شي جينپيڭ وزبەكستاننىڭ اقپارات قۇرالدارىندا اۆتورلى ماقالا جاريالادى
جۇڭگو - وزبەكستان قاتىناسىنىڭ اناعۇرلىم كوركەم بولاشاعىن قول ۇستاسا اشايىق
2022.09.14 16:29 كەلۋ قاينارى : حالىق تورابى
«حالىق گازەتى»، 9 - ايدىڭ 13 - كۇنى، بەيجيڭ. 9 – ايدىڭ 13 – كۇنى، ميرزيويەۆ زۇڭتۇڭنىڭ ۇسىنىسىمەن وزبەكستان رەسپۋبليكاسىندا مەملەكەتتىك ساپاردا بولۋ ءارى شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 22 - رەتكى ماجىلىسىنە قاتىناسۋ قارساڭىندا، مەملەكەت ءتوراعاسى شي جينپيڭ 9 - ايدىڭ 13 - كۇنى وزبەكستاننىڭ «حالىق ءۇنى گازەتى»، وزبەكستان مەملەكەتتىك اقپارات اگەنتتىگى سياقتى اقپارات دانەكەرلەرىندە «جۇڭگو - وزبەكستان قاتىناسىنىڭ اناعۇرلىم كوركەم بولاشاعىن قول ۇستاسا اشايىق» دەگەن تاقىرىپتا اۆتورلى ماقالا جاريالادى. ماقالانىڭ تولىق مازمۇنى تومەندەگىدەي:
جۇڭگو - وزبەكستان قاتىناسىنىڭ اناعۇرلىم كوركەم بولاشاعىن قول ۇستاسا اشايىق
جۇڭحۋا حالىق رەسپۋبليكاسىنىڭ ءتوراعاسى شي جينپيڭ
«جەرى قۇنارلى، ەگىنشىلىكپەن شۇعىلدانادى، ورمانى جايقالعان، باۋ – باقشاسى قۇلپىرعان، جىلقى كوپتەپ وسىرىلەدى». بۇل ءبىر مىڭ 300 قانشا جىلدىڭ الدىندا جۇڭگونىڭ تاڭ داۋىرىندەگى شۋان زاڭ ۇستاز سۋرەتتەگەن سامارحاننىڭ ىرىستى كورىنىسى ەدى. مول ءونىمدى قۋانىشپەن قارسى العان وسى كۇز ورتاسىندا ميرزيويەۆ زۇڭتۇڭنىڭ ۇسىنىسىمەن سامارحان سىندى كورىكتى قالاعا تاعى كەلىپ، ميرزيويەۆ زۇڭتۇڭمەن جۇڭگو - وزبەكستان سەلبەستىگىنىڭ ۇلى جوسپارىن اقىلداسپاقپىن ءارى شاڭحاي سەلبەستىك ۇيىمىنىڭ سامارحانداعى باسشىلار باس قوسۋىنا قاتىناسپاقپىن.
جۇڭگو مەن وزبەكستان − بايىرعى وركەنيەتتى ەلدەر، ۇلى جىبەك جولى ەكى ەل حالىقتارىنىڭ 2 مىڭ جىلدان استام ۋاقىتتان بەرگى دوستىق بارىس - كەلىسىنە كۋا بولدى. جۇڭگونىڭ باتىس حان پاتشالىعى داۋىرىندەگى جاڭ چيان، تاڭ پاتشالىعى داۋىرىندەگى شۋان زاڭ، ميڭ پاتشالىعى داۋىرىندەگى چىن چىڭ وزبەكستانعا ساپارلاي بارىپ، تاشكەنت، سامارحان، ناۆوي قاتارلى ايگىلى قالالاردا شىعىستىڭ ىزدەرىن قالدىردى. اتا مەكەنى بۇحارا بولىپ كەلەتىن ساياسي قايراتكەر سەيد ادجال شامسۋددين كەزىندە جۇڭگونىڭ يۋان پاتشالىعى داۋىرىندەگى يۇننان ولكەسىنىڭ اكىمشىلىك ىستەر مىندەتىن وتەگەن، سامارحاندا تۋىلعان استرونوم، ەسەپشى ۋ جۋ 14 - عاسىردىڭ ورتا شەنىندە نانجيڭدە استرونوميا ستانسياسىن سالۋعا قاتىناسقان. ولار − جۇڭگو - وزبەكستان دوستىعىنىڭ ءورىس اشۋشىلارى جانە باستاماشىلارى، ولاردىڭ اڭگىمەلەرى كۇنى بۇگىنگە دەيىن ەكى ەل حالىقتارى اراسىندا تارالىپ كەلەدى.
