كورەرمەننىڭ كوڭىلدەرى قالاعان، استانادا ايتىس ءوتتى الامان

2016.10.08 13:49   كەلۋ قاينارى : حالىق تورابى

　　قازاننىڭ ءبىرىنشى جۇلدىزى، 3 - كەزەكتى ۇشتاس اتىنداعى قازاق ستۋدەنتتەرىنىڭ ايتىسى ورتالىق ۇلتتار ۋنيۆەرسيتەتىنىڭ لەكسيا زالىندا بولىپ ءوتتى، زال ءىشى ايتىستى تاماشالاعان كورەرمەندەرگە لىق تولدى. وسىمەن ءۇش كەزەك وتكەن «ۇشتاس» اتىنداعى الامان ايتستى ورتالىق ۇلتتار ۋنيۆەرسيتەتىنىڭ قازاق ءتىل - ادەبيەتىنىڭ ستۋدەنتتەرى ۇيىمداستىرىپ وتكىزىپ كەلەدى.

　　وسى رەتكى ايتىسقا بەيجيڭ، نانجيىڭ، چاڭچۇن، تارىم قاتارلى قالالاردان التى ستۋدەنت اقىن قاتىناسىپ، ورتالىق قالا بەيجيڭنىڭ اسپانىن ءان- جىرعا بولەدى. «جۇزدەن جۇيرىك مىڭنان تۇلپار دەگەندەي» ءار جەردەن سارالانىپ كەلىپ ايتىسقا قاتىناسقان اقىندار «جىگىتتە دە جىگىت بار، ازاماتى ءبىر بولەك؛ جۇيرىكتە دە جۇيرىك بار، قازاناتى ءبىر بولەك» ەكەنىن بايقاتىپ، ايتىس مايدانىندا تالماي شاۋىپ، باق سىناستى. ايتىستىڭ جۇبى ناق مايداندا جەرەبە تارتۋ ارقىلى بەلگىلەندى، اقىندار ەش تايسالماستان قارسى كەلگەن قارسىلاستىڭ قاندايىنا دا توتەپ بەرىپ، قازاقتىڭ قايماعى بۇزىلماعان قارا ولەڭىنىڭ ءدامى ءالى دە تاڭدايدان كەتپەگەنىن سەزدىرىپ، شىت ۇسىنۋ سەكىلدى سالت - داستۇرلەرىمىزدى دە كورسەتە ءبىلدى.

　　ايتىسقا ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ پارتيا ياچەيكا شۋجيى مۇحتار ءابىلقاق ۇلى؛ قازاقستان رەسپۋبليكاسى ۇلتتىق عىلىم اكەدەمياسى احىمەت بايتۇرسىن ۇلى اتىنداعى ءتىل ءبىلىمى ينستيتۋتى گرامماتيكا ءبولىمىنىڭ مەڭگەرۋشىسى ورىناي جۇبايوۆا؛ ءال - فارابي اتىنداعى قازاق ۇلتتىق ۋنيۆەرسيتەتى، قازاق ءتىل ءبىلىمى كافەدراسىنىڭ وقىتۋشىسى حانىشايىم قارابايوۆا؛ ورتالىق ۇلتتار ۋنيۆەرسيتەتى قازاق ءتىل- ادەبيەت فاكۋلتەتىنىڭ دەكانىنىڭ ورىنباسارى بولاش شوكەيەۆ؛ ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ ۇستازى، اۋىز ادەبيەتى عىلىمدارىنىڭ دوكتورى نۇرباقان كالەلقان ۇلى؛ ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ ۇستازى، بەلگىلى ايتىس زەرتتەۋشى ءناسيرا ايتوللا قىزى قاتارلى ۇستازدار باعالاۋشى بولدى.

　　بەيجيىڭ پوچتا- تەلەگراف ۋنيۆەرسيتەتىنەن ايبىن ەربول ۇلى؛ نانجيڭ پەداگوگيكا ۋنيۆەرسيتەتىنەن ەربولات جاڭاي ۇلى؛ ياڭجوۋ ۋنيۆەرسيتەتىنەن گۇلجاز ەركىنبەك قىزى 3 - دارەجەلى، شينجياڭ تارىم ۋنيۆەرسيتەتىنەن قاسىمبەك ءاتقان ۇلى؛ جيلين اۋىل شارۋاشىلىق ينستيتۋتىنان گۇلبان مۇرات قىزى 2 - دارەجەلى؛ جۇڭگو ساياسي - زاڭ ۋنيۆەرسيتەتىنەن باعدات قۇماربەك ۇلى 1 - دارەجەلى سيلىقتى ەنشىلەدى.

　　ايتىستىڭ سىرگە جيارىندا ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ پارتيا ياچەيكا شۋجيى مۇحتار ءابىلقاق ۇلى ءسوز سويلەپ، الس - جاقىننان ايتسقا ات سالىسقان اعايىندارعا راحىمەت ايتتى، ءارى «سەندەر باردا قازاقتىڭ قارا ولەڭى، قايماقتى قارا ءسوزى ەشقاشان ولمەيدى» دەپ جاس اقىنداردىڭ تالابىنا جوعارى باعا بەرىپ، سەنىم ءبىلدىردى.

　　حاباردى جازعان پاتۋرا عالىمبەك قىزى

　　كەلۋ قاينارى: حالىق تورابى