شي جينپيڭ جۇڭگو - اراب ەلدەرى سەلبەستىك تالقى مىنبەرىنىڭ 10 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى

2024.05.31 16:41 كەلۋ قاينارى : حالىق تورابى

　　«حالىق گازەتى»، 5 – ايدىڭ 30 – كۇنى، بەيجيڭ (تىلشىلەر ۋاڭ يۋان، ۋاڭ حايلين). 5 - ايدىڭ 30 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگو - اراب ەلدەرى سەلبەستىك تالقى مىنبەرىنىڭ 10 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى. شي جينپيڭ بىلاي دەپ جاريالادى: جۇڭگو 2026 - جىلى جۇڭگودا 2 - كەزەكتى جۇڭگو - اراب ەلدەرى باسشىلار باس قوسۋىن وتكىزەدى، جۇڭگو جاق اراب ەلدەرى جاقپەن جۇڭگو - اراب ەلدەرى دوستىق رۋحىن ساۋلەلەندىرىپ، ”بەس ۇلكەن سەلبەستىك اۋقىمىن“ قالىپتاستىرىپ، جۇڭگو - اراب ەلدەرى تاعدىرلاس ورتاق تۇلعاسىن قۇرۋدى جەدەلدەتۋدى قالايدى.

　　جادىراعان جاز ايى كەلىپ، كۇللى تىرشىلىك قۇلپىردى. دياۋيۇيتايداعى فاڭحۋا باعىندا جۇڭگو مەن اراب ەلدەرىنىڭ مەملەكەت تۋى، سونداي - اق اراب ەلدەرى وداعىنىڭ تۋى ءبىر - بىرىنە ءسان قوسا شۇعىلا شاشتى.

　　شي جينپيڭ باحرەيننىڭ پاتشاسى حاماد، ەگيپەتتىڭ زۇڭتۇڭى سيسي، تۋنيستىڭ زۇڭتۇڭى سايد، اراب بىرىككەن امىرلىگىنىڭ زۇڭتۇڭى مۇحاممەد، اراب ەلدەرى وداعىنىڭ باس حاتشىسى گەيت، سونداي - اق اراب ەلدەرى ۋاكىلدەر ۇيىرمەسىنىڭ 22 باسشىسىمەن ءبىر - بىرلەپ قول الىستى ءارى توپتىق سۋرەتكە ءتۇستى.

　　قىزۋ قول شاپالاق ءۇنى ىشىندە شي جينپيڭ «سەلبەستىكتى تەرەڭدەتىپ، الدىڭعىلاردىڭ ءىزىن باسا بولاشاققا جول اشىپ، جۇڭگو - اراب ەلدەرى تاعدىرلاس ورتاق تۇلعاسىن قۇرۋ اياق الىسىن جەدەلدەتەيىك» دەگەن تاقىرىپتا ارقاۋ ءسوز سويلەدى.

　　شي جينپيڭ بىلاي دەپ اتاپ كورسەتتى: جۇڭگو مەن جۇڭگو حالقىنىڭ اراب ەلدەرىمەن جانە حالقىمەن دوستىعى بايىرعى جىبەك جولىنداعى دوستىق بارىس - كەلىسپەن، ۇلت ازاتتىعىنا قول جەتكىزۋ بارىسىنداعى تىزە قوسا شايقاس جاساۋمەن، مەملەكەت قۇرىلىسى بارىسىنداعى سەلبەسە ورتاق يگىلىكتەنۋمەن بىتە قايناسىپ كەتكەن. جاڭا عاسىردان بەرى جۇڭگو - اراب ەلدەرى قارىم - قاتىناسى ۇزدىكسىز تىڭ ساتىعا كوتەرىلدى. 2022 - جىلى 12 – ايدا مەن ساۋد ارابياعا بارىپ تۇڭعىش كەزەكتى جۇڭگو - اراب ەلدەرى باسشىلارىنىڭ باس قوسۋىنا قاتىناستىم، جۇڭگو مەن اراب ەلدەرى جاڭا داۋىرگە بەت العان جۇڭگو - اراب ەلدەرى تاعدىرلاس ورتاق تۇلعاسىن قۇرۋعا بار كۇشپەن كىرىستى. جۇڭگو جاق اراب ەلدەرى جاقپەن باسشىلار باس قوسۋىنىڭ ستراتەگيالىق جەتەكشىلىك رولىن ويداعىداي ساۋلەلەندىرىپ، جۇڭگو - اراب ەلدەرى قارىم - قاتىناسىنىڭ قارىشتاپ دامۋىن ۇزدىكسىز ىلگەرىلەتۋدى قالايدى. جۇڭگو جاق 2026 - جىلى جۇڭگودا 2 - كەزەكتى جۇڭگو - اراب ەلدەرى باسشىلارى باس قوسۋىن وتكىزەدى، مۇنىڭ جۇڭگو - اراب ەلدەرى قاتىناسىنىڭ تاعى ءبىر بەلەسىنە اينالاتىنىنا سەنەمىن.