وزبەكستان − ورتا ازياداعى ءىرى ەل جانە وڭىرلىك ورتالىق. تاۋەلسىزدىك العان 31 جىلدان بەرى وزبەكستاننىڭ مەملەكەت قۇرىلىسى مەن ۇلتتى گۇلدەندىرۋ ىستەرىندە سۇبەلى تابىستارعا قول جەتتى. اسىرەسە، تاياۋ جىلداردان بەرى ميرزيويەۆ زۇڭتۇڭنىڭ باسشىلىعىندا وزبەكستان حالقى «جاڭا وزبەكستان» قۇرۋدىڭ جاڭا ساپارىن باستادى، ءار سالاداعى رەفورما، دامۋ جەدەل ارناعا ءتۇستى، مەملەكەتتىڭ بەت - بەينەسى شىت جاڭا تۇسكە ەندى، حالىق تۇرمىسى كۇننەن - كۇنگە جاقسارىپ، حالىقاراداعى ورنى كورنەكتى جوعارىلادى. دوس كورشى ەل جانە جان - جاقتى ستراتەگيالىق سەرىك رەتىندە ءبىز بۇعان شىن جۇرەكتەن قۋانامىز.
بيىل − جۇڭگو مەن وزبەكستاننىڭ ديپلوماتيالىق قاتىناس ورناتقانىنىڭ 30 جىلدىعى. 30 جىلدان بەرى جۇڭگو - وزبەكستان قاتىناسىنىڭ بايتەرەگى بارعان سايىن تەرەڭدەپ، قاۋلاپ ءوسىپ كەلەدى. ەكى ەل باستان - اياق ءوزارا قۇرمەت ەتىپ، تاتۋ كورشىلىك دوستىق ورناتىپ، تار جول، تايعاق كەشۋدەن بىرگە ءوتىپ، ءوزارا پايدا جەتكىزىپ، تەڭ يگىلىككە كەنەلىپ، ءار سالاداعى سەلبەستىكتە ناقتى تابىستارعا قول جەتكىزدى.
− ءبىز ءوزارا سىرلاس دوستارمىز. 2016 - جىلدان بەرى مەن ميرزيويەۆ زۇڭتۇڭمەن قويۋ بارىس - كەلىستى جالعاستىرىپ، كەزدەسۋ، سويلەسۋ، ءوزارا حات جولداۋ سياقتى تاسىلدەر ارقىلى تاماشا قىزمەت قاتىناسىن جانە تەرەڭ جەكە دوستىق ورناتتىق. ەكى ەل جان - جاقتى ستراتەگيالىق سەرىكتەستىك قاتىناس ورناتىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى قولداپ، وزدەرىنىڭ دامۋ ستراتەگياسىن ىلگەرىلەتۋ جاعىندا ءبىر - بىرىنە دەم بەرىپ، رەفورما جاساپ، ەسىك اشۋدى كەڭەيتۋ جاعىندا ءوزارا ۇيرەنىپ، ءوزارا ۇلگى الىپ، ءوڭىردىڭ دامۋىنا ۇزدىكسىز وڭ ەنەرگيا ۇستەدى.
