حان جىڭ برازيليا زۇڭتۇڭىنىڭ ورىنباسارى اركىميڭمەن كەڭەس وتكىزدى ءارى جۇڭگو - برازيليا جوعارى جىكتەگىلەرىنىڭ سايكەستىرۋ جانە سەلبەستىك كوميتەتىنىڭ 7 - رەتكى ءماجىلىسىن بىرگە باسقاردى
2024.06.07 16:11 كەلۋ قاينارى : حالىق تورابى
«حالىق گازەتى»، 6 - ايدىڭ 6 – كۇنى، بەيجيڭ (ءتىلشى لي شين - ي). مەملەكەت ءتوراعاسىنىڭ ورىنباسارى حان جىڭ 6 - ايدىڭ 6 - كۇنى بەيجيڭدە برازيليا زۇڭتۇڭىنىڭ ورىنباسارى اركىميڭمەن كەڭەس وتكىزدى ءارى جۇڭگو مەن برازيليانىڭ جوعارى جىكتەگىلەرىنىڭ سايكەستىرۋ جانە سەلبەستىك كوميتەتىنىڭ 7 - رەتكى ءماجىلىسىن بىرگە باسقاردى.
حان جىڭ مىنالاردى ءبىلدىردى: ءتوراعا شي جينپيڭ لۋلا زۇڭتۇڭمەن بىلتىر بەيجيڭدە تابىسى مول كەڭەس وتكىزىپ، جاڭا داۋىردەگى جۇڭگو – برازيليا قارىم - قاتىناسىنىڭ جاڭا بولاشاعىنا جەتەكشىلىك ەتۋ جانە ونى اشۋ جونىندە ماڭىزدى ورتاق تانىمعا كەلدى. بيىل − جۇڭگو مەن برازيليانىڭ ديپلوماتيالىق قارىم - قاتىناس ورناتقانىنىڭ 50 جىلدىعى، سونداي - اق جوعارى دارەجەلى كوميتەت مەحانيزمى قۇرىلعانىنىڭ 20 جىلدىعى. ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، جۇڭگو مەن برازيليا ءبىر - ءبىرىنىڭ وزەكتى مۇددەسىنە ساياتىن ماسەلەلەردە باستان - اياق ءبىرىن - ءبىرى باتىل قولداپ، سەلبەسىپ تەڭ يگىلىككە كەنەلۋدى قوزعاۋشى كۇش ەتۋدە تاباندى بولىپ، ساياسي ءوزارا سەنىمدىلىكتى ۇزدىكسىز تەرەڭدەتىپ، ستراتەگيالىق سەلبەستىكتى كۇشەيتىپ، ەكونوميكا - ساۋدا، فينانس، اۋىل شارۋاشىلىعى، عىلىم - تەحنيكا، عارىش سياقتى سالالارداعى سەلبەستىكتە ناقتى جەتىستىكتەرگە قول جەتكىزىپ، وڭتۇستىك - وڭتۇستىك سەلبەستىگىنىڭ ۇلگىسىن ورناتتى.
حان جىڭ مىنالاردى ءبىلدىردى: جۇڭگو مەن برازيليا − وركەندەپ كەلە جاتقان ءىرى ەلدەر جانە ماڭىزدى بريكس ەلدەرى، كەڭ كولەمدى ورتاق مۇددەگە يە. جۇڭگو جاق جۇڭگو - برازيليا قارىم - قاتىناسىنا باستان - اياق ستراتەگيالىق بيىكتىكتەن جانە ۇزاق بولاشاقتىق تۇرعىدان مامىلە جاساپ جانە ونى دامىتىپ، جۇڭگو - برازيليا قارىم - قاتىناسىن ديپلوماتيادا الدىڭعى ورىنعا قويادى. ءجۇز جىلدا بولماعان زور وزگەرىس الدىندا، ەكى جاق ستراتەگيالىق تىلدەسۋدى ونان ارى كۇشەيتىپ، ءوزارا پايدا جەتكىزەتىن دوستىق پەن ناقتى سەلبەستىكتى تەرەڭدەتىپ، جۇڭگو مەن برازيليانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ۇزدىكسىز ىشكەرىلەي دامۋىن ىلگەرىلەتىپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋى كەرەك.
اركىميڭ مىنالاردى ءبىلدىردى: برازيليا - جۇڭگو قارىم - قاتىناسى ەكى جاقتى كاتەگوريادان اسىپ ءتۇستى، ستراتەگيالىق مانگە جانە دۇنيە جۇزىلىك ىقپالعا يە. برازيليا جاق جۇڭگومەن قارىم - قاتىناستى دامىتۋعا ايرىقشا ءمان بەرەدى، ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن جانە جوعارى دارەجەلى كوميتەت مەحانيزمى قۇرىلعانىنىڭ 20 جىلدىعىن تىڭ باستاما ەتىپ، جۇڭگومەن قارىم - قاتىناستى، سايكەسۋدى اناعۇرلىم كۇشەيتىپ، ءار سالاداعى اۋىس - كۇيىستى، سەلبەستىكتى تەرەڭدەتىپ جانە كەڭەيتىپ، ەكى ەلدىڭ قارىم - قاتىناسىن تىڭ دەڭگەيگە كوتەرۋدى قالايدى. برازيليا جاق جۇڭگو جاقپەن بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى كوپ جاقتى تۇعىرلاردا تىعىز سايكەسىپ، سەلبەسىپ، كوپ جاقتىلىقتى قول ۇستاسا قورعاپ، دۇنيە ءجۇزىنىڭ باياندى دامۋى مەن دۇنيە جۇزىلىك باسقارۋ جۇيەسى رەفورماسىن بىرگە ىلگەرىلەتۋدى قالايدى.
