اقساي اۋدانىنىڭ كونە اۋدان قالاشىعى، دوباگۋ توراڭعى قىساڭى وڭىرلەرى كينو ءتۇسىرۋ ورنىنا اينالدى

ەرىكتى تىلشىلەر: ماقالاسىن جازعان مارالبەك ابدىكارىم ۇلى، سۋرەتتەردى تۇسىرگەن ماقان قاپاس ۇلى  

2015.02.27 14:48   كەلۋ قاينارى : حالىق تورابى

　　اقساي قازاق اۆتونوميالى اۋدانىنىڭ كونە اۋدان قالاشىعى التىن تاۋدىڭ باۋرايىنداعى بولاجاڭزى سايىنىڭ جيەگىنە ورنالاسقان، تەڭىز دەڭگەيىنەن 2700 مەتر بيىكتىكتە بولىپ، ورتاشا تەمپەراتۋراسى جوعارى، تابيعي شارت - جاعدايى ناشار ەدى. 1954 - جىلى اقساي قازاق اۆتونوميالى اۋدانى قۇرىلعاننان 1998 - جىلعا دەيىن وسى ورىن (بۇرىن بولاجاڭزى قالاشىعى دەپ اتالعان) اقساي اۋدانىنىڭ ساياسي - مادەنيەت ورتالىعى بولىپ كەلدى.

　　تابيعي شارت جاعدايى ناشار، سۋى ىلاي، سۋىر تارالمالى ىندەتىنە جاقىن رايون بولعاندىقتان، اۋدان باسشىلارىنىڭ جوعارىعا اۋدان قالاشىعىن كوشىرۋ تۋرالى كوپ رەت مالىمەت بەرۋى ءارى مەملەكەتتىك كەڭەستىڭ قولداپ - قۋاتتاۋىندا 1998 - جىلدىڭ ورتاسىندا بۇكىلدەي جاڭادان سالىنعان جىڭعىلدى قويناۋ قالاشىعىنا كوشىپ وتىرىقتاندى.

　　اقساي اۋدانى بوباگۋ قىستاعىنداعى توراڭعى قىساڭىنىڭ كورىنىسى كوزدىڭ جاۋىن الادى ءارى توراڭعى كورىنىسى كينو تۇسىرۋگە لايىقتى ەدى.

　　سوندىقتان، جاقىنعى جىلداردان بەرى كونە اۋدان قالاشىعى جانە دوباگۋ قىستاعىنداعى توراڭعى قىساڭى گانسۋ ولكەسى جيۋچۋان قالاسى توڭىرەگىندەگى بىردەن - ءبىر كينو ءتۇسىرۋ ورنىنا اينالدى. ايگىلى رەجيسسەر جاڭ يموۋ رەجيسسەرلىك ەتكەن «باتىر» اتتى كينو اقساي اۋدانى كونە اۋدان قالاشىعى توڭىرەگىندە كەسكىنگە الىنسا، 2010 - جىلى كونە اۋدان قالاشىعىندا حالىق ساقشىلارى مەن بۇزاقىلار اراسىنداعى قيان - كەسكى ايقاس سۋرەتتەلگەن «باتىس داۋىلى» اتتى كينو كەسكىنگە تۇسىرىلگەن - دى. 2011 - جىلى تاريحي كينو «حۇڭمىن قوناعاسى» اقسايدىڭ توراڭعى قىساڭىندا كەسكىنگە تۇسىرىلگەن بولاتىن. ال 2014-جىلى لي رىنگاڭ رەجيسسەرلىك ەتكەن، ايگىلى اكتەر چىڭ لۇڭ باس رولدا بولعان كينو «قاس باتىر» اقساي اۋدانىنىڭ توراڭعى قىساڭىندا كەسكىنگە تۇسىرىلسە، 2015 - جىلى قاڭتاردان اقپانعا دەيىن ەكى ايلىق ۋاقىتپەن اقساي اۋدانىنىڭ كونە اۋدان قالاشىعى بولاجاڭزى وڭىرىندە ايگىلى رەجيسسەر لۋچۋان باس رەجيسسەرلىك ەتكەن «حيكىمەتتى كونە قالا» (سايتاننىڭ شامدى ۇرلەۋى) اتتى كينو تۇسىرىلىپ كەسكىنگە الىندى. جوعارىداعى سۋرەتتەر اقساي كونە اۋدان قالاشىعىندا (بولاجاڭزى) «حيكىمەتتى كونە قالا» (سايتاننىڭ شامدى ۇرلەۋى) اتتى كينو الىنعان كەزدەگى كورىنىستەر ەدى.

　　كەلۋ قاينارى: حالىق تورابى