تاباندىلىق ونى تابىس تورىنەن كورسەتتى

(مەملەكەت بويىنشا 10 ەڭ ارداقتى اۋىل - قىستاق سەنىمدى امانات - قارىز قىزمەتكەرىنىڭ ءبىرى بولعان نومىربەك نۇركەي ۇلى جايلى)

مۇقامادي ءشارىپ ۇلى

2014.10.16 13:45   كەلۋ قاينارى : حالىق تورابى

　　سۋرەتتە: نومىربەك (سولدان ءۇشىنشى) سيلىق ساحناسىندا.

　　كوكتوعاي اۋدانىندا قاراپايىم قىزمەت ورنىندا تابانى كۇرەكتەي 33 جىل قىزمەت ىستەگەن سەنىمدى امانات - قارىز قىزمەتكەرى بار، 33 جىلدان بەرى، ونىڭ اۋىل - قىستاققا تاراتقان قارىز سوماسى 150 ميلليون يۋانعا جەتىپ، 13 ميلليون يۋان ءوسىم سوماسىن جيناپ، قارىز سوماسىنىڭ جينالۋ مولشەرىن %99كە جەتكىزدى، بۇقارا ءۇشىن جالىقپاي ەڭبەك ەتىپ، تاباندىلىعىنىڭ ارقاسىندا تابىسقا جەتكەن بۇل ازاماتىمىز كوكتوعاي اۋدانى اۋىل - قىستاق سەنىمدى امانات - قارىز بىرلەسپە كوپەراتيۆىنىڭ قىزمەتكەرى نومىربەك نۇركەي ۇلى ەدى.

　　نومىربەك نۇركەي ۇلى جاۋاپتى بولعان كۇرتى اۋىلى مەن قاراتۇڭكە قالاشىعى از ۇلت شوعىرلى قونىستانعان رايون بولىپ، قازاق، حۇيزۋ، ۇيعۇر، موڭعۇل قاتارلى كوپ ۇلتتان قۇرام تاپقان، از ۇلتتار جالپى جان سانىنىڭ %90ىن ۇستايدى، بۇقارامەن ەتەنە بايلانىستا بولۋ ءۇشىن، نومىربەك ءار ۇلت بۇقاراسىنىڭ تۇرمىس داعدىسىمەن تانىسىپ قالماستان، كوپ ۇلتتىڭ ءتىلىن دە ۇيرەندى. ول اۋدانداعى ءار ۇلت بۇقاراسىنىڭ اۋقاتتانۋ جولىنا ءتۇسۋى ءۇشىن قاجىماي - تالماي قىزمەت ەتتى.

　　قۋەرتىس قالاشىعىنداعى جەكە كاسىپكەر ياڭ چۇنلان بىلاي دەدى: 2000 - جىلى قۋەرتىس قالاشىعىنا كەلىپ ساۋدامەن شۇعىلدانعاندا قولىمدا بار 8 مىڭ يۋانمەن جۇمىس باستادىم، سول كەزدە نومىربەك جاعدايىمدى بىلگەننەن كەيىن 10 مىڭ يۋان قارىز اقشا بەردى، سودان بەرى جىل سايىن قارىز اقشا الىپ قايتارىپ كەلەمىن، قازىر ەكونوميكالىق كىرىسىم جامان ەمەس.

　　نۇكەڭ قاراپايىم قىزمەت ورنىندا جولىققان ءارقانداي جاپادان قورىقپاي، حالىق ءۇشىن قالىتقىسىز قىزمەت ىستەدى، ول شىلدەنىڭ شىجىعان ىستىعى مەن اقپاننىڭ قاقاعان ايازى بولسىن، قىستا اتقا ءمىنىپ، جازدا ءوزى جەكەلىك ساتىپ العان موتوسيكىلىمەن قاراستى رايونداعى وتباسىلارىن ارالاپ، بۇقارانىڭ قاجەتىنەن شىعۋعا كۇش سالدى.

　　كوپ جىلداردان بەرگى قالجىراۋمەن قىزمەت باسىمدىلىعى سالدارىنان جاسى 50گە جەتپەگەن ول جۇرەك، مي قان تامىرى اۋرۋى، قانداعى قانت قۇرامى جوعارى بولۋ ناۋقاسىنا شالدىقتى، قىزمەتتى بارىنەن دە جوعارى ورىنعا قوياتىن ول اۋرۋعا نەمقۇرايدى قاراعاندىقتان، اۋىرۋى اسقىنىپ، سوڭىندا وپەراتسيا جاساتۋعا ءماجبۇر بولدى. ول وپەراتسيادان كەيىن ەسىن جيا سالىسىمەن باستىعىنا تەلەفون شالىپ، ءوزى جاۋاپتى بولعان رايونداعى بۇقاراعا قارىز سوما تاراتۋ جۇمىسىنا ادام ورنالاستىرۋىن ءوتىندى. وپەراتسيادان ەندى عانا شىققان ونىڭ جاتسا - تۇرسا ويلايتىنى ەگىنشى - مالشىلارعا كوكتەم ءوندىرىسىن جۇرگىزۋگە قاجەتتى قارىز اقشا تاراتۋ جۇمىسى بولدى.

