- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
توي مادەنيەتىمىز مايەكتەنۋگە ءتيىس
ىسپانديار سولتاش ۇلى
2015.01.08 13:07 كەلۋ قاينارى : حالىق تورابى
«توي دەگەندە قۋ باس دومالايدى» دەگەن ءسوزدىڭ قاي زامانداردا ايتىلعانى بىزگە بەيمالىم. وسى ءسوزدىڭ وزىنەن-اق توي-دۋمانشىل حالىق ەكەنىمىز ايتپاسا دا اڭعارىلىپ تۇر. شۇكىرشىلىك، وزگە جۇرتپەن سالىستىرعاندا ءبىز باسقا جاقتان تاپشى بولساق تا، تاپ تويدان تاپشى ەمەسپىز. ول كوڭىل توعايتارلىقتاي. ويتكەنى، بۇل كۇندەرى بىزدە تويدىڭ ءتۇرى كوپ، قامتيتىن كولەمى دە كەڭ ءارى ول ءجيى وزدىرىلادى. توي قيمىلىن كوپ سانداعى ادامدار ءوزىنىڭ جۇرەكجاردى قۋانىش-قىزىعىن تۋىس-تۋعان، دوس-جاراندارىمەن ءبولىسۋ ءۇشىن وزدىرسا؛ ال از سانداعى ادامدار سالاۋاتىن، ارالاساتىن ادامىنىڭ مولدىعىن، مارتەبەسىن، بايلىعىن جۇرتقا جاريا ەتۋ ماقساتىندا وزدىراتىن سياقتى. ءيا مەيلى، قالاي بولسا سولاي بولسىن، تويدىڭ بولماعانىنان بولعانى جاقسى. ەل امان، جۇرت تىنىش، حالىق تۇرمىسى جاقسى بولسا، توي، تويعا ۇلاسا بەرسە، ول دا ءومىردىڭ ءوز ءسانى. قارا ورمانداي حالقىمىزدى ۇلى جاراتىلىس تاماشا تىرىلىكتەن، توي-دۋماننان ايىرماسىن دەپ تىلەيىك.
توي ــ ۇلتىمىزدىڭ وزگەشە قاسيەتىن ساقتايتىن، سالت-ءداستۇرىن جالعاستىراتىن، رۋحاني جان-دۇنيەسىن ونان ارى بايىتاتىن مادەني قۇندىلىقتارىمىزدىڭ ءبىر ءتۇرى. ول قاراپايىم حالىقتى ۇيىمشىلدىققا، بەرەكە-بىرلىككە، ساۋىق-سايرانعا، ونەر-بىلىمگە، ۇلتتىق ءداستۇرىمىزدى دارىپتەپ، ويىن تۇرلەرىن دامىتۋعا جەبەيتىن امبەباپ قيمىل ءتۇرىمىز.
ءبىز ءسوز ەتىپ وتىرعان توي مادەنيەتى كەڭ ماعىناداعى ۇعىم. ول قىرۋار مازمۇندى قامتيدى. ايتالىق، قازىرگى ساحنالىق تويلار جونىنەن ايتقاندا اسابانىڭ كاسىپتىك دەڭگەيى، ءانشى-كۇيشى، مۋزيكانتتاردىڭ شەبەرلىگى، توي يەسىنىڭ توي جونىندەگى تۇسىنىگى مەن جالپى دايىندىعى، توي كومەكشىلەرىنىڭ سايكەسۋى، تويدا باتا-تىلەك ايتۋشىلاردىڭ ماعلۇماتى، توي ۇستىندە ىستەلەتىن كادە، جول-جورالعىلار، اس-تاعام ازىرلەۋ مەن قوناق كۇتۋ سالتى، توي مازمۇنىنىڭ ۇلتتىق قۇندىلىقتارىمىزعا ساي تانىمدىق، تاربيەلىك مانگە يە بولۋى، تويعا جينالعان جۇرتتىڭ جالپى مادەني ورەسى، وندا ولاردىڭ ۋاقىتقا قۇرمەت ەتۋى، ورنىعىپ وتىرعان سوڭ تويدىڭ العاشقى باتاسى جاسالماي تۇرىپ ەت كەسۋ، دورەكى قالجىڭ ايتۋ، تەمەكى تارتۋ، تەلەفون سوعۋ سياقتى قۇرمەتسىز قىلىقتاردان اۋلاق بولىپ ءوزىن-ءوزى ادەپتى ۇستاۋ مانەرى، تويدىڭ ايتىلعان ۋاقىتىندا باستالىپ، ءوز لايىعىندا اياقتاۋى قاتارلىلاردىڭ بارلىعى بۇگىنگى ساحنالىق توي مادەنيەتى ۇعىمىنا كىرەدى. جوعارىدا ايتىلعان ءار ءتۇرلى فاكتور ءوزارا جاقسى سايكەسكەندە عانا بۇگىنگى تويلارىمىز ءوز جاراسىمىن تابادى.
