ەل - جۇرت ەلقۇتقا كومەك قولىن سوزدى

 حابارىن جازىپ، سۋرەتتەرىن تۇسىرگەن باقىتبەك ءجۇمادىل ۇلى، بەكتۇرسىن نۇرادىلقان ۇلى

2016.02.24 14:51   كەلۋ قاينارى : حالىق تورابى

　　سۋرەتتە: جىلۋ اتاۋ قيمىلىنا جينالعان ءار سالا جۇرتشىلىعى

　　تەكەس اۋدانى قاراتوعاي اۋىلى ەشكىلىك قستاعىنداعى ءنۇسىپ باقىت ۇلى 2014 - جىلى جەلتوقسان ايىندا ءبىر ۇلدى بولادى. وكىنىشكە وراي بۇل نارەستە تەكەس اۋداندىق حالىق ەمحاناسىندا تۋىلعاندا ۇلكەن دارەت جولى بىتەۋ ەكەن. سونىمەن اۋداندىق ەمحانا بۇل بالانى ىلە وبلىستىق دوستىق ەمحاناسىنا جوتكەپ، دەر كەزىندە بالانىڭ انوس جولىن اشۋ وپەراتسياسى جاسالادى. وپەراتسيا بارىسىندا دارىگەرلەر بالانىڭ انوس جولىن اشۋدىڭ كۇردەلىلىگى ونىڭ ۇستىنە بۇنداي كەمدىكتى ءبىر رەتكى وپەراتسيامەن تۇبەگەيلى ساۋىقتىرۋ قيىن ەكەندىگىن مولشەرلەپ، بالانىڭ قۇرساق سىرتىنا ۋاقىتتىق ۇلكەن دارەت شىعىپ تۇراتىن قالتاشا ورناتىپ بەرىپ، ۇرىمجىگە جوتكەيدى.

　　سودان بەرى ەلقۇت اتتى وسى نارەستەگە شيىنجياڭ مەديتسينا ۋنيۆەرسيتەتىنە قاراستى ەمحانادا ىلگەرىندى - كەيىندى 4 رەت انوس جولىن اشۋ وپەراتسياسى جاسالادى. بالاسىن ەمدەتۋ بارىسىندا ءنۇسىپ وتباسى اۋدان، اۋىلداعى قاتىستى تاراۋلاردىڭ ەكونوميكالىق كومەگىنە يە بولعان بولسا دا، ازىناۋلاق مالعا قاراپ كۇنەلتىپ وتىرعان ءال - اۋقاتى شىركىناي ەمەس وتباسىنا «تاس تۇسكەن جەرىنە اۋىر دەگەندەي» وسى 4 رەتكى وپەراتسيانىڭ شىعىنى وڭاي بولمايدى. ول بار مالىن ساتىپ، الىس جۋىققا قارىزدانىپ، 400 مىڭ يۋاننان ارتىق اقشا جۇمساپ، تاقىر جەرگە وتىرىپ قالعانداي حالگە تۇسەدى. ەمحانانىڭ ورنالاستىرۋى بويىنشا ەلقۇتقا بيىل انوس جولىن اشۋدىڭ ەڭ سوڭعى وپەراتسياسىن جاساۋ قاجەت ەكەن. وسىنداي جاعدايدا ءنۇسىپ ىلە حالىق راديو ستانسياسىنا تەلەفون جالعاپ، بالاسىن 5 - رەتكى وپەراتسياعا اپارۋعا قولىندا كوك تىيىنى جوق بولىپ، امالى تاۋسىلىپ، داعدارىپ وتىرعان جاعدايىن باياندايدى. سونىمەن ىلە حالىق راديو ستانسياسىنىڭ قازاق راديوسى باس بولىپ، اۋە تولقىنى مەن ءۇنحات تەكشەسى ارقىلى قوعامداعى مەيىربان جاندار توپتارى مەن جاناشىر ادامدارعا ەلقۇتقا كومەك بەرۋ جونىندە ۇندەۋ كوتەرگەن بولاتىن. وتە - موتە قازاق راديوسىنىڭ «ەلقۇتقا كومەكتەسەيىك ەل - جۇرتىم» اتتى ارناۋلى باعدارلاماسى تاراتىلعاننان كەيىن قوعامدا كۇشتى اڭىس قوزعاپ، كوپتەگەن جاناشىر جاندار باعدارلامانىڭ ىستىق لەنيالى تەلەفونىنا قاتىسىپ، وزدەرىنىڭ جاس نارەستەگە مەيىرلەرىن باعىشتاپ، كوزى جىلتىراپ ازاپقا توزىپ جاتقان باۋىر ەتتەرىن قۇتقارىپ قالۋعا بارىن سالىپ جاتقان قايسار اتا - اناعا مەدەت بەرەتىنىندىكتەرىن ءبىلدىردى.

