شي جينپيڭ حالىقارالىق وليمپيادا كوميتەتىنىڭ 139 - رەتكى جالپى ءماجىلىسىنىڭ اشىلۋ سالتىندا بەينە ەكراندا ءسوز سويلەدى

2022.02.08 14:47   كەلۋ قاينارى : شينجياڭ گازەتى

　　2 - ايدىڭ 3 - كۇنى مەملەكەت ءتوراعاسى شي جينپيڭ حالىقارالىق وليمپيادا كوميتەتىنىڭ 139 - رەتكى جالپى ءماجىلىسىنىڭ اشىلۋ سالتىندا بەينە ەكراندا ءسوز سويلەدى. □ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگىنىڭ 2 - ايدىڭ 3 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 2 - ايدىڭ 3 - كۇنى حالىقارالىق وليمپيادا كوميتەتىنىڭ 139 - رەتكى جالپى ءماجىلىسىنىڭ اشىلۋ سالتىندا بەينە ەكراندا ءسوز سويلەدى.

　　شي جينپيڭ حالىقارالىق وليمپيادا كوميتەتىنىڭ ءتوراعاسى باحقا جانە حالىقارالىق وليمپيادا كوميتەتىنىڭ مۇشەلەرىنە جۇڭگونىڭ كوكتەم مەرەكەسىندە ”قوس وليمپيادا سپورت جارىسى قالاسى“ بەيجيڭدە باس قوسقاندىعىن ءارى حالىقارالىق وليمپيادا كوميتەتىنىڭ 139 - رەتكى جالپى ءماجىلىسىنىڭ اشىلعاندىعىن قىزۋ قارسى الاتىندىعىن ءبىلدىردى!

　　شي جينپيڭ بىلاي دەپ اتاپ كورسەتتى: كەزەكتە دۇنيە جۇزىندە 100 جىلدا بولماعان ۇلكەن وزگەرىس جانە عاسىرلىق جاڭا تيپتى ايدارشا ۆيرۋس وكپە قابىنۋ ىندەتى قاباتتاسىپ، دۇنيە ءجۇزى جاڭا الماعايىپ وزگەرىس مەزگىلىنە ءوتتى، ادامزات قات - قابات سىن - سايىستارعا ءدوپ كەلدى. حالىقارالىق وليمپيادا كوميتەتى وليمپيادا سپورتىنا باسشىلىق ەتىپ، ەرلىكپەن العا ىلگەرىلەپ، الەمنىڭ ۋاقىتتىق قيىنشىلىقتى بىرگە جەڭۋىن، ىنتىماقتاسا سەلبەسۋىن ىلگەرىلەتۋ ءۇشىن ماڭىزدى دا وزگەشە رول اتقاردى. حالىقارالىق وليمپيادا كوميتەتىنىڭ ۇزاق ۋاقىتتان بەرى جۇڭگونىڭ دەنە تاربيە ىستەرىنىڭ دامۋى ءۇشىن بەلسەندى ۇلەس قوسقاندىعىنا، جۇڭگونىڭ بەيجيڭ قىسقى وليمپيادا سپورت جارىسىن وتكىزۋگە ءوتىنىش بەرۋىن جانە وتكىزۋگە دايىندىق كورۋىن بار كۇشپەن قولداعاندىعىنا جانە جەتەكشىلىك ەتكەندىگىنە العىس ايتامىن.

　　شي جينپيڭ بىلاي دەپ باسا دارىپتەدى: 2008 - جىلعى ”ورتاق الەم، ورتاق ارماننان“ 2022 - جىلعى ”بولاشاققا بىرگە اتتانايىققا“ دەيىن جۇڭگو وليمپيادا سپورتىنا بەلسەنە ات سالىسىپ، وليمپيادا رۋحىن بۇلجىماستان اسقاقتاتتى، وليمپيادا مۇراتىنىڭ تاباندى تالپىنۋشىسى، ارەكەتتەنۋشىسى بولدى. جۇڭگو قىسقى وليمپيادا سپورت جارىسىن وتكىزۋگە دايىندىق كورۋ ارقىلى 300 ميلليون ادامدى قار - مۇز سپورتىنا ات سالىسۋعا ءساتتى جەتەكتەپ، وڭىرلىك دامۋدى، ەكولوگيالىق قۇرىلىستى، جاسىل جاڭالىق اشۋدى، حالىق تۇرمىسىن جاقسارتۋدى ىلگەرىلەتىپ، الەمدىك قار - مۇز سپورتىنىڭ دامۋىنا ءتىپتى دە كەڭ ءورىس ازىرلەدى.

　　شي جينپيڭ بىلاي دەپ اتاپ كورسەتتى: بەيجيڭ قىسقى وليمپيادا سپورت جارىسىنىڭ شىمىلدىعى ەرتەڭ كەشتە اشىلادى، دۇنيە ءجۇزى جۇڭگودان ءۇمىت كۇتۋدە، جۇڭگو دايىندالىپ بولدى. جۇڭگو جاق شىن ىقىلاسپەن دۇنيە جۇزىنە ۇنەمدى، حاۋىپسىز، تارتىمدى وليمپيادا سپورت جارىسى سالتاناتتى جينالىسىن تارتۋ ەتىپ، ”اناعۇرلىم تەز، اناعۇرلىم ورەلى، اناعۇرلىم قۋاتتى − اناعۇرلىم ىنتىماقتى بولۋداي“ وليمپيادا ناقىلىن امالياتتا ايگىلەيدى.