تاۋلى رايونداردا ەمدەلۋ وڭايلاستى (بايىرعى رايوننىڭ جاڭا ىستەرى)

سىچۋاننىڭ شىعىس سولتۇستىك قويناۋىندا، ميساڭ تاۋىنىڭ وڭتۇستىك بوكتەرىندە تاۋ سىلەمدەرى تۇتاسىپ جاتادى.

65 جاستاعى ۋاڭ داشۇن باجۇڭ قالاسى پيڭچاڭ اۋدانى تۋشيڭ قالاشىعىندا تۇرادى. ول كوپ ءتۇرلى سوزىلمالى اۋرۋعا شالدىققان، جۇرەككە تىرەۋ سالۋ وپەراتسياسىن دا جاساتقان. بىرنەشە كۇننىڭ الدىندا ۋاڭ داشۇن دەنساۋلىعى جايسىزدانىپ، شيپاحاناعا بارىپ كورمەك بولادى.

بۇرىن ۋاڭ داشۇن پيڭچاڭ اۋدانىنا نەمەسە باجۇڭ قالاسىنداعى شيپاحانالارعا بارىپ تەكسەرىلگەندە عانا كوڭىلى جايلاناتىن، تاۋ جولىندا اۋرە - سارساڭعا تۇسپەيتىن. قازىر ول قالاشىقتاعى پيڭجوۋ باس شيپاحاناسىنىڭ تۋشيڭ بولىمشە شيپاحاناسىندا ەمدەلسە بولعانى، اۋدان دارەجەلى ەمدەۋ قۇرىلىمدارىنىڭ قىزمەت وتەۋىنەن يگىلىكتەنە الادى.

باجۇڭ قالاسى سىچۋان - شانشي توڭكەرىستىك بايىرعى رايونىنا ورنالاسقان، تاۋلار قورشاپ جاتادى. بۇرىن اۋدان دارەجەلىدەن تومەن شيپاحانالار ناشار، تاۋلى وڭىردەگى بۇقارانىڭ ەمدەلۋى قيىن بولاتىن.

باس شۋجي شي جينپيڭ بىلاي دەپ باسا دارىپتەدى: ”ەمدەۋ، دەنساۋلىق ساقتاۋ قىزمەتىنىڭ ءتۇيىنىن تومەنگە ويىستىرۋعا، بايلىقتى تومەنگە تۇسىرۋگە جەتەكتەپ، سالاماتتىقتىڭ ’قورۋشىسى بولۋ‘ ءتۇزىمىن ورناتۋ _ حالىق بۇقاراسىنىڭ اۋرۋ كورسەتۋ، ەمدەلۋ قاجەتىن قاناعاتتاندىرۋداعى تۇبىرىنەن وڭاۋ شاراسى“.

باجۇڭ قالاسى باس شۋجي شي جينپيڭنىڭ ماڭىزدى نۇسقاۋىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، ينفورماتسيادان ورتاق يگىلىكتەنۋدى، بايلىقتى ءوزارا بايلانىستىرۋدى، قىزمەت وتەۋدى تومەنگە ءتۇسىرۋدى جەدەل ىلگەرىلەتىپ، تىعىز اۋدان كولەمىندەگى ەمدەۋ ورتاق تۇلعاسىنىڭ ساپاسىن جوعارىلاتىپ، دارەجەسىن جوعارىلاتۋدى ىلگەرىلەتتى. ۋاڭ داشۇننىڭ ەمدەلۋدەگى جاڭا كەشىرمەلەرى _ وسىنىڭ ارقاسى.

شيپاحاناعا بارعاننان كەيىن ۋاڭ داشۇن توسەككە جايلانىپ جاتىپ، جۇرەك تەكسەرۋ اسپابىن جالعاتتى، جاۋاپتى شيپاگەر ۋاڭ يۋانيۇن ءبىر جاعىنان اۋرۋ جاعدايىن سۇراپ، ءبىر جاعىنان تەكسەرە باستادى.

”ءدارىنى ۋاعىندا ءىشىپ ءجۇرسىز بە؟“ ”ۋاعىندا ءىشىپ ءجۇرمىن“. …

تەكسەرۋ اياقتاعان سوڭ ساندى مالىمەت ينفورماتسيا تەكشەسى ارقىلى پيڭچاڭ اۋداندىق حالىق شيپاحاناسىنا جەتكىزىلدى. ”اۋداندىق شيپاحانانىڭ جۇرەك كارديوگرامماسى ارقىلى دياگنوز قويۋ ورتالىعىن دياگنوز قويۋعا ۇسىنىس ەتتىك، ناتيجەسى ءتىپتى دە ايقىن بولسا، ناۋقاستار ءتىپتى دە الاڭسىز بولادى“ دەدى ۋاڭ يۋانيۇن.

