ەۆروپا ەلىن ەلەڭ ەتكىزگەن ەرجەت

ەۆروپا كلۋبىندا ويىن كورسەتەتىن تۇڭعىش شينجياڭدىق فۋتبولشى، مەملەكەتتىك وليمپيادا فۋتبول قۇراماسىنا قابىلدانعان تۇڭعىش قازاق ويىنشى

اۆتورى: ماقسات قيزات ۇلى 

2014.12.12 09:40  

　　1993-جىلدىڭ 4-قاڭتارى شاۋەشەك قالاسىنداعى ەرزات وتباسى ۇزاعىنان ءسۇيىندى، بەسىگى ۇلمەن تەربەتىلسە، قاي قازاقتىڭ شەكەسى شىلقىمايدى دەيسىز، بۇل دا سونداي قۋانىشتىڭ ۇزىگى ەدى، ونەر دەسە ىشكەن اسىن جەرگە قوياتىن ەرەكەڭ كوزىن اشىپ كورگەنى، اۋىزىن اشىپ سۇيگەن جالعىز ۇلىنا بولەكشەلەپ ەسىم قويدى، كوزىن جۇمىپ، كۇبىرلەپ كەلىپ: «ەز ەمەس، ەر بول، ويلاعانىڭا كەز بول. تىلەگىڭە تەز جەت، ەرتوستىكشە ەرجەت»،- دەدى، سوڭعى ءسوز اتاۋلى كۇيىندە ءسابي قۇلاعىنا جاڭعىرىپ قالا بەردى، ءسابي ەسىمى ەرجەت اتاندى. بالاسى دەسە اناسى گۇليدىڭ شىعاردا جانى بولەك، موينىنا بۇرشاق سالىپ تاڭىرىنەن تىلەپ العان تورسىق شەكەسى ەمەس پە، كوزىنەن تاسا قىلماۋعا قۇلشىنادى، وعان قۇلدىراڭداعان قۇلىن قويسىن با، بىردە تورگە، بىردە ورگە وزادى، اياق-قولى وزگە قۇربىلارىنان گورى شيراقى دا شىمىر، الا دوپتى كورسە اسىعى الشى تۇسكەندەي ارتىنان قالمايدى، قازداياقتاپ قۇلانشا قىلپىپ تۇرادى، ورتاداعى جالعىز تەنتەكتىڭ بۇل قىلعى بارىنەن بۇرىن اتاسى قىدىرقان مۇقاتايعا قاتتى باتتى، «سۇلۋ دا سۇلۋ دۇنيە-اي»،- دەپ ولەڭدەتىپ جۇرگەن ەسىمى ەلگە تانىس اقىن اعانىڭ، ۇستاز اعانىڭ مىنەزى بالالارعا قاتالداۋ ەدى، ەلىكتەي ورعىپ تۇرعان نەمەرەسى ەرجەتتى دە شالىس قيمىلىنا بولا ءبىر-ەكى رەت شەكەدەن شەرتىپ قويىپ ەدى، وعان مۇقالعان ەرجەت بولمادى، توپ قۇربىسىن باستاپ كەلىپ اتاسىنىڭ كەڭ اۋلاسىن دوپپەن شاڭداتتى، توپىرلاعان بالاعا، داڭعىرلاعان قاقپاعا قاراپ تۇرىپ اتاسى ەرىكسىز ەزۋ تارتتى، «الا دوپ دەسە جانىڭ ەكەن، بۇل سەرىگىڭ نە سورىڭ، نە باعىڭ بولار، ءيلايىم سوڭعى بولسىن»،-دەپ ىشتەي دۇعا ەتتى دە: ال تەنتەكتەر توسىلماي تەبىڭدەر، العا جۇيتكىڭدەر،-دەپ ءداۋ داربازانى اشىپ تاستاپ، بالالارمەن قوسىلىپ دوپ تەۋىپ كەتتى. قاي قازاقتىڭ اتا-اناسى ۇلىنىڭ تىزەسىنىڭ جارا، كيىمنىڭ قارا بولىپ «سۇيكىمسىز حالدە» دوپ قۋىپ جۇرگەنىن ۇناتادى دەيسىز، ويىن-ساۋىققا بەيىمدەۋ حالىق بولعانسىن با، العاشىندا ەرجەتتىڭ اسقار تاۋى مەن ءمولدىر بۇلاعى دا وسى جاعىن قۇپ كورىپ، تۇلەكتەرىن مۋزىكا كلاسىنا تابىستاپ، ءان ايتىپ، ەلەكتروندى رويال ويناپ كەتسە دەپ ويلاعان، ءبىر ايدان كەيىن ۇلىنىڭ مۋزىكالىق ۇلگىرىمىن بايقاستايتىن دەپ اناسى بارسا، بالاڭىز باياعى «دو، راي، مي، فادان» ارى اسا الماعان قۇلىقسىز پىشىندە، سىرتتا دوپ تەۋىپ جۇرگەن اعالارىنا الاقتاپ قاراي بەرگەن، بۇنى سەزگەن كىسى جوق، مۋزىكا بولماعاسىن داۆينچدىڭ دارىنى جۇقسىن دەپ بالاسىن جەتەكتەپ اناسى سۋرەت كلاسىنا اپارىپ تاستاعان كەلەسى