءولىم - ءجىتىم بولدى، بۇل − وتە اششى ساباق! جارالانعانداردى بار كۇشپەن ەمدەپ، قازا بولعانداردىڭ سوڭعى جۇمىستارىن ىڭعايلاستىرۋ جانە ولاردىڭ وتباسىنداعىلاردى جۇباتۋ سياقتى قىزمەتتەردى ۇيلەسىمدى ىستەپ، سەبەبىن تەز ارادا تەكسەرىپ انىقتاپ، زاڭ بويىنشا جاۋاپكەرشىلىكتى قاتاڭ قۋزاۋ كەرەك.

شي جينپيڭ بىلاي دەپ باسا دارىپتەدى: ”1 - مامىر“ دەمالىسى تاياپ قالدى، بۇقارانىڭ سىرتقا شىعىپ جولاۋشىلاۋى كوبەيدى، دەمالىس قيمىلدارى جيىلەدى، جەر - جەر جانە قاتىستى تاراۋلار حاۋىپسىزدىك جاۋاپكەرشىلىگىن تياناقتاندىرىپ، شۇعىل جاعدايعا توتەپ بەرۋ دايىندىق جوباسىن كەمەلدەندىرىپ، حاۋىپ - قاتەردى، كومەسكى كىناراتتاردى ءبىر - بىرلەپ تەكسەرىپ، ەلەۋلى حاۋىپسىزدىك شىرعالاڭدارىنىڭ تۋىلۋىنان باتىل ساقتانىپ، ونى تەجەپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن جانە قوعامدىق جالپى جاعدايدىڭ ورنىقتىلىعىن شىنايى قامتاماسىز ەتۋى كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جازىپ، مىنالاردى اتاپ كورسەتتى: ادامداردى ىزدەۋگە جانە جارالىلاردى قۇتقارۋعا، ەمدەۋگە كۇش سالىپ، قازا بولعانداردىڭ سوڭعى جۇمىستارىن ىڭعايلاستىرۋ سياقتى قىزمەتتەردى ۇيلەسىمدى جاقسى ىستەۋ، سونىمەن بىرگە، شىرعالاڭنىڭ سەبەبىن جەدەل انىقتاپ، جاۋاپكەرشىلىكتى زاڭ بويىنشا قاتاڭ قۋزاۋ كەرەك. قازىر ”1 - مامىر“ تاياپ قالدى، مەملەكەتتىك كەڭەستىڭ ءوندىرىس حاۋىپسىزدىگى كوميتەتى جەر - جەردى، قاتىستى جاقتاردى حاۋىپسىزدىك كومەسكى قاتەرلەرىن ىشكەرىلەي ءبىر - بىرلەپ تەكسەرۋگە جەتەكشىلىك ەتىپ، قۋزاپ، ءوندىرىس حاۋىپسىزدىگى شارالارىنىڭ تياناقتانۋىن كۇشەيتىپ، ءتۇرلى ەلەۋلى، ەرەكشە ءىرى شىرعالاڭداردىڭ تۋىلۋىنان قاتاڭ ساقتانۋى كەرەك.

شي جينپيڭنىڭ ماڭىزدى نۇسقاۋى مەن لي چياڭنىڭ تالابىنا ساي، شۇعىل جاعدايعا توتەپ بەرۋدى باسقارۋ مينيسترلىگى قىزمەت گرۋپپاسىن ناق مايدانعا جىبەرىپ، شۇعىل جاعدايعا توتەپ بەرۋ، ءبىر جاقتى ەتۋ قىزمەتىنە جەتەكشىلىك ەتتى. لياۋنيڭ ولكەسى، لياۋياڭ قالاسى قۇتقارۋ قىزمەتىن ورىستەتۋگە كۇش ۇيىمداستىردى. قازىر ناق مايداندا قۇتقارۋ، سوڭعى جۇمىستاردى ءبىر جاقتى ەتۋ سياقتى قىزمەتتەر جۇرگىزىلۋدە.

كەلۋ قاينارى: حالىق تورابى