مىناداي ساندىقشانى بايقاساڭىز، دەرەۋ ساقشىعا مالىمدەڭىز! 

جۋىردا جىجياڭ ولكەسى جياشيڭ قالاسى تۇڭشياڭ قالالىق قوعام حاۋىپسىزدىگى مەكەمەسىنىڭ ۋجىن ساقشى بولىمشەسى تەلەكوم سالاسىنداعى قىزمەتكەردىڭ اڭىس ەتۋىن تاپسىرىپ العان، ونىڭ ايتۋىنشا، ءمالىم قوناق ءۇيدىڭ بولمەسىندە بىرەۋلەر ەكى تۇراقتى تەلەفون نومىرىمەن قىسقا ۋاقىت ىشىندە سىرتقا قاراي ءجۇز نەشە رەت تەلەفون جالعاپ، تەلەكوم مەن ينتەرنەتتەن پايدالانىپ الدامكوستىك ىستەۋ كۇمانىن قالىپتاستىرعان.

ساقشى جاق دەرەۋ اتالعان قوناق ۇيگە بارىپ تەكسەرۋ جۇرگىزىپ، ەڭ سوڭىندا قوناق ءۇيدىڭ بولمەسىنەن كۇماندى حۋاڭ X پەن ياڭ X تى قولعا تۇسىرگەن ءارى ينتەرنەت ارا جالعاستىرۋشى اسپاپتان 2 اسپاپتى جانە بىرنەشە ينتەرنەت سىمىن قولعا تۇسىرگەن.

تەرگەۋ بارىسىندا، قىلمىس كۇماندىلارى حۋاڭ X پەن ياڭ X وزدەرىنىڭ زاڭعا قايشى ارەكەت وتكىزۋ بارىسىن شىنايى مويىنداعان.

6 – ايدىڭ سوڭىندا، حۋاڭ X ءمالىم الەۋمەتتىك جەلىدە ”كۇندىك جوعارى اقى بەرىلەتىن قوسىمشا جۇمىسقا“ قابىلداۋ تۋرالى جارنامانى كورگەن سوڭ، بايلانىس جاساۋشى ”KK“ دى قوسادى، وسىدان سوڭ قارسى جاق ونى ”جاقسى جۇمىسقا“ ورنالاستىرىپ، قوناق ۇيگە بارىپ، ”قارا قوبديشانى“ بولمەدەگى تۇراقتى تەلەفونعا جالعاسا، ءبىر اسپاپ ءۇشىن كۇنىنە 1000 يۋان اقى بەرەتىنىن ايتادى. وسىنداي ”وپ – وڭاي اقشا تابۋعا بولاتىن“ قىزمەت بارىن ەستىگەندە، حۋاڭ X دەرەۋ ماقۇل بولادى ءارى دوسى ياڭ X تى دە قاتارعا قوسىلۋعا شاقىرادى.

7 – ايدىڭ سوڭعى شەنىندە، حۋاڭ X پەن ياڭ X بايلانىس جاساۋشىنىڭ نۇسقاۋى بويىنشا، پوچتا ارقىلى سالىنعان ”قارا قوبديشانى“ الىپ، ۋجىن قالاشىعىنداعى ءبىر قوناق ۇيگە كىرىپ، ”جەلىنى جالعاۋ مىندەتىن“ اتقارۋعا كىرىسەدى، ەكەۋى وپ – وڭاي اقشا تابۋ سىندى ءتاتتى قيالعا شومىپ وتىرعان كەزدە، حالىق ساقشىلارى ولاردىڭ ۇستىنەن تۇسەدى.

سالىمىن سىناۋ ويىندا بولعان حۋاڭ X تەرگەۋ بارىسىندا: ”الدامكوستەرگە كومەكتەسىپ جاتقانىمىزدى بىلسەم دە، وسىلاي ىستەگەندە اقشا تابۋدىڭ وڭاي ەكەنىن ويلاپ تاۋەكەلگە بەل بايلادىم، ساقشىلاردىڭ وسىنشاما تەز جەتىپ كەلەتىنىن ويلاماپپىن“ دەپ قىلمىسىن مويىنداعان.

تەكسەرىپ كۋالىك الۋعا قاراعاندا، ”قارا قوبديشا“ (VOIP اسپابى) ءىس جۇزىندە ءبىر ءتۇرلى ۆيرتۋالدى تەلەفون سوعۋ اسپابى بولىپ، الدامكوستەر وسى اسپاپ ارقىلى شەكارا سىرتىنداعى الدامكوستەردىڭ تەلەفونىن ەل ىشىندەگى تۇراقتى تەلەفوننىڭ نومىرىنە اينالدىرىپ، زياندالۋشىلاردىڭ سەزىكتەنۋىنەن بارىنشا ساقتانادى.

ساقشى جاق مىنانى ەسكەرتەدى

”جوعارى اقىلى قوسىمشا جۇمىس“ شىرعاسىنان ساق بولىپ، كىشى – گىرىم پايداعا بولا قىلمىسكەرلەردىڭ قولشوقپارىنا اينالىپ قالۋدان ساق بولىڭىزدار. قوناق ءۇي قاتارلى الەۋمەتتىك ورىندار حاۋىپسىزدىككە ساياتىن باسقارۋدى كۇشەيتۋى، قوناق ۇيگە ورنالاسقان ادامداردىڭ سالاۋاتىن سالىستىرىپ انىقتاپ وتىرۋى، ”قارا قوبديشا“ سەكىلدى كۇماندى زاتتار بايقالسا، دەر كەزىندە ساقشىعا مالىمدەۋى كەرەك.

كەلۋ قاينارى: حالىق تورابى