ايدا، از-كەم ۋاقىتتان سوڭ اسەم ونەردەن ازدا بولسا جۇعىن بولعان شىعار دەپ بارىپ ەدى اكەسى، ۇلانىڭ ۇستازىنىڭ «جەرى شارىنى دومالاقتاپ سىز» دەگەنىن «دوپ سىز» دەپ ۇعىپ اق قاعازدىڭ بەتىن الا دوپپەن تولتىرىپ تاستاعان، اكەسى سول كەزدە سەزدى عوي ەرجەتتىڭ ەس-اقىلى الا دوپ دەيتىن دارۋشتە ەكەنىن، «بولار بالانىڭ بەتىن قاقپاي بەلىن بۋ» دەگەن اتا ءسوزى ەسكە ءتۇستى، دانالىقتى ەسكەرمەسەڭ ەستىلىگىڭ قايسى، ويلامدى اكە، ارداقتى انا بالاسىنىڭ تىزگىنىن تارتپاي، ءوز ويىمەن ءومىر كەشىپ، ءوز ويىمەن ونەر يگەرۋدى قۇپ كوردى. ەرزات شاڭىراعىنىڭ ەلگەزەك ۇلى الا دوپقا عانا وزەلەنىپ قالعان جوق، وقۋدا دا ۇعىمتال بولدى، ساباعىن اقساتپاي، اتا-اناسىن قاقساتپاي قۇلشىنا ءوستى، كەشتە ۇيقىعا باس قويعان جاستىڭ ءبىر قۇشاعىندا الا دوپ جاتسا، ءبىر قۇشاعىندا انا ءتىلى وقۋلىعى جاتاتىن ەدى، «قۇلشىنعانعا قۇت ءۇيىر» دەگەن ەمەس پە اتام قازاق، ەرجەت باستاۋىش وقىپ جۇرگەندە 6 جىل كلاسكومدىق مىندەت وتەسە، دەنە-تاربيە الاڭىندا قالالىق 7-باستاۋىش مەكتەپ فۋتبول كومانداسىنىڭ باس ويىنشىسى بولدى، ونىڭ وسى «كاپيتان» بولعانى وعان ۇلكەن جول اشتى، ەرجەتتىڭ فۋتبولداعى جارقىن جولى وسى كەزدە تۋدى، «وراي دايىندىعى بار ادامعا تاۋەلدى» دەگەن ناقىل بولماۋشى ما ەدى، 2005-جىلى ەلىمىزگە اتى تانىس ءۇرىمجى قالاسىنداعى «سۇڭچيليڭ فۋتبول مەكتەبى» ەلىمىزدىڭ بولاشاق فۋتبول شولپاندارىن جەتىستىرۋ ءۇشىن بۇكىل شينجياڭنان الادوپتى اياعىندا ويناتاتىن جاسوسپىرىمدەردى جيناۋعا اتقا قونادى، كوپ جەرلەرگە بارادى، كوڭىلدەرى تويات تاباتىنداي تۇلەك تابا الماي تىقىرشىدى، «جورگەنگە جورگەم ىلىنەدى» دەگەن، تارباعاتاي ايماعىنا بارعان كەزدە، سول جەردە ەرجەتتەي قىراعى جاس قىراندى كوزدەرى شالعان كەزدە ساراپشىلاردىڭ كوڭىلى ورنىنا ءتۇسىپ، «ۇھ» دەدى، ايتسە جار دەگەندە جالعىزى عىلىم جولىنا تۇسسە دەپ تىلەك ەتىپ ەدى اتا-انا، ەندى «سايدا سانى، قۇمدا ءىزى جوق» دوپ قۋالاعان كوكبالاقتىڭ ءبىرى بولىپ كەتىپ بارادى، قايتسە ءجون، ەرجەتىن ەتەگىنەن تارتىپ الىپ قالسا ءجون بە، جوق، الدە، ارمانىن الا دوپپەن جالعاعان جالعىزىنا باتاسىن بەرىپ قويا بەرسە راۋا ما، شەشىمدى «سۇڭشچيليڭ فۋتبول مەكتەبىنىڭ» باس جاتتىقتىرۋشىسى بولات مۇعالىم ايتتى، «بالاڭىزدىڭ ەتى ءتىرى ەكەن، بىزگە بەرىڭىز، جالىندى بولسا جەردە قالماس، ەلىمىز شينجياڭ فۋتبولىنا نازارىن سالىپ وتىر، كىم كوزگە تۇسەدى دەپ توسىپ وتىر، بابى مەن باعى قاتار شاپسا، ەندى 5 جىلدا ەرجەتىڭىزدى ەلىمىز فۋتبول كومانداسىنان كورمەسىڭىزگە كىم كەپىل»،-دەدى تاربيەشى، وزگەگە سەنبەسەك تە ۇستازعا يمانداي سەنەتىن ۇلىتتىڭ ۇرپاعىمىز، اكە-شەشەسى 11 جاسار ۇلىنىڭ بۋىنشاق-تۇيىنشەگىن دايىندادى دا: «ال ۇلىم، الا دوپ الدىڭنان ءتيسىن»،-دەپ اق باتاسىن بەرىپ الىس شاھارعا شىعارىپ سالدى.