　　شي جينپيڭ بىلاي دەپ باسا دارىپتەدى: قازىر دۇنيە جۇزىندە 100 جىلدا بولماعان وزگەرىس جەدەل قۇبىلۋدا. جۇڭگو دا، اراب ەلدەرى دە ءوز ۇلتىنىڭ كوركەيۋىن جۇزەگە اسىرۋ، مەملەكەت قۇرىلىسىن جەدەلدەتۋ سىندى داۋىرلىك بورىش ارقالاپ وتىر. جۇڭگو - اراب ەلدەرى تاعدىرلاس ورتاق تۇلعاسىن قۇرۋ ءبىزدىڭ جۇڭگو - اراب ەلدەرى قارىم - قاتىناسىنىڭ جاڭا عاسىرىن اشۋ، كوركەم دۇنيە ءجۇزىنىڭ جاڭا بولاشاعىن اشۋ سىندى ورتاق تىلەگىمىزدى ايگىلەيدى. جۇڭگو جاق اراب ەلدەرى جاقپەن ءوزارا قارايلاسىپ، تەڭ تۇرعىدا ءوزارا پايدا جەتكىزىپ، سيىسىمدى بولىپ، ءوزارا ۇلگى الىپ، تىعىز سەلبەسىپ، جۇڭگو - اراب ەلدەرى قارىم - قاتىناسىن دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋدىڭ ۇلگىسى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدىڭ ۇلگىسى، تۇرلىشە وركەنيەتتەردىڭ جاراسىمدى قاتار ءومىر ءسۇرۋىنىڭ ۇلگىسى، دۇنيە جۇزىلىك جونگە سالۋدىڭ دۇرىس جولىن قاراستىرۋدىڭ ۇلگىسى ەتىپ قۇرىپ شىعۋدى قالايدى.

　　شي جينپيڭ بىلاي دەپ اتاپ كورسەتتى: ەكى جاقتىڭ بىرگە قۇلشىنۋىندا، مەن تۇڭعىش كەزەكتى جۇڭگو - اراب ەلدەرى باسشىلار باس قوسۋى كەزىندە العا قويعان جۇڭگو - اراب ەلدەرى ناقتى سەلبەستىگىن ىلگەرىلەتۋدىڭ ”سەگىز ءىرى ورتاق ارەكەتىندە“ العاشقى مەزگىلدەگى ماڭىزدى تابىستارعا قول جەتتى. جۇڭگو جاق وسىنى نەگىز ەتىپ، اراب ەلدەرى جاقپەن ”بەس ۇلكەن سەلبەستىك اۋقىمىن“ قالىپتاستىرىپ، جۇڭگو - اراب ەلدەرى تاعدىرلاس ورتاق تۇلعاسىن قۇرۋدى جەدەلدەتۋدى قالايدى.

