ا ق ش – تىڭ بۇرىنعى پرەزيدەنتى ۇلكەن بۋشقا مەملەكەتتىك جەرلەۋ سالتى وتكىزىلدى

2018.12.06 14:48   كەلۋ قاينارى : حالىق تورابى

　　شينحۋا اگەنتتىگى، 12 – ايدىڭ 5 – كۇنى، ۋاشينگتون (ءتىلشى: سۇن ديڭ، شۇي جيانمەي) ا ق ش – تىڭ بۇرىنعى پرەزيدەنتى جورج حەربەرت ۋالكەر بۋشقا (ۇلكەن بۋش) 12 – ايدىڭ 5 – كۇنى ۋاشينگتوندا مەملەكەتتىك جەرلەۋ سالتى وتكىزىلدى.


　　ا ق ش پارلامەنت سارايىنا قويىلعان ۇلكەن بۋشتىڭ تابىتى سول كۇنى تۇستەن بۇرىن ۋاشينگتوننىڭ قالا رايونىنداعى مەملەكەتتىك شىركەۋگە جەتكىزىلدى. ۇلكەن بۋش ا ق ش – تىڭ 41 – كەزەكتى پرەزيدەنتى بولعاندىقتان، مەملەكەتتىك شىركەۋ وعان قۇرمەت رەتىندە 41 رەت قوڭىراۋ سوقتى.


　　ا ق ش پرەزيدەنتى ترامپ، ا ق ش – تىڭ بۇرىنعى پرەزيدەنتى كارتەر، ا ق ش – تىڭ بۇرىنعى پرەزيدەنتى كلينتون، ا ق ش – تىڭ بۇرىنعى پرەزيدەنتى وباما جانە گەرمانيانىڭ پرەمەر مينيسترى مەركەل، انگليانىڭ پاتشا مۇراگەرى چارس قاتارلى نەشە مىڭ ادام جەرلەۋ سالتىنا قاتىناستى.


　　ۇلكەن بۋشتىڭ ۇلكەن ۇلى، ا ق ش – تىڭ بۇرىنعى پرەزيدەنتى جورج ۋالكەر بۋش (كىشى بۋش) جوقتاۋ سوزىندە ۇلكەن بۋشتىڭ تالىمدەرى مەن ونىڭ ومىرىندەگى قىزىقتى وقيعالاردى ەسكە الىپ، ۇلكەن بۋشتىڭ «جاقسى اكە، جاقسى پرەزيدەنت» بولعانىن ايتتى. ءسوزىن اياقتار الدىندا كىشى بۋش ءبىر ءسات بۋلىعىپ، كوزىنە جاس الدى.


　　مەملەكەتتىك جەرلەۋ سالتى اياقتاعان سوڭ، ۇلكەن بۋشتىڭ تابىتى ۇشاقپەن تەكساس شتاتى حيۋستون قالاسىنا جەتكىزىلدى. ۇلكەن بۋش تەكساس اۋىل شارۋاشىلىعى جانە مەحانيكا ۋنيۆەرسيتەتىنىڭ اۋلاسىنداعى جورج بۋش پرەزيدەنت كىتاپحاناسىنىڭ ارتقى اۋلاسىنا جەرلەنگەن جۇبايى باربارا بۋشپەن بىرگە جەرلەنەدى.


　　ۇلكەن بۋش 11 – ايدىڭ 30 – كۇنى كەشتە حيۋستوندا 94 جاسىندا كوز جۇمدى. ۇلكەن بۋشتىڭ تابىتى 12 – ايدىڭ 3 – كۇنى حيۋستوننان ۋاشينگتونعا جەتكىزىلىپ، پارلامەنت سارايىنا قويىلعان بولاتىن.


　　ترامپ ۇلكەن بۋش كوز جۇمعاننان كەيىن حابارلاندىرۋ جاريالاپ، اق ساراي، الەۋمەتتىك ورىندار، اسكەري قۇرىلعىلار قاتارلى جەرلەردە مەملەكەت تۋىن 30 كۇن جارتىلاي ءتۇسىرۋدى بۇيىردى ءارى 12 – ايدىڭ 5 – كۇنىن مەملەكەتتىك ازا ءبىلدىرۋ كۇنى ەتىپ بەلگىلەدى.


　　ۇلكەن بۋش 1924 – جىلى 6 – ايدىڭ 12 – كۇنى ا ق ش – تىڭ ماسساچۋەتس شتاتىندا دۇنيەگە كەلگەن، 1989 – جىلدان 1993 – جىلعا دەيىن ا ق ش – تىڭ 41 – كەزەكتى پرەزيدەنتى بولعان. ول 1974 – جىلى ا ق ش – تىڭ جۇڭگودا تۇراتىن بايلانىس باسقارماسىنىڭ مەڭگەرۋشىسى بولعان. ۇلكەن بۋشتىڭ ۇلكەن ۇلى كىشى بۋش ا ق ش – تىڭ 43 – كەزەكتى پرەزيدەنتى بولعان.


　　كەلۋ قاينارى: حالىق تورابى