جۇڭگو، قىرعىزستان، وزبەكستان ءۇش ەلدىڭ مەملەكەت باسشىلارى جۇڭگو - قىرعىزستان - وزبەكستان تەمىر جول نىسانىنداعى ءۇش ەل ۇكىمەت ارالىق كەلىسىمىنە قول قويىلعانىن بەينە ەكران ارقىلى قۇتتىقتادى
2024.06.07 16:06 كەلۋ قاينارى : حالىق تورابى
6 - ايدىڭ 6 - كۇنى جۇڭگو - قىرعىزستان - وزبەكستان تەمىر جول نىسانىنداعى ءۇش ەل ۇكىمەت ارالىق كەلىسىمىنە قول قويۋ سالتى بەيجيڭدە وتكىزىلدى، مەملەكەت ءتوراعاسى شي جينپيڭ كەلىسىمگە قول قويىلعانىن بەينە ەكران ارقىلى قۇتتىقتادى. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن
شينحۋا اگەنتتىگى، 6 – ايدىڭ 6 – كۇنى، بەيجيڭ. 6 - ايدىڭ 6 - كۇنى جۇڭگو - قىرعىزستان - وزبەكستان تەمىر جول نىسانىنداعى ءۇش ەل ۇكىمەت ارالىق كەلىسىمىنە قول قويۋ سالتى بەيجيڭدە وتكىزىلدى، مەملەكەت ءتوراعاسى شي جينپيڭ، قىرعىزستاننىڭ زۇڭتۇڭى جاپاروۆ، وزبەكستاننىڭ زۇڭتۇڭى ميرزيويەۆ كەلىسىمگە قول قويىلعانىن بەينە ەكران ارقىلى قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو - قىرعىزستان - وزبەكستان تەمىر جولى − جۇڭگونىڭ ورتا ازيامەن ۇلاسۋ، تۇتاسۋىنداعى ستراتەگيالىق نىسان، ءۇش ەلدىڭ ”ءبىر بەلدەۋ، ءبىر جول“ سەلبەستىگىن بىرگە قۇرۋىنداعى بوگەنايلىق ينجەنەريا. ءۇش ەل ۇكىمەت ارالىق كەلىسىمىنىڭ جاسالۋى جۇڭگو - قىرعىزستان - وزبەكستان تەمىر جول نىسانى قۇرىلىسىن بەرىك زاڭدىق نەگىزبەن قامدايدى، بۇل جۇڭگو - قىرعىزستان - وزبەكستان تەمىر جولىنىڭ جوسپاردان رەالدىققا اينالعاىنىڭ بەلگىسى، حالىقارالىق قوعامعا ءۇش ەلدىڭ قول ۇستاسا وتىرىپ سەلبەستىكتى جەبەۋ، بىرگە دامۋدى كوزدەۋ بەرىك بەكىمىن ايگىلەيدى. جۇڭگو قىرعىزستان، وزبەكستان ەكى ەلمەن بىرگە ۇزدىكسىز كۇش قوسىپ، نىسان قۇرىلىسىن باستاۋ ءۇشىن ءتۇرلى دايىندىق جاساپ، ءۇش ەلدى جانە ءۇش ەل حالىقتارىن يگىلىككە كەنەلتەتىن، ءوڭىردىڭ ەكونوميكالىق، قوعامدىق دامۋىنا دەم بەرەتىن ستراتەگيالىق جولدى ەرتەرەك سالۋدى قالايدى.
جاپاروۆ مىنالاردى ءبىلدىردى: جۇڭگو - قىرعىزستان - وزبەكستان تەمىر جولى ءۇش ەلدىڭ ”ءبىر بەلدەۋ، ءبىر جولدى“ بىرگە قۇرۋداعى باستاماشى ينجەنەرياسى، سالىنىپ بولعاننان كەيىن ازيادان ەۆروپاعا جانە پارىس شىعاناعىنا دەيىنگى ەلدەردىڭ جاڭا تاسىمال جەلىسىنە اينالادى، جەلى بويىنداعى ەلدەردىڭ، ءتىپتى، تۇتاس ءوڭىردىڭ ۇلاسۋ، تۇتاسۋىن جەبەۋدە، ەكونوميكا - ساۋدا بارىس - كەلىسىن كۇشەيتۋدە كەلەلى ماڭىز الادى. وسى تەمىر جولدىڭ ەرتەرەك سالىنىپ، ىسكە قوسىلىپ، ءوڭىردىڭ بىرگە دامۋىن ىلگەرىلەتۋگە، ءار ەل حالقىنىڭ ىرىس - قۇتىن ارتتىرۋعا جاڭا دەمەۋشى كۇش ازىرلەۋىن ءۇمىت ەتەمىن.
ميرزيويەۆ مىنانى ءبىلدىردى: بۇگىنگى قول قويۋ سالتى تاريحي مانگە يە، وڭىرلىك ۇلاستىرۋ - تۇتاستىرۋ قۇرىلىسىنداعى ناقتى قادام بولدى. جۇڭگو - قىرعىزستان - وزبەكستان تەمىر جولى جۇڭگونىڭ ورتا ازيا ەلدەرىمەن بايلانىس جاسايتىن ەڭ قىسقا قۇرلىق جولىنا اينالادى، سونداي - اق وڭتۇستىك ازيا، ورتا شىعىس ەلدەرى ءىرى بازارىن اشادى، وڭىردەگى ەلدەردىڭ جۇڭگومەن سەلبەستىگىن ونان ارى كەڭەيتىپ، مەملەكەتتەر ارا دوستىق قارىم - قاتىناستى تەرەڭدەتۋگە ءتيىمدى بولادى، ءار ەلدىڭ ۇزاق بولاشاقتىق مۇددەسىنە ۇيلەسەدى.
جۇڭگو - قىرعىزستان - وزبەكستان تەمىر جولى شينجياڭنىڭ قاشقارىنان باستالىپ، قىرعىزستان ارقىلى وزبەكستان شەكاراسىنا وتەدى، بولاشاقتا باتىس ازياعا، وڭتۇستىك ازياعا دەيىن سوزىلادى، سالىنىپ بولعاننان كەيىن ءۇش ەلدىڭ ۇلاستىرۋ - تۇتاستىرۋىن بارىنشا جەبەپ، وڭىرلىك ەكونوميكانىڭ، قوعامنىڭ اناعۇرلىم تەز دامۋىن جەبەيدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