　　ءبىرىنشى، اناعۇرلىم ومىرشەڭدىك كۇشكە باي جاڭالىق جاراتۋ ارقىلى دەم بەرۋ اۋقىمى. جۇڭگو اراب ەلدەرىمەن بىرگە تىرشىلىك، سالاماتتىق، جاساندى زەردە، جاسىل، تومەن كومىرتەكتى دامۋ، وسىزامانعى اۋىل شارۋاشىلىعى، كەڭىستىك ينفورماتسياسى سياقتى سالالاردا 10 بىرلەسكەن تاجىريبەحانانى بىرگە قۇرادى؛ جاساندى زەردە سالاسىنداعى سەلبەستىكتى كۇشەيتىپ، جاساندى زەردەنىڭ ناقتى ەكونوميكانى جەبەۋىن بىرگە كۇش سالا ىلگەرىلەتىپ، كەڭ كولەمدى ورتاق تانىمعا يە دۇنيە جۇزىلىك جاساندى زەردە كاسىبىن باسقارۋ جۇيەسىن قالىپتاستىرۋدى ىلگەرىلەتەدى؛ كەڭىستىك بولشەكتەرىن بىرلەسىپ باقىلاۋ ورتالىعىن، جەتىقاراقشى قولدانىلمالى سەلبەستىگىن دامىتۋ ورتالىعىن بىرگە قۇرىپ، عارىشقا ادام الىپ ۇشۋ، حالىقتىق جولاۋشىلار ۇشاعى سياقتى سالالارداعى سەلبەستىكتى كۇشەيتەدى.

　　ەكىنشى، اناعۇرلىم كولەمدى قارجى قوسۋ، فينانس اۋقىمى. جۇڭگو اراب ەلدەرى جاقپەن بىرگە كاسىپ سالاسى جانە قارجى قوسۋ سەلبەستىك تالقى مىنبەرىن قۇرۋدى قالايدى، ەكى جاقتىڭ فينانس قۇرىلىمدارىنىڭ سەلبەستىكتى كۇشەيتۋىن قولدايدى، اراب ەلدەرى بانكە قۇرىلىمدارىنىڭ حالىق اقشاسىمەن شەكارا اتتاپ تولەۋدى اداقتاۋ جۇيەسىنە كىرۋىن قارسى الادى، ورتالىق بانكەنىڭ سيفرلى اقشا سالاسىنداعى اۋىس - كۇيىسىن، سەلبەستىگىن تەرەڭدەتەدى.

　　ءۇشىنشى، اناعۇرلىم سترەولدى ەنەرگيا سەلبەستىك اۋقىمى. جۇڭگو اراب ەلدەرى جاقپەن مۇناي، تابيعي گاز سالاسىنداعى ستراتەگيالىق سەلبەستىكتى ونان ارى كۇشەيتىپ، جاڭا ەنەرگيا تەحنيكاسىن زەرتتەپ تاپقىرلاۋدى جانە جابدىق ءوندىرۋدى بىرلەسىپ ورىستەتەدى. جۇڭگونىڭ ەنەرگيا كاسىپورىندارى مەن فينانس قۇرىلىمدارىنىڭ اراب ەلدەرىندە تۋىنداما ەنەرگيا نىساندارىنا قاتىناسۋىن قولدايدى.

　　ءتورتىنشى، اناعۇرلىم بارابار ەكونوميكا - ساۋدا اۋقىمى. جۇڭگو جاق جۇڭگو مەن اراب ەلدەرىنىڭ دامۋ سەلبەستىك نىساندارىن اتقارۋدى ۇزدىكسىز بەلسەنە ىلگەرىلەتەدى، ەكى جاقتى جانە وڭىرلىك ەركىن ساۋدا كەلىسىمى كەلىسسوزىن جەدەلدەتەدى، ەلەكتروندىق ساۋدا سەلبەستىگى جونىندە پىكىرلەسۋ مەحانيزمى قۇرىلىسىن ىلگەرىلەتەدى. جۇڭگو جاق اراب ەلدەرى جاقتىڭ جۇڭگو حالىقارالىق يمپورت كورمەسىنە بەلسەنە قاتىناسۋىن قارسى الادى، اراب ەلدەرى جاقپەن ەنەرگيا تۇرىنە جاتپايتىن ونىمدەردى، اسىرەسە، اۋىل شارۋاشىلىعى ونىمدەرىن يمپورت ەتۋدى كەڭەيتۋدى قالايدى.

