شي جينپيڭ بىشكەككە جەتتى

سول جەر ۋاقىتى 8 - ايدىڭ 30 - كۇنى تۇستەن كەيىن مەملەكەت ءتوراعاسى شي جينپيڭ ارناۋلى ۇشاقپەن بىشكەككە جەتتى، قىرعىزستاننىڭ زۇڭتۇڭى جاپاروۆتىڭ ۇسىنىسىمەن 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسادى ءارى قىرعىزستاندا مەملەكەتتىك ساپاردا بولادى. شي جينپيڭ مەن حانىمى پىڭ لييۋان بىشكەك ماناس حالىقارالىق اۋەجايىنا جەتكەندە جاپاروۆ زۇڭتۇڭ مەن حانىمى قىزۋ قارسى الدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 8 - ايدىڭ 30 - كۇنى، بىشكەك (تىلشىلەر ياڭ شۋەبو، ياڭ چياۋچۋ). سول جەر ۋاقىتى 8 - ايدىڭ 30 - كۇنى تۇستەن كەيىن مەملەكەت ءتوراعاسى شي جينپيڭ ارناۋلى ۇشاقپەن بىشكەككە جەتتى، قىرعىزستاننىڭ زۇڭتۇڭى جاپاروۆتىڭ ۇسىنىسىمەن 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسادى ءارى قىرعىزستاندا مەملەكەتتىك ساپاردا بولادى.

شي جينپيڭ مەن حانىمى پىڭ لييۋان بىشكەك ماناس حالىقارالىق اۋەجايىنا جەتكەندە جاپاروۆ زۇڭتۇڭ مەن حانىمى قىزۋ قارسى الدى. جاپاروۆ پىڭ لييۋانعا گۇل ۇسىندى. سول جەردىڭ بويجەتكەندەرى ءتوراعا شي جينپيڭ مەن حانىمىنا باۋىرساق، بال ۇسىنىپ، ءداستۇرلى قۇرمەتپەن ەڭ سيلى قوناقتاردى قارسى الدى. قۇرمەت قاراۋىلى قىزىل كىلەمنىڭ ەكى جاعىنا ءتىزىلىپ قۇرمەت ءبىلدىردى. ەكى ەلدىڭ مەملەكەت باسشىلارى مەن ولاردىڭ حانىمدارى سول جەردىڭ ءداستۇرلى مۋزىكا اسپاپتارىمەن ورىندالعان ويىن نومەرلەرى مەن بۇركىت، تازى، ءداستۇرلى سايىسكەرلىك، ات كەرۋەنى، كيىز ءۇي سياقتى مادەنيەت كورمەلەرىن بىرگە تاماشالادى. سول جەردەگى جاستار مەن ورەندەر جۇڭگو اندەرىن شىرقادى.

شي جينپيڭ جازباشا ءسوز سويلەپ، جۇڭگو ۇكىمەتى مەن جۇڭگو حالقى اتىنان جاپاروۆ زۇڭتۇڭعا جانە قىرعىزستان حالقىنا شىنايى سالەم جولدادى جانە ىزگى تىلەك ءبىلدىردى. شي جينپيڭ مىنالاردى اتاپ كورسەتتى: جۇڭگو مەن قىرعىزستاننىڭ ءداستۇرلى دوستىعى ارىدان باستاۋ الادى، الىپ تيانشان تاۋى ەكى ەل حالقىنىڭ مىڭ جىلدىق دوستىق بارىس - كەلىس تاريحىنا كۋا. ديپلوماتيالىق قاتىناس ورناتقان 34 جىلدان بەرى جۇڭگو - قىرعىزستان قاتىناسى حالىقارالىق اۋمالى - توكپەلى وزگەرىستەردىڭ سىنىنان ءوتىپ، باستان - اياق اقاۋسىز، ورنىقتى دامىپ، جاڭا داۋىردەگى جالپى بەتتىك ستراتەگيالىق سەرىكتەستىك قاتىناستىڭ جوعارى دەڭگەيىنە جەتتى. تاياۋ جىلداردان بەرى ەكى ەلدىڭ سەلبەستىگى جەدەل دامۋدىڭ ”التىن مەزگىلىن“ قارسى الدى، ەكى جاقتى ساۋدا سوماسى، ەكى ەل ادامدارىنىڭ بارىس - كەلىسى تاعى دا تىڭ دەڭگەيگە كوتەرىلدى، جۇڭگو - قىرعىزستان - وزبەكستان تەمىر جولى سياقتى ءىرى نىساندار ءساتتى اتقارىلىپ، ناقتى ءوزارا ءتيىمدى سەلبەستىك جەتىستىكتەرى ەكى ەل حالقىن كەڭ كولەمدە يگىلىككە كەنەلتتى. ساپار كەزىندە مەن جاپاروۆ زۇڭتۇڭمەن جۇڭگو - قىرعىزستان قاتىناسى، ەكى ەلدىڭ ءار سالاداعى سەلبەستىگى، سونداي - اق بىرگە كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، جۇڭگو - قىرعىزستان تاعدىرلاس ورتاق تۇلعاسىن قۇرۋعا جاڭا جوبا جاسايمىن. شاڭحاي سەلبەستىك ۇيىمىنىڭ بىشكەكتەگى باسشىلار ماجىلىسىنە قاتىناسىپ، ءارقايسى جاقپەن بىرگە شاڭحاي سەلبەستىك ۇيىمىنىڭ ۇزدىكسىز جاڭا دامۋدى جۇزەگە اسىرۋىن ىلگەرىلەتۋدى كۇتەمىن.

ساي چي، ۋاڭ ي قاتارلى ساپارلاستارى ارناۋلى ۇشاقپەن بىرگە باردى.

جۇڭگونىڭ قىرعىزستانداعى باس ەلشىسى ليۋ جياڭپيڭ دە اۋەجايعا بارىپ قارسى الدى.

«حالىق گازەتى»، 8 - ايدىڭ 30 - كۇنى، بەيجيڭ. 8 - ايدىڭ 30 - كۇنى تۇستەن بۇرىن مەملەكەت ءتوراعاسى شي جينپيڭ 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ ءۇشىن بەيجيڭنەن اتتانىپ بىشكەككە جەتتى، قىرعىزستاننىڭ زۇڭتۇڭى جاپاروۆتىڭ، ەگيپەتتىڭ زۇڭتۇڭى سيسيدىڭ ۇسىنىسى بويىنشا ەكى ەلدە مەملەكەتتىك ساپاردا بولادى.

ءتوراعا شي جينپيڭنىڭ حانىمى پىڭ لييۋان، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترى ۋاڭ ي قاتارلىلار شي جينپيڭمەن بىرگە ساپارعا اتتاندى.

كەلۋ قاينارى: حالىق تورابى