　　مىنە وسىلاي 19 - اقپان كۇنى تۇستەن كەيىن ىلە حالىق راديو ستانسياسىنىڭ جيىن زالىندا دابىرالى مەيىر باعىشتاۋ قيمىلى وتكىزىلدى. بۇل قيمىلعا ىلە حالىق راديو ستانسياسىنداعى قازاق، حانزۋ، ۇيعۇر، حۇيزۋ، سىبە قاتارلى بەس ۇلتتان قۇرام تاپقان بارلىق قىزمەتكەرلەر مەن قوعامنىڭ ءار سالاسىنان كەلگەن جاناشىر جاندار بولىپ، 300دەن ارتىق ادام جينالدى. بۇلاردىڭ اراسىندا «ىلەدەگى مەيىرىمدى جاندار ۇيىمى»، «اققۋ قور قوعامى»، ىلە وبلىسىنداعى «مەيىربان انالار قور قوعامى»، ماناس اۋدانىنداعى «بىرلىك قور ۇيىمى»، «شينجياڭ پانا يگىلىك قورى توبىنىڭ» توعىزتاراۋ، تەكەس اۋداندارىنداعى بولىمشەلەرى، بۇراتالا وبلىسىنداعى مەيرىمدى جاندار، ىلە وبلىستىق 1 - ورتا مەكتەپ جانە «اق بەسىك مەيىربان انالار قور قوعامى» سياقتى جەر - جەردەگى ونشاقتى مەيىربان جاندار ۇيىمدارى مەن قايىرىمدىلىق ورىندارىنىڭ، جەكە كاسىپكەرلەردىڭ ۋاكىلدەرى بار. وسى رەتكى قيمىلدا «كوپ تۇكىرسە كول بولار» دەگەن اتالى ءسوزدىڭ كۋاسىنداي ناق مايداندا 155 مىڭ يۋان قارجى توپتالدى. قيمىلعا كەلىپ قاتىناسا الماسا دا، وسى رەتكى قيمىلدى قولداپ ءوز جەرلەرىندە جينالعان اقشالاردى بانكە ەسەپ نومىرى ارقىلى قيمىل سوڭىنان جولداپ بەرگەندەردىكىن قوسقاندا سول كۇنى ەلقۇتقا جالپى 220 مىڭ يۋان كومەك قاراجات جينالدى. بۇنىڭ سىرتىندا ۇرىمجىدەگى جەكە كاسىپكەر جارقىن بەكتۇرعان ۇلى قيمىل وتكىزىلىپ جاتقاندا تەلەفون جالعاپ، ءوزىنىڭ ىلە حالىق راديو ستانسياسىنىڭ ءۇنحات تەكشەسىنەن ەلقۇتتىڭ جاعداينان حابار تاۋىپ، ماڭىنداعى اق كوڭىل ازاماتتاردى اتتانىسقا كەلتىرىپ 50 مىڭ يۋان قارجى جيناعاندىعىن، ونى ەلقۇت ۇرىمجىگە ەمحاناعا بارعاندا الدىنان شىعىپ، ەمحاناعا ورنالاستىرىپ، قارجىنى ەمحاناعا تولەيتىندىگىن جەتكىزىپ، جينالعان جۇرتتى اسەرلەندىردى. قارا ورمانداي حالقىنىڭ قولداپ، مەدەت بەرۋىندە جۇگى جەڭىلدەپ، قام - قايعىسىنان ارىلعانداي بولعان ءنۇسىپ كوز جاسىن كولدەتە وتىرىپ، حالقىنا، جاناشىر جاندارعا العىسىن جاۋدىرىپ، ىلە حالىق راديو ستانسياسىنا العىس كەرمە تۋىن ۇسىنىپ، جينالعان قارجىنى ناق مايداندا تاپسىرىپ الىپ، بالاسىن ەمحاناعا اپارۋعا قامدانۋعا اۋىلىنا قايتتى.

　　كەلۋ قاينارى: حالىق تورابى