　　تەلقوڭىردىڭ ورتاسىندا ويناقتاپ وسكەن جاس بالا جات جەر، وزگە اعايىنداردىڭ اراسىنا كەلگەندە قوڭىلتاقسىپ-اق قالدى، ەرجەتتىڭ بويىندا ەجەلدەن ءبىر قاسيەت قينالعانىن قيماسىنا دا اشىپ ايتپايتىن، سول تاسقاينات تاباندىلىعىنا سالىپ، تاربيەشىنىڭ قاتاڭ تالابىنان شىعۋعا تالپىندى، مەكتەپتىڭ سۋلى-شايلى تاماعىنا دا كوندىكتى، باسقاسى ەمەس، ءدىلى ءبىر، ءتىلى باسقا ۇيعۇر دوستارىنىڭ ءسوزىن باستابىندا تۇسىنە الماي دىعدىردى، وزگە ءتىلدى ۇيرەنۋدىڭ وزىق ونەر ەكەنىن تەرەڭنەن ءتۇسىندى، ەرجەتتىڭ ءالى ەسىندە اناسىنا بىلاي دەپ تەلەفون بەرگەنى، «شەشە، كىلتتى ۇيعۇرشا نە دەپ اتايدى»،-دەپ، «بالام، اشقۇش دەپ ايتادى»،- دەپ اناسى باپپەن ءتۇسىندىردى، الىستاعى اناسى وعان اركەز جاردەمشى بولدى، ال قازىر اناسىنىڭ ەجىكتەپ سويلەگەن ۇيعۇرشاسىنا ەرجەتتىڭ كوڭىلى تولمايدى، «قويىڭىزشى، نە قازاقشا ەمەس، نە ۇيعۇرشا ەمەس، قىرعىزشىلاماي» دەپ قالجىڭداپ قويادى، ءوزى انا تىلىنەن سىرت ۇيعۇر، حانزۋ ءتىلىن سۋداي ساپىرسا، اعىلشىن، پورتۋگال، نيدەرلاند ءتىلىن اجەپتاۋىر جاقسى سويلەيدى، «كورە-كورە كوسەم بولعان، سويلەي-سويلەي شەشەن بولعان» دەگەن وسى دا. ونىڭ رۋحاني قازىعى اناسىنىڭ سول ءبىر ايتقان ءبىر اۋىز ءسوزى: «شىدامدى شىڭعا شىعادى». ءالسىز بۋىن بەس جىلدىق ماشىق بارىسىندا قاراعايدىڭ دىڭىندەي قاتايىپ، سەرىپپەدەي سەرپىندى قيمىلعا كوشتى، مەكتەپ ونى باستابىندا جاسىل الاڭنىڭ الدىڭعى شابۋىلشىسى رەتىندە تەكەدەي تاڭداپ اكەلگەن بولاتىن، ءبىراق رايونىمىزدا وتكىزىلگەن جاسوسپىرىمدەردىڭ ءبىر رەتكى فۋتبول جارىسىندا ول جارالانىپ قالعان قاقپاشىنىڭ ورنىندا قاقپا قورعادى، بۇرىندارى وزىنەن ۇلكەن اعالارىمەن بىرگە فۋتبول ويناعان كەزىندە قاقپا قورعاپ العىس العان تاجىريبەسى دە بار ەدى، سونىسى سەپ بولدى ما، جوق الدە، وزىندە بار تۋما سەزگىرلىگى قۋات بەردى مە، اقىرى دىتتەگەن جەردەن شىعىپ، كومانداعا جەڭىس سيلادى، مىنە وسىلاي 13 جاستاعى ەرجەتتىڭ پەشەنەسىنە قاقپا قورعاۋ بۇيىردى، «توعىز ۇلىم ءبىر توبە، ەرتوستىگىم ءبىر توبە» دەگەندەي فۋتبول وينىندا كومانداداعى وزگە 10 وينشىنىڭ ورنى ءبىر بولەك بولسا، قاقپا قورعاۋشىنىڭ ورنى تىم بولەك، بەينەلەپ ايتار بولساق فۋتبول قاقپاشىسى قاراۋىلدى قورعاپ تۇرعان 1-ءنومىرلى سارباز ىسپەتتى.

