جاعداي وزگەرىسىنە ۇيلەسىپ، ستراتەگيالىق ماڭىزدى ءتۇيىندى يگەرىپ، ”15 - بەسجىلدىق“ كەزىندەگى ەكونوميكالىق، قوعامدىق دامۋدى عىلمي جوسپارلاۋ كەرەك

4 - ايدىڭ 30 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شاڭحايدا ءىشىنارا ولكە، اۆتونوميالى رايون، قالالاردىڭ ”15 - بەسجىلدىق“ كەزىندەگى ەكونوميكالىق، قوعامدىق دامۋى جونىندەگى اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن

«حالىق گازەتى»، 4 - ايدىڭ 30 – كۇنى، شاڭحاي. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 4 - ايدىڭ 30 - كۇنى تۇستەن بۇرىن شاڭحايدا ءىشىنارا ولكە، اۆتونوميالى رايون، قالالاردىڭ ”15 - بەسجىلدىق“ كەزىندەگى ەكونوميكالىق، قوعامدىق دامۋى جونىندەگى اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى. ول بىلاي دەپ باسا دارىپتەدى: بيىل _ ”14 - بەسجىلدىق“ جوبانىڭ اياقتالاتىن جىلى، جوبادا بەلگىلەنگەن نىسانا، مىندەتتەردى جەدەل تياناقتاندىرۋمەن بىرگە، جاعداي وزگەرىسىنە ۇيلەسىپ، ستراتەگيالىق ماڭىزدى ءتۇيىندى يگەرىپ، ”15 - بەسجىلدىق“ كەزىندەگى ەكونوميكالىق، قوعامدىق دامۋدى عىلمي ويداعىداي جوسپارلاۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي اڭگىمە ماجىلىسىنە قاتىناستى.

اڭگىمە ماجىلىسىندە ىشكى موڭعۇل اۆتونوميالى رايوندىق پارتكومنىڭ شۋجيى سۇن شاۋچىڭ، شاڭحاي قالالىق پارتكومنىڭ شۋجيى چىن جينيىڭ، جىجياڭ ولكەلىك پارتكومنىڭ شۋجيى ۋاڭ حاۋ، حۋبەي ولكەلىك پارتكومنىڭ شۋجيى ۋاڭ جۇڭلين، گۋاڭدۇڭ ولكەلىك پارتكومنىڭ شۋجيى حۋاڭ كۇنميڭ، سىچۋان ولكەلىك پارتكومنىڭ شۋجيى ۋاڭ شياۋحۇي، گانسۋ ولكەلىك پارتكومنىڭ شۋجيى حۋ چاڭشىڭ ىلگەرىندى - كەيىندى ءسوز سويلەدى، قىزمەت ءىس جۇزىندىگىمەن بىرلەستىرىپ، ”15 - بەسجىلدىق“ كەزىندەگى ەكونوميكالىق، قوعامدىق دامۋ جونىندە پىكىر جانە ۇسىنىس قويدى.

كوپشىلىكتىڭ ءسوزىن تىڭداعاننان كەيىن شي جينپيڭ ماڭىزدى ءسوز سويلەدى. ول بىلاي دەپ باسا دارىپتەدى: 5 جىلدىق جوبانى عىلمي جاساۋ جانە ونى ۇزدىكسىز اتقارۋ _ پارتيامىزدىڭ ەل باسقارۋداعى ماڭىزدى تاجىريبەسى ءارى جۇڭگوشا سوتسياليزمنىڭ ماڭىزدى ساياسي ابزالدىعى. ”15 - بەسجىلدىق“ كەزىندەگى ەكونوميكالىق، قوعامدىق دامۋدى جوبالاۋدا، ءسوز جوق، ”15 - بەسجىلدىق“ كەزىندەگى كەزەڭدىك تالاپتى دالمە - ءدال يگەرىپ، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن كوزدەپ، سوتسياليستىك وسىزامانداندىرۋ نىساناسىن نەگىزىنەن جۇزەگە اسىرۋدى مىقتاپ ارقاۋ ەتىپ، سالا - سالا بويىنشا نىسانانى، مىندەتتى لايىقتى بەلگىلەپ، وي جەلىسىن، شارالاردى ورتاعا قويۋ كەرەك. ءار جاقتاعى نىساناعا، مىندەتكە ىشكەرىلەي تالداۋ جاساپ جانە ونى دالەلدەپ، عىلمي، دالمە - ءدال بولۋىنا، دەر كەزىندە جۇزەگە اسۋىنا شىنايى كەپىلدىك ەتۋ كەرەك. ءبىر تۇتاس جوسپارلاپ، جوبالاپ، ءتۇيىندى، شەشۋشى فاكتورلاردى مەڭگەرىپ، ريتىم مەن اياق الىستى ويداعىداي يگەرىپ، ابزالدىقتى بەكەمدەۋگە، كەڭەيتۋگە، كەدەرگىلەردى، بوگەتتى تۇيىندەردى بۇزۋعا، ولقىلىقتاردى، ءالسىز تۇستاردى تولىقتاۋعا، كۇشەيتۋگە، ساپانى، ونىمدىلىكتى جوعارىلاتۋعا ءمان بەرىپ، جالپى تۇلعالىق نىسانامەن بەتالىس بىردەيلىگىن ساقتاۋ كەرەك.