حان جىڭ مەن اركىميڭ جۇڭگو مەن برازيليانىڭ قاتىستى تاراۋلارى جاۋاپتىلارىنىڭ ساۋدا، جاڭاشا ونەركاسىپتەنۋ، ساياسي قارىم - قاتىناس، ەگىن، مال شارۋاشىلىعى، قازىنا ساياساتى، نەگىزدىك قۇرىلعى سياقتى كەڭەستىك تاقىرىپتار جونىندەگى تالقىسىن جانە 11 بولىمشە كوميتەت پەن جۇڭگو - برازيليا كاسىپورىنشىلار كوميتەتىنىڭ قىزمەت مالىمەتىن تىڭداپ، ەكى ەلدىڭ ءار سالاداعى سەلبەستىگىندە قول جەتكەن بەلسەندى جەتىستىكتەردى، سونداي - اق كورسەتكەن ومىرشەڭدىك كۇشى مەن سەرپىمدىلىگىن جوعارى باعالادى.
ەكى جاق ەكى ەل مەملەكەت باسشىلارىنىڭ ماڭىزدى ورتاق تانىمىن بەلسەندى، جان - جاقتى تياناقتاندىرىپ، وسى رەتكى ءماجىلىستىڭ جەتىستىكتەرىن مۇقيات تياناقتاندىرىپ، جوعارى دارەجەلى كوميتەت مەحانيزمىنىڭ ءبىر تۇتاس جوسپارلاۋ، سايكەستىرۋ، جەتەكشىلىك ەتۋ رولىن ۇزدىكسىز ويداعىداي ساۋلەلەندىرىپ، ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋگە ماقۇل بولدى.
ەكى جاق ”ءبىر بەلدەۋ، ءبىر جول“ باستاماسىن اناعۇرلىم ناقتى، جوعارى ءونىمدى ارەكەتپەن برازيليانىڭ ”قايتالاي ونەركاسىپتەندىرۋ“، جاڭا ۇلگىدەگى ”ارتۋ قارقىنىن جەدەلدەتۋ جوسپارى“ سياقتى دامۋ ستراتەگيالىق جوبالارىمەن ۇشتاستىرۋدى ىلگەرىلەتىپ، جۇڭگو مەن برازيليانىڭ ءوزارا پايدا جەتكىزۋ، ءوزارا تيىمدىلىك جاساۋ سەلبەستىگىنىڭ جاڭا جاعدايىن قول ۇستاسا اشۋعا ماقۇل بولدى.
ەكى جاق ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىر - ءبىرىن باتىل قولداپ، ناعىز كوپ جاقتىلىقتى امالياتتا ايگىلەپ، بارابار، ءتارتىپتى دۇنيە ءجۇزىنىڭ كوپ ۇيەكتەنۋى مەن قامتىمدى ەكونوميكانىڭ جاھاندانۋىن دارىپتەپ، حالىقارالىق ادىلدىك پەن ادىلەتتىلىكتى بىرگە قورعاپ، دۇنيە ءجۇزىن باسقارۋدىڭ دۇرىس بەتالىسىنا جەتەكشىلىك ەتۋگە ماقۇل بولدى.
ماجىلىستەن كەيىن حان جىڭ مەن اركىميڭ ءماجىلىس ەستەلىگىنە قول قويدى ءارى ەكى جاقتى قارجى قوسۋ، اۋىل شارۋاشىلىق ونىمدەرىن تەكسەرۋ - كارەنتيندەۋ، ءوندىرىس قۋاتى سەلبەستىگى، قامسىزداندىرۋ كاسىبىن باقىلاۋ - باسقارۋ، باعالى قاعاز، كەسىكتى بۇيىمدى باقىلاۋ - باسقارۋ، ورتا، شاعىن، ۇساق كاسىپورىندار سياقتى سالالارداعى سەلبەستىك قۇجاتتارىنا قول قويۋعا، سونداي – اق ديپلوماتيالىق، ۇكىمەت ىستەرىندىك پاسپورتى بار ادامداردىڭ ۆيزاسىز كىرىپ – شىعۋىنا ءوزارا كەشىرىم جاساۋ كولەمىن جۇڭگو جاقتىڭ جاي پاسپورتى بار ادامدارىنا دەيىن كەڭەيتۋ قۇجاتىن الماستىرۋعا كۋا بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