　　اتاعى الاتاۋداي فۋتبول مەكتەبىنە كەلگەننەن كەيىن ويىن بالاسى جاسىنداعى ەرجەت وزگە قۇربىلارى سياقتى قىزىلدى-جاسىلدى قالانى قىزىقتاپ، ويىن قۋىپ كەتكەن جوق، جەلىك كوڭىلىن قاتاڭ تاربيەگە جەڭدىرە ءبىلدى، قۇيما قۇلاق قىرعي ۇستازى تاربيەنى ءبىر ايتسا ءبىر، ەكى ايتسا ەكى قاعىپ الدى، سونىڭ ارقاسى ەمەس پە، مەكتەپكە كەلگەنىنە 3 جىل تولماي جاتىپ، شينجياڭ فۋتبول كومانداسىنىڭ سابىنا قوسىلدى، تالاي بايراقتى باسەكەدە اعالاپ العا شىقتى، اسىرەسە 2009-جىلعى قازاقىستان رەسپۋبليكاسىندا وتكىزىلگەن «پرەزيدەنت كۋبوگىنە» تالاسۋ جارىسىندا ازيا ەلدەرىندەگى بەلدى كوماندالارمەن باق سىناسقان شينجياڭ فۋتبول كومانداسى توپ جاردى، جارىس سوڭىندا ەرجەتتىڭ ايىرىقشا تالانتىنا سۇيىنگەن ۇجىم ونى «قىراعى قاقپاشى» اتاعىمەن ماراپاتتادى. العاش حالقارالىق جارىستا مىنە وسىلاي كوزگە تۇسكەن كوك ءورىم سودان باستاپ ەرتەمەن شاپسا كەشكە وزدى، ەڭىسكە سالسا ورگە وزدى. ول سان مارتە شينجياڭ فۋتبول قۇراماسىن باستاپ حالقارالىق فۋتبول دودالارىنىڭ كورىگىن قىزدىرىپ، ەۆروپاداعى ازۋى التى قارىس سان پەتربۋرك زەنت كلۋبى، ماسكەۋ ورتالىق قۇرلىق ارمياسى سىندى مىقتى فۋتبول كلۋبتارىمەن تىزە قاعىستىرىپ، تىڭ ناتيجەلەرگە قول جەتكىزدى، «القاۋلى ەڭبەكتەرىمىزدىڭ باسىندا ەرجەتتەي ەرىمىز تۇر، ول ءبىزدىڭ قاقپامىزدى عانا ەمەس، نامىسىمىزدى دا قورعاپ ءجۇر»،- دەيدى شينجياڭ فۋتبول قۇراماسىنداعى ساپتاستارى وعان ريزاشىلىعىن ءبىلدىرىپ. «ەل ماقتاعان جىگىتتى قىز جاقتاعان»، ەرجەتتىڭ اتاعى اسپانداعان سايىن وعان «قۇدالىق تۇسەتىن» ەلىمىز ءىشى-سىرتىنا تانىمالى فۋتبول كلۋبتارى كوبەيە باستادى، 2011-جىلى ماۋسىمدا ەلىمىزدىڭ سۋپەر ليگاسىندا ورەلى ويىن كورسەتىپ جۇرگەن «شاڭحاي شىنحۋا» كلۋبى ەرجەتتى باۋرىنا تارتتى، رايونىمىزدىڭ فۋتبول قۇرامالارىمەن سالىستىرعاندا قارجىسى مول، تەحنيكاسى كوش ىلگەرى ىشكى ولكەنىڭ داڭىقتى فۋتبول كلۋبى ەرجەتتىڭ تالانتىن جەتىلدىرىپ، شالعىسىن ۇشتادى. ول 2011-جىلى شاڭحاي سەلبەستىك ەلدەر ۇيىمىنا مۇشە ەلدەردىڭ فۋتبول جارىسىندا ەرەن ەڭبەك كورسەتىپ، فۋتبول جانكۇيەرلەرىنىڭ ماقتانىشىنا اينالدى. ەل ۇلانى ەرجەتتىڭ فۋتبولداعى ۇمىتىلماس ەستەلىگى 2013-جىلى جازدا جازىلدى دەسەك قالت ايتپاعان بولار ەدىك، بىلتىر ەرجەت شينجياڭ فۋتبول قۇراماسىن باستاپ 12-كەزەكتى مەملەكەتتىك سپورت جينالىسىنىڭ فۋتبول جارىسىنا باردى، باۋىرىن ەندى عانا جازىپ كەلە جاتقان رايونىمىز فۋتبول قۇراماسىنىڭ ورەسىز ءوزىڭىز بىلەسىز، وزگە ولكەلەردەگى الا دوپتى اسىقشا يىرەتىندەرمەن يىق تىرەسەتىن دارەجەدە ەمەس، ءبىراق سەنىم بولسا بيىكتى بىرلىكتە باعىندىرۋعا بولاتىنىن ءبىزدىڭ جىگىتتەر بەس قولىنداي ءبىلدى، سونىڭ ىشىندە ەلىمىزگە تانىمالى جاس تالانتتى فۋتبولشى ەرجەتكە ارتىلعان جاۋاپكەرشىلىك تاۋداي ەدى، قاقپاشى مىقتى بولسا، قارسىلاستىڭ قيىندىعى ءىشى قۋىس جاڭعاقتاي ەكەن، تەز «شاعىلدى»، اقىرعى مارەدە شينجياڭ فۋتبول قۇراماسى 4- ورىنعا تياناقتاپ، ەلىمىزدىڭ فۋتبول جانكۇيەرلەرىن قۋانىشقا بولەدى. تاريحتا شينجياڭ فۋتبول قۇراماسى ءدال وسىنداي جوعارى ناتيجەنى جاراتىپ كورمەگەن ەدى، ەرجەت سەركەلىك ەتكەن شينجياڭ قۇراماسى اقىرعى ەسەپتە سپورت تاريحىمىزعا جىل قۇسىنداي جاڭالىق اكەلدى. ۇلانىمىزدىڭ ۇزدىك ويىنى ءوزىمىزدى عانا تاڭعالدىرىپ قالعان جوق، مەملەكەتتىك وليمپيادا فۋتبول قۇراماسىنا باسشىلىق ەتەتىن تاربيەشىلەردى دە ويعا قالدىردى، «وسى جىگىت بولاشاقتا ەلىمىزدىڭ فۋتبول قۇراماسىنىڭ جارقىن جۇلدىزى بولعالى تۇر، ۋاقىتتى وتكىزبەي مەملەكەتتىك وليمپيادا فۋتبول قۇراماسىنىڭ بەلدى قاقپا قورعاۋشىسىنا تاڭداعانىمىز ءابىزال»،-دەپ كەسىم جاسادى وتاندىق فۋتبول ۇجىمى. اق تۇيەنىڭ قارىنى جارىلدى، ەلىمىز تاريحىندا تۇڭعىش رەت قازاق ۇلتىنان ەرجەت مەملەكەتتىك وليمپيادا فۋتبول قۇراماسىنا قابىلداندى.