شي جينپيڭ بىلاي دەپ اتاپ كورسەتتى: ”15 - بەسجىلدىق“ كەزىندەگى ەكونوميكالىق، قوعامدىق دامۋدى جوسپارلاۋدا حالىقارالىق جاعدايدىڭ دامۋ وزگەرىسىنىڭ ەلىمىزگە جاسايتىن ىقپالىن بولجامدى يگەرىپ، جاعدايعا ساي ءتيىمدى جاققا جەتەكتەي وتىرىپ ەكونوميكانىڭ ورنالاسىمىن رەتتەۋ، ساپالىلاندىرۋ كەرەك. ءوز ىستەرىمىزدى بۇلجىماي جاقسى ىستەپ، جوعارى دەڭگەيدە سىرتقا ەسىك اشۋدى بۇلجىماي كەڭەيتىپ، كوپ ءتۇرلى شارانى قاتار قولدانا وتىرىپ جۇمىستاندىرۋدى ورنىقتىرىپ، كاسىپورىندى ورنىقتىرىپ، بازاردى ورنىقتىرىپ، مەجەنى ورنىقتىرىپ، ەكونوميكانىڭ نەگىزگى جاعدايىن ءونىمدى ورنىقتىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى جاپپاي ىلگەرىلەتۋ كەرەك. دامۋ مەن حاۋىپسىزدىكتى ءبىر تۇتاس جوسپارلاۋعا اناعۇرلىم ءمان بەرىپ، ىشكى - سىرتقى حاۋىپ - قاتەر، سىن - سايىستى جان - جاقتى ويلاستىرىپ، مەملەكەت حاۋىپسىزدىگى جۇيەسىن اقاۋسىزداندىرىپ، حاۋىپسىزدىكتى قورعاۋ قابىلەتىن كۇشەيتىپ، جوعارى ونىمدىلىكپەن باسقارۋ ارقىلى جوعارى ساپالى دامۋ مەن جوعارى دەڭگەيلى حاۋىپسىزدىكتىڭ ۇتىمدى ىقپالداستىعىن جەبەپ، جاڭا حاۋىپسىزدىك جاعدايى ارقىلى جاڭا دامۋ جاعدايىن قامتاماسىز ەتۋ كەرەك.

شي جينپيڭ بىلاي دەپ باسا دارىپتەدى: ”15 - بەسجىلدىق“ كەزىندە جەرگىلىكتى جاعدايعا قاراي جاڭاشا وندىرگىش كۇشتەردى دامىتۋدى، ءسوز جوق، ءتىپتى دە كورنەكتى ستراتەگيالىق ورىنعا قويىپ، عىلىم - تەحنيكادا جاڭالىق اشۋدى جەتەكشى ەتىپ، ناقتى ەكونوميكانى تاعان ەتىپ، ءداستۇرلى كاسىپ سالالارىنىڭ تيبىن جاڭالاپ، دارەجەسىن جوعارىلاتۋىن جاپپاي ىلگەرىلەتۋدى، جاڭادان گۇلدەنگەن كاسىپ سالالارىن بەلسەنە دامىتۋدى، بولاشاق كاسىپ سالالارىن الدىن الا ورنالاستىرۋدى قاتار جۇرگىزۋگە تاباندى بولىپ، وسىزاماندانعان كاسىپ سالاسى جۇيەسىن جەدەل قۇرۋ كەرەك. مەملەكەتتىڭ جاڭالىق اشۋ جۇيەسىن كەمەلدەندىرىپ، ءتۇرلى جاڭالىق اشۋ نەگىزگى تۇلعالارىنىڭ ومىرشەڭ كۇشىن قاۋلاتىپ، دۇنيە ءجۇزى عىلىم - تەحنيكاسىنىڭ الدىڭعى لەگىن كوزدەپ، نەگىزدىك زەرتتەۋدى كۇشەيتۋگە، ءتول جاسامپازدىق قابىلەتتى جوعارىلاتۋعا ۇزدىكسىز كۇش سالىپ، شەشۋشى، وزەكتى تەحنيكادا، الدىڭعى لەك تەحنيكاسىندا ناتيجە جاراتۋ جاعىندا قامال الۋدى مىقتى يگەرۋ كەرەك. وقۋ - اعارتۋدىڭ، عىلىم - تەحنيكانىڭ، دارىندىلاردىڭ ءبىر تۇلعالى دامۋىن ءبىر تۇتاس جوسپارلاپ ىلگەرىلەتىپ، جاڭاشا وندىرگىش كۇشتەردى دامىتۋدىڭ نەگىزدىك سيپاتتى، ستراتەگيالىق سيپاتتى تىرەگىن بەكەمدەۋ كەرەك.

