شي جينپيڭ پورتۋگاليانىڭ زۇڭليى مونتەنەگرومەن كەزدەستى

9 - ايدىڭ 9 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا پورتۋگاليانىڭ زۇڭليى مونتەنەگرومەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 9 - ايدىڭ 9 - كۇنى، بەيجيڭ (ءتىلشى ياڭ چياۋچۋ). 9 - ايدىڭ 9 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا پورتۋگاليانىڭ زۇڭليى مونتەنەگرومەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن پورتۋگاليا − تاريحي استارى تەرەڭ ەلدەر، ەكى ەل حالقى اشىق، سيىسىمدى بولۋ، العا باسۋ، وزىنە - ءوزى قوجايىن بولۋ رۋحاني قاسيەتىنە يە. ەكى جاق دوسجار بەينەمەن كەڭەسۋ ارقىلى اۋمىن ماسەلەسىن ۇيلەسىمدى شەشتى. تاياۋ جىلداردان بەرى ءار سالاداعى سەلبەستىكتە ماڭىزدى تابىستارعا قول جەتىپ، تۇرلىشە قوعامدىق ءتۇزىمنىڭ، تۇرلىشە مەملەكەت جاعدايىنداعى ەلدەردىڭ ءوزارا قۇرمەت ەتۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتتى. بيىل − جۇڭگو مەن پورتۋگاليانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعى. جۇڭگو جاق پورتۋگاليا جاقپەن ستراتەگيالىق قارىم - قاتىناستى كۇشەيتىپ، ەكى جاقتى قارىم - قاتىناستىڭ دۇرىس بەتالىسىن يگەرىپ، جۇڭگو - پورتۋگاليا قارىم - قاتىناسىن ونان ارى جاقىنداتىپ، ىنتىماقتاسا سەلبەسۋ ارقىلى ەكى ەلدىڭ جانە دۇنيە ءجۇزىنىڭ گۇلدەنۋىنە، العا باسۋىنا اناعۇرلىم زور ۇلەس قوسۋدى قالايدى. ەكى جاق ءداستۇرلى دوستىقتى جالعاستىرىپ، ءوزارا سەنىم ارتىپ، ءوزارا قولداۋ كورسەتۋى كەرەك. دامۋ ستراتەگياسىن ۇشتاستىرۋدى تەرەڭدەتىپ، جاڭالىق اشۋ، جاسىل، تەڭىز - مۇحيت، ءدارى - دارمەك سياقتى سالالارداعى ناقتى سەلبەستىكتى كەڭەيتىپ، اۋمىننىڭ وزگەشە كوپىرلىك رولىن ساۋلەلەندىرىپ، جۇڭگو - پورتۋگال ءتىلدى ەلدەردىڭ ەكونوميكا - ساۋدا سەلبەستىك تالقى مىنبەرى سياقتى مەحانيزمدەردەن ويداعىداي پايدالانىپ، اناعۇرلىم جوعارى دەڭگەيدەگى ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋ كەرەك. مادەنيەت، وقۋ - اعارتۋ، ساياحات، عىلمي زەرتتەۋ سالالارىنداعى بارىس - كەلىسكە دەم بەرىپ، گۋمانيتارلىق اۋىس - كۇيىستى تەرەڭدەتۋ كەرەك. حالىقارالىق جاعداي نەعۇرلىم بىلىققان سايىن، جۇڭگو مەن ەۆروپا قارىم - قاتىناستى سولعۇرلىم كۇشەيتىپ، ءوزارا سەنىمدىلىكتى ارتتىرىپ، سەلبەستىكتى تەرەڭدەتۋى كەرەك. پورتۋگاليا جاقتىڭ جۇڭگو جاقپەن بىرگە جۇڭگو مەن ەۆروپانىڭ سەرىكتەستىك قارىم - قاتىناسى ورنىنا تاباندى بولىپ، جۇڭگو - ەۆروپا قارىم - قاتىناسىنىڭ باياندى، ورنىقتى، اقاۋسىز دامۋىن ىلگەرىلەتۋىن ءۇمىت ەتەمىن.