قازىرگى تۇستا اقپارات بەتتەرىنە قاراساڭىز تويدى بىرەۋلەر ماقتاپ جاتسا، ال ەندى بىرەۋلەر داتتاپ جاتادى. ءومىر بولعان سوڭ ءبارى دە قالىپتى قۇبىلىس دەۋگە بولادى. ويلاپ قاراساڭىز، ازاماتتار ومىردەگى ءوز قۋانىش-شاتتىعىن وزگەلەرمەن ورتاقتاسىپ، شاما-شارقىنا قاراي، قالىپتى داستارقان ءجايىپ، تۋىس-تۋعان، دوس-جاراندارىمەن ارقا-جارقا اڭگىمەدە بولىپ بەرەكە-بىرلىكتەرىن ونان ارى قويۋلاتىپ، تۇرمىستارىن ارلەندىرىپ جاتسا ونىڭ ارتىقتىعى بولماس. قازىر كەيدە ءىشىنارا تويلاردىڭ جۇرت جاعىنان قولداۋ تاپپاي سىندالىپ جاتاتىنى، ونىڭ ءوز قالىپتى دەڭگەيىن ساقتاماي، اسىرا سىلتەنۋىندە بولسا كەرەك. ءيا قۇرمەتتى وقىرمان، مەن بۇل شاعىن ماقالادا تويدىڭ ارتىقشىلىعىن دا كەمشىلىگىن دە ءسوز ەتپەي، ونى وزگە قالامداس دوستارىما قالتىرىپ، تەك تويدىڭ ءوزى ءبىر ءتۇرلى مادەنيەت، وسى مادەني قيمىلىمىزدى حالقىمىزدىڭ رۋحاني دۇنيەسىن بايىتاتىن مايەكتى مادەنيەت ۇلگىسىنە اينالدىرساق، وندا ونان ۇتارىمىز از بولماس ەدى دەگەن ويىمدى سىزدەرمەن بولىسپەكشىمىن. ياعني توي مادەنيەتى ىشىندە تويدىڭ ارعى-بەرگىسىن، كولەمىن، ءتۇر-تۇلعاسىن ءسوز ەتپەي تەك قازىرگى قالا-قالاشىقتارداعى مەرەكەلىك زالداردا وتكىزىلەتىن توي مادەنيەتىمىزگە عانا قىسقاشا توقتالماقشىمىن.
بۇگىنگى ءوتىپ جاتاتىن ساحنالىق تويلاردا توي مازمۇنى ماتەريالدىق بايلىقتان گورى رۋحاني بايلىقتى بەينەلەۋگە قاراتىلۋى، ياعني تويعا قاتىناسۋشىلاردى تويا ءىشتىرىپ، توڭقالاڭ استىرۋدى ماقسات ەتپەي، قاراپايىم قۇرساق قامى مەن ماعىناسىز شاتتىققا، ارزان كۇلكىگە قۇرىلماي، قايتا ول ادامدارعا تاماشا رۋحاني ءلاززات باعىشتايتىن، سانالىعا سارا جول كورسەتەتىن، تاربيەلىك ءمانى زور ەستەن كەتپەس مادەني قيمىل بولۋعا قاراتىلۋى، ايتالىق، وندا ۇلتتى ۇلاعاتتىلىققا باستايتىن كوسەم وي، كوركەم ءتىل قولدانىلۋى، كۇمبىرلى كۇي، اۋەلەگەن اسەم ءان، مىڭبۇرالعان تاماشا ءبي، ۇلتتىق رۋحاني قۇندىلىقتار ءوزارا توعىسقان بەساسپاپ قيمىل بولۋعا قاراتىلۋى ءتيىس.
