سۋعا ءتۇسىپ كەتكەندەردى امالدىڭ بارىنشا ىزدەپ قۇتقارىپ، جارالانعانداردى بار كۇشپەن ەمدەپ، ەرەكشە اۋىر حاۋىپسىزدىك شىرعالاڭى كوپ تۋىلۋ اۋقىمىن باتىل تەجەۋ كەرەك

شينحۋا اگەنتتىگى، 5 - ايدىڭ 4 – كۇنى، بەيجيڭ. 5 - ايدىڭ 4 - كۇنى ساعات 16 دان 40 مينۋت وتكەندە گۇيجوۋ بيجيە قالاسى چيانشي قالاسى شينرىن اۋىلى حۋا - ۋ قىستاعىنداعى بايلي حۋالاڭ كورىنىس رايونىندا ساياحات كەمەسى اۋدارىلىپ كەتتى. قازىرگە دەيىن شىرعالاڭدا 3 ادام قازا بولىپ، 60 ادام شيپاحاناعا ەمدەۋ - قۇتقارۋعا جىبەرىلدى، بۇدان سىرت 14 ادامدى ىزدەۋ - قۇتقارۋ جۇمىسى جالعاسۋدا.

شىرعالاڭ تۋىلعاننان كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ايرىقشا ءمان بەردى ءارى ماڭىزدى نۇسقاۋ بەرىپ بىلاي دەپ اتاپ كورسەتتى: گۇيجوۋ بيجيە قالاسى چيانشي قالاسىنداعى ءبىر كورىنىس وڭىرىندە سەرۋەن كەمەسى اۋدارىلۋ شىرعالاڭى تۋىلدى، سۋعا كەتكەن ادامداردى امالدىڭ بارىنشا ىزدەپ قۇتقارىپ، جارالىلاردى بار كۇشپەن قۇتقارىپ، ەمدەپ، قازا بولعانداردىڭ سوڭعى جۇمىستارىن ىڭعايلاۋ جانە ولاردىڭ وتباسىنداعىلاردى جۇباتۋ سياقتى قىزمەتتەردى ۇيلەسىمدى جاقسى ىستەۋ كەرەك.

شي جينپيڭ بىلاي دەپ باسا دارىپتەدى: جۋىقتان بەرى كەيبىر جەرلەردە ىركەس - تىركەس حاۋىپسىزدىك شىرعالاڭدارى تۋىلىپ، كوپ ادام قازا بولدى، جارالاندى، جەر - جەر جانە قاتىستى تاراۋلار اشتى ساباق الىپ، سالعىرتسۋ يدەياسىن باتىل جەڭىپ، ءار جاقتىڭ جاۋاپكەرشىلىگىن ونان ارى قاتايتىپ، نازاردى ساياحات كورىنىس وڭىرلەرى، ءىرى الەۋمەتتىك ورىندار، تۇرعىندار اۋماقتارى، قايتۋ جولىنداعى قاتىناس قۇرالدارى سياقتىلارعا شوعىرلاندىرىپ، حاۋىپسىزدىك شارالارىن كۇشەيتىپ، قىزمەتتەردى تياناقتاندىرۋدى مىقتاپ يگەرىپ، اۋىر، ەرەكشە اۋىر حاۋىپسىزدىك شىرعالاڭدارىنىڭ كوپ تۋىلۋ اۋقىمىن باتىل تەجەۋى كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جازىپ، بىلاي دەپ اتاپ كورسەتتى: دەرەكسىز كەتكەندەردى بار كۇشپەن ىزدەستىرىپ - قۇتقارىپ، جارالانعانداردى قۇتقارىپ، ەمدەپ، ولاردىڭ وتباسىنداعىلاردى جۇباتۋ، سوڭعى جۇمىستاردى ءبىر جاقتى ەتۋ جانە شىرعالاڭدى تەكسەرىپ ءبىر جاقتى ەتۋ سياقتى قىزمەتتەردى شىن مانىندە ويداعىداي ىستەۋ كەرەك. ”1 - مامىر“ دەمالىسى اياقتاۋ الدىندا تۇر، جەر - جەردىڭ، قاتىستى جاقتاردىڭ ءوندىرىس حاۋىپسىزدىگى جاۋاپكەرشىلىگىن تياناقتاندىرۋدى جانە حاۋىپسىزدىك باسقارۋ شارالارىنىڭ تياناقتانۋىن مىقتى يگەرۋىنە اناعۇرلىم قۋزاۋ سالىپ، جەتەكشىلىك ەتىپ، ءتۇيىندى ورىنداردى، ءتۇيىندى سالالاردى كورنەكتىلەندىرىپ، حاۋىپ - قاتەردى، كومەسكى كىناراتتاردى جاپپاي ءبىر - بىرلەپ تەكسەرىپ الاستاپ، ءتۇرلى ەلەۋلى، ەرەكشە ءىرى شىرعالاڭداردىڭ تۋىلۋىنان باتىل ساقتانۋ كەرەك.

شي جينپيڭنىڭ ماڭىزدى نۇسقاۋى مەن لي چياڭنىڭ تالابىنا ساي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى جاڭ گوچيڭ قاتىستى تاراۋلاردىڭ جاۋاپتى جولداستارىن باستاپ ناق مايدانعا بارىپ، قۇتقارۋ، ءبىر جاقتى ەتۋ قىزمەتىنە جەتەكشىلىك ەتتى. گۇيجوۋ ولكەلىك پارتكومنىڭ، ولكەلىك ۇكىمەتتىڭ نەگىزگى جاۋاپتى جولداستارى شۇعىل جاعدايعا توتەپ بەرۋ، ءبىر جاقتى ەتۋ قىزمەتىنە ناق مايداندا قولباسشىلىق ەتتى، گۇيجوۋ ولكەسى، بيجيە قالاسى ناق مايداندا ىزدەۋ، قۇتقارۋ، جارالانعانداردى قۇتقارۋ سياقتى قىزمەتتەردى بار كۇشپەن جاقسى ىستەدى. قازىر قاتىستى قىزمەتتەر ورىستەتىلۋدە.

كەلۋ قاينارى: حالىق تورابى