لي چياڭ بريكس ەلدەرى باسشىلارى 17 - ديدارلاسۋىنىڭ 2 - جانە 3 - كەزەڭدىك ماجىلىسىنە قاتىناستى

سول جەر ۋاقىتى 7 - ايدىڭ 6 - كۇنى جانە 7 - كۇنى مەملەكەتتىك كەڭەستىڭ زۇڭليى لي چياڭ ريو - دە - جانەيرودا بريكس ەلدەرى باسشىلارى 17 - ديدارلاسۋىنىڭ 2 - جانە 3 - كەزەڭدىك ماجىلىسىنە قاتىناسىپ، كوپ جاقتىلىقتى كۇشەيتۋ، جاساندى زەردە، قورشاعان ورتا جانە كليمات وزگەرىسى، دۇنيە جۇزىلىك دەنساۋلىق ساقتاۋ سياقتى كەڭەستىك تاقىرىپتار توڭىرەگىندە ءسوز سويلەدى. سۋرەتتە: 7 - ايدىڭ 7 - كۇنى بريكس ەلدەرى مەن سەرىك ەلدەردىڭ، سيلى قوناق ەلدەردىڭ باسشىلارى، سونداي - اق حالىقارالىق ۇيىمداردىڭ ۋاكىلدەرى توپتىق سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

«حالىق گازەتى»، 7 - ايدىڭ 7 - كۇنى، ريو - دە - جانەيرو (تىلشىلەر چىن شاڭۋىن، شى يۋانحاۋ). سول جەر ۋاقىتى 7 - ايدىڭ 6 - كۇنى جانە 7 - كۇنى مەملەكەتتىك كەڭەستىڭ زۇڭليى لي چياڭ ريو - دە - جانەيرودا بريكس ەلدەرى باسشىلارى 17 - ديدارلاسۋىنىڭ 2 - جانە 3 - كەزەڭدىك ماجىلىسىنە قاتىناسىپ، كوپ جاقتىلىقتى كۇشەيتۋ، جاساندى زەردە، ورتا جانە كليمات وزگەرىسى، دۇنيە جۇزىلىك دەنساۋلىق ساقتاۋ سياقتى كەڭەستىك تاقىرىپتار توڭىرەگىندە ءسوز سويلەدى. بريكس ەلدەرى مەن سەرىك ەلدەردىڭ، سيلى قوناق ەلدەردىڭ باسشىلارى جانە حالىقارالىق ۇيىمداردىڭ ۋاكىلدەرى ماجىلىسكە قاتىناستى.

لي چياڭ مىنالاردى ءبىلدىردى: قازىر حالىقارالىق ەكونوميكا - ساۋدا ءتارتىبى، كوپ جاقتى ساۋدا ءتۇزىلىسى اۋىر سوققىعا ۇشىراپ، دۇنيە ءجۇزى ەكونوميكاسىنىڭ قالپىنا كەلۋى قيىنعا سوقتى. ”ۇلكەن بريكس سەلبەستىگى“ قۇرىلۋ العاشقى ماقساتىنان جازباي، ءداۋىردىڭ قاجەتىنە سايكەسىپ، كوپ جاقتىلىقتى قورعاپ جانە امالياتتا ايگىلەپ، ءادىل، اشىق حالىقارالىق ەكونوميكا - ساۋدا ءتارتىبىن ورناتۋدى ىلگەرىلەتىپ، دۇنيە ءجۇزىنىڭ وڭتۇستىگىندەگى كۇشتەردى ۇيىستىرىپ، دۇنيە ءجۇزىنىڭ ورنىقتىلىعىنا، دامۋىنا اناعۇرلىم زور ۇلەس قوسۋى كەرەك. ءبىرىنشى، اشىق دۇنيە ءجۇزى ەكونوميكاسىن قۇرۋعا كۇش سالۋ كەرەك. سىڭار جاقتىلىق پەن قورعانىمپازدىققا تۋدى ايقىن ۇستاپ قارسى تۇرىپ، دۇنيە جۇزىلىك ساۋدا ۇيىمىنىڭ نەگىزگى پرينسيبىن قورعاپ، ساۋدا مەن قارجى قوسۋدىڭ ەركىن، قولايلى بولۋىن جەبەپ، كاسىپ تىزبەگىنىڭ، قامداۋ تىزبەگىنىڭ ورنىقتى، ىركىلىسسىز بولۋىن قورعاۋ كەرەك. جۇڭگو جاق بريكس ەلدەرىنىڭ ەرەكشە ەكونوميكالىق رايونى جۇڭگو سەلبەستىك ورتالىعىن قۇردى، ءار جاقپەن سەلبەستىك تورىن بىرگە قۇرۋدى قالايدى. ەكىنشى، حالىقارالىق فينانس سەلبەستىگىنىڭ دەڭگەيىن جوعارىلاتۋعا كۇش سالۋ كەرەك. جۇڭگو جاق جاڭا اشۋ بانكەسىنىڭ زورايۋىن، كۇشەيۋىن قولدايدى، شارتقا ۇيلەسەتىن دۇنيە جۇزىندەگى وڭتۇستىك ەلدەردىڭ جۇڭگونىڭ فينانس بازارىنا قارجى قوسۋىن قارسى الادى. دۇنيە بانكەسىنىڭ جارنا ۇقىعىن قاراۋدى جانە حالىقارالىق اقشا قورى ۇيىمىنىڭ ۇلەسىن رەتتەۋدى ىلگەرىلەتىپ، وركەندەپ كەلە جاتقان ەلدەردىڭ ۋاكىلدىك سيپاتى مەن سويلەۋ ۇقىعىن ارتتىرۋ كەرەك. ءۇشىنشى، ەكونوميكالىق ارتۋدىڭ جاڭا كوك تەڭىزىن اشۋعا كۇش سالۋ كەرەك. سيفر، جاسىل سياقتى جاڭادان گۇلدەنگەن سالالارداعى سەلبەستىكتى كەڭەيتىپ، جاساندى زەردەنىڭ سان مىڭداعان كاسىپ سالاسىنا، سان مىڭداعان وتباسىنا تيىمدىلىك جاساۋىنا مۇمكىندىك جاساپ، دۇنيە جۇزىندەگى وڭتۇستىك ەلدەردىڭ قابىلەت قۇرىلىسىن كۇشەيتۋىنە كومەكتەسۋ كەرەك. جۇڭگو جاق دۇنيە جۇزىلىك دامۋ باستاماسى جۇلگەسىندە ”سيفرلى وڭتۇستىك“ ماركاسىن جاراتادى، الداعى 5 جىلدا وڭتۇستىك ەلدەرىنە 200 كەزەك سيفرلى ەكونوميكا، جاساندى زەردە تاربيەلەۋ نىسانىن وتكىزەدى. جۇڭگو جاق ءار ەلدىڭ بيىل 7 - ايدا جۇڭگودا وتكىزىلەتىن دۇنيە جۇزىلىك جاساندى زەردە جينالىسىنا قاتىناسۋىن قارسى الادى.