− ءبىز بىرگە داميتىن جاقسى سەرىكتەرمىز. جۇڭگو − وزبەكستاننىڭ ءبىرىنشى ۇلكەن ساۋدا سەرىگى جانە نەگىزگى قارجى قاينارى. 2021 - جىلى ەكى جاقتى ساۋدا سوماسى 8 ميلليارد دوللاردان استى. بيىل الدىڭعى جارتى جىلدا ەكى جاقتى ساۋدا سوماسى 5 ميلليارد دوللارعا جەتىپ، تۇتاس جىلدا 10 ميلليارد دوللار بولۋ نىساناسىنا قاراي نىق قاداممەن ىلگەرىلەۋدە. ەكى جاقتىڭ «ءبىر بەلدەۋ، ءبىر جولدى» بىرگە قۇرۋ سەلبەستىگىنىڭ تابىسى مول بولدى، كەلەلى نىساندار تارتىپپەن ىلگەرىلەتىلدى. جۇڭگو - ورتا ازيا تابيعي گاز قۇبىرىنىڭ 4 قۇبىر جەلىسى تۇگەلدەي وزبەكستاننان وتەدى. ورتا ازياداعى ءبىرىنشى ۇزىن تۋنەل «انگرەن – پوپ» تەمىر جول تۋنەلى ءساتتى تۇتاستىرىلدى، جۇڭگو - قىرعىزستان - وزبەكستان تاس جولىنىڭ، جۇڭگو - قازاقستان - وزبەكستان تەمىر جولىنىڭ تاسىمال قۋاتى كومەسكى كۇشى ۇزدىكسىز اشىلىپ، جۇڭگو - قىرعىزستان - وزبەكستان تەمىر جول نىسانىنىڭ الدىڭعى مەرزىمدىك قىزمەتىندە بەلسەندى ىلگەرىلەۋشىلىككە قول جەتتى، وزبەكستان «قۇرلىقتاعى تۇيىق ەلدەن» «قۇرلىقتاعى بايلانىستىرۋشى ەلگە» اينالۋدا. ەكى جاق تاعى جاڭا ەنەرگيا، اۋىل شارۋاشىلىعى، فينانس، وسى زامانعى حابارلاسۋ سياقتى سالالارداعى سەلبەستىكتى بەلسەنە ورىستەتىپ، ەكى ەل حالىقتارىنىڭ ىرىس - قۇتىن ارتتىردى.
− ءبىز وركەنيەتتى تىلدەسۋدىڭ تاماشا ۇلگىسى بولدىق. ەكى جاق كوركەمونەر مەرەكەسى، ادەبيەت - كوركەمونەر كورمەسى، كورمە، تالقى ءماجىلىسى سياقتى باي مازمۇندى اۋىس - كۇيىس قيمىلدارىن ورىستەتىپ، ءوزارا وقۋشى جىبەرۋ، كىتاپ اۋدارۋ، باسپادان شىعارۋ، كينو ءتۇسىرۋ، تەلە فيلم اۋدارۋ، جەرگىلىكتى ورىنداردىڭ بارىس - كەلىسى جانە قىزمەتكەرلەردى تاربيەلەۋ سياقتى جاقتارداعى سەلبەستىكتى دابىرالى ورىستەتىپ، ەكى ەل حالىقتارىنىڭ كوڭىل توعىستىرۋىن ءونىمدى جەبەدى. تاياۋ جىلداردان بەرى جۇڭگو وزبەكستانعا 6 مىڭ 500 دەن استام كاسىپتىك دارىندى تاربيەلەپ بەردى، ولار وزبەكستاننىڭ رەفورما، دامۋ ىستەرىنە بەلسەنە ات سالىستى. كۇڭزى شۋەيۋانى تاشكەنتتە، سامارحاندا تامىر تارتىپ، وزبەكستانعا قىرۋار حانزۋ ءتىلى دارىندىلارىن تاربيەلەپ بەردى، ولار جۇڭگو - وزبەكستان دوستىعىنىڭ ەلشىسىنە اينالدى. ەكى ەلدىڭ ساياحات سەلبەستىگى تەز دامىپ، كوپتەگەن جۇڭگو ازاماتتارى وزبەكستان سىندى كورىكتى جەرگە ساپارلاي باردى. مەن 2013 - جىلى سامارحانعا ساپارلاي بارعاندا باستالعان حيۆا بايىرعى قالاسىنىڭ تاريحي ەجەلگى ەسكەرتكىشتەرىن قورعاۋ، قالپىنا كەلتىرۋ نىسانى تابىسپەن اياقتاپ، حيۋا سىندى بايىرعى قالا ونان ارى قۇلپىرا ءتۇستى.