شي جينپيڭ بىلاي دەپ باسا دارىپتەدى: بيىل − جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى، سونداي - اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. دۇنيە ءجۇزى جاڭا اۋمالى - توكپەلى وزگەرىس كەزەڭىنە ءوتتى، ادامزات تاعى ءبىر رەت تاريحتىڭ جول ايىرىعىندا تۇر. جۇڭگو جاق پورتۋگاليا جاقپەن كوپ جاقتى سەلبەستىكتى جيىلەتىپ، ناعىز كوپ جاقتىلىقتى بىرگە امالياتتا ايگىلەپ، بىرلەسكەن مەملەكەتتەر ۇيىمىنىڭ بەدەلىن قورعاپ، ەركىن ساۋدا ءتۇزىلىسىن قورعاپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتۋدى قالايدى.

مونتەنەگرو دەسوۋسا زۇڭتۇڭنىڭ ءتوراعا شي جينپيڭگە جولداعان ىقىلاستى سالەمىن جەتكىزدى. مونتەنەگرو مىنالاردى ءبىلدىردى: پورتۋگاليا - جۇڭگو قارىم - قاتىناسىنىڭ تاريحى ۇزاق، بولاشاققا بەت العان، ەكى ەل اۋمىن ماسەلەسىن دوسجار بەينەمەن كەڭەس ارقىلى ۇيلەسىمدى شەشتى. وتكەن 25 جىلداعى اۋمىننىڭ تابىستى امالياتى پورتۋگاليا ۇكىمەتىنىڭ سول جىلى دۇرىس شەشىم جاساعاندىعىن تولىق دالەلدەدى. پورتۋگاليا جاق ءبىر جۇڭگو ساياساتىن ۇزدىكسىز اتقارادى، جۇڭگو جاقتىڭ پورتۋگاليا ەكونوميكاسى ەڭ قيىن كەزدە كورسەتكەن قاستەرلى قولداۋىن، كومەگىن ۇمىتپايدى. پورتۋگاليا جاق پورتۋگاليا مەن جۇڭگونىڭ دوستىق سەلبەستىگىن تەرەڭدەتۋگە باتىل كۇش سالادى، جۇڭگو جاقپەن ساياسي ءوزارا سەنىمدىلىكتى ارتتىرىپ، ەكونوميكا - ساۋدا بايلانىسىن جيىلەتىپ، قوس باعىتتا قارجى قوسۋدى كۇشەيتىپ، ەنەرگيا، فينانس، دەنساۋلىق ساقتاۋ، سۋ يگىلىگى سياقتى جاقتارداعى سەلبەستىكتى تەرەڭدەتىپ، ەكى ەل قارىم - قاتىناسىنىڭ ۇزدىكسىز العا دامۋىن ىلگەرىلەتۋدى ءۇمىت ەتەدى. جۇڭگو حالىقارالىق ىستەردە ماڭىزدى رول اتقارۋدا، پورتۋگاليا جاق ءتوراعا شي جينپيڭ العا قويعان دۇنيە جۇزىلىك جونگە سالۋ باستاماسىندا قامتىلعان ماڭىزدى ۇستانىمدى قۇپتايدى، كوپ جاقتىلىقتى بىرگە قورعاۋدى قالايدى، جۇڭگو جاقتىڭ دۇنيە جۇزىلىك جونگە سالۋ جۇيەسىن كەمەلدەندىرۋگە اناعۇرلىم زور ۇلەس قوسقانىن قۋانا كورىپ وتىر. جۇڭگو − ەۆروپانىڭ ورنىن وگەيسىتۋگە بولمايتىن سەلبەستىك سەرىگى، پورتۋگاليا ەۆروپا - جۇڭگو قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدە بەلسەندى رول اتقارۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى