بەيجيڭدە ناۋرىز

2015.03.23 16:56   كەلۋ قاينارى : حالىق تورابى

　　حالىق تورابى، 23 – ناۋرىز، بەيجيڭ. (نۇرعيسا قۇرمانجان ۇلى) جىلقى جىلى جىلىستاپ، قوڭىر مىنەز قوي جىلى كەلدى، ەل – جۇرت «ەسكى جىل ەسىركە، جاڭا جىل جارىلقا» دەپ تىلەك ايتىپ، جەتى دامنەن جاسالعان تىلەۋ كوجە داستارقانى باسىندا قۋانىشپەن قاۋىشتى.

　　ناۋرىز جىلدىڭ باسى، تاعىلىمى مول، تاريحى ۇزاق مەرەكە. حالقىمىز ناۋرىز مەرەكەسىن «سامارقاننىڭ كوك تاسى ەرىگەن كۇن» دەپ ەرەكشە قۇرمەتپەن قارسى العان، قاپ تۇبىندە ساقتاعان سوعىمنىڭ سيلى جىلىگىن قوسىپ، جەتى دامنەن اسپەتتەپ ناۋرىز كوجە جاساعان، كورشى – كولەم، اۋىل اراسىندا قىدىرىپ، اق تىلەكتەرىن ايتىپ، الىسقا كەتكەن جولاۋشىلارعا ارناپ سىباعا ىشكەن.

　　قازاق بالاسى قايدا جۇرسە دە ۇلىستىڭ ۇلى كۇنى تويلاۋدى ۇمىت قالدىرماعان. ەلىمىزدىڭ استاناسى بەيجيڭ قالاسىنداعى تۇرعىلىقتى قازاقتار دا بۇل مەرەكەنى توپتىق ورتادا تويلاۋدى الدىڭعى عاسىردىڭ 82 – جىلىنان باستاپتى. ەلدىڭ ءىسى دەگەندە ەرىنۋدى بىلمەيتىن ەلپەك ازاماتتار سالعان وسى ءداستۇر ۇزىلمەي جالعاسىن تاۋىپ كەلەدى.

　　«بەيجيڭدە ناۋرىز» ساۋىق كەشى 21 – ناۋرىز كۇنى كەشتە ۇلتتار باسپاسىندا سالتاناتتى وتكىزىلدى. ۇلىس كۇنىنە ارنالعان قۇتتىقتاۋ قيمىلىنا ۇلتتار باسپاسى، ورتالىق ۇلتتار ۋنيۆەرسيتەتى، ورتالىق حالىق راديو ستانسياسى، جۇڭگو ۇلتتار اۋدارما مەكەمەسى، «ۇلتتار ادەبيەتى» جۋرنالى، حالىق تورابى، جۇڭگو قازاق راديو تورابى، ورتالىق تەلەۆيزيا تورابى قاتارلى ورىندار اتسالىستى. قازاقستان رەسپۋبليكاسىنىڭ جۇڭگودا تۇراتىن باس ەلشىلىگىنىڭ قىزمەتكەرلەرى ناۋرىز تويىنا ات باسىن ارنايى بۇردى.

　　مەملەكەتتىك ساياسي كەڭەس مۇشەسى، ايگىلى جازۋشى، «جۇڭگو جازۋشىلارى» جۋرنالىنىڭ باس رەداكتورى اكبار ءماجيت ناۋرىز تويىنىڭ باستالۋ ءسوزىن سويلەدى، قازاقستان رەسپۋبليكاسىنىڭ شاڭحاي سەلبەستىك ۇيىمى حاتشىلىعى جانىنداعى تۇراقتى ۋاكىلى باعدات سەيىتباتتالوۆ سوزگە شىعىپ، ناۋرىز مەرەكەسىنە قۇتتى بولسىن ايتىپ، ەكى ەلدىڭ دوستىعىنىڭ نىعايا بەرۋىن، حالىق اراسىنداعى قارىم – قاتىناستىڭ ۇزىلمەي جالعاسا بەرۋى تىلەدى. ىلە – شالا سوز كەزەگىن العان قازاقستان تەمىر جولىنىڭ جۇڭگوداعى باس وكىلى امانجول يبراگيموۆ اقجارما تىلەگىن:

　　قۇتتى بولسىن مەرەكە،

　　ناۋرىز ايى سيلاعان.

　　تانىمى، ءتانى تاعزىمى،

　　شەكتەۋگە ءتىپتى سيماعان.

