شينجياڭ اقسۋ ايماعى ءۇشتۇرپان اۋدانىندا 7.1 بال جەر سىلكىندى، سىلكىنىس ءدۇمپۋى كۇشتى بولدى
2024.01.23 13:11 كەلۋ قاينارى : حالىق تورابى
شينحۋا اگەنتتىگىنىڭ 1 - ايدىڭ 23 - كۇنى ۇرىمجىدەن بەرگەن حابارى. جۇڭگو جەر سىلكىنىسى ستانسياسى تورىنىڭ رەسمي تەكسەرىپ بەكىتۋىنشە، 1 - ايدىڭ 23 - كۇنى ساعات 2 دەن 09 مينۋت وتكەندە، شينجياڭ اقسۋ ايماعى ءۇشتۇرپان اۋدانىندا (سولتۇستىك ەندىك 41.26 گرادۋس، شىعىس بويلىق 78.63 گرادۋس) 7.1 بال جەر سىلكىندى، سىلكىنىس قاينارى 22 كيلومەتر تەرەڭدىكتە.
ءتىلشىنىڭ سۇحبات بارىسىندا ۇعىسۋىنشا، اقسۋ قالاسىندا سىلكىنىس ءدۇمپۋى توتەنشە كۇشتى بولعان. ەلەكتر قۋاتى سەرىكتەستىگى جاريالاعان ينفورماتسياعا قاراعاندا، جەرگىلىكتى ورىنداعى نەگىزگى ەلەكتر تورى قالىپتى جۇمىس ىستەۋدە، باسقا قاتىستى قۇرىلعىلاردى قازىر ءبىر - بىرلەپ تەكسەرۋدە.
اقسۋ ايماقتىق ۇگىت ءبولىمىنىڭ قىزمەتكەرىنىڭ تانىستىرۋىنشا، ايماقتىق شۇعىل جاعدايلارعا توتەپ بەرۋ ىستەرىن باسقارۋ قولباسشىلىق كەڭسەسى بەرگەن اقپاراتقا ساي، سىلكىنىس ورتالىعىنىڭ ءۇشتۇرپان اۋدانى يامانسۋ اۋىلىندا ەكەنى العاشقى قادامدا تۇراقتاندىرىلعان، يامانسۋ اۋىلى جۇڭگو مەن قىرعىزستان شەكاراسىنداعى تاۋلى وڭىردە، قازىرگە دەيىن جارالانۋ، قازا بولۋ جانە مال - مۇلىكتىڭ زيانعا ۇشىراۋى جونىندە مالىمەت بەرىلمەگەن.
جەر سىلكىنگەن كەزدە، ءۇشتۇرپان اۋداندىق توعىسپالى مەديا ورتالىعى قىزمەتكەرىنىڭ ايتۋىنشا، اۋدان قالاشىعىندا سىلكىنىس ءدۇمپۋى كۇشتى بولعان، 6 قاباتتىق عيماراتتاعى توعىسپالى مەديا ورتالىعى ءبىر مينۋتتاي تەڭسەلىپ تۇرعانداي سەزىنگەن، تۇنگى كەزەكتەگى قىزمەتكەرلەر عيماراتتان دەرەۋ شەگىنىپ شىققان. اۋدان قالاشىعىنداعى كوپتەگەن شاعىن اۋماقتاردىڭ تۇرعىندارى عيماراتتان شۇعىل سىرتقا شىعارىلعان. ءبىر تۇرعىننىڭ ايتۋىنشا، ولاردىڭ قوناق بولمەسىندەگى اسپا شىراق تا جەرگە تۇسكەن. قازىر اۋدان قالاشىعىنداعى اۋا تەمپەراتۋراسى نولدەن تومەن 10 گرادۋس.
اقسۋ ايماعى كەلپىن اۋدانىنىڭ تۇرعىنى ليۋ مىرزانىڭ ايتۋىنشا، جەر سىلكىنگەننەن كەيىن، اۋدان قالاشىعىنداعى كوپتەگەن ادامدار عيماراتتان سىرتقا شىعىپ جەر سىلكىنىسىنەن ساقتانعان، كەيبىرەۋلەر قايتالاما سىلكىنىستەن ساقتانۋ ءۇشىن اۆتوموبيلمەن كەڭ جەرلەرگە قاراي كەتكەن، قازىر كەلپىن اۋدانىندا قايتالاما سىلكىنىس ۇزدىكسىز تۋىلۋدا.
ءۇرىمجى، بۇراتالا وبلىسى، حوتان، قاشقار قاتارلى جەرلەردە تۇگەلدەي سىلكىنىس ءدۇمپۋى سەزىلگەن، ءۇرىمجى قالاسىنىڭ تۇرعىنىنىڭ ايتۋىنشا، ولاردىڭ وتباسى تۇراتىن 17 - قابات تا كورنەكتى تۇردە تەربەلگەن.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
