ساق بولىڭىزدار! ”قۋاتتىق ءونىم“ دەگەندى جەلەۋ ەتكەن الدامكوستىك قارتتاردى تورۋىلداي باستادى 

بازاردى باقىلاۋ – باسقارۋ باس مەڭگەرمەسى مەن جۇڭگو تۇتىنۋشىلار بىرلەستىگى جۋىردا ”قۋاتتىق ءونىمدى“ جەلەۋ ەتكەن الدامكوستەردىڭ قارتتاردى الداۋىنان ساقتانۋ جونىندە تۇتىنۋشىلارعا ەسكەرتۋ جاريالاپ، قارت تۇتىنۋشىلارعا حاۋىپ – قاتەردەن ساقتانۋ تانىمىن كۇشەيتىپ، الدامكوستەردىڭ تۇزاعىنان اۋلاق بولۋدى ەسكەرتتى.

قازىرگى تاڭدا، ءىشىنارا زاڭسىز تيجاراتشىلار ”قۋاتتىق ءونىم“ دەگەن ۇعىمدى جەلەۋ ەتىپ، تومەن باعادا ساياحاتتاتۋ، تەگىن لەكسيا تىڭداتۋ، تەگىن جۇمىرتقا تاراتۋ، سونداي – اق، ”بارلىق اۋرۋعا شيپالى“ دەپ تانىستىرۋ قاتارلى فورمالاردان پايدالانىپ، جەلىلەس الدامكوستىكتەر مەن شىرعالاردى ورناتىپ، ونىمدەرى جونىندە جالعان نەمەسە ادامدى الجاستىراتىن ۇگىت جاساپ، قارتتاردى تۇتىنۋعا شىرعالايدى.

قارت تۇتىنۋشىلارعا حاۋىپ – قاتەردەن ساقتانۋ تانىمىن ارتتىرىپ، الدامكوستەردىڭ تۇزاعىنان اۋلاق بولۋ جاعىندا ”ۇشتەن ساقتانۋدى“ ەسكەرتەمىز: بىرىنشىدەن، ”تەگىن تاراتۋ“ دەگەن تۇزاقتان ساق بولىپ، دەنساۋلىققا قاتىستى تەگىن لەكسيا، دەنساۋلىقتى تەگىن تەكسەرۋ، تەگىن تارتۋ بەرۋ قاتارلى شىرعالاردان اباي بولىڭىز. ەكىنشىدەن، اسىرەلەپ ۇگىتتەۋشىلەردەن ساق بولىپ، ولاردى تويتارىڭىز، ”قۋاتتىق ونىمدەردى“ عىلىمي ساۋاتقا ساي كەلمەيتىن سوزدەرمەن ”حيكىمەتتى ەمدەۋ رولى بار“، ”بارلىق اۋرۋعا شيپالى“ دەپ ۇگىتتەگەندەردى باتىل تويتارىڭىز. ۇشىنشىدەن، سەنىمدى ارنالار ارقىلى ساتىپ الۋعا كوڭىل ءبولىڭىز. كۋالىكتەرى تولىق، سەنىمدى ساۋدا دۇكەندەرىنەن، ەرەنبازارلاردان، تىزبەكتى دۇكەندەردەن جانە ينتەرنەتتىك دۇكەندەردەن ساتىپ الىڭىز، كوشە بويىنداعى شاعىن جايمالار، كۋالىگى جوق شاعىن دۇكەندەر، ءونىم ۇگىتتەگەن بەيتانىس ادامدار قاتارلى ارنالاردان ساتىپ الماڭىز.

قارت تۇتىنۋشىلارعا ”قۋاتتىق ونىمدەردىڭ“ ءمانىن ايقىن تانۋدى ەسكەرتەمىز. ازىق – تۇلىك حاۋىپسىزدىگى زاڭىنا ساي، ازىق – تۇلىك، قۋاتتىق ازىق – تۇلىك قاتارلىلاردى اۋرۋدان ساقتانۋ، اۋرۋدى ەمدەۋ رولى بار دەپ ۇگىتتەۋگە بولمايدى. استە، ازىق – تۇلىكتى ءدارى – دارمەك رەتىندە، تۇرمىستىق بۇيىمداردى ەمدەۋ اسپاپتارى رەتىندە پايدالانباڭىزدار، ”قۋاتتىق ونىمدەرگە“ شەكتەن تىس ارقا سۇيەپ الۋىڭىزعا تىپتەن بولمايدى. دەنساۋلىعىڭىز جايسىزدانسا، اۋرۋ ەمدەتپەكشى بولساڭىز سەنىمدى ەمحانالارعا بارىپ ەمدەلىڭىز، اۋرۋدى ەمدەيتىن ۋاقىتتى وتكىزىپ الۋدان اباي بولىڭىز. (ءتىلشى جاۋ ۋىنجۇن)

كەلۋ قاينارى: حالىق تورابى