قازىرگى تويلار كوبىنەسە بەلگىلى مادەني ورەگە كوتەرىلمەي، ءبىر سارىندىلىقپەن وتە قاراپايىم وتكىزىلۋدە. وندا اسابا توي يەسىمەن سۇحباتتاسىپ توي سەرياسىن الدىن الا مۇقياتتاپ جازىپ دايارلاماي توي ساحناسىنا شىعادى دا زور داۋىسپەن بۇرىنعى وتكەن تويلاردا جۇرت تالاي ەستىپ جۇرگەن جاۋىر، جاتتاندى سوزدەرىن قايتالايدى. سونان سوڭ مۋزيكا دىبىسى قۇلاق تۇندىرارداي اشتى قويىلىپ ءان ايتىپ، ءبي بيلەۋ باستالادى. وسىندايدا كوپتەن كورىسپەگەن تانىس-ءبىلىس، دوس-جاراندارىڭمەن جۇزدەسكەنىڭدە ولارمەن دۇرىس سويلەسە دە الماي قور بولاسىڭ. توي مايدانىندا مۋزيكا مەن ادام دىبىسى ءبىرىن-ءبىرى باسىپ تۇسۋگە تالاسىپ جاڭعىرعان داڭعازا ءۇن ونان ارمان ۇلعايعاندىقتان، ايتىلعان ءاننىڭ نە ءسوزىن، نە مۋزيكاسىن ۇعا الماي، ەكى قۇلاعىعىڭىز شىڭىلداپ مەڭ-زەڭ كۇيدە تويدان قايتاسىز. توي اتاۋلى وسىلاي وتەدى دەۋدەن اۋلاقپىز، ءبىراق، كوبىنەسە وسىنداي.
جوعارىدا ايتىلعان توي مادەنيەتىن تۇلعالاندىراتىن قىرۋار فاكتورلاردىڭ ىشىندە ساحنالىق توي جونىنەن ايتقاندا، اسابانىڭ اتقاراتىن رولى ەڭ نەگىزگى ورىندا تۇرادى. تويدىڭ قالاي ءوتۋى كوپ جاعدايدا اسابانىڭ اڭعارىمپازدىعىنا، بىلىكتىلىگىنە، شەشەن-شەبەرلىگىنە تىكەلەي قاتىستى بولادى. سوندىقتان اسابا بولعان ادامدا تويعا قاتىناسۋشىلاردى شىنايى باۋراي الاتىن سۋىرىپسالما شەشەندىك، مول قابىلەت، تۋابىتتى بەيىمدىلىك، قۇلاققا جاعىمدى قوڭىر ءۇن، ساحنالىق تاماشا كوركەم وبىراز بولۋى قاجەت. اسابانىڭ ءار ءسوزى تاعىلىم بيىكتىگى مەن تانىم تەرەڭدىگىنە قۇرىلۋى ءتيىس.
بۇل كۇندەرى ساحنالىق تويلاردىڭ سالتاناتىن، قىزىق-دۋمانىن اسىرىپ، ءمانىن دە ءسانىن دە كەلتىرىپ، كوپتى ايرانداي ۇيىتىپ اۋزىنا قاراتاتىن اسابالار دا كوبەيىپ كەلەدى. ويتكەنى «ەل ءىشى ــ ونەر كەنىشى» دەگەن ەمەس پە، حالقىمىزدىڭ نە ءبىر شۇرايلى سوزدەرىن، قىسقا دا نۇسقا اقىل-ناقىل، شەشەندىك تولعاۋلارىن قيۋىن كەلتىرىپ شەبەر قولدانىپ، جۇرتتى بىردە ورىندى ءازىل-قالجىڭمەن كۇلدىرىپ، بىردە تەرەڭ ويعا باتىرىپ 4-5 ساعات ۋاقىتتىڭ قالاي وتكەنىن سەزدىرمەي، كوپتى زەرىكتىرمەي، شارشاتپاي، اۋا جايىلدىرماي «و، بالە، ءبىر جاساپ قالعانىمىزدى قاراشى» دەگىزىپ، جۇرتتىڭ شىنايى القاۋىنا يە بولاتىن قابىلەتىنە ازاماتتىق قاسيەتى ساي كەلەتىن اسابالاردى دا كورىپ ءجۇرمىز. بۇنداي تويلاردا جۇرت توي يەسى مەن اساباعا العىستارىن جاۋدىرىپ، جۇرەك قىلىن شەرتەر تاپقىر ءسوز، تاماشا ءان، ناقىشتى ىرعاقتاردان مول ەستەتيكالىق ءلاززات قابىلداپ، كوڭىلدەرىن كوتەرىپ، رۋحتارىن سەرپىلتىپ، بىلىمدەرىن مولايتىپ، كوز ايالارىن كەڭەيتىپ، ءساليقالى ءومىر سالتىن ونان ارى ارلەندىرىپ، وركەنيەتتى ومىرگە، دامىعان قوعامدىق ورتاعا ساي كىسىلىك قاسيەتتەرىن قالىپتاستىرىپ، ءوز بولاشاقتارىنا تاماشا جول سالىپ اتتانىپ جاتادى.
