بەيجيڭدەگى مەملەكەتتىك كىتاپحانادا قازاقستان كىتاپ بۇرىشى اشىلدى

2016.12.15 15:21   كەلۋ قاينارى : حالىق تورابى

　　سۋرەتتە: (سولدان وڭعا قاراي) قازاقستاننىڭ جۇڭگودا تۇراتىن باس ەلشىسى شاحرات نۇرىشەۆ، قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ باستىعى ءۇمىتقان مۇنالبايەۆا، جۇڭگو مەملەتتىك كىتاپحاناسىنىڭ باستىعى حان يۇڭجين، ايگىلى جازۋشى، مەملەكەتتىك ساياسي كەڭەستىڭ مۇشەسى اكبار ءماجيت ۇلى.

　　حالىق تورابى، 15 – جەلتوقسان، بەيجيڭ. قازاقستان مەن جۇڭگونىڭ ديپلوماتيالىق قارىم – قاتىناس ورناتقاندىعىنىڭ 25 جىل تولۋىنا وراي، قازاقستاننىڭ جۇڭگودا تۇراتىن ەلشىحاناسى، جۇڭگو مەملەكەتتىك كىتاپحاناسى جانە قازاقستان رەسپۋبليكاسىنىڭ ۇلتتىق اكادەميالىق كىتاپحاناسى جاعىنان ۇيىمداستىرىلعان قازاقستان كىتاپ بۇرىشى 15 – جەلتوقسان كۇنى بەيجيڭدەگى مەملەكەتتىك كىتاپحانادا اشىلدى.

　　اتالعان ءىسشاراعا قازاقستاننىڭ جۇڭگودا تۇراتىن باس ەلشىسى شاحرات نۇرىشەۆ، جۇڭگو مەملەتتىك كىتاپحاناسىنىڭ باستىعى حان يۇڭجين، قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ باستىعى ءۇمىتقان مۇنالبايەۆا، ايگىلى جازۋشى، مەملەكەتتىك ساياسي كەڭەستىڭ مۇشەسى اكبار ءماجيت ۇلى جانە باسقادا وقۋ – اعارتۋ، مادەنيەت سالاسىنداعى قۇرمەتتى قوناقتار قاتىناستى.

　　ءىسشارانىڭ بەتاشارىندا، باس ەلشى شاحرات نۇرىشەۆ الدىمەن ءسوز كەزەگىن الىپ، ەكى مەملەكەتتىڭ ديپلوماتيالىق قارىم – قاتىناس ورناتقاندىعىنىڭ 25 جىلدىعىن اتاي ءوتىپ، ەكى ەل باسشىلارىنىڭ ورتاعا قويىپ وتىرعان «نۇرلى جول» باعدارلاماسى، «ءبىر جول ءبىر بەلدەۋ» وي جەلىسى توڭىرەگىندە ەكى ەلدىڭ ىشكەرىلەي مادەني اۋىس – كۇيىستى دامىتاتىنىن، اسىرەسە ەكى ەل حالقىنىڭ مادەنيەت جاعىندا ءبىرىن – ءبىرى تۇسىنۋى ەكى ەلدىڭ ۇزاق ۋاقىتتىق دوستىق قارىم – قاتىناس ورناتىپ، ەكى ەل دوستىعىن بەكەمدەي تۇسۋدە ماڭىزدى رول اتقاراتىنىن اتاپ ءوتتى.

　　ءسوز كەزەگىندە، جۇڭگو مەملەكەتتىك كىتاپحاناسىنىڭ باستىعى حان يۇڭجين ەكى ەل دوستىعىن تىلگە تيەك ەتىپ، ەكى ەل حالقىنىڭ مادەنيەت جاعىنداعى ءبىر – ءبىرىن ءتۇسىنۋى ەكى ەلدىڭ ۇزاق ۋاقىتتىق مادەنيەت تاريحىنداعى قالدىرعان اسىل مۇرالارى مەن ۇلى فيلوسوفيالىق ويلار ارقىلى توعىساتىنىن، سول سەبەپتى مەملەكەتتىك كىتاپحانادان قازاقستان كىتاپ بۇرىشىنىڭ اشىلۋى جۇڭگو وقىرماندارىنىڭ قازاق مادەنيەتىن تۇسىنۋىنە دارا جول اشاتىنىن ءبىلدىردى.

　　قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ باستىعى ءۇمىتقان مۇنالبايەۆا بۇل رەتكى كىتاپ بۇرىشىنا اباي اقىليالارى، ەلباسى نازاربايەۆ تۋرالى جازىلعان كىتاپتار، ءىلياس ەسەنبەرليننىڭ «كوشپەندىلەر» رومانى، «استانا» قاتارلى 200گە تارتا كىتاپتار قويىلعانىن، سول ارقىلى جۇڭگو وقىرماندارىنىڭ قازاقستان مادەنيەتىن ءتىپتى دە جاقسى تۇسىنۋىنە جول اشقانىن اتاپ ءوتتى، سونىمەن قاتار جۇڭگو مەملەكەتتىك كىتاپحاناسىنا، قازاقستان ەلشىلىگىنە شىن جۇرەكتەن راحىمەتىن ءبىلدىردى.

　　ءىسشارا سوڭىندا، باس ەلشى شاحرات نۇرىشەۆ، جۇڭگو مەملەكەتتىك كىتاپحاناسىنىڭ باستىعى حان يۇڭجين، قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ باستىعى ءۇمىتقان مۇنالبايەۆا، مەملەكەتتىك ساياسي كەڭەستىڭ مۇشەسى اكبار ءماجيت ۇلى قاتارلى باسقادا وقۋ – اعارتۋ، مادەنيەت سالاسىنداعى قۇرمەتتى قوناقتار جۇڭگو مەملەكەتتىك كىتاپحاناسىن كوزدەن كەشىردى، قازاقستان كىتاپ بۇرىشىنا بارىپ، كىتاپ بۇرىشىنا قويىلعان بارلىق كىتاپتارمەن تانىسىپ، ادەبيەت پەن مادەنيەت سالاسىندا سىر شەرتتى.

　　كەلۋ قاينارى: حالىق تورابى