　　اتا – بابا زەر سالىپ،

　　ارداقتاپ وتكەن ۇلى كۇن.

　　عاسىردان – عاسىر وتسە دە،

　　ۇرپاعىن تويعا جيناعان، - دەگەن ولەڭ جولدارىمەن جەتكىزدى.

　　ورتالىق ۇلتتار ۋنيۆەرسيتەتى قازاق ءتىل – ادەبيەت فاكۋلتەتىنەن زەينەتكە شىققان قارت ۇستاز مۇحامەتجان وسپان ۇلى تويدىڭ اق باتاسىن بەردى.

　　ساۋىق كەشتى ورتالىق حالىق راديو ستانسياسىنىڭ جۇرگىزۋشىسى گۇلجان زارقىنبەك قىزى مەن ورتالىق حالىق راديو ستانسياسى عالامتور ءبولىمىنىڭ قىزمەتكەرى داۋىل قادىلبەك ۇلى جۇرگىزدى.

　　التاي ايماعىنىڭ ءۋاليى تالعات ۇسەن ۇلىنىڭ ەرەكشە قولداپ – قۋاتتاۋىندا، التاي ايماقتىق ءۋالي مەكەمەسى باس حاتشىسىنىڭ ورىنباسارى جالىن قازاقباي ۇلىنىڭ باستاۋىندا اعاجاي التايدان بەيجيڭگە ات باسىن بۇرعان جالىن قايسا ۇلى، كابيرا ۇرىستەم قىزى، قادىل بەيىسقان ۇلى، ەربول سۇلەيبەك ۇلى، مايرا قايرات قىزى قاتارلى ونەرپازدار ءان – كۇيدەن شاشۋ شاشىپ، بەيجيڭدەگى مەرەكەنىڭ مەرەيىن اسىرسا، ەل اعالارىنىڭ ۇسىنىسىمەن كەلگەن ىلە وبلىستىق كوركەمونەر ۇيىرمەسىنىڭ ءانشىسى تۇردىگۇل سەيسەنبەك قىزى جانە تەكەس اۋداندىق كوركەمونەر ۇيىرمەسىنىڭ ءانشىسى تىلەۋجان توقتاقىن ۇلى شىرقاتا ءان سالىپ، ساۋىق كەشتىڭ سالتاناتىن ارتتىردى. بەيجيڭدەگى «قازاق بالا» كلۋبىنىڭ بالدىرعانداردى دايىنداعان قارا جورعا ءبيى جۇرتتى تاڭداندىرىپ، تاڭداي قاقتىردى. بەيجيڭدەگى مەكتەپتەردە ءان – ءبي ونەرىنەن كاسىپتىك ءبىلىم الىپ جۇرگەن قازاق ستۋدەنتتەر دە ءوز ونەرلەرىن توپ ورتاعا سالدى.

　　ارينە، حالقىمىزدىڭ ناۋرىز مەرەكەسىن تويلاۋداعى باسقا حالىقتان بوگەنايى بولەك ءداستۇرى ــ ناۋرىز كوجە. اۋىل ءۇي اراسىندا بولسا ءبىر ءسارى، ءنان قالانىڭ ورتاسىندا قاۋقىلداسىپ كوجە ىشكەن قانداي، تويعا جيىلعان حالىق اسەم ءان، كۇمبىرلى كۇي تىڭداي وتىرىپ، تىلەۋ كوجەدەن اۋىز ءتيىپ، جاستارىنا جاس قوسىلىپ ماسايرادى.

　　ۇلتتار باسپاسىندا وتكىزىلگەن «بەيجيڭدە ناۋرىز» اتتى ساۋىق كەشتەن سىرت، ورتالىق ۇلتتار ۋنيۆەرسيتەتىندە، چاۋياڭ رايونىنداعى 4 مەكتەپ اراسىندا جەكە – جەكە ناۋرىزعا ارنالعان قۇتتىقتاۋ قيمىلدارى وتكىزىلىپ، ستۋدەنتتەر ءان – كۇيمەن، مىڭ بۇرالعان بيمەن، ءماندى قيمىلدارمەن مەرەكەنى قارسى الدى. بەيجيڭدەگى قازاق مەكەمەلەر دە شاعىن كولەمدە ناۋرىز تويىن تويلادى.

　　ناۋرىز مەرەكەلەرىڭىز قۇتتى، دەنساۋلىقتارىڭىز مىقتى بولسىن، ۇلىس وڭ بولسىن، اعايىن!

　　كەلۋ قاينارى: حالىق تورابى