ال كەي ساحنالىق تويلاردا ءىشىنارا توي اسابالارى قاجەتسىز قالجىڭ، ماعىناسىز بوس سوزدەردى كوپ قايتالاپ، جۇرتتى كوڭىلدەندىرىپ، كۇلدىرەم دەيدى. ءبىراق، ءوزىنىڭ ءبۇلدىرىپ تۇرعانىن اڭعارمايدى. وندايدا ءارلى ءسوزدىڭ ءوزى اسابانىڭ كوپ قايتالاۋىمەن قۇتى قاشىپ قۇنارسىز سوزگە اينالادى. سۇيتە تۇرا اسابا ءوزى مەزى قىلعان جۇرتتى دۇركىن-دۇركىن تىنىشتالۋعا شاقىرىپ، قايتا-قايتا شاپالاق سوعۋدى سۇرايدى. ەگەر ول ورەلى وي، كوركەم ءتىلدى قيادان شاۋىپ، قيسىنىن تاۋىپ ايتا بىلسە، جۇرت ونىڭ سوزىنە نەگە قۇلاق اسپاسىن، شاپالاق نەگە ۇرىلماسىن. اسابا ساحناعا كوتەرىلىپ توي باستالا بەرە جۇرت العاشىندا ءبىر مەزگىل نازار اۋدارىپ «قانە ەندى نە ايتىلار ەكەن» دەپ، اسابانىڭ اۋزىنا ىنتىعا قاراۋمەن بولادى. وسىندايدا توي ساحناسىندا اسابا جاعىنان قارشا بوراعان جۇيەسىز، جاتتاندى ماقتاۋ سوزدەر ءجيى قايتالانىپ، جۇرتتى ابدەن مەزى ەتەدى. مىنە مۇنداي توي جۇرگىزۋ داعدىسى تويدىڭ ءسانىن كەلتىرمەيدى، كەرىسىنشە ءمانىن كەتىرەدى، اۋەلى توي يەسىنىڭ بەدەلىن ءتۇسىرىپ، قادىرىن كەتىرەدى. سونىڭ سالدارىنان توي باستالا بەرە تويدىڭ سوڭعى تاعامدارى داستارقانعا شىقپاي جاتىپ تويدان قوتارىلا قايتۋ باستالادى. توي يەسىندە ىشتەي «بۇل قالاي بولعانى» دەگەن مازاسىز وي ءجيى قايتالانىپ توي اقىرلاسادى.
