ءار ۇلت حالقى بەرەكەلى، تويلادى مەرەكەنى

2015.03.19 14:56   كەلۋ قاينارى : حالىق تورابى

　　گۇلميرا داۋلەتبەك قىزى حابارلايدى. ناۋرىز - قازاقتىڭ ءتول مەرەكەسى، جاڭا جىلىنىڭ باسى، بەرەكە-بىرلىكتىڭ، باياشات ءومىر، باقىتتى تىرلىكتىڭ شاتتىعى رەتىندە اتاپ وتەتىن دۋمان تويى، ءار ءبىر قازاق وت باسى ءۇشىن ەرەكشە قاستەرلى، قاسيەتتى كۇن سانالادى. ءار ءبىر شاڭىراقتا شىراق جاعىلىپ، قىزىر ءتۇنىن كۇتىپ، اق نيەتپەن وتكەنگە سالاۋات ايتىپ، جاقسىلىق قۇت بەرەكە تىلەپ، ەرتەڭگى كۇنگە زور ۇمىتپەن قارايتىن سەنىم مەرەكەسى. جىل كەلدى، اراي كەلدى دەپ ناۋرىزدى بۇكىل ەل باقىتقا بالايدى، شوپاندارى ورىستە مالدارىن قايىرسا، قاناتىن نۇرعا مالىپ، جىل قۇستارى كەلەدى دالامىزعا. قىتىمىر قىس تا كەتىپ، جەر انا بۋسانىپ، بۇكىل الەم، كوكتەمنىڭ نۇرىنا بولەنەدى. سامارقاننىڭ كوپ تاسى ەرىپ، دەنەگە قۋات، دالاعا شۋاق بوپ كەلگەن ءاز ناۋرىزدا، ارقا - جارقا قۋانىپ، «ۇلىس وڭ بولسىن، اق مول بولسىن» دەپ تىلەكتەر ايتىلىپ، اۋىلدان تارتىپ، قالامىزعا دەيىن ۇلىستىڭ ۇلى كۇنى تويلانىپ جاتادى، 18 – ناۋرىزدا، كوكتوعاي اۋدانى 2015 - جىلعى ناۋرىز شاتتىعى حالىققا مادەنيەت جەتكىزۋ كوركەمونەر نومىرلەرىن حالىقپەن جۇزدەستىرىپ، ناۋرىز مەرەكەسىن قارسى الدى.

　　كوكتوعاي اۋداندىق كوركەمونەر ۇيىرمەسىندەگى ارتيستەردىڭ ورىنداۋىندا نۇرعسيا تىلەنديەۆتىڭ كۇيى «اتا تولعاۋىمەن» ساۋىق كەشتىڭ شىمىلدىعىن اشتى. ۇيعۇرشا توپتىق ءبي «شاتتىق»، حوۋ يچيڭنىڭ ورىنداۋىندا جەكە ءان «قۇستار» قاتارلى ويىن نومىرلەرىن قىسقا عانا ۋاقىتپەن دايارلانسا، انشى ءزىلاش ءمۇتالىپ قىزى، تاتار حالقىنىڭ ءانشىسى ءشاديا ءشادىل قىزى، قىرعىز حالقىنىڭ ءانشىسى ارزىگۇل تۇرعان قاتارلى انشىلەر كوكتوعاي حالقىمەن بىرگە اسقاقتاتا ءان شىرقاپ، ءار ۇلت حالقى ءبىر ارناعا توعىسقان، بەرەكەلى دە مەرەكەلى جاراسىمدى قوعامدى جىرلاعان تاماشا ءبىر كەش بولدى.

　　كوكتوعاي اۋداندىق پارتكوم ۇگىت ءبولىمىنىڭ ورىنباسار باستىعى ەركىنبەك قايسا ۇلى بىلاي دەدى: «كوكتوعاي اۋدانىندا اۋىلدا، قىستاقتان تارتىپ، حالىق ناۋرىزدى وزگەشە فورمامەن قارسى الدى، ەگىنشى – مالشىلار بالۋانعا ءتۇسىپ، كوكپار تارتىپ، مادەنيەت كوركەمونەر مەرەكەسىن وتكىزىپ ۇلىستىڭ ۇلى كۇنىن تويلادى، اسىرەسە، وزگە ۇلت انشىلەرى اۋدانىمىزعا كەلىپ، نەگىزگى ساتىعا ءتۇسىپ، مادەنيەتتى نەگىزگى ساتىعا جەتكىزۋ فورماسىمەن ساۋىق كەش ساحناسىنا ءسان، مازمۇنىنا ءمان قوستى».

　　ءار ۇلت حالقى باسىمىز امان، دەنىمىز ساۋ بولسىن، قازانىمىزدا ناۋرىز كوجەمىز بۇلكىلدەپ قايناپ، شاڭىراعىمىزعا قۇت-بەرەكە ۇيالاسىن! ۇرپاعىمىزدىڭ ساناسىنا قاسيەتتى ناۋرىز مەرەكەمىزدى مىقتاپ ۇيالاتار تەكتى وت باسىلار كوبەيسىن،-دەپ تىلەكتەر ايتتى ساۋىق كەشكە جينالعان جۇرت.

　　كوكتوعاي اۋدانى تاريحتىڭ سالقار كوشىندە نەشە ونداعان ۇلت، تىرشىلىك كەشىپ، اتا مەكەندى بىرگە قۇرىپ، ۇلتتار ىنتىماعى مەن وتان تۇتاستىعىن قورعاۋدىڭ ايبىندى سيمفونياسىن جازدى. «تيانشاننىڭ قاراعايى تامىرلاس، ءار ۇلت حالقى جۇرەكتەس» بولۋداي كوكتوعاي اۋدانىنداعى ءار ۇلت حالقى تىنىستاس، تاعدىرلاس بولىپ، اتا ءداستۇرىن ۇرپاقتار بويى جالعاپ، كورىكتى التايدىڭ قارىشتاپ دامۋىن جۇزەگە اسىرۋعا، ۇلتتاردىڭ ىنتىماعىن، قوعامنىڭ ورنىقتىلىعىن ءتىپتى دە ويداعىداي قورعاۋعا كۇش سالىپ كەلەدى.

　　كەلۋ قاينارى: حالىق تورابى