− ءبىز ءبىرىن - ءبىرى سۇيەمەلدەيتىن جاقسى باۋىرلاسپىز. جۇڭگو مەن وزبەكستان ءبىر - بىرىنە ارقا سۇيەپ، امانشىلىقتا دا، جامانشىلىقتا دا بىرگە بولدى. ەكى جاق ەكى جاقتى سالادا جانە شاڭحاي سەلبەستىك ۇيىمى سياقتى وڭىرلەردە، كوپ جاقتى دەڭگەيدە تىعىز سەلبەسىپ، سىرتقى كيلىگۋگە بىرگە قارسى تۇرىپ، «ءۇش ءتۇرلى كۇشكە» جانە ەل اتتاعان ۇيىمدىق قىلمىسقا، ەسىرتكى ساتۋعا سوققى بەرىپ، اقپارات اۋىس - كۇيىسىن كۇشەيتىپ، قىزمەتكەرلەردى تاربيەلەۋدى كەڭەيتىپ، حاۋىپسىزدىك قالتقىسىن بىرگە سالدى. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى ەكى ەل ءبىر - بىرىنە قارايلاسىپ، بوران - شاشىندى بىرگە وتكەرىپ، ىندەتكە قارسى اتتانۋ سەلبەستىگىن بەلسەنە ورىستەتتى. جۇڭگونىڭ ۆاكسيناسى وزبەكستاننىڭ ىندەتكە قارسى اتتانۋىنداعى نەگىزگى قۇرالىنا اينالدى ءارى بىرلەسىپ ءوندىرۋ ىسكە اسىرىلدى، جاڭا تيپتى ايدارشا ۆيرۋستان ساقتانۋداعى ءدارى – دارمەكتىڭ وزبەكستاندا بەكىتۋدەن ءوتىپ كلينيكادا ىستەتىلۋى ەكى ەل حالىقتارىنىڭ باس اماندىعىن ءونىمدى قورعادى.
2 مىڭ جىلدان استام ۋاقىتتان بەرگى دوستىق بارىس - كەلىس پەن 30 جىلدىق ءوزارا ءتيىمدى سەلبەستىك جۇڭگو مەن وزبەكستاننىڭ جالپى بەتتىك سەلبەستىكتى كۇشەيتۋى تاريح اعىمىنا ۇيلەسەتىنىن، ەكى ەل حالىقتارىنىڭ ءتۇبىرلى مۇددەسىنە ۇيلەسەتىنىن ايگىلەدى. تاريح پەن بولاشاق توعىسىندا تۇرعان ءبىز جۇڭگو - وزبەكستان قاتىناسىنىڭ بولاشاعىنا كامىل سەنەمىز ءارى زور ءۇمىت كۇتەمىز.
ءبىرىنشى، ءبىز ءوزارا قولداۋدى كۇشەيتىپ، ءوزارا سەنىمدىلىك دانەكەرىن بەكەمدەۋىمىز كەرەك. ەكى جاق جاڭا داۋىردەگى جۇڭگو - وزبەكستان قاتىناسىنىڭ جوباسىن ستراتەگيالىق جانە ۇزاق بولاشاقتىق تۇرعىدان جوبالاپ، جوعارى جىكتەگىلەردىڭ بارىس - كەلىسىن كۇشەيتىپ، ساياسي سەنىمدىلىكتى ارتتىرىپ، ەل باسقارۋ تاجىريبەلەرىن اۋىستىرۋدى تەرەڭدەتىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ۇزدىكسىز ءبىرىن - ءبىرى قولداۋى كەرەك. جۇڭگو وزبەكستاننىڭ ءوز ەلىنىڭ جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، ءارقانداي كۇشتىڭ وزبەكستاننىڭ ىشكى ىسىنە كيلىگۋىنە قارسى تۇرادى.
ەكىنشى، ءبىز ءوزارا ءتيىمدى سەلبەستىكتى تەرەڭدەتىپ، دامۋدى، گۇلدەنۋدى بىرگە جوسپارلاۋىمىز كەرەك. ەكى ەلدىڭ دامۋ ستراتەگياسىن ۇشتاستىرۋدى جەدەلدەتىپ، ەكى ەلدىڭ ەكونوميكا - ساۋدا، قارجى قوسۋ، ءتۇيىندى نىساندار سياقتى سالالارداعى سەلبەستىگىنىڭ جاڭا جولىن بىرگە جوبالاۋ كەرەك. جۇڭگو جاڭا دامۋ كەزەڭىنە قادام تاستادى، جاڭا دامۋ جاعدايىن بەلسەنە قالىپتاستىرۋدا، وزبەكستاننىڭ جۇڭگونىڭ دامۋ جۇردەك پويەزىنا وتىرىپ، دامۋ ورايىنان بىرگە يگىلىكتەنۋىن قارسى الادى. كەلەر جىل − «ءبىر بەلدەۋ، ءبىر جولدى» بىرگە قۇرۋ باستاماسى العا قويىلعانىنىڭ 10 جىلدىعى، ەكى جاق وسىنى وراي ەتىپ، بۇرىنعىعا مۇراگەر بولىپ، كەيىنگىگە جول اشىپ، جاعدايعا قاراي العا باسىپ، ەگجەي - تەگجەيلى جوبا جاساپ، ساپالى دامۋدى بىرگە جۇزەگە اسىرۋى كەرەك. ەكى جاق كەدەيلەردى ازايتۋ، كەدەيلەردى سۇيەمەلدەۋ سەلبەستىگىن كەڭەيتىپ، جۇڭگو مەن وزبەكستاننىڭ ءوزارا ءتيىمدى سەلبەستىگىنىڭ ەكى ەل حالىقتارىن اناعۇرلىم كوپ، اناعۇرلىم جاقسى يگىلىككە كەنەلتۋىنە مۇمكىندىك جاساۋى كەرەك.
