جۇڭگو جاق ا ق ش جاقتىڭ اسكەري ونەركاسىپ سالاسىنداعى كاسىپورىندارىنان 5 كاسىپورنىنا جازالاۋ شاراسىن اتقارۋدى ۇيعاردى
2024.01.08 15:08 كەلۋ قاينارى : حالىق تورابى
شينحۋا اگەنتتىگىنىڭ 1 - ايدىڭ 7 - كۇنى بەيجيڭنەن بەرگەن حابارى. سىرتقى ىستەر مينيسترلىگى مالىمدەمەشىسىنىڭ ا ق ش - نىڭ جۇڭگونىڭ تايۋان وڭىرىنە قارۋ - جاراق ساتقانىنا، جۇڭگونىڭ ناقتى تۇلعالارىنا جازالاۋ شاراسىن اتقارعانىنا قارسى تۇرۋ جونىندە 1 - ايدىڭ 7 - كۇنى ءتىلشىنىڭ سۇراۋىنا جاۋاپ بەرگەن كەزدە ايتۋىنشا، جۇڭگو جاق ا ق ش جاقتىڭ اسكەري ونەركاسىپ سالاسىنداعى 5 كاسىپورنىنا جازالاۋ شاراسىن اتقارۋدى ۇيعارعان.
ءبىر ءتىلشى: جۋىردا ا ق ش تايۋانعا جاڭا كەزەكتى قارۋ - جاراق ساتۋدى اتقاردى ءارى ءتۇرلى سىلتاۋلارمەن جۇڭگونىڭ كاسىپورىندارىنا جانە جەكەلەرىنە جازالاۋ شاراسىن اتقاردى. جۇڭگو جاق الدا قارسى جازالاۋ شاراسىن اتقاراتىنىن ءبىلدىردى، مالىمدەمەشىنىڭ جۇڭگو جاقتىڭ ناقتى شارالارىن تانىستىرۋىنا بولا ما؟ _ دەپ سۇرادى.
مالىمدەمەشى بىلاي دەدى: ا ق ش جاق ءبىر جۇڭگو پرينسيپىنە جانە جۇڭگو مەن ا ق ش اراسىنداعى ءۇش رەتكى بىرلەسكەن مالىمدەمەگە، اسىرەسە، ”17 - تامىز“ مالىمدەمەسىنە اشىقتان - اشىق قايشىلىق جاساپ، جۇڭگونىڭ تايۋان وڭىرىنە قارۋ - جاراق ساتىپ، ءتۇرلى سىلتاۋلاردى ويدان قيىستىرىپ، جۇڭگونىڭ كاسىپورىندارىنا جانە جەكەلەرىنە زاڭسىز تۇردە سىڭار جاقتىلى جازالاۋ شارالارىن اتقارىپ، جۇڭگونىڭ يەلىك ۇقىعى مەن حاۋىپسىزدىك مۇددەسىنە اۋىر دارەجەدە زيان سالدى، تايۋان بۇعازىنىڭ بەيبىتشىلىگى مەن ورنىقتىلىعىن اۋىر دارەجەدە ءبۇلدىردى، جۇڭگو جاقتىڭ كاسىپورىندارى مەن جەكەلەرىنىڭ ۇيلەسىمدى، زاڭدى ۇقىق - مۇددەسىنە اۋىر دارەجەدە سۇعاناقتىق جاسادى. جۇڭگو جاق بۇعان قاتاڭ نارازىلىق بىلدىرەدى، قاتاڭ قارسىلىق بىلدىرەدى، ا ق ش جاقپەن قاتاڭ سويلەستى.
مالىمدەمەشى مىنانى ءبىلدىردى: ا ق ش جاقتىڭ وسىنداي اۋىر قاتەلىك وتكىزگەن ارەكەتتەرى جونىندە، «جۇڭحۋا حالىق رەسپۋبليكاسىنىڭ شەتەلدىڭ جازالاۋ شارالارىن اتقارۋىنا قارسى تۇرۋى جونىندەگى زاڭىنا» نەگىزدەلىپ، جۇڭگو جاق ا ق ش جاقتىڭ اسكەري ونەركاسىپ سالاسىنداعى سەرىكتەستىكتەرى — بەي - ي قۇرلىق جانە قارۋ - جاراق جۇيەسى (BAE Systems Land and Armament)، بىرلەسكەن تەحنيكالىق جۇيەنى ىسكە قوسۋ سەرىكتەستىگى (Alliant Techsystems Operation)، عارىش ورتاسى سەرىكتەستىگى (AeroVironment)، ViaSat سەرىكتەستىگى جانە Data Link Solutions سەرىكتەستىگى قاتارلى سەرىكتەستىكتەرىنە جازالاۋ شاراسىن اتقارادى. شارالاردا ەلىمىز شەكاراسى ىشىندەگى جىلجىمالى مۇلكىن، جىلجىمايتىن مۇلكىن جانە باسقا ءتۇرلى مال - مۇلكىن مۇزداتۋ، ەلىمىز شەكاراسى ىشىندەگى ۇيىمدار مەن جەكەلەردىڭ ولارمەن ساۋدا جاساۋ، سەلبەسۋ قاتارلى قيمىلداردى وتكىزۋىنە تيىم سالۋ قامتىلادى.
مالىمدەمەشى: ”مەن مىنانى باسا دارىپتەيمىن: جۇڭگو ۇكىمەتى مەملەكەتتىڭ يەلىك ۇقىعى، حاۋىپسىزدىگى جانە تەرريتوريا تۇتاستىعىن باتىل قورعايدى، جۇڭگو كاسىپورىندارى مەن ازاماتتارىنىڭ زاڭدى ۇقىق - مۇددەسىن قورعاۋ جاعىنداعى بەكىمىنەن اينىمايدى. ءبىز ا ق ش جاقتى ءبىر جۇڭگو پرينسيپىنە جانە جۇڭگو مەن ا ق ش اراسىنداعى بىرلەسكەن مالىمدەمەلەردەگى بەلگىلەمەلەرگە شىنايى بويسۇنۋعا، حالىقارالىق زاڭ مەن حالىقارالىق قارىم - قاتىناستىڭ نەگىزگى ولشەمدەرىنە بويسۇنۋعا، تايۋانعا قارۋ - جاراق ساتۋدى توقتاتۋعا، جۇڭگوعا باعىتتالعان زاڭسىز سىڭار جاقتىلى جازالاۋ شاراسىن اتقارۋدى توقتاتۋعا قۋزايمىز، ويتپەگەندە، جۇڭگو جاقتىڭ پارمەندى قايتارما سوققىسىنا ۇشىرايتىنى داۋسىز“، _ دەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