　　بەسىنشى، اناعۇرلىم كەڭ ولشەمدى گۋمانيتارلىق اۋىس - كۇيىس اۋقىمى. جۇڭگو اراب ەلدەرىمەن بىرگە ”دۇنيە جۇزىلىك وركەنيەت باستاماسىنىڭ جۇڭگو - اراب ەلدەرى ورتالىعىن“ قۇرىپ، اقىل - پاراسات قويماسى وداعى، جاستار دامۋ تالقىسى، داشۋەلەر وداعى، مادەنيەت جانە ساياحات سەلبەستىگىن زەرتتەۋ ورتالىعى سياقتى تۇعىرلار قۇرىلىسىن جەدەلدەتۋدى قالايدى. جۇڭگو جاق ءار جىلى اراب ەلدەرى جاقتان ساياسي پارتيا باسشىسىنان 200 ادامدى جۇڭگوعا ساپارلاي كەلۋگە ۇسىنىس ەتەدى، الداعى 5 جىلدا 10 ميلليون ساياحاتشىنىڭ ءوزارا ساپاردا بولۋىن جۇزەگە اسىرۋعا كۇش سالادى.

　　شي جينپيڭ بىلاي دەپ اتاپ كورسەتتى: ورتا شىعىس _ دامۋدىڭ قۇنارلى ورتاسى، الايدا وسى ورتاداعى سوعىس ءورتى ءالى دە تولاستاماي كەلەدى. سوعىستى ەندىگارى شەكسىز جالعاستىرۋعا بولمايدى، ادىلەتتىلىكتى ماڭگى قاعىس قالدىرۋعا بولمايدى، ”ەكى مەملەكەت جوباسىنان“ بەتالدى اۋىتقۋعا استە بولمايدى. جۇڭگو جاق 1967 - جىلعى شەكارانى نەگىز، شىعىس يەرۋساليمدى استانا ەتكەن، تولىق يەلىك ۇقىققا يە تاۋەلسىز پالەستينا مەملەكەتىن قۇرۋدى باتىل قولدايدى، پالەستينانىڭ بىرلەسكەن مەملەكەتتەر ۇيىمىنا رەسمي مۇشە ەل بولۋىن قولدايدى، اناعۇرلىم كەڭ كولەمدى، اناعۇرلىم بەدەلدى، اناعۇرلىم ءونىمدى حالىقارالىق بەيبىتشىلىك ءماجىلىسىن اشۋدى قولدايدى. جۇڭگو جاق گازاداعى ادامگەرشىلىك داعدارىسىن باسەيتۋگە جانە سوعىستان كەيىنگى قايتا قۇرۋعا ۇزدىكسىز قولداۋ كورسەتەدى جانە شۇعىل ادامگەرشىلىك كومەك بەرەدى.

　　شي جينپيڭ سوڭىندا بىلاي دەپ اتاپ كورسەتتى: اراب ەلدەرىندە دوستىق _ ءومىردىڭ شۇعىلاسى دەگەن ءسوز بار. جۇڭگو اراب دوستارمەن بىرگە جۇڭگو - اراب ەلدەرى دوستىق رۋحىن ساۋلەلەندىرىپ، ىنتىماقتاسا وتىرىپ بولاشاقتى بىرگە قۇرىپ، جۇڭگو - اراب ەلدەرى تاعدىرلاس ورتاق تۇلعاسىن قۇرۋ داڭعىل جولىن شۇلەن شۇعىلاعا بولەۋدى قالايدى! (ءسوزدىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار)