پيڭجوۋ باس شيپاحاناسى _ پيڭچاڭ اۋداندىق حالىق شيپاحاناسى باستاماشى بولىپ قۇرعان اۋدان كولەمىندەگى ەمدەۋ ورتاق تۇلعاسى، ول بۇرىنعى 20 اۋىل - قالاشىق شيپاحاناسىن قامتيدى. ەمدەۋ ورتاق تۇلعاسى قۇرعان ينفورماتسيادان ورتاق يگىلىكتەنۋ تەكشەسى ”نەگىزگى ساتىدا تەكسەرۋ، اۋدان دارەجەلى دياگنوز قويۋ، ناتيجەسىن ءوزارا مويىنداۋدى“ جۇزەگە اسىردى.

كوپ وتپەي تالداۋ مالىمەتى قايتا جىبەرىلدى. ۋاڭ يۋانيۇن قاراپ كۇلىمسىرەپ: ”بارلىعى قالىپتى، جۋىقتان بەرى ءبىراز شارشاۋدىڭ اسەرى بولۋى مۇمكىن“ دەدى.

”الاڭسىز بولىڭىز، شيپاگەر ءسىزدىڭ قان قىسىمىڭىزدى باقىلاپ كەلەدى، قالىپسىزدىق بايقالسا دەر كەزىندە ەسكەرتەدى“. ۋاڭ يۋانيۇن ءبىر جاعىنان ۋاڭ داشۇنمەن سويلەسىپ، ەندى ءبىر جاعىنان كومپيۋتەردەگى زەردەلى سوزىلمالى اۋرۋلاردى باسقارۋ جۇيەسىن اشىپ تەكسەردى. قازىر تۋشيڭ قالاشىعىندا باقىلاۋ - تەكسەرۋگە ەنگىزىلگەن سوزىلمالى اۋرۋعا شالدىققاندار 2000 عا تايادى، ۇيدە قان قىسىمىن، قانداعى قانتتى ولشەيدى، شيپاگەر الىس ارالىقتان باقىلاي الادى.

”ەمدەۋ ورتاق تۇلعاسى قۇرىلعاننان كەيىن اۋداندىق حالىق شيپاحاناسىنىڭ ورتا دارەجەلى جانە ودان جوعارى كاسىپتىك اتاعى بارلار اۋىل - قالاشىق بولىمشە شيپاحانالارىنا بارىپ تۇراقتى قىزمەت وتەپ، كۇندەلىكتى وتىرىپ دياگنوز قويۋمەن بىرگە، باۋلۋعا دا كومەكتەسەدى“. پيڭجوۋ باس شيپاحاناسى باستىعىنىڭ ورىنباسارى لي جىچياڭ بىلاي دەدى: ”بيىل سوڭعى جارتى جىلدا تاعى 10 شيپاگەر بولىمشە شيپاحاناعا بارىپ قىزمەت وتەيدى“.

باجۇڭ قالاسى تۇڭجياڭ اۋدانى، نانجياڭ اۋدانى، ىنياڭ رايونى سياقتى جەرلەر دە تۇرلىشە تاسىلدەر ارقىلى بايلىقتى باسقارۋ جانە قىزمەت وتەۋدى بىرىكتىرىپ، وزىندىك ەرەكشەلىككە يە اۋدان كولەمىندەگى ەمدەۋ ورتاق تۇلعاسىن قۇرىپ، نەگىزگى ساتىداعى بۇقارانىڭ ەمدەلۋىنە اناعۇرلىم قولايلىلىق جاراتتى. 2025 - جىلى باجۇڭ قالاسىنىڭ نەگىزگى ساتىدا ەمدەۋ مولشەرى %68.18 تى ۇستاپ، سىچۋانداعى ءارقايسى قالا، وبلىستاردىڭ الدىڭعى قاتارىنا ءوتتى. باجۇڭ قالالىق دەنساۋلىق ساقتاۋ، سالاماتتىق كوميتەتى مەڭگەرۋشىسىنىڭ ورىنباسارى شۇي جۇيحۋا بىلاي دەپ تانىستىردى: ”’15 - بەسجىلدىق‘ مەزگىلىندە ءبىز ’ادەتتەگى اۋرۋلاردى قالا، اۋدانداردا ەمدەۋدى، كۇندەلىكتى اۋرۋلاردى نەگىزگى ساتىدا ەمدەۋدى‘ ونان ارى ىلگەرىلەتەمىز“.

”اۋرۋ كورسەتكەندە تاۋ اسىپ، تاس باسۋدىڭ قاجەتى جوق، كۇش ۇنەمدەلەدى، الاڭسىز بولدىق“. شيپاحانادان شىققاندا، تاۋ سامالى ەسىپ، ۋاڭ داشۇننىڭ ءجۇرىسى جەڭىلدەي ءتۇستى.