　　ميليارد ەلىنىڭ فۋتبول قۇراماسىنىڭ قاقپاسىن شينجياڭدىق قازاق جىگىت قورعاپ ءجۇر دەگەندى ەۆروپانىڭ قۇلاعى تۇرىك فۋتبول كلۋبتارى بىردەن ەستىدى، اسىرەسە، شينجياڭداعى از ۇلت ازاماتتارىنىڭ فۋتبولعا دەگەن قىزىعۋشىلىعى مەن الا دوپتى اياعىندا ويناتاتىن شەبەرلىگىن ولار ەرتەدەن بىلەتىن، ەرجەتتىڭ اتى ەلىمىز اسپانىندا اسقاقتاعان ساتتەن باستاپ-اق شەتەلدىڭ كەرەگەسىن كەڭگە جايعان فۋتبول كلۋبتارى كەلىسىم شارتتارىنىڭ قۇلاعىن قىلتيتا باستادى. ەۆروپانىڭ فۋتبول كلۋبى شينجياڭدىق فۋتبولشى تۇگىل ەلىمىزدىڭ اتى الىسقا بەتتەگەن فۋتبول ساڭلاقتارىنىڭ دا ارمانى. كوكتەن ىزدەگەنىن جەردەن تاپقان تارلان تارباعاتايدىڭ تاستۇلەگى ۇزاق جىلدىق ۇمتىلىسىنىڭ ارقاسىندا 2014-جىلى 29-قاڭتاردا پورتۋگاليانىڭ «گوندومار» فۋتبول كلۋبىمەن جارىم جىلدىق كەلىسىم شارتقا قول قويىپ، كارى قۇرىلىقتىڭ قاقپاسىن قاققان تۇڭعىش شينجياڭدىق فۋتبولشىعا اينالدى، ەرجەت ەسىمى تاريح بەتىنە التىن ارىپپەن جازىلدى. قازىرگى كۇنى الا دوپتىڭ الەمدىك ارەناسىندا كوش باستاپ تۇرعان كريشتيانۋ رونالدونىڭ ەلىندە باعىن سىناپ جۇرگەن بەتكە باسار ۇلىمىز جاپالى ماشىق پەن تاتىمدى تاربيەگە قاتار جۇگەن سالىپ جارىم جىلدا پورتۋگاليالىق فۋتبول سۇيەر قاۋىمنىڭ جاقسى باعاسىنا يە بولدى. ءارقانداي سىناقتان سۇرىنبەي ءوتىپ، گوندوماردىڭ ابىرويىن اسقاقتاتقانىنا قاباعات رازى بولعان كلۋب قوجايىندارى وعان بەرەتىن سي اقىنى جوعارىلاتىپ، قۇراما قاقپاسىن جانە دە ءبىر جىل قورعاپ بەرۋىن ءوتىنىپ، مامىر ايىنىڭ اياعىندا كەلىسىم شارتتىڭ ۋاقىتىن كەلەر جىلعى ماۋسىمعا دەيىن ۇزارتتى. بۇل ەسىل ەردىڭ وزگە قۇرىلىقتا جۇرسەدە، نامىستى جاتقا بەرمەي، قازاق اتىن حالقاراعا تانىتۋعا قۇلشىنعانىنىڭ جەمىسى.