لي چياڭ بىلاي دەپ اتاپ كورسەتتى: قازىر بۇكىل جەر شارىنىڭ كليمات، ورتا جانە دەنساۋلىق ساقتاۋ سالاسىنداعى تۇراقسىز حاۋىپ - قاتەر جوعارىلاۋدا، حالىقارالىق قوعام كەڭ كولەمدە ورتاق تانىم ۇيىستىرىپ، بەلسەندى، پارمەندى ارەكەت قولدانىپ، ورتاق سىن - سايىسقا قول ۇستاسا توتەپ بەرۋى كەرەك. ءبىرىنشى، كليمات وزگەرىسىنە توتەپ بەرۋدىڭ اناعۇرلىم كوپ بىرىككەن كۇشىن توپتاۋ كەرەك. «بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى جۇلگەلىك شارتىن» جانە «پاريج كەلىسىمىن» باتىل تياناقتاندىرىپ، ورتاق، ءبىراق پارىقتى جاۋاپكەرشىلىك پرينسيبىن قورعاپ، تازا ەنەرگيا، كومىرتەگى بازارى سياقتى سالالارداعى سەلبەستىكتى تەرەڭدەتىپ، دامىعان ەلدەردى قارجى، تەحنيكا سياقتى جاقتارداعى ۋادەسىن ورىنداۋعا قۋزاۋ كەرەك. ەكىنشى، ەكولوگيالىق ورتانى قورعاۋدىڭ ءىس جۇزىندىك ونىمدىلىگىن جوعارىلاتۋ كەرەك. ادام مەن تابيعاتتىڭ جاراسىمدى قاتار ءومىر سۇرۋىنە تاباندى بولىپ، جۇيەلى جونگە سالۋدى دارىپتەپ، «ورگانيزمدەردىڭ الۋان تۇرلىلىگى شارتىن»، «بىرلەسكەن مەملەكەتتەر ۇيىمىنىڭ شولەيتتەنۋدەن ساقتانۋ جانە ونى تىزگىندەۋ شارتىن» اناعۇرلىم ويداعىداي اتقارۋ كەرەك. ءۇشىنشى، الەۋمەتتىك دەنساۋلىق ساقتاۋ جۇيەسىنىڭ قابىلەت قۇرىلىسىن كۇشەيتۋ كەرەك. دۇنيە جۇزىلىك دەنساۋلىق ساقتاۋ ۇيىمىنىڭ دۇنيە جۇزىلىك دەنساۋلىق ساقتاۋدى جونگە سالۋدا سايكەستىرۋ رولىن ۇزدىكسىز ساۋلەلەندىرۋىنە قولداۋ كورسەتىپ، بريكس ۆاكسيناسىن زەرتتەۋ - اشۋ ورتالىعى سياقتى تۇعىرلاردىڭ رولىن تولىق ساۋلەلەندىرىپ، دۇنيە ءجۇزىنىڭ وڭتۇستىگىن اناعۇرلىم كوپ الەۋمەتتىك ونىمدەرمەن قامداۋ كەرەك. ۇزاق ۋاقىتتان بەرى جۇڭگو سەنىمدى امالياتتا ايگىلەۋگە، ۋادەسىندە تۇرۋعا تاباندى بولىپ، ءوز قابىلەتىمەن دۇنيە ءجۇزىنىڭ قاجەتىنە بەلسەندى ۇلەس قوستى. جۇڭگو ۇزدىكسىز اناعۇرلىم كوپ ءىس جۇزىندىك ارەكەت قولدانىپ، وتەۋگە ءتيىستى جاۋاپكەرشىلىكتى ارقالاپ، ءار جاقپەن اناعۇرلىم جاسىل، اقاۋسىز، باياندى دۇنيە جۇزىلىك دامۋدى بىرگە جەبەيدى.

ءماجىلىس «بريكس ەلدەرى باسشىلارىنىڭ جاساندى زەردەنى دۇنيە جۇزىلىك جونگە سالۋ جونىندەگى مالىمدەمەسىن»، «بريكس ەلدەرى باسشىلارىنىڭ كليمات قارجىسى جۇلگەلىك جارناماسىن» ماقۇلدادى.

كەلۋ قاينارى: حالىق تورابى