چاڭ – ى 6 – ءنومىرلى بارلاۋ اسپابى ايدىڭ ارعى بەتىنە ءساتتى قوندى
ادامزاتتىڭ بارلاۋ اسپابىنىڭ ايدىڭ ارعى بەتىنەن ۇلگى الۋى مىندەتىن تۇڭعىش رەت باستادى
2024.06.03 15:25 كەلۋ قاينارى : حالىق تورابى
سۋرەتتە: چاڭ – ى 6 – ءنومىرلىنىڭ قونۋ اسپابى مەن ۇشۋ اسپابىنىڭ قۇراماسىنىڭ ايدىڭ ارعى بەتىنە قونۋىنا ەلىكتەپ جاسالعان قۋىرشاق كەسكىننەن تۇسىرىلگەن كورىنىس. بۇل كورىنىس 6 – ايدىڭ 2 – كۇنى بەيجيڭ عارىشقا ۇشۋدى مەڭگەرۋ ورتالىعىنداعى ەكراننان تۇسىرىلگەن. شينحۋا اگەنتتىگىنىڭ ءتىلشىسى جين ليۋاڭ فوتوسى
حالىق گازەتىنىڭ 6 – ايدىڭ 2 – كۇنى بەيجيڭنەن بەرگەن حابارى (يۇي سىنان، لي ي) ءتىلشىنىڭ مەملەكەتتىك عارىش مەكەمەسىنەن ۇعىسۋىنشا، 6 – ايدىڭ 2 – كۇن ساعات 6 دان 23 مينۋت وتكەندە، چاڭ – ى 6 – ءنومىرلىنىڭ قونۋ اسپابى مەن ۇشۋ اسپابىنىڭ قۇراماسى ساۋىسقان كوپىر 2 – ءنومىرلى ۇلاستىرعىش جاساندى سەرىكتىڭ قولداۋ كورسەتۋىندە، ايدىڭ ارعى بەتىنىڭ وڭتۇستىك ۇيەگىندەگى ايتكەن ويپاتىنداعى الدىن الا تاڭدالعان قونۋ ورنىنا ءساتتى قونىپ، ادامزاتتىڭ بارلاۋ اسپابىنىڭ ايدىڭ ارعى بەتىنەن ۇلگى الۋى مىندەتىن تۇڭعىش رەت باستاعان.
سول كۇنى ساعات 6 دان 9 مينۋت وتكەندە، قۇراما دەنە قوزعاۋشى كۇشتى تومدەندەتۋ مىندەتىن اتقارۋدى باستاعان. فورماسىن جەدەل تەجەۋ ارقىلى قۇراما دەنە ايدىڭ بەتىنە بىرتىندەپ جاقىندادى. وسىدان سوڭ، قۇراما دەنە جالپى جاقتان حاۋىپسىز ورىندى تاڭداپ، حاۋىپسىز ورىننىڭ جوعارعى جاعىنان 100 مەتر ورىندا قالىقتاپ تۇرىپ، لازەرلى ءۇش ولشەمدى جايمالاعىشپەن دالمە – ءدال سۋرەتكە تارتىپ، ايدىڭ بەتىندەگى كەدەرگىلەردى تەكسەرىپ، ەڭ سوڭىندا قوناتىن ورىندى تاڭداعان سوڭ، ۆەرتيكال تۇردە باياۋ تومەندەگەن. ايدىڭ بەتىنە تاياعاندا، موتوردى ءوشىرىپ، باسەڭدەتكىش جۇيەدەن پايدالانىپ، قۇراما دەنەنىڭ ايدىڭ ارعى بەتىنىڭ وڭتۇستىك ۇيەگىندەگى ايتكەن ويپاتىنا ورنىقتى قونۋىنا كەپىلدىك ەتكەن.
قۇراما دەنە ءساتتى قونعان سوڭ، قونۋ اسپابى ساۋىسقان كوپىرى 2 – ءنومىرلى ۇلاستىرعىش جاساندى سەرىك ارقىلى جەر بەتىندەگىلەردىڭ مەڭگەرۋىمەن كۇن ەنەرگياسىن جيناۋ قاناتى مەن باعداردى بەلگىلەۋ انتەنناسىن ىسكە قوسۋ قاتارلى جاعدايدى تەكسەرۋ جانە ورنالاستىرۋ قىزمەتىن ورىستەتكەن، وسىدان سوڭ، ايدىڭ ارعى بەتىنەن 2 كۇن جالعاستى ۇلگى الۋ قىزمەتىن رەسمي باستاعان، بۇرعىلاعىش اسپاپپەن بۇرعىلاۋ جانە مەحانيكالىق بىلەكپەن الۋ قاتارلى ەكى ءتۇرلى ءتاسىلدى قولدانىپ، ايدىڭ توپىراعىنان ۇلگى الۋ مەن ايدىڭ بەتىندەگى تاۋ جىنىسىنان ۇلگى الۋ مىندەتىن جەكە – جەكە اتقارادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