شي جينپيڭ بىلاي دەپ اتاپ كورسەتتى: جۇڭگو ۇلگىسىندەگى وسىزامانداندىرۋ _ جالپى حالىق بىرگە باييتىن سوتسياليستىك وسىزامانداندىرۋ. ”15 - بەسجىلدىق“ كەزىندەگى ەكونوميكالىق، قوعامدىق دامۋدى جوسپارلاۋدا اۋەلگى ماقساتتى ۇمىتپاي، حالىقتى باقىتقا كەنەلتۋدى ءتۇبىرلى قۇن بەتالىسى ەتىپ، دامۋ بارىسىندا حالىق تۇرمىسىن قامتاماسىز ەتۋ مەن جاقسارتۋعا تاباندى بولىپ، بىرگە بايۋدى ورنىقتى قاداممەن ىلگەرىلەتۋ كەرەك. وڭىرلەردىڭ ورنالاسىمىن ساپالىلاندىرۋ، وڭىرلەردىڭ سايكەستى دامۋىن جەبەۋ جانە كەدەيلىكتەن ارىلتۋدان قامال الۋ جەتىستىكتەرىن بەكەمدەۋ، كەڭەيتۋ، اۋىل - قىستاقتى جاپپاي گۇلدەندىرۋ مەن قالا، اۋىلدىڭ توعىسا دامۋىن ىلگەرىلەتۋ، اۋىل شارۋاشىلىعىنىڭ، اۋىل - قىستاقتىڭ وسىزاماندانۋىن جەدەلدەتۋ سياقتى جاقتارداعى ءونىمدى شارالاردى ىشكەرىلەي زەرتتەپ، قالا مەن اۋىلداعى بۇقارانىڭ كىرىسىن ورنىقتى ارتتىرۋ كەرەك. بىركەلكىلىگى، قولجەتىمدىلىگى كۇشتى ءبىر توپ حالىق تۇرمىسى ساياسات، شاراسىن زەرتتەپ ۇسىنىپ، بۇقارانىڭ شۇعىل، قيىن، ۋايىمداعان، ءزارۋ ماسەلەلەرىن كۇش سالا شەشۋ كەرەك. بۇقاراعا ساياتىن ىستەردىڭ تەتىگى ونىڭ ناقتى بولۋىندا، ءتۇرلى ساياسات، شارالار شىنايى، ناقتى ونىمدىلىككە باي بولۋى، بار كۇشپەن ىستەۋگە، شامانىڭ جەتىسىنشە ىستەۋگە تاباندى بولۋ كەرەك.

شي جينپيڭ بىلاي دەپ باسا دارىپتەدى: وڭىرلەر ”15 - بەسجىلدىق“ كەزىندەگى ەكونوميكالىق، قوعامدىق دامۋدى جوسپارلاۋدا مەملەكەتتىڭ كەلەلى جاعدايىندا ورىندى دالمە - ءدال تۇراقتاندىرۋى، جوبانى ۇشتاستىرۋدى كۇشەيتۋى كەرەك. ىشكەرىلەي تەكسەرۋ - زەرتتەۋ جۇرگىزىپ، نىسانانى باعدار ەتۋ مەن ماسەلەنى باعدار ەتۋدىڭ ءوزارا بىرلىگىنە تاباندى بولىپ، دامۋ وي جەلىسى مەن ستراتەگيالىق شارانى تۇراقتاندىرعاندا ءوز ەرەكشەلىگىن بەينەلەۋگە، سالىستىرمالى ابزالدىقتى ساۋلەلەندىرۋگە ءمان بەرۋى كەرەك.

حى ليفىڭ، ۋ جىڭلۇڭ اڭگىمە ماجىلىسىنە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى ولكە، اۆتونوميالى رايون، قالالارداعى جاۋاپتى جولداستار اڭگىمە ماجىلىسىنە قاتىناستى.

كەلۋ قاينارى: حالىق تورابى