　　ەلىمىزدىڭ پرەمەر ليگاسىنداعى ءبىرقاتار كوماندالاردىڭ «جوعارى جالاقى بەرەمىز، ءبىزدىڭ قۇرامامىزعا كەل» دەگەنىنە مويىن بۇرماعان ەرجەت پورتۋگاليانىڭ تومەنگى ليگا كومانداسىن تاڭداۋىنىڭ سەبەبىن بىلاي تۇسىندىرەدى:«ەۆروپادا دوپ تەبۋ بۇرىننان بەرگى ءتاتتى تىلەگىم، ەۆروپا فۋتبول مادەنيەتىنىڭ بەسىگى، پورتۋگالياعا اياق باسقاننان كەيىن ەلىمىز فۋتبول سپورتىنىڭ شاڭ قاۋىپ قالعانىن باعامدادىم. مەنىڭ وسى جاقتا ۇزاق ۋاقىت تاربيە كورىپ، قاقپا قورعاۋدىڭ قىرى مەن سىرىنا جەتىسىپ، الەمدەگى ەڭ ۇزدىك قاقپا قورعاۋشى، سپانيا ۇلتتىق قۇراماسىنىڭ كاپيتانى كاسيلاس سياقتى تانىمالى قاقپاشى بولسام با دەگەن ۇلى ارمانىم بار، انام ايتاتىن ازامات ارمانىنان جاڭىلىسسسا جەڭىلىس تابادى دەپ، انا ءسوزى ءاردايىم جۇرەگىمدە».

