«قار-مۇز پەريزاتى» اتىنداعى ارۋلار باسەكەسى اقىرعى مارەسىنە جەتتى

2013.11.28 08:36  

　　ەرىكتى تىلشىلەر وجەت دالەلقان ۇلى، نۇرشا قاسەيىن قىزى حابارلايدى. بۋرىلتوعاي اۋداندىق 9-كەزەكتى قىسقى بالىق اۋلاۋ مەرەكەسىنىڭ 3-رەتكى «قار مۇز پەريزاتىن» سارالاۋ شەشۋشى جارىسى 26-قاراشا بۋرىلتوعاي اۋداندىق مادەنيەت قيمىل ورتالىعىندا وتكىزىلدى.

　　بۋرىلتوعاي اۋداندىق قىسقى بالىق اۋلاۋ كولەمدى قيمىلى وتكىزىلگەننەن قازىرگە دەيىن اتالعان اۋدان 9 كەزەكتى كولەمدى اتاپ ءوتۋ سالتىن ۇيىمداستىرىپ، وزىندەگى تولىپ جاتقان جەرگىلىكتى ەرەكشەلىگىمەن ەلىمىز ءىشى-سىرتىنداعى ساياحاتشىلاردى باۋراپ، بۋرىلتوعايدىڭ تابيعي ابزالدىلىعى بولعان ۇلىڭگىر كولى ساياحات رايونىنىڭ قىسقى-جازعى كورىنىسى مەن ەرەكشە ونىمدەرى ارقىلى ساياحات كاسىبىن حالىق بۇقاراسىن اۋقاتتاندىرۋدىڭ تاعى ءبىر ارناسى ەتتى.

　　بۇل رەتكى 9-كەزەكتى بۋرىلتوعاي قىسقى بالىق اۋلاۋ مەرەكەسى «قار-مۇز پەريزاتىن» سارالاۋ كولەمدى جارىسى تۇڭعىش رەت وتكىزىلىپ وتىر، قازاق ۇلتىنىڭ ءداستۇرلى مادەنيەتى مەن قازاق قىزدارىنىڭ تابيعي ءتول سۇلۋلىعى ارقىلى كەزەكتەگى مەرەكەنىڭ شىنايى وبرازىن تىكتەپ، ءار ۇلتتى ورتاق دامۋعا جەتەلەۋ بۇل رەتكى قيمىلدىڭ باستى ماقساتى بولاتىن.

　　الامان جارىس ەكى كەزەككە بولىنىپ، قارا جارىسقا قازاقتىڭ 18-30 جاس ارالىعىنداعى قارا كوزدەرىنەن 40 ادام قاتىناسىپ، ولاردىڭ اراسىنان 10 ۇزدىك ارۋ سارالانىپ، شەشۋشى جارىسقا قاتىناستى. سوڭعى ناتيجەدە ماۋلىتجان بەيجڭبەك قىزى ءوز بويىنداعى قازاق قىزدارىنا ءتان قاراپايىمدىلىعى مەن سىمباتى جانە ءار ونەردىڭ بۇيداسىن قاتار ۇستاعان دارالىعىمەن وسى رەتكى «قار –مۇز پەريزاتى» باسەكەسىنىڭ باس بايگەسىنە يە بولدى.

　　كەلۋ قاينارى: التاي اقپارات تورابى