ازيا بويىنشا دزيۋ – دودان اشىق جارىستا شينجياڭدىق سپورتشىلار جۇڭگو كومانداسىنا ءبىر التىن ءبىر مىس مەدال الىپ بەردى 

تيانشان تورى – شينجياڭ گازەتىنىڭ ءتىلشىسى دۇڭ لياڭ حابارلايدى. ءتىلشىنىڭ شينجياڭ ۇيعۇر اۆتونوميالى رايوندىق دەنە تاربيە مەكەمەسىنەن ۇعىسۋىنشا، 9 – ايدىڭ 7 – كۇنى حاڭجوۋدا اياقتاعان 2025 – جىلعى حاڭجوۋ ازيا دزيۋ – دو اشىق جارىسىندا، جۇڭگو دزيۋ – دو كومانداسى ۇزدىك ونەر كورسەتىپ، 9 التىن، 6 كۇمىس، 7 مىس مەدال الىپ، ۇزدىك ناتيجە جاراتقان. مۇنىڭ ىشىندە شينجياڭنان كەلگەن 2 سپورتشى ءبىر التىن، ءبىر مىس مەدال العان.

سۋرەتتە: ايمان جەڭىسنۇر مەن سۇڭقار سەرىك جارىستان سوڭ سۋرەتكە تۇسۋدە. سۋرەتتى سۇحبات بەرۋشىلەر بەرگەن

وسى رەتكى اشىق جارىستى ازيا دزيۋ – دو بىرلەستىگى ۇيىمداستىرعان، رەسمي ورىندار كۋالاندىرعان حالىقارالىق A دارەجەلى جارىس سانالادى. جۇڭگو، كانادا، جاڭا زەللانديا، كورەيا، تايلاند قاتارلى 13 مەملەكەتتەن كەلگەن جۇزگە جۋىق دزيۋ – دو سپورتشىسى جارىسقا قاتىناسقان. جارىستا ەرلەر مەن ايەلدەر بويىنشا جەكە – جەكە 7 دارەجەدەگى جارىس ورنالاستىرىلعان، جۇڭگو كومانداسى ءاربىر دارەجە بويىنشا ەرەسەكتەر گرۋپپاسىنا جانە جاستار گرۋپپاسىنا جەكە – جەكە ەكىدەن سپورتشى قاتىناستىرعان.

شينجياڭدىق ەكى سپورتشى سۇڭقار سەرىك جانە ايمان جەڭىسنۇر جۋىرداعى جىلداردان بەرى ەلىمىزدە تەبىن تانىتقان جاس سپورتشىلار، ەكەۋىنىڭ دە جاسى 22 دە. ايمان قازىر ەلىمىز كولەمىندە ايەلدەر بويىنشا 78 كيلوگرامنان جوعارى سالماق دارەجەسىندە ءبىرىنشى ورىندا تۇر، حالىقارالىق تىزىمدىكتە 12 – ورىندا. سۇڭقاردىڭ حالىقارالىق تىزىمدىكتەگى ورنى جوعارى بولماعانىمەن، ەلىمىز كولەمىندە ەرلەر اراسىندا 81 كيلوگرامدىق سالماق دارەجەسىندەگى ءبىرشاما ۇزدىك جاس سپورتشى، سونىمەن بىرگە، مەملەكەتتىك كوماندانىڭ ءتۇيىندى تۇردە تاربيەلەيتىن وبيەكتىلەرىنىڭ ءبىرى.

كەلۋ قاينارى: حالىق تورابى