جۇڭگو وزبەكستانمەن بىرگە دۇنيە جۇزىلىك دامۋ باستاماسىن بەلسەنە امالياتتا ايگىلەپ، ورتاق ارەكەت قولدانىپ، قالىڭ وركەندەپ كەلە جاتقان ەلدەردىڭ مۇددەسىن قورعاپ، جالپىعا ءتيىمدى، تەپە - تەڭ، سايكەستى، قامتىمدى، سەلبەسىپ تەڭ يگىلىككە كەنەلەتىن، بىرگە گۇلدەنەتىن دامۋ جاعدايىن بىرگە جاراتۋدى قالايدى.
ءۇشىنشى، ءبىز حاۋىپسىزدىك سەلبەستىگىن كۇشەيتىپ، حاۋىپ - قاتەر مەن سىن - سايىستى باسەيتۋىمىز كەرەك. ەكى جاق حاۋىپسىزدىك سالاسىنداعى سەلبەستىكتى تەرەڭدەتىپ، ءارقانداي كۇشتىڭ وڭىرلىك ورنىقتىلىق جاعدايىن بۇلدىرۋىنە تۋدى ايقىن ۇستاي وتىرىپ قارسى تۇرىپ، ەكى ەلدىڭ دامۋىنا حاۋىپسىز سىرتقى ورتا ازىرلەۋى كەرەك. اۋعانستان − جۇڭگو مەن وزبەكستاننىڭ كورشى ەلى، بەيبىت، ورنىقتى، دامىعان، گۇلدەنگەن اۋعانستان ەكى ەلدىڭ ورتاق مۇددەسىنە ۇيلەسەدى. جۇڭگو وزبەكستاننىڭ اۋعانستان ماسەلەسىن شەشۋدە ەرەكشە رول اتقارعانىن القايدى ءارى قولدايدى. ءبىز وزبەكستانمەن بىرگە دۇنيە جۇزىلىك حاۋىپسىزدىك باستاماسىن امالياتتا ايگىلەپ، جاڭا حاۋىپ - قاتەر، جاڭا سىن - سايىسقا توتەپ بەرىپ، بەيبىتشىلىك پەن ورنىقتىلىقتى جانە حالىقارالىق ادىلدىك پەن تۋراشىلدىقتى قورعاۋدى قالايمىز.
ءتورتىنشى، ءبىز گۋمانيتارلىق اۋىس - كۇيىستى جيىلەتىپ، حالىق تىلەگىنىڭ توعىسۋىن جەبەۋىمىز كەرەك. تۋىس – تۋعان ارالاسقان سايىن جاقىنداپ، دوستىق ارالاسقان سايىن تەرەڭدەيدى. جۇڭگو مەن وزبەكستاننىڭ ۇرپاقتان - ۇرپاققا جالعاسقان دوستىعى تەرەڭ تاريحي استارعا يە، ەكى جاقتىڭ گۋمانيتارلىق سەلبەستىكتى ورىستەتۋىنىڭ نەگىزى بەرىك، بولاشاعى نۇرلى. ءبىز اقپارات قۇرالدارى، وقۋ - اعارتۋ، دەنساۋلىق ساقتاۋ، مادەنيەت، ساياحات، اقپارات، ارحەولوگيا، جەرگىلىكتى ورىندار اۋىس - كۇيىسى سياقتى سالالارداعى سەلبەستىكتى كەڭەيتىپ، ءوزارا مادەنيەت ورتالىعىن قۇرۋدى جانە وزبەكستاندا لۋبان شەبەرحاناسىن قۇرۋدى جەدەلدەتىپ، كوپ نەگىزدى، ىقپالداس گۋمانيتارلىق اۋىس - كۇيىس جالپى جاعدايىن ورناتىپ، جۇڭگو مەن وزبەكستاننىڭ ەكى جاقتى قاتىناسىنىڭ ۇزاق ۋاقىت بەكەمدەلۋىنە، حالىقتاردىڭ ۇرپاقتان - ۇرپاققا جالعاسقان دوستىعىنىڭ ۇزىلمەۋىنە مۇمكىندىك جاساۋىمىز كەرەك.
