دەلوعا ساياتىن قاراجات 78 ميلليون يۋان! التىندى اتكەزشىلىكپەن شەكارادان شىعارۋعا قاتىستى ەرەكشە ءىرى دەلو انىقتالدى 

جۋىردا، شىنجىن كەدەن مەكەمەسىنىڭ اتكەزشىلىككە سوققى بەرۋ مەكەمەسى حابارلاندىرۋ شىعارىپ، اۋەجايداعى جولاۋشىلاردى تەكسەرۋ ارناسى ارقىلى اتكەزشىلىكپەن التىندى شەكارادان شىعارۋعا ساياتىن ەرەكشە ءىرى دەلونى ءساتتى تۇردە انىقتاعان، جيىنى 11 قىلمىس كۇماندىسى تۇتقىندالعان، اتكەزشىلىكپەن شىعارۋ كۇمانىن قالىپتاستىرعان التىن مەن ودان جاسالعان بۇيىمداردان 130 كيلوگرامى انىقتالعان، دەلوعا قاتىستى سوما 78 ميلليون يۋان بولىپ، ەل ىشىندە ساتىپ الىپ، كوتەرمە ساۋداعا زات الۋ مەن كەدەننەن وتكىزۋ، شەكارا سىرتىندا ساتۋ قاتارلى بارلىق باسقىشتى قامتىعان اتكەزشىلىك قىلمىستىق ىستەر تورىن ءساتتى تۇردە تالقانداعان.

التىن — مەملەكەتتىڭ ماڭىزدى ستراتەگيالىق زاپاس بايلىعى بولىپ، مەملەكەت شەكارادان شىعارۋعا شەكتەۋ سالاتىن بۇيىمدارعا جاتادى. التىندى شەكارادان اتكەزشىلىكپەن شىعارۋ مەملەكەتتىڭ التىندى شەكارادان شىعارۋدى باسقارۋ تۋرالى بەلگىلەمەلەرىنە اۋىر دارەجەدە قايشى كەلىپ، التىن بازارىنداعى قالىپتى ساۋدا ءتارتىبىن بۇزىپ، مەملەكەتتىڭ فينانس حاۋىپسىزدىگىنە كومەسكى قاتەر توندىرەدى. «جۇڭحۋا حالىق رەسپۋبليكاسى كەدەن زاڭى»، «جۇڭحۋا حالىق رەسپۋبليكاسىنىڭ التىن، كۇمىستى باسقارۋ ەرەجەسى» قاتارلى زاڭ – تۇزىمدەرگە ساي، ءارقانداي ورىن مەن جەكەنىڭ مەملەكەتتىڭ قاتىستى باسقارۋشى تاراۋلارىنىڭ رۇقساتىنسىز التىن مەن التىن بۇيىمداردى زاڭسىز الىپ ءجۇرۋ، تاسىمالداۋ، پوچتادان سالۋ ارقىلى شەكارادان شىعارۋىنا قاتاڭ تيىم سالىنادى.

«جۇڭحۋا حالىق رەسپۋبليكاسىنىڭ قىلمىستىق ىستەر زاڭىنىڭ» 151 – تارماعىنىڭ 2 – تارماقشاسىندا مىنالار ايقىن بەلگىلەنگەن: مەملەكەت شەكارادان شىعارۋعا تيىم سالعان التىن، كۇمىس جانە باسقا باعالى مەتالداردى اتكەزشىلىكپەن شەكارادان شىعارۋ باعالى مەتالداردى اتكەزشىلىكپەن شەكارادان شىعارۋ قىلمىسىن قالىپتاستىرادى، قىلمىس وتكىزۋشى زاڭ بويىنشا 5 جىلدان جوعارى 10 جىلعا دەيىن مەرزىمدى قاماق جازاسىنا ۇكىم ەتىلەدى ءارى وعان اقشالاي ايىپ سالىنادى؛ سيپاتى ەرەكشە اۋىر بولعان جاعدايدا، 10 جىلدان جوعارى مەزىمدى قاماق جازاسىنا نەمەسە مەرزىمسىز قاماق جازاسىنا ۇكىم ەتىلەدى ءارى مال – مۇلكى ءمۇسادىرالانادى؛ سيپاتى جەڭىل بولعان جاعدايدا، 5 جىلدان تومەن مەرزىمدى قاماق جازاسىنا ۇكىم ەتىلەدى ءارى وعان اقشالاي ايىپ سالىنادى. اتكەزشىلىككە سوققى بەرۋ ساقشىلارى مىنانى ەسكەرتەدى: مەيلى، توپتى ۇيىمداستىرۋشى، زاتتى قاينارىنان ساتىپ الۋشى، جۇكتى وكىلدىك تاسىمالداۋشى بولسىن، الدە، پايداعا قىزىعىپ زات الىپ جۇرۋگە قاتىناسقان جاي جولاۋشىلار بولسىن، بارلىعى بىرگە قىلمىس وتكىزگەن سانالىپ، قىلمىستىق ىستەر جاۋاپكەرشىلىگى زاڭ بويىنشا قۋزاستىرىلادى.

كەلۋ قاينارى: حالىق تورابى