　　ايتا كەتەيىك گوندومار قۇراماسى 1921-جىلى قۇرىلعان اتى ەۆروپا كلۋبتارىنا تانىمالى فۋتبول قۇراماسى، ول پورتۋگاليانىڭ پورتۋ ايماعىنداعى گوندومار قالاسىنا ورنالاسقان، قۇراما ءبىرقانشا جىلدان بەرى پورتۋگاليانىڭA دارەجەلى ليگاسىندا ۇزدىك ويىندار كورسەتكەنى سەبەپتى پورتۋگاليالىقتاردىڭ سۇيىكتى قۇراماسىنا اينالىپ ۇلگىردى.

　　قىسقاشا تانىستىرۋ:

　　اتى-ءجونى: ەرجەت ەرزات ۇلى

　　تۋىلعان جىلى:1993-جىلى 4-قاڭتار

　　تۋعان جەرى: تارباعاتاي ايماعىنىڭ شاۋەشەك قالاسى

　　قۇراماسى: پورتۋگاليانىڭ گوندومار قۇراماسى

　　بوي بيىكتىگى: 185cm

　　سپورت ءنومىرى:1

　　ومىرلىك ۇستانىمى: شىدامدى شىڭعا شىعادى

　　كەلۋ قاينارى: جۇڭگو قازاق راديو تورابى