بۇل جولى وزبەكستاندا شاڭحاي سەلبەستىك ۇيىمىنىڭ سامارحانداعى باسشىلار باس قوسۋىنا قاتىناسامىن. بيىل − «شاڭحاي سەلبەستىك ۇيىمى ەرەجەسىنە» قول قويىلعانىنىڭ 20 جىلدىعى جانە «شاڭحاي سەلبەستىك ۇيىمىنا مۇشە ەلدەردىڭ ۇزاق ۋاقىتتىق تاتۋ كورشىلىك، دوستىق سەلبەستىك شارتىنا» قول قويىلعانىنىڭ 15 جىلدىعى. وسى ۇيىم ەرەجە مەن شارتتا بەلگىلەنگەن باستى ماقسات پەن پرينسيپتىڭ جەتەكشىلىگىندە، «شاڭحاي رۋحىن» امالياتتا ايگىلەپ، اۋەلگى ماقساتتان، بورىشتان اينىماي، مۇشە ەلدەردىڭ ورنىقتىلىقتى بىرگە قورعاۋىن، دامۋدى بىرگە قاراستىرۋىن ىلگەرىلەتىپ، ءوزارا قۇرمەت ەتەتىن، ءادىل دە ادىلەتتى، سەلبەسىپ تەڭ يگىلىككە كەنەلەتىن جاڭاشا حالىقارالىق قاتىناستىڭ ۇلگىسىن ورناتىپ، ەۆروپا - ازيا ءوڭىرى مەن حالىقارالىق ىستەردەگى ماڭىزدى سىندارلى كۇشكە اينالدى.
وزبەكستان شاڭحاي سەلبەستىك ۇيىمىنىڭ كەزەكتى ءتوراعا ەلى بولعاننان بەرى جاڭا تيپتى ايدارشا ۆيرۋس وكپە قابىنۋ ىندەتى سياقتى فاكتورلاردىڭ ىقپالىن جەڭىپ، مۇشە ەلدەرمەن قاتىناس جاساۋدى جانە سايكەسۋدى كۇشەيتىپ، ءتۇرلى قىزمەتتەردى تىڭعىلىقتى ورىستەتىپ، وسى ۇيىمنىڭ اقاۋسىز، ورنىقتى دامۋ جاعدايىن جالعاستىردى. جۇڭگو مۇنى جوعارى باعالايدى. ءار جاقتىڭ بىرگە قۇلشىنۋىندا سامارحانداعى باسشىلار باس قوسۋىنىڭ، ءسوز جوق، سۇبەلى تابىستارعا قول جەتكىزىپ، اناعۇرلىم تىعىز شاڭحاي سەلبەستىك ۇيىمىنىڭ تاعدىرلاس ورتاق تۇلعاسىن قۇرۋعا، ءوڭىردىڭ بەيبىتشىلىگىن، ورنىقتىلىعىن، دامۋىن، گۇلدەنۋىن جەبەۋگە اناعۇرلىم زور ۇلەس قوساتىنىنا سەنەمىن.
كوڭىلگە الساڭىز، جول الىستىق ەتپەيدى. جۇڭگو وزبەكستانمەن بىرگە ديپلوماتيالىق قاتىناس ورناتۋداعى اۋەلگى ماقساتتى ەستە بەرىك ساقتاپ، تاريحي ورايدى يگەرىپ، مەملەكەتتى دامىتۋ، گۇلدەندىرۋ جولىندا ۇزدىكسىز قول ۇستاسا العا باسىپ، جۇڭگو مەن وزبەكستاننىڭ تاعدىرلاس ورتاق تۇلعاسىن قۇرۋ بولاشاعى مەن نىساناسىنا قاراي بىرگە قۇلشىنۋدى قالايدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