　　باحرەيننىڭ پاتشاسى حاماد، ەگيپەتتىڭ زۇڭتۇڭى سيسي، تۋنيستىڭ زۇڭتۇڭى سايد، اراب بىرىككەن امىرلىگىنىڭ زۇڭتۇڭى مۇحاممەد، اراب ەلدەرى وداعىنىڭ باس حاتشىسى گەيت جەكە - جەكە ارناۋ ءسوز سويلەدى. ولار جۇڭگو - اراب ەلدەرى سەلبەستىك تالقى مىنبەرى قۇرىلعان 20 جىلدان بەرى اراب ەلدەرى مەن جۇڭگونىڭ ءار سالاداعى سەلبەستىگىندە قول جەتكەن بەلسەندى جەتىستىكتەردى جوعارى باعالاپ، مىنانى ءبىلدىردى: اراب ەلدەرى مەن جۇڭگونىڭ جالپى بەتتىك سەلبەستىگىن اناعۇرلىم تەرەڭدەتۋ _ اراب ەلدەرى مەن جۇڭگو حالقىنىڭ ورتاق تىلەگى، اناعۇرلىم ءادىل، ۇيلەسىمدى حالىقارالىق جاڭا ءتارتىپ ورناتۋدى ىلگەرىلەتۋگە ءتيىم. اراب ەلدەرى جاعى جۇڭگونىڭ دامۋ ناتيجەلەرىن جانە تاجىريبەلەرىن جوعارى باعالايدى، جۇڭگونىڭ قازىرگى جانە بولاشاق دۇنيەدە ساۋلەلەندىرگەن ماڭىزدى رولىنا باسا ءمان بەرەدى، ءبىر جۇڭگو پرينسيبىندە باتىل تۇرادى، جۇڭگونىڭ مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋىن قولدايدى، جۇڭگو جاقپەن بىرگە اراب ەلدەرى مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ دەڭگەيىن اناعۇرلىم جوعارىلاتىپ، جاڭا داۋىرگە بەت العان اراب ەلدەرى - جۇڭگو تاعدىرلاس ورتاق تۇلعاسىن كۇش سالا قۇرۋدى قالايدى.

　　باسشىلار جۇڭگونىڭ پالەستينا ماسەلەسىندە ۇستاعان ءادىل، ادىلەتتى مايدانىن ايرىقشا القاپ، مىنانى ءبىلدىردى: جۇڭگومەن تىعىز سەلبەسىپ، گازا وڭىرىندەگى شۇعىل جاعداي مەن ادامگەرشىلىك داعدارىسىن باسەڭدەتۋدى ىلگەرىلەتۋگە كۇش سالىپ، پالەستينا حالقىنىڭ دەربەس مەملەكەت قۇرۋىن جۇزەگە اسىرۋدى، پالەستينا ماسەلەسىنىڭ ەرتەرەك جاپپاي، ءادىل شەشىلۋىن ىلگەرىلەتۋدى قالايمىز.

　　ساي چي جوعارىداعى قيمىلدارعا قاتىناستى.

　　ۋاڭ ي اشىلۋ سالتىن باسقاردى.

　　كەلۋ قاينارى: حالىق تورابى

5 - ايدىڭ 30 - كۇنى تۇستەن بۇرىن مەملەكەت ءتوراعاسى شي جينپيڭ دياۋيۇيتاي مەملەكەتتىك قوناق ۇيىندە جۇڭگو - اراب ەلدەرى سەلبەستىك تالقى مىنبەرىنىڭ 10 - كەزەكتى مينيستر دارەجەلىلەر ءماجىلىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى. سۋرەتتە: شي جينپيڭ باحرەيننىڭ پاتشاسى حاماد، ەگيپەتتىڭ زۇڭتۇڭى سيسي، تۋنيستىڭ زۇڭتۇڭى سايد، اراب بىرىككەن امىرلىگىنىڭ زۇڭتۇڭى مۇحاممەد، اراب ەلدەرى وداعىنىڭ باس حاتشىسى گەيت، سونداي - اق اراب ەلدەرى ۋاكىلدەر ۇيىرمەسىنىڭ 22 باسشىسىمەن توپتىق سۋرەتكە تۇسۋدە. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved