شاڭحاي قالاسىندا شەكارا اتتاپ زاڭسىز تيجارات جۇرگىزگەن ەرەكشە ءىرى جاسىرىن بانكە دەلوسى انىقتالدى 

حالىق گازەتىنىڭ 8 - ايدىڭ 30 – كۇنى شاڭحايدان بەرگەن حابارى (ءتىلشى جۇن يۇنپىڭ) ءتىلشىنىڭ شاڭحاي قالالىق قوعام حاۋىپسىزدىگى مەكەمەسىنەن ۇعىسۋىنشا، جۋىردا شاڭحاي ساقشى جاعى ۆيرتۋال اقشادان پايدالانىپ شەكارا اتتاپ زاڭسىز تۇردە اقشا اۋىستىرعان ەرەكشە ءىرى جاسىرىن بانكەگە قاتىستى دەلونى ءساتتى انىقتاپ، قىلمىس كۇماندىلارىنان 19 ادامدى ۇستاعان، دەلوعا قاتىستى سوما 20 ميلليارد يۋانعا جۋىق بولعان.

2026 - جىلى 1 - ايدا، شاڭحاي قوعام حاۋىپسىزدىگى مەكەمەسى ەكونوميكالىق قىلمىستاردى تەكسەرۋ تاراۋى ينتەرنەت ارقىلى شارلاپ تەكسەرۋ جۇرگىزگەندە، ءبىر ءبولىم ادامداردىڭ ينتەرنەت تەكشەسى ارقىلى اقشا اۋىستىرۋ كاسىبىن ۇگىتتەپ جۇرگەنىن بايقايدى. جان – جاقتى تەكسەرىپ تۇجىرىم جاساعاننان كەيىن، ساقشى جاق ەكونوميكالىق قىلمىس وتكىزگەن بولۋى مۇمكىن دەپ كۇماندانىپ، دەلو تۇرعىزىپ تەكسەرۋ جۇرگىزەدى.

تەكسەرۋ ارقىلى انىقتاۋعا قاراعاندا، 2024 - جىلى 8 - ايدان بەرى، قىلمىس كۇماندىسى ليۋ x، شۇي x قاتارلىلار زاڭسىز پايدا تابۋدى ماقسات ەتىپ، مەملەكەتتىڭ باسقارۋشى تاراۋىنىڭ بەكىتۋىنەن وتكىزبەگەن جاعدايدا، ۆيرتۋال اقشانى ەسەپتەۋ قۇرالى ەتىپ، ينتەرنەت ارقىلى جانە ينتەرنەتتەن تىس تاسىلمەن اقشا اۋىستىرۋدى قاجەت ەتەتىن قاريدارلاردى باۋراپ، ۆيرتۋال اقشا جانە شەكارا ءىشى - سىرتىنداعى قارجىنى ءوزارا اينالىمعا سالۋ ارقىلى، حالىق اقشاسى مەن شەتەل اقشاسىن زاڭسىز اۋىستىرعان ءارى وسىعان بەلگىلى سالىستىرمادا قىزمەت وتەۋ اقىسىن العان. قاريدارلار حالىق اقشاسىن توپتىڭ مەڭگەرۋىندەگى ەسەپكە اۋدارعاننان كەيىن، قىلمىستىق توپ ۆيرتۋال اقشا ساۋداگەرلەرىمەن بايلانىس جاساپ، ۆيرتۋال اقشا ساتىپ الىپ، سوڭىنان شەتەلدەگى ارنالار ارقىلى ساتىپ، شەتەل اقشاسىنا اۋىستىرىپ، قاريدار بەلگىلەگەن شەتەلدەگى ەسەپ نومىرىنە جوتكەپ، ”حالىق اقشاسى − ۆيرتۋال اقشا − شەتەل اقشاسى“ بويىنشا زاڭسىز اۋىستىرۋدى جۇزەگە اسىرعان.

ناقتى دالەل – ىسپاتتاردى يگەرگەننەن كەيىن، بيىل 4 - ايدان باستاپ، شاڭحاي قوعام حاۋىپسىزدىگى مەكەمەسى ەكونوميكالىق قىلمىستاردى تەكسەرۋ تاراۋى كوپ رەت تور جايۋ ارەكەتىن ورىستەتىپ، قىلمىس كۇماندىلارىنان 19 ادامدى تۇتقىنداعان. قازىر پروكۋراتۋرا ورگانى قىلمىس كۇماندىلارىنان ليۋ x، شۇي x قاتارلى 5 ادام زاڭسىز تيجارات جاساۋ قىلمىسىن، ينفورماتسيالىق جانە ينتەرنەتتىك قىلمىستىق ارەكەتپەن شۇعىلدانعاندارعا كومەكتەسۋ قىلمىسىن وتكىزدى دەگەن كۇمانمەن ولاردى زاڭ بويىنشا قولعا الۋدى بەكىتكەن، دەلو قازىر ىشكەرىلەي تەكسەرىلۋدە.

كەلۋ قاينارى: حالىق تورابى