كەيدە قالاي ەكەنى بەيمالىم، ءىشىنارا اسابالارىمىز ءوز تويىمىزدى وزگەشە ءتۇس الدىرىپ جۇرگىزەدى. ءاسىلى قويۋ ۇلتتىق تۇسكە يە تاماشا بيلەرىمىز بەن جاڭا داۋىرگە سايكەسكەن ەسترادالىق اندەرىمىز ەشكىمنەن كەم ەمەس، بايىرعى حالىقتىق اندەرىمىز دە زامانعا ساي ارلەنە تۇسكەن. سونى بىلە تۇرا، بەينە ءوز ءان-كۇيلەرىمىز بەن بيلەرىمىز توي سالتاناتىن اسىرۋعا جارامايتىنداي اسابانىڭ جەتەگىندە ءوز تويىمىزدا وزگە جۇرتتىڭ ءان-بيىنە باسامىز. بۇل جەردە ۇلتىمىز ازاماتتارى وزگە جۇرتتىڭ ءانىن ايتىپ، ءبيىن بيلەمەسىن دەگەن ۇعىم شىقپايدى. بىزگە وزگە جۇرتتىڭ ءانىن ايتىپ، ءبيىن بيلەۋىمىزگە تويدان باسقا ساحنالار دا جەتىپ جاتىر، سول سەبەپتى ءبىرىڭعاي ءوز ەنشىمىزگە تيگەن تويلاردا كوبىنەسە ءوز قۇندىلىقتارىمىز قۇرمەتتەلگەنى ءجون. ءوزىڭدى ءوزىڭ قۇرمەتتەمەي، وزگەلەر سەنى سيلامايتىنى ەجەلدەن بەلگىلى جاي. سوندىقتان توي يەلەرىنە، اسىرەسە، اسابالارعا ءوز تويلارىمىزدا قازاق ەكەنىڭدى قاي-قاشاندا قيمىل-قياپاتىڭمەن ايگىلە، ۇلتتىق وبىرازىڭدى كىرشىكسىز ساقتاۋدى ۇمىتپا دەمەكشىمىز. سوندا عانا ءوز ەنشىلى تويلارىمىز ءوز حالقىمىزعا ءتان ۇلتتىق بوياۋىن، تاربيەلىك ءمان-ماعىناسىن ساقتاي الاتىن بولادى.
وتكەندە ءمالىم ءبىر تويدا اسابانىڭ قىلىعىنا كەيىس بىلدىرگەن قاريانىڭ سوزىنە كۋا بولعان ءجايىم بار، سوندا الگى قاريا: «پا، مىنا اسابا وتكەندە بالەنبايدىڭ تويىندا ايتقان ءسوزىن وسى تويدا قاز-قالپىندا قايتالاپ تۇرعانىن قاراشى، اۋەلى، الگىندە توي يەسىنە قالجىڭباس كىسىمسىپ، ساحنادا قالتاسىن توسىپ قايىرشى ادامشا سۇرانۋى دا وتكەندەگىسىمەن ۇقساس ەكەن، ارجاعىن تەسىپ بارا جاتقان اقشا ەكەنى بەلگىلى، ساحنادا ماسقارا بولىپ سۇراماسا دا بەرەر ەدى عوي، ادامدا ىنساپ، مادەنيەتتىلىك دەگەن بولۋى كەرەك ەمەس پە. مەن بىلگەندە، ادەتتەگى تويلارىمىزعا اسابا دەگەننىڭ پالەندەي قاجەتى دە جوق، توي يەسىنىڭ تۋىس-تۋعاندارى مەن دوس-جاراندارى ىشىنەن ءسوزدىڭ ءجونىن بىلەتىن بىرەۋ شىعىپ، تويدىڭ ءمان-ءجايىن كوپكە ايتىپ قويسا، سونان سوڭ توي مايدانىن قۇلاقتى جارىپ، جۇيكە جۇقارتار قۇر داڭعازاعا اينالدىرماي، اسەم ءان مەن ءتاتتى كۇيگە بولەسە دە جەتەر ەدى عوي» دەگەن ەدى.
جوعارىداعى قاريا ايتپاقشى اسابا بولعان ادام ءبىر تويدا ايتقان ءسوزىن ەندى ءبىر تويدا قايتالاپ جۇرتتى زەرىكتىرمەي، نەعۇرلىم جاڭا ءورىس، سونى مازمۇن تابۋعا شەبەر بولۋى، ءوز كاسىبىنىڭ مايتالمان مامانى بولۋعا تىنباي ىزدەنىس جاساۋى، ءسويتىپ ءسوز مارجانىن ساپىرىپ، توي مەرەيىن اسىرۋعا كوپ جاتىلۋى، ءار كەز اقشادان اردى جوعارى قويا ءبىلۋى قاجەت. قازىر اۋەلى كەي اۋدان، اقماتاردا كەلىننىڭ بەتىن اشىپ تۇرىپ تاباققا تۇسكەن اقشاعا اڭسارى اۋىپ، ءوزىنىڭ نە ايتقانىن اڭعارماي بەرەكەسى كەتىپ سوزدەن جاڭىلاتىن، شەشەن-شەجىرە بولامىن دەپ توي شارابىنان مولىراق ءىشىپ الىپ، شەڭبەردەن شىعىپ تالتىرەكتەپ جۇرتتىڭ كۇلكىسىنە قالاتىن اسابالاردىڭ بار ەكەنىن دە ەستىپ-ءبىلىپ ءجۇرمىز.
