كوڭىل بولىڭىزدەر! سولتۇستىكتەگى وڭىرلەردە جوعارى تەمپەراتۋرالى اۋا رايى باستالدى 

شينحۋا اگەنتتىگىنىڭ ءتىلشىسى ليۋ شىپيڭ 6 – ايدىڭ 4 – كۇنى بەيجيڭنەن حابارلايدى. جوعارى تەمپەراتۋرالى اۋا رايى 6 – ايدىڭ 4 – كۇنى باستالىپ، 6 – ايدىڭ 5 – كۇنىنەن 8 – كۇنىنە دەيىن بىرتىندەپ سولتۇستىك جۇڭگوعا، حۋاڭحى – حۋايحى وڭىرىنە، سونداي – اق، شينجياڭداعى كوپتەگەن جەرلەرگە بىرتىندەپ كەڭەيەدى. قامتيتىن اۋماعى كەڭ، جالعاساتىن ۋاقىتى ءبىرشاما ۇزاق جوعارى تەمپەراتۋرالى اۋا رايى الدا سولتۇستىكتەگى وڭىرلەردى شارپيدى، ءىشىنارا وڭىرلەردە 40 گرادۋستان 41 گرادۋسقا دەيىن جەتەدى.

ورتالىق اۋا رايى ستانسياسى 6 – ايدىڭ 4 – كۇنى ساعات 18 دە جاريالاعان بولجامعا قاراعاندا، 6 – ايدىڭ 5 – كۇنىنەن 8 – كۇنىنە دەيىن، بەيجيڭ، تيانجين، حىبەيدىڭ ورتا – وڭتۇستىك بولەگى، سانشيدىڭ ورتا – وڭتۇستىك بولەگى، شانشيدىڭ گۋانجۇڭ ءوڭىرى، حىناننىڭ كوپ ءبولىمى، شاندۇڭنىڭ سولتۇستىگى جانە ورتا – باتىس بولىگى، سونداي – اق، وڭتۇستىك شينجياڭداعى ويپاتتى ءوڭىر جانە تۇرپان ويپاتى قاتارلى جەرلەردە جوعارى تەمپەراتۋرالى اۋا رايى جارىققا شىعادى، كۇندىك ەڭ جوعارى اۋا تەمپەراتۋراسى 35 گرادۋستان 37 گرادۋسقا دەيىن بولادى، ءىشىنارا جەرلەردە 39 گرادۋستان اسادى.

حىنان ولكەلىك اۋا رايى ستانسياسىنىڭ مەجەلەۋىنشە، حىنان ولكەسىنىڭ سولتۇستىك بولەگى مەن ورتا بولەگىندە جوعارى تەمپەراتۋرالى اۋا رايى بىرنەشە كۇن جالعاسادى، 6 – ايدىڭ 5 – كۇنىنەن 7 – كۇنىنە دەيىن وسى جولعى تەمپەراتۋرا ەڭ ىستىق بولاتىن مەزگىل بولىپ، سولتۇستىك بولەك پەن ورتا – باتىس بولەكتەگى ءىشىنارا اۋدانداردا (قالا، رايون) ەڭ جوعارى اۋا تەمپەراتۋراسى 37 گرادۋستان 39 گرادۋسقا دەيىن بولادى، ءىشىنارا جەرلەردە 40 گرادۋستان 41 گرادۋسقا دەيىن جەتەدى.

جوعارى تەمپەراتۋرالى اۋا رايى دەگەنىمىز اۋا تەمپەراتۋراسى 35 گرادۋستان اساتىن اۋا رايىن كورسەتەدى، مۇنداي اۋا رايى دەنساۋلىق، قاتىناس، سۋدان پايدالانۋ، ەلەكتردەن پايدالانۋ قاتارلى جاقتاردا تۇرلىشە دەڭگەيدە ىقپال جاسايدى.

كەلۋ قاينارى: حالىق تورابى