2026 - جىلدان 2030 - جىلعا دەيىن شينجياڭدا از ۇلت جوعارى ساپالى كاسىپتىك - تەحنيكالىق تىرەكتىلەرىنەن 2000 ادام تاربيەلەنەدى 

تيانشان تورابى – شينجياڭ گازەتىنىڭ ءتىلشىسى جاۋ چۇنحۋا حابارلايدى. 8 – ايدىڭ 27 – كۇنى، ءتىلشىنىڭ اۆتونوميالى رايوندىق ادام كۇشى بايلىعى جانە قوعامدىق قامتاماسىزداندىرۋ مەڭگەرمەسىنەن ۇعىسۋىنشا، 2026 – جىلدان 2030 – جىلعا دەيىن، شينجياڭدا از ۇلت جوعارى ساپالى كاسىپتىك - تەحنيكالىق تىرەكتىلەرىنەن 2000 ادام تاربيەلەنەدى، ماماندار قىزمەت وتەۋ ۇيىرمەسى قيمىلىن 20 رەت ورىستەتىپ، شينجياڭنىڭ كاسىپتىك – تەحنيكالىق دارىندىلار قوسىنى قۇرىلىسىن كۇشەيتىپ، شينجياڭنىڭ ەكونوميكاسى مەن قوعامىنىڭ جوعارى ساپالى دامۋىن جەبەۋگە تىرەكتى دارىندىلاردى ازىرلەيدى جانە اقىل – پاراسات جاعىنان قولداۋ كورسەتەدى.

اۆتونوميالى رايون شينجياڭنىڭ ەكونوميكاسى مەن قوعامىن جوعارى ساپالى دامىتۋ نىساناسى مەن كاسىپتىك – تەحنيكالىق دارىندىلار قوسىنى قۇرىلىسىنىڭ قاجەتىنە نەگىزدەلىپ، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى، شۇعىل قاجەت بولىپ وتىرعان، كەمشىل دارىندىلاردى جەتىلدىرۋدى جەتەكشى باعدار، قابىلەت قۇرىلىسىن وزەك، ورتا، جوعارى ساتىداعى از ۇلت كاسىپتىك – تەحنيكالىق دارىندىلارىن ماڭىزدى ءتۇيىن ەتىپ، زاتتىق جاقتا قارجى قوسۋ مەن دارىندىلار جاعىندا قارجى قوسۋدى تىعىز ۇشتاستىرۋعا، ءىس ورنىنىڭ قاجەتىنە ۇيلەستىرۋ مەن تاربيەلەۋ – ىستەتۋدى ءوزارا ۇشتاستىرۋعا، قىزمەت امالياتى مەن كاسىپتىك جاقتان تاربيەلەۋدى ءوزارا ۇشتاستىرۋعا تاباندى بولىپ، جىلىنا اۆتونوميالى رايون بويىنشا كاسىپتىك – تەحنيكالىق دارىندىلاردان 400 ادامدى سارالاپ، قاتىستى ولكەلەردەگى (اۆتونوميالى رايون، توتە قاراستى قالا) جوعارى مەكتەپتەرگە، عىلىمي زەرتتەۋ ورىندارىنا جانە باسقا دا قاتىستى كاسىپورىن، ءىسورىندارعا ءبىر جىلدىق ەرەكشە تاربيەلەۋگە جانە اماليات بارىسىندا ۇيرەنۋگە ورنالاستىرادى. وقۋ – اعارتۋ، دەنساۋلىق ساقتاۋ، اۋىل شارۋاشىلىعى، ينجەنەريا تەحنيكاسى، مادەنيەت، ساياحات، كوركەمونەر قاتارلى ءتۇيىندى سالالار مەن تىرەكتى كاسىپ سالاسىندا شۇعىل قاجەت بولىپ وتىرعان دارىندىلاردى ءتۇيىندى تۇردە جەتىلدىرەدى، وڭتۇستىك شينجياڭ وڭىرىندە جانە نەگىزگى ساتىدا ۇزاق ۋاقىت قىزمەت ىستەگەن، جەتىلدىرۋدە كومەسكى قۋاتى بار كاسىپتىك – تەحنيكالىق تىرەكتىلەرگە لايىقتى تۇردە ءمان بەرىلەدى.

سونىمەن بىرگە، جىلىنا 4 رەت مامانداردىڭ قىزمەت وتەۋ ۇيىرمەسىن ۇيىمداستىرىپ، شينجياڭدا (بيڭتۋاندى قامتيدى) كەڭەس بەرۋ، لەكسيا سويلەۋ، تەگىن ەمدەۋ، تاربيەلەۋ جانە تەحنيكالىق جاقتا جەتەكشىلىك ەتۋ قاتارلى قىزمەت وتەۋ قيمىلدارىن ورىستەتىپ، شينجياڭنىڭ كاسىپتىك – تەحنيكالىق دارىندىلارىنىڭ بىلىمدەرىن جاڭالاۋدى تەزدەتىپ، جاڭا نازاريا، جاڭا ءبىلىم، جاڭا تەحنولوگيا، جاڭا ءادىستىڭ تارالۋىن، جالپىلاسۋىن جانە قولدانىلۋىن جەبەيدى.

كەلۋ قاينارى: حالىق تورابى