بۇگىنگى دامىپ بارا جاتقان ءداۋىردىڭ تالابى بويىنشا قاراعاندا، تويدا اساباعا جۇكتەلەتىن جاۋاپكەرشىلىكتى استە تومەن مولشەرلەۋگە بولمايدى. ويتكەنى اسابا دا جاڭا ءداۋىردىڭ جارشىسى، ۇگىتشىسى ەسەپتى. جۇرتتى باۋراپ، كوپشىلىككە ۇناي ءبىلۋ، ساحنادا ديكتورعا، ارتيسكە ءتان ونەر كورسەتۋ ادەتتە ەكىنىڭ ءبىرىنىڭ قولىنان كەلە بەرمەيتىن ۇلكەن ونەر. قازىرگى تويلاردا كوپ جاعدايدا اسابا دۇرىس تاڭدالمايدى، كوبىنىڭ مادەني ورەسى تومەن، سوزگە شەشەندىگى، ويعا ورامدىلىعى، قيمىلدى ۇيىمداستىرۋ شەبەرلىگى جوعارى ەمەس، ۇلتتىق قۇندىلىقتارىمىزدان حابارى از. كوبىنەسە بەيادەپ ءسوز، ارزان ازىلمەن كوپتى زەرىكتىرىپ، سۇبەلى ءسوز، تۇشىمدى وي ايتا بىلمەيدى. سوندىقتان توي اسابالارىنىڭ سەلقوستىققا سالىنباي، وزدەرىنە قاتاڭ تالاپ قويىپ، حالقىمىزدىڭ ءسوز قۇدىرەتىن كوپكە سەزىندىرۋ جولىندا شىنايى جاۋاپكەرشىلىكپەن جان-جاقتىلى دايىندىق جاساپ، جۇرتقا تاماشا رۋحاني سەرپىلىس باعىشتاۋ جولىندا قۇلشىنىس جاساۋىنا تۋرا كەلەدى. ەگەر وسىلاي ىستەلەتىن بولسا، وندا بۇگىنگى ساحنالىق تويلارىمىز تاماشا جۇيەگە ءتۇسىپ، مادەني، رۋحاني دەڭگەيى زامانا تالابىنا ساي ارلەنە تۇسەر ەدى.
ويىمىزدى قورتا كەلگەندە، توي حالقىمىزدىڭ ءداستۇرلى قيمىلدارىنىڭ ءبىرى، ول تۇتاس ۇلتتىق قۇندىلىقتارىمىزدى ءوز بويىنا سىڭىرگەن مادەنيەت ۇلگىمىز، وسى مادەنيەت ۇلگىمىزدىڭ ورەسى اسابا جانە توي يەسىنىڭ قۇلشىنۋىمەن عانا بيىكتەمەيدى، قايتا تۇتاس قاۋىمنىڭ سانالى سايكەسۋى ارقىلى بيىكتەيدى. توي مادەنيەتىمىزدىڭ مايەكتەنۋى ۇلت مادەنيەتىنىڭ وركەندەۋىنە وزىندىك اسەر ەتەدى. توي قيمىلى ارقىلى ازاماتتارىمىز، اسىرەسە، جاس جەتكىنشەكتەر جاعى ءوز ۇلتىن ءوزى قايتا تانىپ، ءتۇسىنۋ ورايىنا يە بولادى ءارى وزگە جۇرتقا ءوز مادەنيەتىن تانىتادى. توي مادەنيەتىمىز بۇگىنگى جاپپاي جاھاندانۋدىڭ تەرىسكەي تۇستارىنان ساقتانۋىمىزعا دا كوپ كومەگىن تيگىزەدى، سوندىقتان توي مادەنيەتىمىزدى جاڭا زاماننىڭ تالابىنا ساي ونان ارى مايەكتەندىرىپ، ونى ءداستۇرىمىزدى دارىپتەۋگە، سالتىمىزدى ساقتاۋعا، حالىقتىق يدەيالوگيامىزدى بەكەمدەۋگە قىزمەت ەتتىرۋىمىز ءتيىس.
2014.12
اۆتوردىڭ قىزمەت ورنى: التاي ايماقتىق پارتيا مەكتەبى
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