　　ول نەگىزگى ساتىداعى قالىڭ ەگىنشى - مالشىلاردىڭ قامى ءۇشىن وزىندە باردىڭ ءبارىن ارنادى، ءبىر جىلداعى 365 كۇننىڭ ىشىندە ونىڭ وتباسىنداعىلارمەن بىرگە بولاتىن كۇندەرى ساناۋلى عانا، ديقاندار ءوندىرىس جۇمىسىمەن قاربالاس بولعان كەزدە ول دا قاربالاس جۇمىس ىستەيدى، ال ديقانداردىڭ وندىرىستىك جۇمىسى سايابىرلاعاندا، ونىڭ جۇمىسى ءتىپتى قاربالاس بولادى، اكەسى نۇركەي بوجان ۇلى بولسا ۇزاق جىل اۋىل - قىستاقتا سەنىمدى امانات قارىز قىزمەتكەرى بولىپ حالىق ءۇشىن قالتقىسىز ۇلەس قوسقان، ەسەلى ەڭبەگىنىڭ ارقاسىندا اۆتونوميالى رايوم دارەجەلى سەنىمدى امانات - قارىز قىزمەتكەرى بولىپ سيلانعان، باسقالارعا كومەكتەسۋدى، حالىق ءۇشىن يگى ءىس ىستەۋدى ۇلى مۇراتىنا اينالدىرعان ىزگى نيەتتى جان ەدى. اكە ارمانىن ورىنداۋ ءۇشىن نۇكەڭ بارلىق زەيىن - زەردەسىن سەنىمدى امانات - قارىز قىزمەتىن قۇلشىنا ىستەۋگە ارنادى.

　　«مەن اۋىل - قىستاقتا تۋىلىپ، ەرجەتكەنمىن، سەنىمدى امانات - قارىز قىزمەتكەرى بولعاندىعىم ءۇشىن جاستىق كوكتەمىم مەن جۇرەك قانىمدى تۋعان جەرىم اۋىل - قىستاق ءۇشىن سارقا جۇمساۋىم كەرەك». مىنە، بۇل جاسى 50گە جەتپەسە دە شاشى اپپاق بولىپ اعارعان نومىربەكتىڭ جۇرەك ءسوزى، اۋىل - قىستاق سەنىمدى امانات - قارىز كوپەراتيۆىنىڭ «ديقاندار، اۋىل - قىستاق، اۋىل شارۋاشىلىعى» ءۇشىن قىزمەت وتەۋدە تاباندى بولۋىنىڭ ناقتىلى بەينەسى بولىپ تابىلادى.

　　اۋداندىق اۋىل - قىستاق سەنىمدى امانات - قارىز بىرلەسپە كوپەراتيۆىنىڭ مەڭگەرۋشىسى تان جۇنيۇن بىلاي دەدى: نومىربەكتىڭ اۋىل - قىستاقتا سەنىمدى امانات - قارىز قىزمەتىمەن شۇعىلدانعانىنا 33 جىلدان اسىپ، قىزمەت جاعىنان مول تاجىريبەگە يە بولدى، ونىڭ قىزمەتكە دەگەن ىنتالىلىعى مەن قاجىرلى قۇلشىنىسى ءبىزدىڭ ۇيرەنۋىمىزگە ابدەن تاتيدى.

　　30 نەشە جىلدىق جاپالى قىزمەت بارىسىندا نومىربەك قاراپايىم قىزمەت ورنىن بارىنشا قاستەرلەپ، ءۇن - ءتۇنسىز ۇلەس قوسىپ، اۋىل - قىستاق، ديقاندار ءۇشىن ءوزىنىڭ جاستىق كوكتەمىن ارنادى. «اشتى ەڭبەگىنىڭ ءتاتتى جەمىسىن كورگەن» نۇكەڭ ءوز ساپتاستارىنان وزا شاۋىپ، 2014 - جىلى مەملەكەت بويىنشا 10 ەڭ ارداقتى اۋىل - قىستاق سەنىمدى امانات - قارىز قىزمەتكەرىنىڭ ءبىرى بولىپ باعالانىپ، داڭق تورىنەن كورىنىپ، اۋدانداعى، تۇتاس ايماق، اۆتونوميالى رايونىمىزداعى اۋىل - قىستاق سەنىمدى امانات - قارىز قىزمەتكەرلەرىنە ۇلكەن ابىروي اپەردى.

　　ءيا، حابارىمىزدىڭ سوڭىندا بۇقارا ءۇشىن «جارعاق قۇلاعى جاستىققا تيمەي» قىزمەت ەتىپ كەلە جاتقان ازاماتىمىزعا ەلىڭ ءۇشىن ايانباي ەڭبەك ەتىپ، تابىس تالعارىنان كورىنە بەر دەگەن اق تىلەگىمىزدى ايتامىز!

　　كەلۋ قاينارى: حالىق تورابى